BAQ.kz - Қазақстан жаңалықтары USD 370.49 BAQ.kz - Қазақстан жаңалықтары EUR 421.06 BAQ.kz - Қазақстан жаңалықтары RUB 5.54
استانا:

پرەزيدەنت جانىنداعى جەمقورلىققا قارسى ٴىس-قيمىل ماسەلەلەرى جونىندەگى كوميسسيا وتىرىسى ٴوتتى

فوتو: Бауыржан Жуасбаев

استانا، baq.kz. باسقوسۋدا حالىقتى جۇمىسپەن قامتۋ سالاسىنداعى زاڭدىلىقتى ساقتاۋعا، سونداي-اق ينفراقۇرىلىمدىق دامۋدىڭ «نۇرلى جول» مەملەكەتتىك باعدارلاماسىن جۇزەگە اسىرۋعا بولىنگەن قاراجاتتى پايدالانۋ تيىمدىلىگىنە قاتىستى قابىلدانىپ جاتقان شارالار تالقىلاندى. بۇل تۋرالى اقوردا حابارلادى.

وتىرىستا باس پروكۋراتۋرا، مەملەكەتتىك قىزمەت ىستەرى جانە سىبايلاس جەمقورلىققا قارسى ٴىس-قيمىل اگەنتتىگى، ينۆەستيسيا جانە دامۋ، ەڭبەك جانە حالىقتى الەۋمەتتىك قورعاۋ مينيسترلىكتەرى باسشىلارىنىڭ باياندامالارى تىڭدالدى.

جيىندى اشقان گۇلشارا ٴابدىقالىقوۆا مەملەكەت باسشىسى نۇرسۇلتان نازاربايەۆتىڭ بيىلعى 7 قاراشادا وتكەن قاۋىپسىزدىك كەڭەسىنىڭ وتىرىسىندا سىبايلاس جەمقورلىقپەن بەلسەندى كۇرەس جالعاسا بەرەتىنىن، حالىق قاراجاتتىڭ قايدا جانە قانداي ماقساتقا جۇمسالعانىن بىلۋگە ٴتيىس ەكەنىن ايتقانىن ەسكە سالدى.

حالىقتى جۇمىسپەن قامتاماسىز ەتۋ ماسەلەسى – مەملەكەتتىڭ الەۋمەتتىك ساياساتىنىڭ نەگىزى. جۇمىسپەن قامتۋ ىسىنە قولداۋ كورسەتۋ ماقساتىمەن قابىلدانعان كەشەندى باعدارلامالار ەڭبەك نارىعىندا تۇراقتىلىقتى ساقتاۋعا جانە داعدارىس كەزەڭدەرىنىڭ كەلەڭسىز سالدارىن جۇمسارتۋعا سەپتىگىن تيگىزدى.

باعدارلامالاردى قارجىلاندىرۋعا ايتارلىقتاي مەملەكەت قاراجاتى بولىنۋدە. سونىمەن بىرگە، 2016 جىلدان بەرى انتيكوررۋپسيالىق قىزمەت 194 قىلمىستى تىركەپ، 32 ادام سوتتالدى. زاڭ بۇزۋ جايتتارى نەگىزىنەن جۇمىسقا تۇرۋ فاكتىلەرىنىڭ جالعاندىعىمەن، بيۋدجەت قاراجاتى مەن بەرىلگەن شاعىن نەسيەلەردىڭ ماقساتىنا ساي جۇمسالماۋىمەن بايلانىستى بولىپ وتىر.

گ.ٴابدىقالىقوۆا سىبايلاس جەمقورلىق قاتەرلەرىن ازايتاتىن ٴتيىمدى تەتىكتەردى ەنگىزۋ قاجەتتىگىن ايتتى.

سونداي-اق، قۇقىق قورعاۋ جانە باقىلاۋ ورگاندارىنىڭ وكىلدەرى كوميسسيا مۇشەلەرىنە قارجىلاندىرۋ كولەمى 3 تريلليون تەڭگەدەن اسقان «نۇرلى جول» ينفراقۇرىلىمدىق دامۋ مەملەكەتتىك باعدارلاماسىن ىسكە اسىرۋعا بايلانىستى كوپتەگەن زاڭ بۇزۋشىلىقتار انىقتالعانى جونىندە مالىمدەدى. باعدارلاما جۇزەگە اسىرىلا باستاعالى سوتقا دەيىنگى 120 تەرگەۋ امالى جۇرگىزىلىپ، 48 ادام سوتتالعان. مەملەكەتتىك اۋديت ورگاندارى جالپى قۇنى 48 ميلليارد تەڭگە بولاتىن زاڭ بۇزۋ جايتتارىن انىقتاعان.

مەملەكەتتىك حاتشى سىبايلاس جەمقورلىقتى ازايتۋ ٴۇشىن جەرگىلىكتى جەرلەردە ٴاربىر ينۆەستيسيالىق جوبانىڭ جۇزەگە اسىرىلۋىن قامتاماسىز ەتىپ، ەلەكتروندىق رەسۋرستار مۇمكىندىكتەرىن كەڭىنەن قولدانۋ ماڭىزدى ەكەنىن اتاپ ٴوتتى.

تالقىلاۋ قورىتىندىسى بويىنشا كوميسسيا وكىلەتتى مەملەكەتتىك ورگاندارعا انىقتالعان زاڭ بۇزۋ جايتتارىن جويۋ ٴۇشىن ناقتى شارالار قابىلداۋ جونىندە تاپسىرما بەردى.

فوتولار: باۋىرجان جۋاسبايەۆ


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي