BAQ.kz - Қазақстан жаңалықтары USD 371.31 BAQ.kz - Қазақстан жаңалықтары EUR 419.32 BAQ.kz - Қазақстан жаңалықтары RUB 5.59
استانا:

اقتاۋ سامميتىندە كاسپييدىڭ قۇقىقتىق مارتەبەسى تۋرالى كونۆەنسياعا قول قويىلدى

فوتو: Бауыржан Жуасбаев

بۇگىن كاسپيي ماڭى مەملەكەتتەرىنىڭ بەسىنشى سامميتىندە بەس ەلدىڭ باسشىسى كاسپيي تەڭىزىنىڭ قۇقىقتىق مارتەبەسى تۋرالى كونۆەنسياعا قول قويدى، دەپ حابارلايدى baq.kz اقپارات اگەنتتىگى اقورداعى سىلتەمە جاساپ.

مەملەكەتتەر باسشىلارىن قارسى الۋ راسىمىنەن سوڭ، نۇرسۇلتان نازاربايەۆ جانە ازەربايجان رەسپۋبليكاسىنىڭ پرەزيدەنتى يلحام اليەۆ، يران يسلام رەسپۋبليكاسىنىڭ پرەزيدەنتى حاسان رۋحاني، رەسەي فەدەراسياسىنىڭ پرەزيدەنتى ۆلاديمير پۋتين، تۇرىكمەنستان پرەزيدەنتى گۋربانگۋلى بەردىمۇحامەدوۆ بەسىنشى كاسپيي ٴسامميتىنىڭ پلەنارلىق وتىرىسىنا قاتىستى.

نەگىزگى بايانداما جاساعان قازاقستان پرەزيدەنتى بۇعان دەيىن وتكەن كاسپيي سامميتتەرىنىڭ رولىنە ەرەكشە توقتالىپ، وندا كەلىسسوز ۇدەرىسىنە قاجەتتى ساياسي سەرپىلىس بەرىلگەنىن جانە قايشىلىق ۇستانىمدار بويىنشا كەلىسىمگە قول جەتكىزىلگەنىن ايتتى.

نۇرسۇلتان نازاربايەۆ كاسپيي ٴوڭىرىنىڭ تاريحى بىرەگەي ٴارى مادەنيەتى الۋان ٴتۇرلى ەكەنىن، مۇندا ادام رەسۋرستارى مول جانە باي تابيعي قور شوعىرلانعانىن، سونىمەن قاتار، تەڭىزدىڭ گەوگرافيالىق تۇرعىدان ٴتيىمدى ورنالاسۋىنىڭ ارقاسىندا زور گەوساياسي ماڭىزعا يە بولىپ وتىرعانىن اتاپ ٴوتتى.

"بۇگىندە كاسپيي ماڭى ەلدەرىنىڭ الەۋەتى زور جانە قارقىندى دامىپ كەلە جاتىر. ٴبىزدىڭ ەلدەرىمىزدەگى تۇرعىنداردىڭ جالپى سانى – 240 ميلليون. وسىنىڭ ٴبارى كاسپييگە قاتىستى ماسەلەلەر كەشەنىن بىرلەسىپ شەشۋ قاجەتتىگىن تۋعىزدى"، – دەدى مەملەكەت باسشىسى.

قازاقستان پرەزيدەنتى كونۆەنسيانى كاسپيي تەڭىزىنىڭ سۋىن، ٴتۇبىن، قازبا بايلىقتارىن، تابيعي رەسۋرستارى مەن اۋە كەڭىستىگىن قوسا العاندا، كاسپييگە قاتىستى تاراپتاردىڭ قۇقىقتارى مەن مىندەتتەرىن رەتتەيتىن نەگىزگى جان-جاقتى قۇجات بولىپ سانالاتىنىن ايتتى. سونىمەن قاتار مەملەكەت باسشىسى كاسپيي ماڭى ەلدەرىنىڭ قاۋىپسىزدىگىن قامتاماسىز ەتۋ، توتەنشە جاعدايلاردىڭ الدىن الۋ مەن ولاردى بولدىرماۋ، اسكەري قىزمەتتەرى ماسەلەلەرىنە ايرىقشا نازار اۋداردى.

نۇرسۇلتان نازاربايەۆ كونۆەنسياعا قاتىسۋشى ەلدەر قىزمەتتەرىنىڭ نەگىزىن قالايتىن قاعيداتتارعا ەرەكشە توقتالىپ، سونىڭ ىشىندە كاسپيي تەڭىزى ايماعىن بەيبىتشىلىك، تاتۋ كورشىلىك جانە دوستىق وڭىرىنە اينالدىرۋ قاجەتتىگىن، ونى بەيبىت ماقساتتا پايدالانىپ، ەلدەردىڭ ەگەمەندىگى مەن اۋماقتىق تۇتاستىعىن قۇرمەتتەۋ كەرەكتىگىن، سونداي-اق، كاسپيي تەڭىزىندە تاراپتارعا قاتىسى جوق قارۋلى كۇشتەر بولماۋعا ٴتيىس ەكەنىن ايتتى.

مەملەكەت باسشىسى كونۆەنسيانىڭ كاسپيي ماڭى ەلدەرى اراسىنداعى ىنتىماقتاستىقتى نىعايتۋعا زور مۇمكىندىك بەرەتىنىنە توقتالىپ، وسى باعىتتاعى ٴبىرقاتار قوسىمشا شارالاردى اتاپ ٴوتتى.

"كاسپيي تەڭىزىنىڭ ساياسي تۇرعىدان تۇراقسىز ايماققا جاقىندىعى قاۋىپسىزدىكتى قامتاماسىز ەتۋ ماقساتىندا كاسپيي ماڭى مەملەكەتتەرىنىڭ ٴوزارا ٴتيىمدى ٴارى ناقتى ٴىس-قيمىلداردى پىسىقتاۋدى تالاپ ەتەدى. وسىعان وراي، اسكەري قىزمەت سالاسىنداعى سەنىم شارالارى ٴۇشىن بەس جاقتى كەلىسىم جاساۋدى ۇسىنامىن"، – دەدى قازاقستان پرەزيدەنتى.

نۇرسۇلتان نازاربايەۆ ينۆەستيسيالىق ىقپالداستىقتى ودان ٴارى دامىتىپ، ەنەرگەتيكالىق جانە گەولوگيالىق بارلاۋ سالاسىنداعى جوبالاردى جۇزەگە اسىرۋ ٴۇشىن كونۆەنسيا مەن قول قويىلاتىن قۇجاتتاردىڭ مۇمكىندىكتەرىن تولىق كولەمدە پايدالانۋ قاجەتتىگىن اتاپ ٴوتتى.

مەملەكەت باسشىسى كولىك-ترانزيت قۋاتىن ارتتىرۋ ٴۇشىن تاريف ساياساتىن جەتىلدىرىپ، كونۆەنسياعا قاتىسۋشى ەلدەردەگى تاسىمالداۋ جاعدايىن جاقسارتۋدى ۇسىندى.

"كاسپيي تەڭىزىنىڭ كەرەمەت ەكولوگيالىق جۇيەسىن ساقتاۋ ٴۇشىن بيولوگيالىق رەسۋرستاردى زاڭسىز كاسىپكە اينالدىرعاندارعا قارسى كۇرەس جۇرگىزۋ جونىندە ارنايى قۇجات قابىلداۋ قاجەت"، – دەدى قازاقستان پرەزيدەنتى.

سوڭىندا نۇرسۇلتان نازاربايەۆ كونۆەنسياعا جانە ٴبىرقاتار ەكى جاقتى قۇجاتتارعا قول قويۋ كاسپيي ماڭى مەملەكەتتەرىنىڭ دوستىق قارىم-قاتىناستارىن كورسەتەتىنىن، سونداي-اق بىرلەسىپ تىعىز ىنتىماقتاستىق ورناتىپ، كاسپيي تەڭىزىنە ۇقىپتى قاراۋ كەرەكتىگىن ايتتى.

"مەن ارىپتەستەرىمە – بارلىق ەلدىڭ باسشىلارىنا، سونداي-اق كونۆەنسيانى ازىرلەگەن ارنايى جۇمىس توبىنا وتە ماڭىزدى جۇمىس اتقارعانى ٴۇشىن ريزاشىلىعىمدى بىلدىرەمىن. سىزدەر بولماساڭىزدار بۇگىنگى جەتىستىككە جەتپەس ەدىك. اقتاۋ ٴسامميتىنىڭ قورىتىندىلارى كاسپيي تەڭىزىندەگى جان-جاقتى ٴىس-قيمىلدارىمىزدى ىلگەرىلەتۋگە ٴوز ۇلەسىن قوساتىن بولادى"، – دەدى نۇرسۇلتان نازاربايەۆ.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي