BAQ.kz - Қазақстан жаңалықтары USD 369.98 BAQ.kz - Қазақстан жаңалықтары EUR 428.7 BAQ.kz - Қазақстан жаңалықтары RUB 5.64
استانا:

نازاربەۆ اقتاۋ ٴسامميتىنىڭ قورىتىندىسى بويىنشا بريفينگ وتكىزدى

فوتو: Бауыржан Жуасбаев

قازاقستان پرەزيدەنتى بەسىنشى كاسپيي ٴسامميتىنىڭ قورىتىندىسى بويىنشا بۇقارالىق اقپارات قۇرالدارى وكىلدەرى ٴۇشىن بريفينگ وتكىزدى، دەپ حابارلايدى baq.kz اقپارات اگەنتتىگى اقوردانىڭ ٴباسپاسوز قىزمەتىنە سىلتەمە جاساپ.

مەملەكەت باسشىسى جۋرناليستەر الدىندا سويلەگەن سوزىندە بەسىنشى كاسپيي ٴسامميتىنىڭ كاسپيي تەڭىزىنىڭ حالىقارالىق كۇنى قارساڭىندا ٴوتۋىنىڭ سيمۆولدىق ٴمانى بار ەكەنىن اتاپ ٴوتتى.

"ٴبىز ارىپتەستەرىمىزبەن بىرگە كاسپيي تەڭىزىنىڭ قۇقىقتىق مارتەبەسىن رەتتەۋ جونىندەگى كوپ جىلعى جۇمىستاردى قورىتىندىلادىق. كوپ جاقتى تاجىريبەلىك ٴىس-قيمىلداردى ىلگەرىلەتۋگە قاتىستى جۇمىستاردىڭ جاعدايى مەن كەيىنگى اتقارىلاتىن شارالاردى تالقىلادىق. ساۋدا، ەكونوميكا، كولىك جانە قاۋىپسىزدىك سالالارىنا بايلانىستى ماڭىزدى كەلىسىمدەرگە قول قويدىق"، – دەدى قازاقستان پرەزيدەنتى.

مەملەكەت باسشىسى جۇرگىزىلگەن كەلىسىمدەردىڭ تابىستىلىعىنا توقتالىپ، كونۆەنسيانى دايىنداۋ پروسەسىندە بارلىق ەل كاسپيي ٴوڭىرىنىڭ ساياسي تۇراقتىلىعى مەن دامۋىن، سونداي-اق ونىڭ تابيعي بايلىعىنىڭ قورعالىپ، كوبەيتىلۋىن قامتاماسىز ەتۋ مۇددەسىن كوزدەگەنىن ايتتى.

"كوپ جىلعى سىڭىرگەن ەڭبەكتىڭ شارىقتاۋ شەگى بۇگىن كاسپيي تەڭىزىنىڭ قۇقىقتىق مارتەبەسى تۋرالى كونۆەنسياعا قول قويۋمەن اياقتالدى. كونۆەنسيا «كاسپيي تەڭىزىنىڭ كونستيتۋسياسى» بولىپ سانالادى. مۇندا تەڭىز جاعاسىنداعى مەملەكەتتەردىڭ قۇقىقتارى مەن مىندەتتەرىنە، سونداي-اق، ٴوڭىردىڭ قاۋىپسىزدىگىنە، تۇراقتىلىعى مەن وركەندەۋىنە كەپىل بولۋعا قاتىستى بارلىق كەشەندى ماسەلەلەردى رەتتەۋ قاراستىرىلعان"، – دەدى قازاقستان پرەزيدەنتى.

نۇرسۇلتان نازاربايەۆ بريفينگكە قاتىسقان جۋرناليستەرگە كونۆەنسيانىڭ كاسپيي جاعاسىنداعى ەلدەردىڭ ىنتىماقتاستىعى ٴۇشىن بارلىق باعىتتار بويىنشا ٴتيىمدى زاڭدى بازا قالىپتاستىراتىنىن جانە ٴاربىر تاراپتىڭ قىزمەتى ٴۇشىن نەگىزگە الىناتىن ۇستانىمداردى انىقتايتىنىن ايتتى.

"اتاپ ايتقاندا، كاسپيي تەڭىزىن بەيبىتشىلىك، تاتۋ كورشىلىك جانە دوستىق ايماعىنا اينالدىرۋ، ونى بەيبىت ماقساتتا پايدالانۋ، ەگەمەندىگى مەن اۋماقتىق تۇتاستىعىن قۇرمەتتەۋ، كاسپيي تەڭىزىندە تاراپتارعا قاتىسى جوق قارۋلى كۇشتەردى بولدىرماۋ ماسەلەلەرى قامتىلعان. ٴبىز اۋماقتىق سۋ كولەمىن 15 تەڭىز ميل ەتىپ بەكىتتىك. وسىعان وراي ونىڭ سىرتقى شەكاراسى مەملەكەتتىك مارتەبەگە يە بولادى. اۋماقتىق سۋعا ون ميلدىك بالىق اۋلاۋ ايماعى جالعاسادى. ٴاربىر مەملەكەت بالىق اۋلاۋ كاسىبىندە ەرەكشە قۇقىققا يە بولادى. تەڭىزدىڭ بالىق اۋلاۋ ايماعىنان تىس بولىگى ورتاق سۋ كەڭىستىگى بولىپ قالا بەرەدى. مەملەكەتتىك تەڭىز شەكاراسىنان تىس اۋماقتا كاسپيي جاعاسىنداعى ەلدەردىڭ تۋى بار كەمەلەرى ەركىن جۇزە بەرەتىن بولادى. باسقا تەڭىزگە جانە الەمدىك مۇحيتقا شىعۋ ەركىندىگى جونىندەگى ۋاعدالاستىقتىڭ ماڭىزى زور. ٴاربىر مەملەكەت ٴوز بولىگىنىڭ شەگىندەگى تەڭىز ٴتۇبىنىڭ بايلىقتارىنا قاتىستى ەگەمەندىك قۇقىعىن جۇزەگە اسىرادى. سوندىقتان، تەڭىز ٴتۇبى ارقىلى ماگيسترالدى قۇبىرلار مەن كابەلدەردى جۇرگىزۋ ەكولوگيالىق تالاپتاردى ساقتاعاندا عانا مۇمكىن بولاتىنى قاراستىرىلعان"، – دەدى مەملەكەت باسشىسى.

قازاقستان پرەزيدەنتى وسى ۇستانىمداردىڭ ساقتالۋى كاسپيي جاعاسىنداعى ەلدەردىڭ كولىك ينفراقۇرىلىمىنىڭ دامۋىنا، كاسپيي ٴوڭىرىنىڭ ترانزيتتىك الەۋەتىنىڭ ارتۋىنا سونداي-اق كاسپييدىڭ ەكولوگيالىق جۇيەسى مەن بيولوگيالىق رەسۋرستارىنىڭ كەرەمەت پوپۋلياسياسىنىڭ قورعالۋىنا سەپتىگىن تيگىزەتىنىن اتاپ ٴوتتى.

سونىمەن قاتار، نۇرسۇلتان نازاربايەۆ كاسپيي تەڭىزى بويىنشا ىنتىماقتاستىقتى ودان ٴارى دامىتۋ جونىندە ٴبىرقاتار قوسىمشا شارالاردى، سونىڭ ىشىندە، اسكەري قىزمەت سالاسىنداعى كەلىسىلگەن سەنىم شارالارى جونىندە بەس جاقتى ارنايى كەلىسىمنىڭ قورىتىندىسى، كاسپيي جاعاسىنداعى ەلدەردىڭ ساۋدا-ەكونوميكالىق قارىم-قاتىناستارىن، اسىرەسە، ينۆەستيسيالىق ىنتىماقتاستىق جانە ەنەرگەتيكالىق سالاداعى جوبالاردى جۇزەگە اسىرۋ جونىندەگى ماسەلەلەردى جانداندىرۋ، ساياسات ٴتاريفىن جەتىلدىرۋ جانە تاسىمالداۋ جاعدايىن جاقسارتۋ، سونداي-اق بيولوگيالىق رەسۋرستاردى زاڭسىز كاسىپكە اينالدىرعاندارعا قارسى كۇرەس جونىندە قۇجات قابىلداۋدى ۇسىندى.

سوڭىندا مەملەكەت باسشىسى اقتاۋ ٴسامميتى كاسپيي ماڭى ەلدەرى اۋقىمدى مىندەتتەردى بىرلەسىپ شەشە الاتىنىن تاعى ٴبىر رەت كورسەتكەنىن ايتىپ، قابىلدانعان حالىقارالىق شارتتار مەن قول جەتكىزىلگەن ۋاعدالاستىقتار «كاسپيي بەستىگىنىڭ» الەۋەتىن تولىقتاي اشۋعا مۇمكىندىك بەرەتىنىنە سەنىم ٴبىلدىردى.

سونداي-اق، سامميت قورىتىندىسى بويىنشا ازەربايجان رەسپۋبليكاسىنىڭ پرەزيدەنتى يلحام اليەۆ، يران يسلام رەسپۋبليكاسىنىڭ پرەزيدەنتى حاسان رۋحاني، رەسەي فەدەراسياسىنىڭ پرەزيدەنتى ۆلاديمير پۋتين، تۇرىكمەنستان پرەزيدەنتى گۋربانگۋلى بەردىمۇحامەدوۆ مالىمدەمە جاسادى.

***

بەسىنشى كاسپيي ٴسامميتىنىڭ قورىتىندىسى بويىنشا مىناداي قۇجاتتارعا قول قويىلدى:

1. كاسپيي تەڭىزىنىڭ قۇقىقتىق مارتەبەسى تۋرالى كونۆەنسيا;

2. كاسپيي تەڭىزىندە تەرروريمگە قارسى كۇرەس جۇرگىزۋ سالاسىنداعى ىنتىماقتاستىق تۋرالى حاتتاما;

3. كاسپيي تەڭىزىندە ۇيىمداسقان قىلمىسقا قارسى كۇرەس جۇرگىزۋ سالاسىنداعى ىنتىماقتاستىق تۋرالى حاتتاما;

4. كاسپيي ماڭى مەملەكەتتەرىنىڭ ۇكىمەتتەرى اراسىنداعى ساۋدا-ەكونوميكالىق ىنتىماقتاستىق تۋرالى كەلىسىم;

5. كاسپيي ماڭى مەملەكەتتەرىنىڭ ۇكىمەتتەرى اراسىندا كولىك سالاسىنداعى ىنتىماقتاستىق تۋرالى كەلىسىم;

6. كاسپيي تەڭىزىندە جانجالدىڭ الدىن الۋ تۋرالى كەلىسىم;

7. شەكارا ۆەدومستۆولارىنىڭ ىنتىماقتاستىعى مەن ٴوزارا ٴىس-قيمىلى تۋرالى حاتتاما.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي