BAQ.kz - Қазақстан жаңалықтары USD 372.49 BAQ.kz - Қазақстан жаңалықтары EUR 424.15 BAQ.kz - Қазақстан жаңалықтары RUB 5.54
استانا:

«قايرات» قاشان چەمپيون بولادى؟

فوتو: Today.kz

وتكەن دەمالىس كۇندەرى فۋتبولدان قازاقستان پرەمەر-ليگاسىنىڭ 29-تۋرى اياقتالدى. ەل بىرىنشىلىگىنىڭ اياقتالۋىنا نەبارى ٴتورت تۋر قالدى. («استانا» مەن «قايرات» كلۋبىنىڭ ٴالى قوسىمشا ٴبىر ويىنى بار). باس جۇلدەدەن ۇمىتكەر «استانا» مەن «قايراتتىڭ» اراسىن ٴقازىر 10 ۇپاي ٴبولىپ تۇر، دەپ حابارلايدى baq.kz ٴتىلشىسى.

جىلدا قايتالاناتىن قاتەلىك

«استانا» مەن «قايرات» كوماندالارىنىڭ تەكەتىرەسى جالعاسىپ كەلە جاتقانىنا بيىل بەسىنشى ماۋسىم. ٴبىراق الماتىنىڭ كومانداسى بەس جىل بويى ەلوردا كومانداسىنىڭ الدىن وراي الماي ٴجۇر. نەلىكتەن؟

ەڭ العاش تەكەتىرەس 2014 جىلى باستالدى. بۇل جىلى «حالىقتىڭ كومانداسى» اتانعان «قايراتتىڭ» قۇرىلعانىنا 60 جىل تولعان. وسى مەرەيتويدىڭ قارساڭىندا فۋتبولشىلار جانكۇيەرلەرىنە سىي جاسايدى دەپ كۇتىلگەن. ٴتىپتى، پرەمەر-ليگانىڭ 28-تۋرىنا دەيىن «قايرات» كوش باستاپ تۇرعان.

ٴبىراق ٴبارى 22 قازاندا باستالدى. ٴدال وسى كۇنى ەلوردا تورىندە ەكى كلۋب 23-تۋردىڭ كەيىنگە شەگەرىلگەن ويىنى ٴۇشىن كەزدەستى. ماتچ «استانا» كلۋبىنىڭ جەڭىسىمەن اياقتالدى. ەسەپ – 5:1.

ويىننان كەيىن «قايرات» كلۋبى سامات سماقوۆ، زاۋربەك پليەۆ، دميتريي حوميچ، الەكساندر كيسليسىن، ميحايل باقايەۆ سەكىلدى فۋتبولشىلارىن جاتتىعۋ جيىندارىنان قۋىلدى. مۇنىڭ سەبەبىن كلۋب باسشىلىعى سول كەزدە اتالعان ويىنشىلار سپورتتىق ٴپرينسيپتى بۇزدى دەپ ايىپتادى.

بۇدان كەيىن «استانا» تىزگىندى تارتپاي، العاش رەت ەل چەمپيونى اتاندى. «قايرات» ٴتىپتى، «اقتوبەدەن» جەڭىلىپ، ٴۇشىنشى ورىندى قاناعات تۇتتى.

الماتى كومانداسىنىڭ وسى جىلداردىڭ ىشىندەگى چەمپيوندىققا ەڭ جاقىن بولعان كەزى 2015 جىل ەدى. تاعى دا 28-تۋرعا دەيىن «قايرات» كوشباسىندا بولدى. ەكى كوماندانىڭ اراسىن 7 ۇپاي ٴبولىپ تۇرعان. كەلەسى تۋردا كۇتپەگەن جەردەن «قايرات» ٴوز الاڭىندا «اتىراۋمەن» تەڭ ٴتۇستى. سوسىن اسا ماڭىزدى ويىندا «استاناعا» ەسە جىبەردى. ٴسويتىپ، ەكى كوماندانىڭ اراسىن 1 ۇپاي شەشىپ كەتتى.

جىل سوڭىندا باس باپكەر ۆلاديمير ۆايسس قىزمەتىنەن كەتتى. ٴبىراق ونىڭ ورنىنا كەلگەن باپكەرلەردىڭ ەشقايسىسى ٴالى كۇنگە «قايراتقا» چەمپيوندىق اپەرە الماي ٴجۇر.

«قايرات» ىشكى چەمپيوناتتا عانا ەمەس، ەۋروكۋبوك تا جەتىستىرىپ ويناپ جۇرگەن جوق. بىلتىر ەۋروپا ليگاسىنىڭ ەكىنشى ىرىكتەۋ كەزەڭىندە البانيانىڭ «سكەندەربەۋ» كلۋبىنان جەڭىلىپ، جارىستان شىعىپ قالۋى كلۋبتىڭ قوجايىنى بورانبايەۆتىڭ دا اشۋىنا تيگەن بولاتىن. سودان كەيىن «قايرات» كلۋبى باقىلاۋشىلار كەڭەسىنىڭ ٴتوراعاسى ٴباسپاسوز ارقىلى دامۋدىڭ باسقاشا جولىن تاڭدايتىنىن ايتقان بولاتىن.

«سوڭعى بىرنەشە جىلدا فۋتبولشىلاردىڭ كلۋبقا دەگەن قارىم-قاتىناسى ياعني ناتيجەسى «تەك ٴبىر قاقپاعا وينايتىن فۋتبول» سەكىلدى بولىپ كەتتى. ال كلۋب 4 جىلدىڭ ىشىندە بارلىق ينفراقۇرىلىمدى جاقسارتتى. فۋبولشىلاردىڭ شەبەرلىگىن ارتتىرۋعا مۇمكىندىكتەردىڭ بارلىعى قاراستىرىلعان. ٴبىراق ناتيجە سول بۇرىنعىشا. ەشقانداي وزگەرىس جوق. مۇنىڭ ٴبارى ٴبىر كۇنى اياقتالاتىنى بەلگىلى. فۋتبول كلۋبتارىندا ۇلكەن وزگەرىستەر نەگىزىنەن ماۋسىمارالىق ٴۇزىلىس كەزىندە جۇزەگە اسادى. الايدا ٴبىزدىڭ كلۋبتىڭ قازىرگى ناتيجەسى كلۋب باسشىلارىنىڭ ول ويىن وزگەرتتى. سوندىقتان وزگەرىستى ٴدال قازىردەن باستاۋدى ٴجون كوردىك.«جالعان فۋتبوللشىلارعا» اقشا قۇيۋدان شارشادىق. بۇكىل ينفراقۇرىلىمدى ەشقانداي موتيۆاسياسى، العا قويعان ماقساتى جوق فۋتبولشىلار ٴۇشىن سالعان جوقپىز. الداعى ۋاقىتتا قازاقستان ٴۇشىن، قالا ٴۇشىن جانە كلۋب ٴۇشىن وينايتىن فۋتبولشىلاردى الامىز»، – دەگەن ەدى ق.بورانبايەۆ.

نەگە بارىنە باپكەر كىنالى؟

«قايراتتى» 2013-2015 جىل ارالىعىندا سلوۆاكيالىق باپكەر ۆلاديمير ۆايسس جاتتىقتىردى. بۇل ماماننىڭ كەزىندە الماتى كومانداسىنىڭ ويىنى كوپشىلىكتىڭ كوڭىلىنەن شىعاتىن. ەۋروپا ليگاسىنىڭ توپتىق كەزەڭىنە شىعۋعا ٴبىر قادام قالعاندا جەڭىلىپ قالعانى بولماسا، ۆايستىڭ كەزىندەگى «قايراتتى» قازىرگى «قايراتپەن» سالىستىرۋعا كەلمەس. ويتكەنى، ول كەزدەگى «قايراتتىڭ» ويىنى «بارسەلونانىڭ» قازاقستاندىق نۇسقاسىن ەسكە تۇسىرەتىن. جانكۇيەرلەر ٴالى كۇنگە كلۋب باسشىلىعىنا ۆلادمير ۆايستى قايتارۋدى سۇراپ جاتادى.

ودان كەيىن الەكساندر بوروديۋك، كاحابەر سحادادزە جاتتىقتىردى. ٴقازىر كلۋبتىڭ تىزگىنى يسپانيالىق كارلوس الوس فەرەردىڭ قولىندا.

فەررەر «قايراتقا» كەلمەس بۇرىن 17 جاسقا دەيىنگى قازاقستان جاسوسپىرىمدەر قۇراماسىن جاتتىقتىرعان. ال ونىڭ الدىندا قازاقستان فۋتبول فەدەراسياسىنىڭ «وڭتۇستىك» اكادەمياسىندا باس جاتتىقتىرۋشى بولعان. ٴبىزدىڭ ەلدە 2015 جىلدان بەرى ەڭبەك ەتىپ ٴجۇر. وعان دەيىن يسپانيادا، ٴتىپتى «بارسەلونا» سپورت مەكتەبىندە، پولشادا، گونكونگتا جۇمىس ىستەگەن. نەگىزىنەن، ورىمدەي جاس فۋتبولشىلارمەن جۇمىس ىستەپ جۇرگەن مامان. ەشقاشان ەرەسەكتەر كومانداسىن جاتتىقتىرماعان، ياعني ۇلكەن فۋتبولدا تاجىريبەسى جوق.

«قايرات» وتكەن سەنبى كۇنى پرەمەر-ليگانىڭ 29-تۋرىندا شىمكەنتتە «ورداباسىدان» جەڭىلىپ، «استانامەن» ۇپاي ايىرماشىلىعىن ۇلعايتىپ الدى. سوڭىنا دەيىن كۇرەسەمىز دەپ جۇرگەن يسپانيالىق باپكەردە ٴقازىر چەمپيوندىقتان كۇدەرىن ۇزە باستاعان ٴتارىزدى.

«ٴبىرىنشى كەزەكتە مىنانى ايتا كەتەيىن، ٴبىز قاجەت ەمەس ويىندا ۇتىلىپ وتىرمىز. «ورداباسىنىڭ» وسىعان دەيىن پروبلەماسى جەتكىلىكتى بولاتىن. سونىڭ وزىندە قارسىلاسقا ەسە جىبەردىك. «قايرات» چەمپيون بولعىسى كەلسە، مۇنداي ويىندا مۇلدەم ۇپاي جوعالتۋعا بولمايدى. ٴبىز بۇگىن چەمپيوندىققا تالاستا بارلىق مۇمكىندىگىمىزدەن ايىرىلدىق»، – دەدى كارلوس الوس كلۋبتىڭ رەسمي سايتىنا ويىننان كەيىنگى ٴباسپاسوز ماجىلىسىندە بەرگەن سۇحباتىندا.

ٴبىر قىزىعى، «قايرات» جانكۇيەرلەرى چەمپيوندىققا تالاستا ەسە جىبەرگەن سايىن بار كىنانى باس باپكەردەن ىزدەيدى. «قايراتقا» سىيماي كەتكەن ۆلاديمير ۆايسس قازىرگى كەزدە گرۋزيا قۇراماسىمەن ٴساتتى جۇمىس ىستەپ ٴجۇر. ودان كەيىنگى كەلگەن گرۋزيالىق مامان كاحابەر سحادادزە بيىل «ورداباسىمەن» شىمكەنتتە «قايراتتى» ەكى رەت ۇتتى. تەك ٴالسىزى رەسەيلىك الەكساندر بوروديۋك بولعان شىعار.

«مەن باپكەرلەردىڭ جۇمىسىن ٴسوز قىلعاندى ۇناتپايمىن. ٴبىراق كوپشىلىك ايتىپ جۇرگەندەي كاحابەردىڭ «قايراتتا» قولىنان ەشتەڭە كەلگەن جوق دەگەنگە كەلىسپەيمىن. ول كەلگەندە «استانا» بىزدەن 12 ۇپايعا وزىپ تۇرعان. ٴبىز ماۋسىمدى ەكىنشى ورىنمەن اياقتادىق. چەمپيوننان بار-جوعى 2 ۇپايعا قالىپ قويدىق. البەتتە، كوماندانىڭ ٴساتسىز ونەرىنەن كەيىن باس باپكەردى كىنالاۋ باسىم بولادى. بۇل جەردە ويىنشىلاردىڭ كىناسى بار. سحادادزە جالعىز بولعان جوق، دۇرىس پا؟ قاسىندا كومەكشىلەرى، اسسيستەنتى، فۋتبولشىلار ٴجۇردى. سوندىقتان بۇل ٴبىزدىڭ ورتاق كىنامىز. سحادادزە – ٴتاپ ٴتاۋىر مامان. بولاشاقتا جاقسى باپكەر رەتىندە كورسەتەتىنە سەنەمىن»، – دەگەن «قايراتتىڭ» ەكس-فۋتبولشىسى جاركو ماركوۆيچ بىلتىر kazfootball.kz سايتىنا بەرگەن سۇحباتىندا.

شىنىمەن دە، كوماندانىڭ ٴساتسىز ونەر كورسەتۋىنىڭ بارىنە باس باپكەردى كىنالاي بەرۋگە بولماس. الاڭعا شىعاتىن نەگىزىنەن فۋتبولشىلار ەكەنىن ۇمىتپاعان ٴجون بولار.

ترانسفەردەگى ساتسىزدىك

«قايرات» ەلوردا كومانداسىمەن سالىستىرعاندا «جىلتىراق» فۋتبولشىلارعا كوپ قىزىعادى. ياعني ماركەتينگ تۇرعىسىنان ٴتيىمدى مە؟ جوق پا؟ سوعان كوپ ٴمان بەرەتىن ٴتارىزدى. الماتى كلۋبىندا تالاي جۇلدىزدار دوپ تەۋىپ ۇلگەردى. چەمپيوندار ليگاسىنىڭ جەڭىمپازى اناتوليي تيموششۋك، قازىرگى كەزدە رەسەيدىڭ ەكس-كاپيتانى اندرەي ارشاۆين ٴجۇر. وسى ارالىقتا جارناماسى جەر جاراتىن، ٴبىراق ويناپ جارىتپاعان فۋتبولشىلاردىڭ تالايى كەلىپ كەتتى. مىسالى، ٴيزرايلدىڭ مەسسيى» اتانعان گاي اسسۋلين الماتىدا بار-جوعى 45 كۇن عانا تۇراقتادى. ال «استانا» كوبىنەسە، شاۋ تارتىپ قالعان ارداگەر جۇلدىزدى ويىنشىلارعا ەمەس، وزدەرىنە قاجەتتى فۋتبولشىلاردى الىپ جاتادى.

«قايرات» ٴقازىر قاقپاشىعا دا قارىق بولىپ جۇرگەن جوق. ۇلتتىق قۇرامادا ٴار كەزدەرى ونەر كورسەتكەن ٴۇش قاقپاشىنى قاتارعا قوسىپ العان. ولار: ستاس پوكاتيلوۆ، ۆلاديمير پلوتنيكوۆ، داۆيد لوريا. سوڭعىسىن جاقىندا العان. ٴالى الاڭعا شىعىپ ۇلگەرگەن جوق. چەمپيوناتتا نەگىزىنەن قاقپانى پوكاتيلوۆ كۇزەتىپ ٴجۇر. الايدا ونىڭ بيىلعى ويىنى جانكۇيەرلەردىڭ دە، مامانداردىڭ دا كوڭىلىنەن شىقپايدى. «قايراتتىڭ» ٴجيى ۇپاي جوعالتۋىنا قاقپاشىنىڭ دا كىناسى بار.

«قايرات» قورعاۋشىعا دا جارىماي ٴجۇر. ەلدوس احمەتوۆ جاراقات الىپ، ٴبىراز ۋاقىت لازەرەتتە جاتتى. ونىڭ ورنىنا جازدا قاتارعا قوسىلعان بەلارۋس فۋتبولشىسى سەرگەي پوليتەۆيچتىڭ اسىپ بارا جاتقان ەشتەڭەسى بايقالمايدى.

«قايراتتىڭ» «استانادان» ارتىقشىلىعى

«قايرات» باستى قارسىلاسىنان سپورتتىق ناتيجەلەرى بويىنشا ارتتا قالعانىمەن، باسقا جاعىنان وزىق تۇر. مىسالى، ەلىمىزدىڭ بىردە-بىر كلۋبىندا «قايراتتىڭ» سپورتتىق بازاسىنداي ينفراقۇرىلىم جوق.

«قايراتتىڭ» جاتتىعۋ بازاسىندا تابيعي كوگالدان جاسالعان ٴۇش فۋتبول الاڭى جانە جاساندى كوگالدان جاسالعان ەكى فۋتبول الاڭى بار. ولاردىڭ ٴبىرى جابىق تۇردە جاسالعان. سونىمەن قاتار، مۇندا اۋماعى 9،5 مىڭ شارشى مەتر بولاتىن اكىمشىلىك عيمارات سالىنعان. جاتتىعۋ كەشەنى 12 گەكتار جەردى الىپ جاتىر. ەكى الاڭ جىلىتۋ جۇيەسىمەن قامتاماسىز ەتىلگەن. ال جاساندى الاڭ بامبۋك وسىمدىگىنەن جاسالعان.

«ٴبىز قۇرىلىستىڭ اياقتالىپ، بازانىڭ قولدانىسقا بەرىلگەنىن ماقتان ەتەمىز. بۇدان ٴتورت جىل بۇرىن مۇنداي «بازا سالامىز» دەگەن يدەياعا ەشكىم سەنبەپ ەدى. مىنەكي، بۇگىن ٴبىز فۋتبول ارداگەرلەرىنە بەرگەن ۋادەمىزدى ورىندادىق. ٴبىز وسى نىسانمەن كلۋبتىڭ ينفراقۇرىلىمدارىن قۇرۋ كەزەڭىن تولىق اياقتادىق. ەندى بىزدە بۇل بازامەن قاتار، بالالارعا ارنالعان ٴۇش فۋتبول اكادەمياسى جانە جاسوسپىرىمدەرگە ارنالعان ٴبىر مەكتەپ-ينتەرنات جۇمىس ىستەيدى» – دەگەن بولاتىن «قايرات» فۋتبول كلۋبىنىڭ قاداعالاۋشى كەڭەسىنىڭ ٴتوراعاسى قايرات بورانبايەۆ «قازاقپاراتقا» بەرگەن سۇحباتىندا.

سوسىن «قايرات» جاس فۋتبولشىلاردى تاربيەلەۋگە دە قاتتى ٴمان بەرەدى. قازىرگى كەزدە «قايراتتىڭ» كەزىندەگى اڭىز فۋتبولشىلارى تيمۋر سەگىزبايەۆ، سەرگەي كۆوچكين، ەۆستافي پەحلەۆانيدي اتىنداعى ٴۇش بىردەي اكادەميا بار. وندا ەلىمىزدىڭ تالاي جاس تالانتتارى تاربيەلەنۋدە. اراسىندا ۇزدىكتەرى نەگىزگى قۇرامدا ويناپ ٴجۇر.

باس باپكەر كارلوس الوس «استانا» كلۋبىنداعى ارىپتەسىمەن سالىستىرعاندا جەرگىلىكتى جاس فۋتبولشىلارعا كوپ مۇمكىندىك بەرەدى. مىسالى، «قايرات» ساپىندا ماگومەد پاراگۋلگوۆ، الەكساندر سوكولەنكو، ٴنۇرالى ٴالىپ، ۆياچەسلاۆ شۆىرەۆ، يان ۆوروگوۆسكيي سەكىلدى جاس فۋتبولشىلار ٴجيى الاڭعا شىعىپ ٴجۇر.

«مەنىڭ الماتىدا جۇرگەنىمە ٴبىر جىلدان استى. ٴبىز بۇل باعىتتا جاقسى جۇمىس ىستەپ جاتىرمىز. مەن كەلگەلى نەگىزگى قۇرامدا ماگومەد پاراگۋلگوۆ، الەكساندر سوكولەنكو، ٴنۇرالى، ۆياچەسلاۆ شۆىرەۆ سياقتى جاستارعا دەبيۋتتارىن وتكىزۋگە مۇمكىندىك بەردىك. شۆىرەۆ العاشقى ويىنى ٴۇشىن الاڭعا شىققاندا بار-جوعى 17 جاستا بولاتىن. ٴالىپ تە ٴبىز ٴۇشىن ماڭىزدى ويىنشى. بۇل جاس فۋتبولشىلار بىلتىر ٴدال وسىلاي جىلدام ٴبىرىنشى كوماندا ساپىندا وينايمىز دەپ ويلاماعان بولار.قازىرگى كەزدە ولار قازاقستان قۇراماسىنا شاقىرىلىپ ٴجۇر. بۇل ولارعا بەرىلگەن جوعارى باعا»، – دەيدى كارلوس الوس prosports.kz سايتىنا بەرگەن سۇحباتىندا.

وسىمەن، فۋتبولدان قازاقستاننىڭ 27-ماۋسىمى اياقتالۋعا جاقىن. بۇعان دەيىن ەكى كوماندا بەس رەتتەن چەمپيون اتانعان. بيىل بۇل قاتارعا «استانا» قوسىلۋى مۇمكىن. «ەرتىسپەن» پەن «اقتوبەنىڭ» جەتىستىگىن قايتالاۋ ٴۇشىن ەلوردا فۋتبولشىلارىنا ەندى قالعان 5 ماتچتىڭ ەكەۋىن ۇتسا جەتكىلىكتى.

«استانانىڭ» الداعى ويىندارىنىڭ كەستەسى:

20 قازان: «استانا» – «ورداباسى»;

27 قازان: «توبىل» –«استانا»;

31 قازان: «شاحتەر» – «استانا»;

3 قاراشا: «استانا» –«قايرات»;

11 قاراشا: «استانا» – «ەرتىس».

«قايراتتىڭ» قالعان ويىندارىنىڭ كەستەسىنىڭ مىنانداي:

20 قازان: «قايرات» – «توبىل»;

27 قازان: «قايرات» –«ەرتىس»;

31 قازان: «قىزىل-جار» – «قايرات»;

3 قاراشا: «استانا» –«قايرات»;

11 قاراشا: «قايرات» – «شاحتەر».


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي