BAQ.kz - Қазақстан жаңалықтары USD 371.31 BAQ.kz - Қазақстан жаңалықтары EUR 419.32 BAQ.kz - Қазақстан жаңалықтары RUB 5.59
استانا:

قازاقستان قۇراماسىنا لەگيونەرلەر قاجەت پە؟

جاقىندا ۇلتتىق قۇرامانىڭ باس باپكەرى ستانيمير ستويلوۆ ۇلتتار ليگاسىنىڭ قازان ايىنداعى ەكى كەزدەسۋىنە قاتىساتىن قۇراما ويىنشىلارىنىڭ ٴتىزىمىن جاريالادى. اراسىندا قازاقستاننىڭ ٴتولقۇجاتىن الىپ، قۇرامادا ويناپ جۇرگەن 5 لەگيونەر-فۋتبولشى بار، دەپ حابارلايدى baq.kz ٴتىلشى.

ٴۇش قاقپاشىنىڭ ەكەۋى لەگيونەر

وسى ۋاقىتقا دەيىن 37 فۋتبولشى-لەگيونەر ٴبىزدىڭ قۇرامانى تاڭدادى. سوڭعىسى، ۋكراينالىق قاقپاشى – دميترو نەپوگودوۆ. ۇلتتار ليگاسى باستالعالى قۇراماعا شاقىرىلعان ٴۇش قاقپاشىنىڭ ەكەۋى وزگە ەلدە دۇنيەگە كەلگەن «كەلىمسەكتەر». نەلىكتەن ولاي ەكەنىن كوپشىلىك تۇسىنبەي الەك. ولاردىڭ اراسىندا جۋرناليستەر دە بار.

ستانيمير ستويلوۆ باس باپكەر بولعالى قۇرامانىڭ قاقپاسىن نەناد ەريچ قورعاپ ٴجۇر. ازىرگە بۇل ٴۇردىس وزگەرە قويماس. سەربيادا دۇنيەگە كەلگەن نەناد سوڭعى 7 جىلىن قازاقستاندا وتكىزگەنى جاسىرىن ەمەس. ال ەندى قوسالقى قۇرامنىڭ قاقپاشىسى رەتىندە ەلىمىزگە كەلگەنىنە تولىق 2 جىل بولماعان نەپوگودوۆقا تاڭداۋ نە سەبەپتى تۇسكەنى ستويلوۆتىڭ وزىنە عانا ايان.

بولگاريالىق باپكەردىڭ بۇل ساۋالعا جاۋابى دا دايىن. 6 قىركۇيەكتەگى ۇلتتار ليگاسىنىڭ العاشقى تۋرى اياسىندا قازاقستان مەن گرۋزيا قۇراماسى كەزدەسۋىنىڭ الدىندا بەرگەن جاۋابى مىنانداي بولعان:

– مەن ەشكىمگە قازاقستاننىڭ كوك ٴتولقۇجاتىن تاراتىپ بەرگەن جوقپىن. ول – قازاقستان ازاماتى. ماعان فۋتبولشىنىڭ ۇلتى كىم، قايدا تۋعانى ماڭىزدى ەمەس. ەگەر فۋتبولشىدا قازاقستاننىڭ قۇجاتى بولسا، قۇرامادا ويناۋعا سەبەپ بار دەگەن ٴسوز. ٴدال سولاي ەريچكە دە ازاماتتىقتى مەن بەرگەن جوقپىن. سوندىقتان بۇل تۋرالى مەنەن سۇراماڭىزدار، – دەيدى ول.

گرۋزيا مەن اندورراعا قارسى كەزدەسۋلەردە نەپوگودوۆ الاڭعا شىققان جوق. ەندى الداعى ەكى ويىنعا تاعى شاقىرىلىپ وتىر. ادەتتە باس باپكەر ٴۇشىنشى قاقپاشىنى جاستاردان تاڭدايتىن ەدى. سەبەبى، تاجىريبە جيناپ، بولاشاقتى سول نەگىزگى قاقپاشىنىڭ ورنىن باسادى عوي دەگەن نيەتپەن. ال ستويلوۆ بولسا، لەگيونەرگە ٴۇمىت ارتىپتى.

سوعان قاراعاندا قۇرالبەك وردابايەۆتىڭ ٴىزباسارلارى ەلىمىزدە جوقتىڭ قاسى بولعانى عوي.

جالپى، پرەمەر-ليگا كلۋبتارىندا نەگىزىنەن قاقپانى ٴوزىمىزدىڭ ازاماتتار كۇزەتەدى. «قايراتتا» ستاس پوكاتيلوۆ، «اقتوبەدە» راميل نۋرمۋحامەدوۆ پەن يگور تروفيمەس، «شاحتەردە» يگور ششاسكيي، «قايساردا» الەكساندر گريگورەنكو، «اتىراۋدا» ۆلاديمير لوگينوۆسكيي مەن اندرەي پاسەچەنكو، «جەتىسۋدا» المات بەكبايەۆ، «ەرتىستە» نيكيتا كالمىكوۆ، «قىزىل-جاردا» انتون سيرين بار.

شابۋىل شەبىندەگى السىزدىك

ۇلتتىق قۇراماداعى وزەكتى ماسەلە شابۋىلشىنىڭ جوقتىعى. قۇرامانىڭ گولدارىن نەگىزىنەن قورعاۋشىلار سوعىپ جۇرگەنى دە جاسىرىن ەمەس. ونى سوڭعى اندوررامەن ويىندا دا بايقادىق. باس باپكەر ستانيمير ستويلوۆ تا اندوررامەن كەزدەسۋدەن كەيىن وسىنى ايتتى.

«وكىنىشكە قاراي، بۇگىن ٴبىز كۇتكەن ناتيجە بولمادى. توقسان مينۋت بويى گول سوعۋ ٴۇشىن وينادىق. شابۋىل شەبىندە ماسەلە كوپ. ەكى ويىندا ٴبىر گول سوقتىق. ويىن سوڭىندا قاتەلىك جىبەرىپ، قاقپاعا گول وتكىزىپ الدىق. ەڭ نەگىزگى ماسەلە - شابۋىلدى تۇيىندەي الماۋ»، - دەيدى ستويلوۆ kazfootball.kz سايتىن بەرگەن سۇحباتىندا.

ەندى ٴقازىر مامانداردىڭ پىكىرى ەكىگە جارىلىپ ٴجۇر. ٴبىرى كەزىندە «قايرات» ساپىندا دوپ تەپكەن بومباردير جەرار گوۋعا ازاماتتىق بەرۋ قاجەتتىگىن ايتسا، ەندى ٴبىرى ەركەبۇلان سەيداحمەت سەكىلدى جاستاردىڭ ويناي بەرگەنى دۇرىس دەپ سانايدى.

جەرار گوۋ «قايرات» ساپىندا 2014 جىلدىڭ ماۋسىم ايىنان 2017 جىلدىڭ قاراشاسىنا دەيىن ونەر كورسەتتى. قازاقستان پرەمەر-ليگاسىندا 102 ويىن وتكىزىپ، 80 گول سوققان. ودان بولەك، ەۋروپا ليگاسىنداعى 11 دوبى تاعى بار. جالپى، قازاقستاندا ٴجۇرىپ، 99 دوپتىڭ اۆتورى اتانعان. شابۋىلشى قازاقستان پرەمەر-ليگاسىنىڭ ٴۇش رەت ۇزدىك سۇرمەرگەنى بولدى. ٴقازىر ول قىتايدىڭ ٴبىرىنشى ليگاسىنداعى «beijing bg» كومانداسىندا وينايدى.

ٴبىراق گوۋ تۋرالى ستويلوۆتىڭ پىكىرى باسقاشا. vesti.kz سايتىنا بەرگەن سۇحباتىندا ول بىلاي ايتقان:

«ماعان قۇراماعا وينايتىن كانديداتتاردىڭ ٴتىزىمىن ۇسىنۋدىڭ قاجەتى جوق. مەن قازاقستاندا ەشكىمگە ٴتولقۇجات تاراتۋمەن اينالىسپايمىن. گوۋ سەكىلدىلەر ٴوز ەلدەرىندە ويناي بەرسىن. ٴقازىر ٴوزىم شاقىرىپ جۇرگەن ويىنشىلارمەن سوڭىنا دەيىن كۇرەسۋگە دايىنمىن»، - دەيدى ول.

قازاقستاندىق فۋتبول مامانى اندرەي فەرەپونتوۆ يۆۋارلىق شابۋىلشى ٴارى كەتسە، ٴبىر ىرىكتەۋ سيكلىنە كومەكتەسەدى، ودان ارىگە شاماسى جوق دەپ وتىر. سوندىقتان بولاشاعىمىزدى ويلاۋىمىز كەرەك دەپ سانايدى. بۇل تۋرالى ول sports.kz سايتىنا بەرگەن سۇحباتىندا ايتتى.

«قۇرامانىڭ شابۋىل شەبىندە پروبلەمانىڭ بار ەكەنى تۇسىنىكتى. ول تۋرالى ستويلوۆتىڭ ٴوزى دە بىرنەشە رەت پىكىر ٴبىلدىردى. ٴبىز جانكۇيەر ٴارى مامان رەتىندە شابۋىلشىلاردىڭ گول سوعۋ كورسەتكىشى تومەن ەكەنىن بايقاپ ٴجۇرمىز. جالپى، شابۋىلشى دەگەن – ساناۋلى تاۋار سەكىلدى، گول سوعاتىن مەرگەن ويىنشىنى تابۋ وڭاي ەمەس. ٴقازىر قازاقستاندا بۇل شەتپە انىق كوشباسشى جوق. جاستاردان ەركەبۇلان سەيداحمەتكە ٴۇمىت ارتامىز. ونىڭ قالاي قالىپتاسىپ، وسەتىنىن ۋاقىت كورسەتەر. ال جەرار گوۋعا كەلسەك، شىنىمدى ايتسام قولدامايمىن. سەبەبى، جاسى دا كەلىپ قالدى. جەرار بىزگە ٴبىر ىرىكتەۋ سيكلىندە كومەكتەسەر. ودان كەيىن نە بولادى؟ سونى ويلاۋىمىز قاجەت. مەنىڭشە، قازاقستاندىق ويىنشىلارعا سەنىم ارتۋىمىز كەرەك. ۋاقىتشا جاساندى ناتيجە الىسقا اپارمايدى»، - دەيدى فەرەپونتوۆ.

استانا قالالىق فۋتبول فەدەراسياسىنىڭ «sportffa» سايتىنا بەرگەن سۇحباتىندا ارداگەر فۋتبولشى يۋسيپ ششاديەۆ گوۋدىڭ كومەگىنە جۇگىگەنىمىز دۇرىس دەگەن پىكىر ٴبىلدىرىپتى.

«ەلىمىزدە نوسەربايەۆتان باسقا ەشكىمدى ايتا المايمىن. ول ناعىز كوشباسشى ويىنشى. قازىرگى كەزدەگى شابۋىلشىلاردى بۇرىنعىلارمەن سالىستىرىپ جاتادى. ستۋكاشوۆ، پەحلەۆانيديلەر كومانداعا كەلگەندە 20-21 جاستا بولاتىن. سوعان قاراماستان ولار فۋتبولدىڭ قىر-سىرىن مەڭگەرىپ، شەبەرلىكتەرى شىڭدالىپ دايىن كەلەتىن. كەيىننەن ميروشنيچەنكو، تىلەشەۆ، ليتۆينەنكو شىقتى. مۇرات تىلەشەۆ سۋپەرجۇلدىز بولادى دەپ ويلادىم. ٴبىراق ول جىگىت ەتتى جاقسى كوردى (ارتىق سالماعىنا قاتىستى ايتقانى). دەگەنمەن، جىلىنا كەمى 15-17 گول سوعىپ ٴجۇرۋشى ەدى. ال ٴقازىر ونداي شابۋىلشىلار جوق. سول سەبەپتى، گوۋدى ناتۋراليزاسيا جاساعان دۇرىس-اۋ. ول ٴبىزدىڭ قۇراماعا كومەكتەسە الادى»، - دەيدى ششاديەۆ.

جەرار گوۋدىڭ اگەنتى رەسەيلىك سەرگەي نوۆيكوۆتىڭ وتاندىق اقپارات قۇرالدارىنا بەرگەن سۇحباتىنان اڭعارعانىمىز فۋتبولشىنىڭ ٴوزى قازاقستان قۇراماسىندا ويناۋعا قارسى ەمەس. گوۋ – قازاقستاندى ەكىنشى وتانى سانايدى دەگەن پىكىر ايتىلۋدا. ٴوزى دە ٴبىر سۇحباتىندا: «فەدەراسيا ۇسىنىس جاساسا دايىنمىن» دەگەن.

وسىدان 10-15 شاقتى جىل بۇرىن ەل چەمپيوناتىنىڭ مەرگەندەر كوشىندە نۇربول جۇماسقاليەۆ، مۇرات تىلەشەۆ، نۇركەن مازبايەۆ، الىبەك بولەشەۆ، اندرەي ميروشنيچەنكو، ولەگ ليتۆينەنكو، ۆيكتور زۋبارەۆ سەكىلدى وتاندىق فۋتبولشىلار جۇرەتىن. ال ٴقازىر جاعداي – مۇلدەم باسقاشا. 2009 جىلعى مۇرات تىلەشەۆتەن كەيىن سوڭعى 9 جىلدا پرەمەر-ليگادا ەشكىم سۇرمەرگەن اتانىپ كورمەدى. بارلىعى – سىرتتان كەلگەن ويىنشىلار. قازىرگى كەزدە ٴبىر ماۋسىمدا 15-20 گول سوعاتىن قازاقستاندىق فۋتبولشى جوقتىڭ-قاسى.

يساەل – «قازاقستاندىق ينەستا» بولا الا ما؟

جەرار گوۋدان بولەك، برازيليالىق فۋتبولشى يساەل بار. ونىڭ نەگىزى مىندەتى – شابۋىلدى ۇيلەستىرۋ، رەتى كەلسە ٴوزى دە گول سوعادى. دريبلينگ جاساۋدان پرەمەر-ليگاداعى ۇزدىكتەردىڭ ٴبىرى. بىرنەشە جىلدان بەرى «قايرات» ساپىندا ٴجۇر.

يساەلدىڭ قازاقستان ازاماتتىعىن الۋى ٴجيى ايتىلۋدا. فۋتبولشىنىڭ ٴوزى بىرنەشە رەت سۇحباتىندا قازاقستانعا ويناۋعا دايىن ەكەنىن ايتىپتى. جەرار گوۋ مەن يساەل قازاقستانعا رەسەيدىڭ «كراسنودار» كومانداسىنان كەلگەن. ەكەۋىنىڭ دە اگەنتى – سەرگەي نوۆيكوۆ. رەسەيلىك مەنەدجەر يساەل قازاقستان ازاماتتىعىن السا «قايرات» ساپىندا كەلەسى ماۋسىمدا قالاتىنىن بولماسا قىتاي چەمپيوناتىنا اۋىساتىن جەتكىزدى. ويتكەنى، جەرار گوۋ ونەر كورسەتىپ جۇرگەن كوماندا يساەلدى وزدەرىنە شاقىرۋعا ٴازىر ەكەن.

اندرەي فەرەپونتوۆ sports.kz سايتىنا بەرگەن سۇحباتىندا جەرار گوۋدىڭ قۇرامادا ويناعانىنا قارسى بولعانىمەن، يساەلدىڭ كەرەك ەكەنىن ايتقان.

«يساەل، ارينە، – جوعارى دەڭگەيلى لەگيونەر. ورتالىق الاڭدا ونداي ويىنشىلار بىزدە وتە از. سوندىقتان يساەل قازاقستان قۇراماسىنا كومەگى تيەدى دەپ ويلايمىن»، – دەيدى قازاقستاندىق مامان.

جەرار گوۋ سەكىلدى يساەلدە 30 جاستان اسىپ بارادى. ونىڭ ۇستىنە برازيليالىق فۋتبولشىنىڭ ويىن ٴستيلى كوپ ەنەرگيانى قاجەت ەتەدى. 60-70 مينۋتتاردا شارشايتىنىن بايقاپ ٴجۇرمىز. ەگەر ماتچتى تولىق وتكىزسە، كەزدەسۋ سوڭىنا قاراي قورعانىسقا قايتا قويمايدى. ونىڭ بارلىعى جاسىنىڭ ٴبىرازعا كەلىپ قالعانىنا دا بايلانىستى بولۋ كەرەك.

دەگەنمەن، فەرەپونتوۆ سەكىلدى «ەكىباستۇز» كلۋبىنىڭ باس باپكەرى اسقار قوجابەرگەنوۆ تە يساەلگە سەنەدى.

«الەكساندر سيمچەۆيچ، روحەر كانياس، يساەلگە قازاقستان ازاماتتىعىن بەرىپ، قۇراماعا شاقىرۋ كەرەك دەپ ٴجيى ايتىلىپ ٴجۇر. وسىلاردىڭ اراسىنان قۇراماعا پايداسى تيەدى دەپ يساەلدى عانا ايتار ەم. مەنىڭشە، بۇل فۋتبولشى ٴالى دە ۇلتتىق بىرىنشىلىگىمىزدە جوعارى دەڭگەيدە ويناي الادى. وزگە لەگيونەرلەردەن قاجەت دەپ ەشكىمدى ايتا الماس ەدىم. بىرەۋدى ناتۋراليزاسيا جاسايتىن بولساق، جاسىنا ٴمان بەرۋىمىز كەرەك. بولاشاقتى ويلاماي بولمايدى.قازاقستان قۇراماسىنىڭ ويىنىن كۇشەيتۋ ٴۇشىن گەرمانيادان ىزدەۋىمىز كەرەك. ول جاققا كەزىندە قازاقستاننان كوشكەندەر كوپ. سولاردىڭ اراسىنان تالانتتاردى شاقىرۋىمىزعا بولادى»، – دەيدى اسقار قوجابەرگەنوۆ.

قازاقستاننان كەتكەن نەمىستەردى شاقىرۋ دۇرىس پا؟

كەزىندە قازاقستاندا تۋىپ، اتا-انالارىمەن بىرگە گەرمانياعا كوشىپ كەتكەن نەمىس فۋتبولشىلارى جەتەرلىك. ولاردىڭ الدى قازاقستان قۇراماسىندا ويناپ تا ۇلگەردى. مىسالى، ۇلتتىق قۇرامانى بەرند شتورك جاتتىقتىرعان تۇستا قۇراما جەيدەسىن سەرگەي كاريموۆ پەن گەنريح شميدتگال كيدى. ودان كەيىن ميروسلاۆ بەرانەك كونستانتين ەنگەلگە، يۋريي كراسنوجان الەكساندر مەركەلگە مۇمكىندىك بەردى. وسىلاردىڭ اراسىنان شميدتگالدىڭ پايداسى كوبىرەك ٴتيدى. ٴتىپتى، گەرمانيا قۇراماسىنا گول دا سوقتى.

ال ەندى تانىمالدىق تۇرعىسىنان العاندا مەركەلدىڭ ٴجونى بولەك. ەۋروپانىڭ بەدەلدى كلۋبتارىندا ويناعان. يتاليانىڭ «ميلانىندا» رونالدينيۋ، زلاتان يبراگيموۆيچتەرمەن بىرگە دوپ تەپتى. ٴبىراق مەركەل قازاقستان قۇراماسى ساپىندا تەك يسلاندياعا قارسى ٴبىر تايم وتكىزۋمەن شەكتەلدى. ودان كەيىن شاقىرىلعان جوق.

26 جاستاعى جارتىلاي قورعاۋشى بيىلعى ماۋسىمدا گوللانديانىڭ «حەراكلەس» كلۋبىندا ونەر كورسەتىپ ٴجۇر.

ۇلتتىق قۇرامانىڭ باس باپكەرى ستانيمير ستويلوۆتىڭ ايتۋىنشا، مەركەلدە ەكى ەلدىڭ ٴتولقۇجاتى بار كورىنەدى. گوللانديا چەمپيوتىندا ول گەرمانيالىق فۋتبولشى رەتىندە تىركەلگەن، سوندىقتان قازاقستان قۇراماسىنا شاقىرا المايمىز دەپ وتىر دەگەن بولاتىن.

بىلتىر بۇل جايلى سول كەزدەگى باس باپكەر الەكساندر بوروديۋك تە ايتقان. ٴبىراق مەركەلدىڭ ٴوزى ونى جوققا شىعاردى.

«بوروديۋكتىڭ نەگە ولاي ايتقانىن تۇسىنبەدىم. بۇل شىنىققا جاناسپايدى. مەندە قازاقستاننىڭ ٴتولقۇجاتى بار. ەگەر بولماسا، وندا مەن قالاي يسلانديامەن ويىندا الاڭعا شىقتىم. بۇل رەسمي ويىن، ول جەردە بارلىعىن قاتاڭ تەكسەرەدى»، – دەيدى vesti.kz سايتىنا بەرگەن سۇحباتىندا.

p.s. ناتۋراليسازيا جاساۋ – الەمدىك فۋتبولدا بار ٴۇردىس. يسپانيا قۇراماسىندا ديەگو كوستا، پورتۋگالياداعى پەپە، يتالياداعى جورجينونىڭ وسىنىڭ مىسالى رەتىندە ايتۋعا بولادى. ٴبىراق قۇراماعا شاقىرىلاتىن لەگيونەر فۋتبولشى سول ەلدىڭ ويىنشىلارىنان دەڭگەيى جوعارى بولۋ كەرەك. مۇنى ستويلوۆ جاقسى تۇسىنەدى دەپ سەنەمىز.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي