BAQ.kz - Қазақстан жаңалықтары USD 370.55 BAQ.kz - Қазақстан жаңалықтары EUR 421.76 BAQ.kz - Қазақстан жаңалықтары RUB 5.57
استانا:

كورەيگە قاراعاندا قازاق ەكەنىمدى ۇقتىم (دەنيس تەننىڭ baq.kz بەرگەن سوڭعى سۇحباتى) ەكسكليۋزيۆ

فوتو: Нұржас Жақсыбай

2014 جىلعى سوچي وليمپياداسىنىڭ قولا جۇلدەگەرى دەنيس تەن پحەنچحان ويىندارىنان كەيىن مۇزايدىنعا ورالدى. بۇل جولى ول استانا تۇرعىندارى مەن قالا قوناقتارىن «دەنيس جانە ونىڭ دوستارى» مۇزايدىنداعى شوۋى ارقىلى قۋانتقالى وتىر. وسى ورايدا سپورتشى baq.kz تىلشىسىنە شوۋ جوباسى تۋرالى، قازىرگى دەنساۋلىعىنىڭ جاعدايى مەن الداعى جوسپارلارى، العان جاراقاتى، سونداي-اق، قازاقستانداعى مانەرلەپ سىرعاناۋ سپورتىنىڭ پوتەنسيالى تۋرالى اڭگىمەلەپ بەردى. (baq.kz ٴتىلشىسى بۇل سۇحباتتى «دەنيس جانە ونىڭ دوستارى» مۇزايدىنداعى شوۋىنىڭ الدىندا العان بولاتىن).

9 ماۋسىمدا استانادا وتەتىن مۇزداعى شوۋدىڭ بۇرىنعىلاردان قانداي ەرەكشەلىگى بار؟

— 2013 جىلى الماتى مەن استانادا مۇزايدىنداعى شوۋ ٴوتتى. جىل سايىن ايتۋلى وقيعانىڭ اۋقىمى كەڭەيىپ، ساپالى بولا ٴتۇستى. العاشقى شوۋلاردا كورەرمەنگە وتە جوعارى دەڭگەيدەگى قويىلىمدى دايىنداپ، مانەرلەپ سىرعاناۋداعى الەمدىك جۇلدىزداردى شاقىردىق. 2013 جىلى قازاقستاندىق ەسترادا جۇلدىزدارى قاتىسسا، 2014 جىلى ەڭ جۇلدىزدى قۇرام قاتىستى. وكىنىشكە قاراي، 2014 جىلى استانادا شوۋ وتپەدى، دەگەنمەن الماتىداعى ەكى شوۋ ٴبىرىڭعاي كونسەپت بويىنشا ادەمى دەكوراسيا، ەسترادا-سيمفونيالىق وركەستردىڭ سۇيەمەلدەۋىمەن جاندى مۋزىكامەن ٴوتتى. وسىدان كەيىن مەن ازداعان ٴۇزىلىس الىپ، سپورت كارەراما كوڭىل ٴبولدىم. بيىل قازاقستانعا جاڭا جوبامەن كەلدىم. قىزۋ جۇمىس ٴجۇرىپ جاتىر. وسىعان دەيىن جۇزەگە اسىرعىم كەلەتىن سان ٴتۇرلى يدەيا مازا بەرمەگەن ەدى. بۇل كونسەپت كورەرمەندەرگە ۇنايدى دەپ ۇمىتتەنەمىن. بۇل شوۋدا باسقا جوبالاردا كەزدەسپەيتىن يننوۆاسيالىق شەشىمدەر بار. كاناداداعى، ازياداعى مۇزايدىنداعى شوۋلارعا قاتىسقان سوڭ ٴبىزدىڭ جوبانىڭ وزگەشە ەكەنىن بىلەمىن. ال شوۋعا قاتىسقان شەتەلدىك دوستارىم ٴوز ەلدەرىنە تىڭ يدەيالاردى الىپ كەتەدى دەپ ويلايمىن. كورەرمەندەرگە ايتارىم، ماعان سەنىڭىزدەر، بيىل مۇلدەم وزگەشە شوۋعا كۋا بولاسىزدار.

بيىل شوۋعا كوپتەگەن الەمدىك جۇلدىزدى شاقىردىڭىز. 10 ەلدەن 16 سپورتشى كەلەيىن دەپ وتىر. ولارمەن قالاي كەلىستىڭىز؟ قولى بوس سپورتشىلاردى ىزدەدىڭىز بە؟ جالپى وسى پروسەسس قالاي ٴجۇردى؟

— «دەنيس جانە ونىڭ دوستارى» شوۋى باسقا جوبالاردان نەسىمەن ەرەكشەلەنەدى؟ بۇل شوۋعا كەلەتىن ٴار مانەرلەپ سىرعاناۋشى سپورتتا جۇرگەن ناعىز جۇلدىزدار. مانەرلەپ سىرعاناۋدان حابارى جوقتارعا «قازاقستانعا ليونەل مەسسي، رافاەل نادال كەلگەن سياقتى، مانەرلەپ سىرعاناۋدىڭ جۇلدىزدارى كەلەدى» دەيمىن. ال ولاردى قازاقستانعا شاقىرۋ وڭاي شارۋا ەمەس، ٴبىرشاما كۇش-جىگەردى تالاپ ەتەدى. وسى سپورت تۇرىمەن بىرنەشە جىل شۇعىلدانىپ كەلە جاتقان سوڭ بارىمەن جاقسى ارالاسامىن. سول سەبەپتى شوۋ «دەنيس جانە ونىڭ دوستارى» دەپ اتالادى. نەگىزگى ماسەلە ول سپورتشىنىڭ گرافيگىنە بايلانىستى. وليمپيادا اياقتالعان سوڭ ٴقازىر كانادا، امەريكادا وليمپيادا تۋرى ٴوتىپ جاتىر. مامىر مەن ماۋسىمدا جاپونيادا بولادى. باسقا جوبالارمەن قاتارلاسپاس ٴۇشىن 9 ماۋسىمدى بەلگىلەدىك. بىزگە الەنا ساۆچەنكو، برۋنو ماسسو، كارولينا كوستنەر سەكىلدى مانەرلەپ سىرعاناۋداعى الەمدىك جۇلدىزدار كەلەدى. سونىمەن قاتار جاڭادان تانىلىپ جاتقان سپورتشىلاردى دا شاقىردىق. «بۇرىن قاتىسقاندار قايتا كەلە مە؟» دەپ سۇرايتىندار كوپ. جوق، ولاي ەمەس. بۇل شوۋدا قازاقستاندىقتاردى جاڭا سپورتشىلارمەن، ال سپورتشىلاردى ٴبىزدىڭ ەلىمىزبەن تانىستىرعىم كەلەدى. سەبەبى ولاردىڭ كوپشىلىگى قازاقستانعا العاش رەت كەلەيىن دەپ وتىر.

«ينستاگرامدا» ٴسىزدىڭ جاپون جانكۇيەرلەرىڭىز شوۋعا قىزىعىپ، كوزدەرىمەن كورگىسى كەلىپ وتىرعانىن جازادى. ٴبىراق ٴبارى بىردەي شوۋعا كەلە المايتىن بولعاندىقتان شوۋ بىتكەن سوڭ dvd شىعارۋ، بولماسا شوۋدى ترانسلياسيالاۋ جوسپاردا بار ما؟

— ٴبىر كورسەتىلىم ٴۇشىن قازاقستانعا تۋريستەر كەلەدى، بۇل تاڭعالارلىق نارسە. 2014 جىلى شوۋعا 500-دەي جاپون ازاماتى كەلدى. ولار ٴۇشىن تۋريستىك اگەنتتىك ارنايى تۋر ۇيىمداستىرعان. مۇنى بىلگەن كەزدە مەن ٴۇشىن ۇلكەن توسىنسىي بولدى. بيىل دا ەلىمىزگە وتە كوپ جانكۇيەر كەلەيىن دەپ وتىر. جاپوندار عانا ەمەس، قىتايدان دا تۋريستەر كەلەدى. ٴبىز ولارعا ۆيزا الۋ ماسەلەسىن شەشۋدە كومەكتەسەمىز. كورشى ەلدەردەن دە سپورت جانكۇيەرلەرى كەلەدى. شوۋعا رەسەيدەن فانكلۋب كەلدى دەگەندى ەستىگەندە تاڭعالعان ەدىم. بۇل مەن ٴۇشىن جاڭالىق بولدى.

قانشاما جارىسقا قاتىسىپ جۇرگەن سوڭ ناعىز جانكۇيەرلەرىڭدى بىردەن تانيسىڭ. ٴبىر شارا ٴۇشىن قازاقستانعا تۋريستەردىڭ كەلۋىن ٴوزىم ەرەكشە سانايمىن. ادەتتە ٴبىز اۋقىمدى شارانى كورۋ ٴۇشىن شەتەلگە اسىعامىز، ال ولار قازاقستاندىق جوبانى كورۋ ٴۇشىن ٴبىزدىڭ ەلىمىزگە كەلمەك. ەلىمىزدە تۋريستەردى تارتاتىن ەكى عانا شوۋ-باعدارلاما بار شىعار: ٴبىرى ٴبىزدىڭ مۇزايدىنداعى شوۋىمىز بولسا، ەكىنشىسى ديماش قۇدايبەرگەننىڭ كونسەرتى.

ٴتۇسىرىلىم مىندەتتى تۇردە بولادى. جىلدا شوۋدى تۇسىرەمىز. 2015 جىلى العاش رەت ترانسلياسيا جاسادىق. 2014 جىلى جاپونيالىق fuji.tv كومپانياسى تەلەۆيزيالىق قۇقىقتى ساتىپ العىسى كەلدى. جاپونيادا مىقتى مۇزايدىنداعى شوۋلارى كوپ بولسا دا تەرريتورياسىندا قازاقستاندىق جوبانى كورسەتكىسى كەلگەنى مەن ٴۇشىن تاريحي وقيعا. العاشىندا ەلىمىزدە تۇسىرىلەتىن ۆيدەوونىمنىڭ ساپاسىنا قاناعاتتانبادىم، سەبەبى بىزدە لايىقتى دەڭگەيدە ساپالى ٴونىم شىعارۋ ٴۇشىن رەسۋرستار بولمادى. ال ەلىمىز ٴۇشىن ماڭىزدى جوبانى الەمگە كورسەتكەندە ول بارلىق پارامەتر بويىنشا ەرەكشە بولۋى ٴتيىس.

تىكەلەي بولماسا دا ترانسلياسيا بولادى. مۇزايدىنداعى شوۋ كەزىندە باسقا دا ۆيدەكورسەتىلىمدەر ەكراننان كورسەتىلەدى. جاڭا كونسەپسيادا مۇز ۇستىندەگى قويىلىممەن قاتار ەكراننان ۆيدەو كورسەتىلەدى. سول سەبەپتى تىكەلەي ەفيرگە شىعارۋ قيىنداۋ بولادى. جانكۇيەرلەر ٴۇشىن مىندەتتى تۇردە شوۋدىڭ ۆيدەوجازباسىن دايىندايمىز. ونى قالاي تاراتاتىنىمىزدى شەشكەن جوقپىز. مۇمكىن youtube-كە ورنالاستىرامىز، dvd شىعارارمىز. مەن ٴۇشىن ەڭ باستىسى شەتەلدىكتەر عانا ەمەس، ەڭ الدىمەن شوۋدى قازاقستاننىڭ كەز كەلگەن ازاماتى كورسە دەيمىن. سەبەبى استانا، الماتى سەكىلدى ۇلكەن قالالارعا ٴبارى بىردەي كەلە المايدى.

سۋرەت: نۇرجاس جاقسىباي

instagram-عا جاقىندا عانا ٴانشى ديماش قۇدايبەرگەنمەن بىرگە تۇسكەن فوتونى جاريالادىڭىز. جانكۇيەرلەرىڭىز ديماشتى شوۋدا ونەر كورسەتە مە دەپ سۇراپ جاتىر.

— ٴقازىر ديماشتىڭ گرافيگى وتە قاربالاس، كوپ ۋاقىتىن قىتايدا وتكىزەدى. الەمدىك تۋرى بار. دەسە دە ارامىزداعى دوستىقتى ماقتان تۇتامىن. بيىل ديماشتىڭ مۋزىكاسىنا ونەر كورسەتتىم. كورسەتىلىمىمە ارناپ اۋەن جازۋى مەن ٴۇشىن ۇلكەن قۇرمەت. ٴقازىر مانەرلەپ سىرعاناۋ بويىنشا باعدارلاما ازىرلەپ جاتىرمىز. وندا ديماشتىڭ اسەرى قالاي بولارىن بىلمەيمىن، ٴبىر انىعى مۋزىكاسىنا بيلەيمىن. سونداي-اق قىزىقتى بي مەن مۋزىكانى، شوۋعا قاتىسا المايتىن سپورتشىلاردىڭ بارلىعىن ٴبىر كونسەپتكە كىرىستىرىپ جاتىرمىز. بۇل جوبادا ٴارتۇرلى فورماتتى قولدانىپ ٴارتۇرلى تۇلعانىڭ باسىن بىرىكتىرەمىز.

ٴسىزدىڭ قازىرگى دەنساۋلىعىڭىز سپورتقا، ياعني مانەرلەپ سىرعاناۋمەن اينالىسۋعا جاراي ما؟

— مامىر باسىندا عانا مۇزعا ورالدىم. وعان دەيىن كونكي تەبە المادىم، سەبەبى ماعان سىرعاناۋعا تىيىم سالىندى. وليمپيادادان كەيىن اياعىمدا قاتتى رەسيديۆ بولعانىن مويىندايمىن. ماعان ٴۇزىلىس الۋ كەرەك بولدى. توبىعىمدى جاراقاتتاپ الدىم. ونى قالپىنا كەلتىرۋ ٴۇشىن كەمىندە ەكى جىل كەتەتىن شىعار. سول سەبەپتى ٴقازىر سالماق تۇسىرگىم كەلمەيدى، تولىقتاي ەمدەلسەم دەيمىن. مۇزايدىنداعى شوۋدا ونەر كورسەتۋگە دايىنمىن. كورەرمەندەرگە ناعىز شوۋدى كورسەتكەنشە اسىقپىن. ەندى-ەندى سىرعاناپ جۇرگەن سوڭ تورتتىك ەلەمەنتتەر تۋرالى ايتا المايمىن. جاتتىعۋلار، ەم-دوم اياعىما قالاي اسەر ەتەتىنىن ۋاقىت كورسەتەدى. ٴقازىر ٴوزىمدى الدەقايدا جاقسى سەزىنەمىن.

بىلتىر وليمپياداعا قاتىسامىن دەپ اياعىڭىزعا وپەراسيا جاسامادىڭىز. قاشان جاساتپاقشىسىز، الدە وسىلاي جۇرە بەرەسىز بە؟

— وپەراسيانىڭ دا قاۋىپ-قاتەرى بار. دەنەڭنىڭ كەز كەلگەن بولىگىنە حيرۋرگيالىق ارالاسۋ بولعان جاعدايدا وپەراسياعا ورگانيزمىڭ قالاي جاۋاپ بەرەتىنىن ەشقاشان بىلمەيسىڭ. دەنەڭدە بۇرىن بولعان سەزۋ قابىلەتىن جوعالتىپ الۋىڭ مۇمكىن. وسىنداي نيۋانستارى كوپ بولعان سوڭ تاۋەكەلگە بارا المايمىن. سول سەبەپتى بيىل ونەر كورسەتەمىن دەپ شەشتىم. مەن ٴۇشىن بۇل كەزەڭ وتە اۋىر بولدى. جاتتىعۋعا دا، جارىسقا دا تولىق كۇشىڭدى ارناي الماعانىڭ وتە قيىن. سوندا دا بارلىق ٴۇمىت اقتالا قويماسا دا، بۇل وزگەشە تاجىريبە بولدى. قولىمنان نە كەلەدى سونى جاساۋعا تىرىستىم. مەنىڭ قازىرگى مىندەتىم تولىعىمەن ەمدەلىپ شىعۋ بولىپ وتىر. ينتەنسيۆتى وڭالتۋ پراكتيكاسىنان ٴوتتىم، فيزيوتەراپەۆتپەن ٴجيى جۇمىس ىستەدىم، 3-4 رەت ٴدارى ەكتى. ٴسىڭىردىڭ قالپىنا كەلۋى ۇزاق ۋاقىتقا سوزىلادى. سۇيەگىمدى سىندىرسام سىڭىرگە قاراعاندا ەمدەۋ الدەقايدا جەڭىل جانە تەز جازىلاتىن ەدى. ٴسىڭىردى جاراقاتتاپ العان سوڭ ٴتىپتى ول ەمدەلگەن كۇننىڭ وزىندە بۇرىنعىداي شىمىر بولمايدى. دەگەنمەن بۇل دا تاجىريبە. سپورت سالاۋاتتى ٴومىر سالتى دەسە دە، ول ٴاردايىم دەنساۋلىق ەمەس، كەز كەلگەن كاسىپقوي سپورتشى جاراقاتتانادى.

مانەرلەپ سىرعاناۋشى ٴۇشىن وڭ اياق وتە ماڭىزدى. سەبەبى سەكىرۋ ەلەمەنتتەرىن ورىنداعاندا مۇزعا وڭ اياقپەن قونادى. مەنىڭ بىلۋىمشە، ٴسىزدىڭ وڭ اياعىڭىز جاراقاتتاندى. اياعىڭىز قانشالىقتى جارامدى؟ كەلەسى ماۋسىمعا قاتىساسىز با؟

— ٴقازىر بىرنارسە دەۋدىڭ ٴوزى قيىن. ٴوزىمدى الدەقايدا جاقسى سەزىنەمىن. ٴتىپتى ۇشۋ قاجەت بولعاندا ۇشاققا وتىرۋعا بولمايتىن كەزدەر بولدى. قىسىممەن وڭ اياعىم ٴىسىپ كەتەتىن بولدى. بۇل مۇز ۇستىندە عانا كەدەرگى كەلتىرگەن جوق، سونىمەن بىرگە كۇندەلىكتى ومىردە دە ٴجاي عانا كوشەگە شىعىپ قىدىرا المادىم، جۇگىرۋدى جاقسى كورەتىن ەدىم وعان دا تىيىم سالدى. استاناعا كەلگەلى «قانداي ادەمى جاعالاۋ، تاڭەرتەڭ شىعىپ ٴجۇرىپ قايتۋعا، جۇگىرۋگە بولادى عوي» دەپ ٴجۇرمىن. دەسە دە، ٴقازىر ازداپ جۇگىرۋگە بولادى، ال وسىعان دەيىن مۇنى ويلاۋعا دا بولمايتىن. وسىنداي جاعىمسىز ساتتەر كەزدەسەدى. اجەپتاۋىر ۋاقىت ٴوتتى. شوۋدان كەيىن تاعى ٴبىر رەت تەكسەرەمىز. ٴقازىر الاڭداۋعا بولمايدى، ٴارتۇرلى اقپاراتپەن باسىما سالماق تۇسىرگىم كەلمەيدى. الدا ٴبارى جاقسى بولادى دەپ ويلايمىن.

«دەنيس جانە ونىڭ دوستارى» شوۋىنان باسقا تاعى قانداي جوبالاردى قولعا الدىڭىز؟

— جوبا دەۋگە كەلمەسە دە، جۇزەگە اسىرعىم كەلەتىن، ٴوزىم قاتىسقىم كەلەتىن قانداي دا ٴبىر يدەيالاردىڭ كورىنىسى بار. بالالارعا ٴوز قالتامنان شىعارىپ ماستەر-كلاسستار وتكىزدىم. ولارعا تولىقتاي تەگىن بولدى. قازاقستاننىڭ تۇكپىر-تۇكپىرىنەن ٴوزىن جاقسى كورسەتكەن بالالاردى تاڭداپ الىپ الماتىدا سەمينار وتكىزدىك. الەكسەي ياگۋدين كەلدى، ٴارتۇرلى بي ساباعى بولدى. سانجار ماديەۆ اكتەرلىك شەبەرلىكتىڭ قىر-سىرلارىن ۇيرەتتى. سەبەبى ساحناعا شىعۋ، تولقىنىسىڭدى جەڭە ٴبىلۋ مانەرلەپ سىرعاناۋمەن تىعىز بايلانىستى. دوسىم it-مامان ارمان سۇلەيمەنوۆ بولسا ٴبىلىمنىڭ، سپورتپەن قاتار مەكتەپكە بارۋدىڭ قانشالىقتى ماڭىزدىلىعى تۋراسىندا ايتتى.

بيىل گرافيكالىق ديزاين سالاسىندا دا جۇمىس ىستەۋ قىزىقتى بولدى. «ينستاگرامنان» كوردىڭىز بە، جوق پا، يلليۋستراتور دوسىم ەكەۋمىز بىرگە @mini.denis دەگەن انيماسيالانعان جوبا باستادىق. جوبا بويىنشا انيماسيالىق كەيىپكەر شىنايى ومىردە جۇرەدى، ساياحات جاسايدى، ٴوز ويىمەن بولىسەدى، ٴتىپتى ۇيقىلى-وياۋ سەلفي جاسايدى.

فوتوعا تۇسىرگەندى، مۋزىكانى ۇناتامىن. كەشە عانا ديماش قۇدايبەرگەنمەن جولىقتىم. ديماشپەن بىرلەسە عاجاپ تۋىندىلار جاسايتىن ەرلان بەكچۋريننىڭ ستۋدياسىندا بولدىم. مۇزايدىنداعى شوۋدا اۆتورلىق كونتەنتىم بولادى. باعدارلامامنىڭ اۆتورلىق كونسەپسياسىن جاساپ جاتىرمىن. مەنىڭ اندەرىم دە بولادى. ەرلان ماعان ارانجيروۆكاسىن جاساۋعا كومەكتەسەدى. كەشە دەمو-ترەكتى كورسەتتىم، قىزىقتى ونەر تۋىندىسى شىعادى دەپ ويلايمىن. وسىنداي قىزىعۋشىلىقتارىم سپورتتا قالۋىما، جاقسى ونەر كورسەتۋىمە كومەكتەستى. ەشكىمگە ۇقسامايتىن ٴستيلىمنىڭ قالىپتاسۋىنا اسەر ەتتى. اياعىم جاراقاتتانعان سوڭ قيىن كەزەڭدە قوسىمشا جوبالاردان ازداپ قول ٴۇزىپ قالدىم. ٴبىراق ماۋسىم اراسىندا ورالىپ، جوبالاردى قايتا قولعا الدىم. يدەيانىڭ سارقىلىپ قالۋ دەگەن مەندە بولماپتى. جۇزەگە اسىرا الماعان قانشاما يدەيام بار، ٴقازىر سولاردى جۇزەگە اسىرعىم كەلەدى.

كوپتەگەن قىزىعۋشىلىعىڭىز بار ەكەنىن ايتىپ ٴوتتىڭىز. وسىنىڭ بارىنە قالاي ۇلگەرۋگە بولادى؟

— باسقالاردا ٴبىر كۇندە قانشا ساعات بولسا، مەندە دە سونشا ساعات بار. شىنىمدى ايتسام، جاتتىعۋعا عانا بار كۇشىمدى سالادى ەكەنمىن. وسىنشا ۋاقىت جاتتىعۋ كەرەك، مىناداي تاپسىرمالاردى ورىنداۋىم كەرەك، وسىنداي ماقساتتارىما جەتۋىم كەرەك دەپ ەڭبەكتەنەمىن. باسقا قىزىعۋشىلىقتارىما دەگەن مۇنداي امبيسيا جوق. مۋزىكانى جازعىم كەلگەندە عانا، گرافيكالىق جوبالارمەن اينالىسقىم كەلگەندە عانا كوڭىل بولەمىن. ٴوزىم سۋرەت سالمايمىن، سكەتچىن جاساپ، يدەيانى تۇسىندىرەمىن. يلليۋستراسيامەن اينالىساتىن دوسىممەن بىرلەسە جاساعان كارتينالاردى الەۋمەتتىك جەلىگە جاريالامايمىز. مەنىڭ مۋزىكاما شاعىن مۋلتفيلم جاسادى. ۇنەمى ميىما يدەيالار كەلسە دە، سول سالادا اتاقتى تۇلعا بولسام دەگەن امبيسيام جوق. مەن ٴۇشىن مانەرلەپ سىرعاناۋ ٴاردايىم ٴبىرىنشى ورىندا، ال قالعانىن قاتار الىپ جۇرۋگە تىرىسامىن. جەلتوقساندا قبتۋ-دى ٴبىتىرىپ، ديپلوم الىپ شىعامىن. سوعان دەيىن ساباق وقۋىم كەرەك، سەبەبى جاۋاپكەرشىلىك دەگەن بار. ال قالعان ىستەرگە كەلگەندە ىنتام بولعاندا عانا جاسايمىن. مىسالى مۋزىكا يدەياسى ەڭ قولايسىز ۋاقىتتا تۋادى. ۇيدە «ٴقازىر باسىما يدەيا كەلەدى، سوسىن سونى جازىپ تاستايمىن» دەپ وتىرمايمىن. مۇنداي پروسەسس ۇنامايدى. مەترودا بولسىن، تاۋعا شىققاندا، ساۋدا ورتالىعىنا كىرگەن كەزدە يدەيا ساپ ەتە قالعاندا سول يدەيانى ۇستاپ قالۋىڭ كەرەك. ەگەر ۇستاپ قالماساڭ قايتا كەلمەيدى.

بۇل شوۋعا جاقىن دوسىڭىز ستەفان لامبەل قاتىسپايدى. نە سەبەپتى بۇل شوۋدان كورە المايمىز؟

— ٴقازىر اكادەمياسىن دامىتۋ ٴۇشىن جۇمىس ىستەيدى. ەڭ ٴبىرىنشى چەمپيون، سودان كەيىن ارتيست بولسا، ٴقازىر باپكەر رەتىندە شۆەيساريادا اكادەميانىڭ جۇمىسىن ۇيلەستىرىپ وتىر. ٴتىپتى وليمپيادا ويىندارىنا قاتىساتىن شاكىرتتەرى بار. ٴقازىر ونىمەن سيرەك جولىعامىز. ال كەزدەسە قالساق ونىڭ اڭگىمەسىنە، بولاشاق جوسپارلارىنا قۇلاق ٴتۇرىپ تىڭداعان ۇنايدى. ول دا قاتارىنان ەكى جىل مۇزايدىنداعى شوۋ وتكىزدى. بيىل قوناقتار قاتارىندا جوق. جانكۇيەرلەرىم «ارالارىندا بىرنارسە بولىپ قالدى» دەپ قورقۋى مۇمكىن. جوق، ولاي ەمەس. بيىلعى شوۋ فورماتى وزگەشە بولعان سوڭ جاڭا ەسىمدەر كوپ بولادى، سوعان ساي قىزىقتى كورسەتىلىم بولماق. ستەفانمەن وتە جاقىن دوسپىز. قازاقستانعا ارتيست رەتىندە عانا ەمەس جاس سپورتشىلارعا ماستەر-كلاسس وتكىزۋگە كەلۋى مۇمكىن. ەلىمىزدەگى جاس مانەرلەپ سىرعاناۋشىلاردىڭ دامۋىنا ازعانتاي بولسا دا ۇلەسىن قوسسادى دەپ سەنەمىن.

ٴسىز دە دوسىڭىز ستەفان سەكىلدى باپكەرلىكپەن اينالىسقىڭىز كەلمەي مە؟

— شىنىمدى ايتسام بۇل تۋرالى تەرەڭ ويلانبادىم. بالالارعا كومەكتەسۋ، ٴوز تاجىريبەممەن بولىسكەن ۇنايدى. ٴارقايسىسى جەتىستىككە جەتە الاتىنىنا كوزدەرىن جەتكىزگىم كەلەدى. قازىرگى جاتتىعۋلارىنا قاراپ مەنىڭ كەزىمدە جاعدايدىڭ قيىن بولعانىن ۇعامىن. دەمەك ٴقازىردىڭ وزىندە ولاردا ٴبىر ارتىقشىلىق بار جانە ونى قولدانا ٴبىلۋى ٴتيىس. باپكەر رەتىندە اكادەميا اشۋ تۋرالى يدەيانى ٴتۇرتىپ قويدىم، ٴبىراق باپكەر بولۋ ٴۇشىن مەن ٴالى جاسپىن. ٴبىراق باپكەرلىك دەگەن ۆاكۋۋم سياقتى ٴبىر تۇسسەڭ ٴارى قاراي اينالىسىپ كەتۋىڭ كەرەك. ال مەن بىرنارسەنى قولعا السام ونى باسىنان-اياعىنا دەيىن جاساپ بىتىرەمىن. شوۋ بولسا ول ٴجاي شوۋ ەمەس، ۇزدىك الەمدىك شوۋلاردىڭ ٴبىرى، ەلىمىزدىڭ سيمۆولى بولۋى ٴتيىس. ٴبىر جوبانى قولعا السام، ونىڭ باسقا جوبالاردان ەرەكشەلىگى بولۋى ٴتيىس. باپكەر بولۋ ٴۇشىن ٴالى جاسپىن. باپكەر بولۋ ٴۇشىن بالالاردىڭ بولاشاعىنا دەگەن جاۋاپكەرشىلىكتى ارقالاۋىڭ كەرەك. ٴدال ٴقازىر باپكەر بولىپ كەتسەم بۇل دۇرىس بولماس ەدى.

ال كارەراڭىزدى اياقتاعان سوڭ؟

— مۇمكىن كارەرامدى اياقتاعان كەزدە اقىلىم تولىسىپ، قانداي دا ٴبىر نارسەلەرگە باسقاشا قاراپ ۇيرەنگەندە بۇل لايىقتى تاڭداۋ بولار ەدى. ادامداردان ٴاردايىم كومەگىمدى ايامايمىن. ٴبىر بالانىڭ بولسىن ارمانىنىڭ ورىندالۋىنا كومەگىم تيسە بوستان-بوس ومىرگە كەلمەدىم دەپ سانايمىن.

بيىل دا الەمدىك جۇلدىزدار ۇلتتىق ستيلدە ونەر كورسەتە مە؟

— ارينە، مىندەتتى تۇردە. بۇل ٴبىزدىڭ ماقتانىشىمىز، ٴبىزدىڭ كونسەپسيامىز. كەز كەلگەن شوۋ بۇل جوبانىڭ نەگىزگى يدەياسىن جۇزەگە اسىرا المايدى. جۇزەگە اسىرسا دا شىنايى شىقپايدى. سەبەبى بىرنارسەنى قولعا العاندا سەن ونى ەلىڭ ٴۇشىن جاسايسىڭ. شوۋ باستالعانعا دەيىن ٴبارى يدەيا جۇزىندە ميىڭدا جۇرەدى. سوسىن ونى مەن بىرەۋمەن بولىسەمىن، سوسىن ەكىنشى بىرەۋمەن... سودان كەيىن جۇمىس باستالىپ يدەيا ٴجايلاپ جۇزەگە اسا باستايدى. باسىڭدا ويناعان مۋزىكانى سالدەن سوڭ ديناميكتەن ەستيسىڭ. حورەوگرافياعا كەلەر بولساق ول كوز الدىڭدا ەلەستەپ تۇرادى. ٴبيدىڭ ويشا كورىنىسىن حورەوگرافپەن ٴبولىسىپ، سپورتشىلارعا ۇيرەتەسىڭ. كوستيۋم تىككەندە، العاشىندا ميىڭنىڭ ٴبىر قاتپارىندا تۇرعان وبرازدىڭ سكەچتىن سالاسىڭ، سودان كەيىن ونى تىگۋىڭ كەرەك. سوسىن ونى سپورتشىنىڭ ۇستىنەن كورگەن سوڭ تاڭدانىپ، ٴاربىر يدەيا بالا سەكىلدى سەنىڭ تۋىندىڭ ەكەنىن بايقايسىڭ. بارىنەن بۇرىن ەلىڭە ۇلكەن مەرەكە سىيلاعىڭ كەلەتىنىن تۇسىنەسىڭ. جالپى ايتقاندا بۇل مەن ٴۇشىن ەرەكشە وقيعا. وسى شاراعا كەلەتىن ٴاربىر ادام وسىنى سەزىنە بىلسە دەيمىن. «ينستاگرامعا» شوۋ وتەتىن الاڭنىڭ رەندەرىن جاريالادىم.

ولار ەڭ ٴبىرىنشى ەلىمىزدى قۇرمەتتەيتىن بولعان سوڭ، ەكىنشىدەن مانەرلەپ سىرعاناۋ قىزىق بولعان سوڭ شەتەلدەن قوناقتار كەلەدى. مەن العاش اياعىما كونكي كيگەندە جاعداي مۇلدە باسقاشا بولاتىن. ال ٴقازىر ٴبارى الەمگە ايگىلى مۇزايدىنداعى شوۋلارعا قاتىسقىسى كەلەدى. قاتىسۋشىلارعا ارناپ تىككەن كوستيۋمدى وزدەرىنە سىيلايمىز. كارولينا كوستنەر 2013 جىلى قىتاي كۋبوگىندا ەركىن باعدارلامادا قازاقتىڭ ۇلتتىق كيىمىن كيىپ شىقتى. ونىڭ ديزاينەرلەرى يتاليالىق شەبەرلەر بولسا دا، ول كويلەگى دايىن بولماعان سوڭ ٴبىز سىيلاعان كوستيۋمدى تاڭدادى. مۇنىڭ قانداي قۇرمەت ەكەنىن ويلاپ كورىڭىزشى. بۇل جوبادا شەتەلدىكتەر مانەرلەپ سىرعاناۋ ارقىلى، كورسەتىلىم ارقىلى ٴبىزدىڭ مادەنيەتىمىزبەن تانىسا الادى.

ەگەر ەلىمىزگە كەز كەلگەن شوۋ كەلىپ قازاقستاندىق قويىلىمدى قويار بولسا، بۇل ٴبارىبىر دە جاقسى شىقپايدى. ونىڭ كوممەرسيالىق ماقساتتا عانا دايىندالعانىن، شىنايى نيەت جوعىن بىلەسىڭ. ال قازاق حالقىنىڭ رۋحتى حالىق ەكەنى بارشاعا ٴمالىم.

قازاقستانداعى مانەرلەپ سىرعاناۋ سپورتىنىڭ پوتەنسيالىن قالاي باعالايسىز؟

— قازىرگى جاعدايى اناعۇرلىم جاقسى. سپورتتا جۇرگەنىمە 20 جىلدان استى. بالا كەزىمدە اشىق مۇزايدىندا سىرعانادىم، كونكي ساتىپ الۋ مۇمكىن بولمادى، ونىڭ ٴجۇزىن اكەم ەگەپ بەرەتىن. ال سەكىرۋ ەلەمەنتتەرىن ۆيدەوكاسسەتادان ۇيرەندىم. قازىرگى بالالاردا مۇنداي پروبلەما جوق. ٴبارى بار. استانانىڭ ينفراقۇرىلىم وتە جوعارى، جالپى سىرعاناۋمەن اينالىسۋعا بولاتىن تاماشا «وقۋشىلار سارايى» بار، «الاۋ» مۇز سارايى، «سارىارقا» ۆەلوترەگى، «بارىس-ارەنا»، «قازاقستان» سپورت كەشەنى، باسقا دا استانا ماڭايىندا جاتتىعۋ بازالارى بار. الماتىدا دا جاقسى مۇزايدىندار پايدا بولدى. جاقىندا عانا اتىراۋدا، ورالدا، شىمكەنت، قاراعاندىدا بولدىم. بارلىق جەردە مۇزايدىندارى سالىنىپ جاتىر. وسىنداي جاعداي جاساۋ ارقىلى ٴار بالا مۇزدا سىرعاناپ كورە الادى.

مانەرلەپ سىرعاناۋ دەڭگەيى تۋرالى ايتساق، جاقسى جاقتارى دا، كەم تۇستارى دا بار. وسى سپورتپەن شۇعىلداناتىن بالالاردىڭ سانى ارتقانى وتە جاقسى، ال تالانتتى بالالاردىڭ كوپتىگى ودان دا جاقسى. قازاقستاندا بالالاردىڭ ٴبارى ۇنەمى قوزعالىستا، كوشەگە شىعىپ ويناعاندى جاقسى كورەدى، ٴبارى اۋلادا فۋتبول ويناپ وسكەن. شىعىس تاربيەسىنىڭ بولعانى دا ۇلكەن ارتىقشىلىق، سەبەبى بالالار ۇلكەندى تىڭدايدى، سىيلايدى. 2015 جىلى مۇزايدىنداعى شوۋدان كەيىن ماستەر-كلاسس وتكىزگەنىمىزدە جانىمدا كانادادان كەلگەن دجوني راشەد بولدى. ول بالالارعا تاپسىرما بەرگەن سوڭ بالالار سونى جاساۋعا كەتىپ قالدى. ىستەپ جاتىر، ىستەپ جاتىر، بالالار تاپسىرمانى قالتقىسىز ورىنداپ جاتىر. ال كانادالىق مامان بالالاردىڭ تاپسىرمانى ٴبىر رەت قانا ورىندايتىنىنا ۇيرەنگەن. ول مەنەن «نەگە ٴالى جاتتىعۋدى ىستەپ جاتىر» دەپ سۇرادى. ولارعا توقتا دەپ ايتپاساڭ جاتتىعۋدى توقتاتپايتىنىن ايتتىم. وسىعان تاڭعالدى. بۇل دەگەنىمىز ٴبىزدىڭ مادەنيەتىمىزدى ايشىقتاي تۇسەدى. بالالار ەڭبەكقور، بىرنارسە بولسىن ۇيرەنگىسى كەلەدى.

ال كەمشىن تۇستارعا كەلەر بولساق، مەن سپورتتا جۇرگەن كەزدەن باستاپ بار ماسەلە. بىزدە سپورتشىلاردى دايىندايتىن ناقتى جۇيە جوق، كادرلار جەتىسپەيدى، كاسىبي ٴارى امبيسياسى جوعارى ماماندار تىم از. قازاقستاندا كاسىبي ەكى باپكەردى عانا بىلەمىن. بالالارمەن قالاي جۇمىس ىستەيتىنىن، ٴوز مۇمكىندىكتەرىن شاما-شارقىنشا ۇيرەتۋگە تىرىساتىنىن كوردىم. مۇنداي ماماندار بالالاردى قابىلداپ العاندا بارلىق جاۋاپكەرشىلىك وزدەرىندە ەكەنىن بىلەدى.

ٴبىر وقيعانى ايتا كەتەيىن، وعان قاراۋ مەن ٴۇشىن اۋىرعا سوقتى. بالانى اكەلىپ تاپسىرعان اتا-انا مامانعا تولىقتاي سەنەدى. باپكەر نە ىستەسە دە ونىكىن دۇرىس دەپ ويلايدى. كاسىبي سپورتشى بولعان سوڭ ولاردىڭ ەڭ باستاپقى كەزەڭنەن قانداي قاتەلىك جىبەرەتىنىن بايقايسىڭ. سپورتشىدان ەشتەڭە شىقپاۋى مۇمكىن، سپورتپەن بىر-ەكى جىل، نە بەس-التى جىل شۇعىلدانۋى مۇمكىن. ٴبىر كەزەڭدە ىشكى پوتەنسيالى مەن تالانتى وسەدى دە، سودان كەيىن كەدەرگىگە تاپ بولادى. سول كەزدە بالالاردىڭ قالاي ۋايىمدايتىنىن كورەمىن. بىرىنشىدەن، ولار از ۋاقىت جوعالتپادى، مۇنىڭ ورنىنا باسقا دا نارسەمەن شۇعىلدانار ما ەدى. مەكتەپكە دە دۇرىس بارمادى. ٴبىر جاقسىسى ٴتارتىپ بويىنشا ٴجۇرۋدى ۇيرەندى. وسىدان كەيىن بالالار قولدارىنان كەلمەگەن سوڭ وزدەرىن تالانتسىزبىن دەپ ەسەپتەيدى، بۇل مەنى قاتتى قىنجىلتادى. شىنداپ كەلگەندە پروبلەمانىڭ ٴبارى ولاردا ەمەس جاتتىقتىرۋشىدا. ال جاتتىقتىرۋشى ۇيرەتپەگەنى ٴۇشىن كىنا وزىندە دەپ مۇلدەم ويلامايدى. ونىڭ جۇمىسى – سپورتشىعا ۇيرەتۋ، باعىت بەرۋ. بالادا وڭ ناتيجە بولماسا ونىڭ تالانتى جوق دەگەن ٴسوز ەمەس، جاتتىقتىرۋشى ۇيرەتە المادى دەگەن ٴسوز. كەز كەلگەن مۇمكىندىكتى پايدالانۋعا بولادى. تالانتسىز، دارىنسىز ادام بولمايدى، بىرەۋمەن كوپ، ال بىرەۋمەن از جۇمىس ىستەۋىڭ كەرەك. وسى مەنىڭ كوڭىلىمدى ٴتۇسىردى. مۇنى ۋاقىتشا ماسەلە دەپ ويلايمىن. قىسقا مەرزىمدە مەملەكەتتەن، ادامداردان كوپ نارسە تالاپ ەتە المايسىڭ. ينفراقۇرىلىم دامىپ جاتىر. حالىق اراسىندا سپورتقا دەگەن قىزىعۋشىلىق ارتىپ كەلەدى. اقشا ٴۇشىن، جەكە ۇستانىمدارى ٴۇشىن ەمەس، سپورت ٴۇشىن، سپورتتىق جەتىستىكتەر ٴۇشىن، بالالار مەن ەل ٴۇشىن، ٴوزى ٴۇشىن جۇمىس ىستەيتىن ماماندار پايدا بولعاندا جاقسى ناتيجە بولادى دەپ ويلايمىن.

بۇل ماسەلەنى شەتەلدىك مامانداردى شاقىرۋ ارقىلى شەشۋگە بولا ما؟

— ولاردى شاقىرۋ جەتكىلىكسىز. وزىمىزدەن مامانداردىڭ شىققانى ماڭىزدى. باسقا ەلدەن جاتتىقتىرۋشى اكەلۋدىڭ ناتيجەسى ۇزاققا بارمايدى. ٴوز ەلىمىزدە جاتتىققان دميتريي بالاندين وليمپيادا ويىندارىندا چەمپيون اتانعان كەزدە قالاي ماقتاندىق. ونى جاقسى كورەسىڭ. تانىس بولسام دا جاقىن ارالاسپادىق. الماتىلىق ەكەنىن بىلەمىن، ول ٴومىر بويى وسى جەردە جاتتىقتى. وليمپيادا مەدالىن العان ناعىز فەنومەن. ٴوز ەلىڭنەن شىققان سپورتشىمەن ماقتاناسىڭ. سپورتشىنىڭ ەلىن قانشالىقتى جاقسى كورەتىنىن تۇسىنەسىڭ. گولوۆكين جەڭىسكە جەتكەندەگى ماقتانىش سەزىمىن ايتىپ جەتكىزۋ قيىن. ادامدار ونىڭ قازاقستاندىق ەكەنىن، مەنتاليتەتى بىزدىكى ەكەنىن بىلەدى.

كورەياعا بارعان سوڭ اياعىمداعى جاراقاتىمنان ەكى ايداي ۇشۋ مۇمكىن بولمادى. كورەيادا ٴومىر ٴسۇرۋ، ادامدارىنىڭ قانداي ەكەنىن كورۋ، نە ويلايتىنى ٴاردايىم قىزىق بولدى. مەنىڭ اتا-تەگىم كورەي بولعان سوڭ «كورەي قازاعىسىڭ با، الدە قازاق كورەيىسىڭ بە» دەپ سۇراق قويادى. ومىرلىك قۇندىلىقتار مەن كوزقاراستارىمدى سالىستىرا كەلە كورەيگە قاراعاندا قازاق ەكەنىمدى ۇقتىم. باسقا جەرگە كەتكەندە وتانىڭ ٴاردايىم سەنىمەن بىرگە دەگەن ٴسوز بار. مەن مۇنى كىشىگىرىم نارسەلەردەن-اق بايقاي الامىن. 10 جاسىمدا ماسكەۋگە، 17 جاسىمدا امەريكاعا كەتتىم. سوندا دا جان-تانىممەن ٴوز ەلىمدە قالا بەرەتىنىمدى سەزدىم. قازاقستان دەپ جۇرەگى سوعاتىن سپورتشىلاردىڭ ارتاتىنىنا ۇمىتتەنەمىن.

شەتەلدىك مامانداردى بالالاردى عانا ەمەس، قازاقستاندىق مامانداردى دايارلاۋعا شاقىرۋ كەرەك. مەنىڭ ويىمشا، ەڭ الدىمەن، جاتتىقتىرۋشىنى وقىتۋ كەرەك، سودان سوڭ سپورتشىعا ۇيرەتۋ كەرەك. بەس كۇندىك ماستەر-كلاستا ادام فيزيكالىق تۇردە كولەمدى اقپاراتتى قابىلداي المايدى. بۇل ٴۇشىن قانشاما جىلعا ارنالعان باعدارلاما قاجەت.

ەليزابەت تۇرسىنبايەۆانىڭ مۇمكىندىگى قانداي، پوتەنسيالىن قالاي باعالايسىز؟

— ەكى كۇن بۇرىن سەرىك ساپيەۆپەن اڭگىمەلەستىم. مەن ودان مۇزايدىنداعى شوۋ تۋرالى ايتا كەلە بىزدە قانداي مانەرلەپ سىرعاناۋ جۇلدىزدارى بارىن سۇرادىم. «مەن تەك ٴۇش ادامدى بىلەمىن، سەن، ەليزابەت جانە ابزال» دەدى ول. شىنىمەن دە، وسى ٴۇش سپورتشى حالىقارالىق دەڭگەيدەگى جارىستارعا قاتىسىپ، كوپشىلىككە تانىلدى. سپورتشىلار كوبەيگەنى دۇرىس، سەبەبى وليمپيادادا كوماندالىق تۋرنيردە مەدال الۋ مۇمكىندىگى جوعارى. ەليزابەت 18-دە، بۇل ناعىز ٴوزىن كورسەتەتىن جاس. قابىلەتتى سپورتشى، الەۋمەتتىك جەلىدە ونىڭ تورتتىك ەلەمەنت ورىنداعان ۆيدەوسىن ٴبارى كوردى. بۇل دەگەن كەز كەلگەن سپورتشىنىڭ قولىنان كەلمەيدى. ٴبارى بىردەي كۇردەلى ەلەمەنتتەردى جاساۋعا قابىلەتتى ەمەس.

ٴقازىر مانەرلەپ سىرعاناۋدىڭ دەڭگەيى كوز ىلەسپەس جىلدامدىقپەن ٴوسىپ جاتىر. باسەكەلەستىكتىڭ اسىرەسە ايەلدەر سىنىندا ارتىپ وتىرعانىن كورىپ وتىرمىز. ايەلدەر سپورتىندا اتلەت رەتىندە ٴومىر ٴسۇرۋ ۇزاقتىعى قىسقارىپ كەلەدى. گيمناستيكانى الىپ قاراساق، قىزدار 15-16 جاستا سپورتتىڭ شىڭىنا جەتەدى. مانەرلەپ سىرعاناۋدا دا وسىنداي تەندەنسيا بولىپ جاتىر. ۆaby boom دەگەن تەرميندى ەستىگەن بولساڭىز ٴقازىر ەرەسەك قىزدار ەمەس جاس قىزدار بىر-بىرىمەن جارىسىپ جاتىر. سەبەبى وتە كۇردەلى باعدارلاما، وزگەشە ەلەمەنتتەر، تورەلىك جۇيەسى وزگەردى. ال ەليزابەت ٴۇشىن ٴقازىر ەڭ ماڭىزدى ۋاقىت، جوعارى ناتيجەگە جەتۋگە مۇمكىندىگى بار. باستىسى مۇز ۇستىندە «ۆاۋ» ەلەمەنتتەردە جاساۋى كەرەك. سوڭعى تەندەنسياعا قاراپ سپورتتىڭ قايدا ۇزاپ بارا جاتقانىنا تاڭىرقايسىڭ. جاسوسپىرىمدەر اراسىنداعى الەم چەمپيوناتىن تورتتىك ەلەمەنتتەردى ورىنداعان مانەرلەپ سىرعاناۋشى جەڭىپ الدى. ەليزابەتتىڭ سپورتتاعى جولى ۇزاق بولادى دەپ ويلايمىن. بۇعان ول ستراتەگيالىق تۇرعىدان دۇرىس دايىندالىپ، ٴوز باعدارلاماسىن كۇردەلەندىرسە جوعارى دەڭگەيگە جەتەدى.

سپورتشىلاردىڭ بۋىنى بار، مەن ونىڭ ۇشەۋىنەن ٴوتتىم. ٴوزىمدى جەڭىمپاز سەزىنگەن كەز التىن كەزەڭىم بولدى. ول كەزدە دەنىم ساۋ جانە بارلىق مۇمكىندىگىمدى سەزە ٴبىلدىم. ەليزابەتتە ٴقازىر وسىنداي ٴداۋىر جانە ول ونى پايدالانۋى ٴتيىس. ٴار سپورتشىنىڭ سپورتتاعى ٴومىر ٴسۇرۋ مەرزىمى بار. قازاقستاندا مانەرلەپ سىرعاناۋدىڭ بار بولعانى جانە ونى دامىتاتىن تۇلعالاردىڭ كوپتەپ شىققانى مەن ٴۇشىن ماڭىزدى. مەن دە سپورتتان كەتەمىن، ەليزابەت تە ەرتە مە، كەش پە سپورتتان كەتەدى، سول سەبەپتى ارتىمىزدان مۇرا قالعانىن قالايمىن.

ٴسىز قازاقستانعا عانا ەمەس، الەمگە تانىمال سپورتشى بولعان سوڭ جەكە ٴومىرىڭىز تۋرالى بىلگىسى كەلەتىندەر كوپ. وتباسىن قۇرۋدى قاشان جوسپارلاپ وتىرسىز؟

— قاشان ەكەنىن ايتۋ قيىن. مۇنداي نارسەلەردى جوسپارلامايمىن. شەتەلگە شىعىپ ەلگە كەلگەن سايىن شىنىمەن ەڭ ادەمى قىزدار قازاقستاندا ەكەنىنە كوزىم جەتتى. بىزدە ٴىشى دە، سىرتى دا سۇلۋ، كوز تارتارلىق قىزدار وتە كوپ. فوتوعا تۇسىرۋگە قىزىققان سوڭ 3-4 جىل بۇرىن ماشينامەن قازاقستاننىڭ بارلىق ٴوڭىرىن ارالاپ ٴجاي عانا ادامداردى فوتوعا تۇسىرگىم كەلدى. تۋىستارىمنىڭ كوپشىلىگى وڭتۇستىكتە تۇرادى. انام شىمكەنتتە، مەن الماتىدا تۋعانمىن. ٴار وڭىردەگى تۇرعىنداردىڭ بىر-بىرىنەن ايىرماسى بار دەيدى، ٴبىراق مۇنى اسا بايقاماپپىن. ادامداردىڭ كەلبەتىن، ولاردىڭ ويىن، ٴار ايماقتىڭ ەرەكشەلىگىن كامەرا ارقىلى كورگىم كەلەدى.

قىزدارعا كەلەر بولساق، قازاقستانداعى ٴار قىز بالاسى ەڭ الدىمەن ٴوزىنىڭ زات ەمەس، تۇلعا ەكەنىن ٴبىلۋى ٴتيىس. وزىندىك وي-پىكىر يەسى ەكەنىن، باعاسىن ٴبىلۋى ٴتيىس. ال ٴبىز ولاردى سىيلاپ، باعالاۋىمىز كەرەك. ەڭ الدىمەن، ٴاربىر قىز بالاسى باقىتتى بولۋى ٴتيىس جانە ٴوز ارمانىنا جەتۋ ٴۇشىن ۇمتىلۋى ٴتيىس. ومىرگە ريزا ەمەس، قانداي دا ٴبىر ٴساتتى ۋىسىنان شىعارىپ الىپ، سول ٴۇشىن قاتتى كۇيزەلەتىن ادامداردى كورگەندە كوڭىلىم تۇسەدى. ٴومىر دەگەن ٴبىر باعىتپەن عانا جۇرەدى. كەشە ديماشپەن سويلەسكەن كەزدە «التىن ۋاقىتتا ٴومىر سۇرەتىنىمىزدى بىلەسىڭ بە» دەيمىن وعان. مەنىڭ سوڭعى ەكى جىلىم وتە اۋىر بولدى. قازىرگى جاسىما قاراپ، ميىما كەلەتىن ويلار مەن يدەيالارعا قاراپ وسى «التىن ۋاقىتتا» عانا جۇزەگە اسىرا الامىن دەپ سانايمىن.

15-16 جاسىندا كوپ ادامدار يدەياسىن جۇزەگە اسىرماي ٴوزىن شەكتەيدى. اركىمدە سەبەپ بولۋى مۇمكىن. ٴار ادام ٴوزىنىڭ «التىن كەزەڭدە» ٴومىر ٴسۇرىپ جاتقانىن سەزسە، باعالاسا دەيمىن. ٴبىر ادام، كەلەسى ٴبىر ادام باقىتتى بولسا ولاردىڭ عانا ەمەس، ەلدەگى ٴومىر ٴسۇرۋ ساپاسى جاقسارادى. الەمدى جاقسارتقىڭ كەلسە، وزىڭنەن باستا. باقىتتى بولعاندا عانا مىقتى بولا تۇسەسىڭ. اسىرەسە، مەنىڭ شىنايى جانكۇيەرلەرىمە وسىنى تىلەيمىن. ولار ماعان بىرنەشە جىلدان بەرى جازادى، شوۋ الدىندا بارىنە جاۋاپ بەرەمىن دەپ شەشتىم. جوباعا قىزىعاتىن ادامداردى قاتتى سىيلايمىن. مەنىمەن بىرگە وسكەن ادامداردىڭ قولداۋىن، ومىرگە دەگەن، ماعان دەگەن قارىم-قاتىناسىن باعالايمىن. سول ادامدار ومىردەن ٴوز ورىندارىن تاۋىپ، باقىتتى بولسا قاتتى قۋانار ەدىم. سەن باقىتتى بولساڭ، سەنىڭ اتا-اناڭ دا باقىتتى، اينالاڭ جارقىن بولادى. بارلىق جانكۇيەرلەرگە، سۇحباتتى وقيتىن ٴار وقىرمانعا وسىنى تىلەگىم كەلەدى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

سسىلكي پو تەمە:
كوممەنتاريي