USD 334.89 EUR 361.61 RUB 5.28
استانا:

تاۋەلسىزدىكتەن قازاق حاندىعىنا دەيىن

فوتو: Ержан Жаубай

ەلوردانىڭ تاۋەلسىزدىك سارايىنىڭ عيماراتىندا ەل تاريحىنىڭ ٴاربىر جىلىنىڭ باستى وقيعالارى مەن جەتىستىكتەرى تۋرالى باياندايتىن «تاۋەلسىزدىك جىلناماسى - 25» فوتوكورمەسى اشىلدى، دەپ حابارلايدى baq.kz ٴتىلشىسى.

ونى استانا قالاسىنىڭ اكىمدىگى «national geographic قازاقستان» جۋرنالىمەن بىرلەسىپ ۇيىمداستىردى. قازاق ەلىنىڭ سوڭعى شيرەك عاسىرداعى قالىپتاسۋ كەزەڭى، اتاۋلى كۇندەرى، ەلەۋلى وقيعالارى مەن ٴجۇرىپ وتكەن جولىن ەسكە سالىپ، كورسەتەتىن كورمەگە قازاقستان جانە شەتەلدىك فوتومامانداردىڭ 80-نەن استام ەڭبەگى ۇسىنىلادى.

«بارلىعىڭىزدى كەلە جاتقان مەرەكەلەرمەن قۇتتىقتايمىز. ٴقازىر سارايدا نەشە ٴتۇرلى وقيعالار بولىپ جاتىر، ەرتەڭ ٴبىز تۇڭعىش پرەزيدەنت كۇنىن اتاپ وتەمىز، بيىل تاۋەلسىزدىگىمىزدىڭ 25 جىلدىعىن مەرەكەلەۋدەمىز، وسى مەرەكە قارساڭىندا اتاۋىندا «تاۋەلسىزدىك» اتاۋى بار وسى سارايدا قازاقستان جىلناماسىنىڭ كورمەسىن اشىپ وتىرمىز. بۇل جەردە فوتوسۋرەتتەر ارقىلى ەلىمىزدىڭ تاريحى، تابيعاتى جانە بايلىعى تۋرالى سىر شەرتەتىن 96-دان استام جۇمىس قويىلعان»، - دەپ ٴمالىم ەتتى تاۋەلسىزدىك سارايىنىڭ ديرەكتورى اسەل ٴومىرشينا.

فوتوتىلشىلەر ٴوز تۋىندىلارىن بۇل كورمەگە قويۋ ارقىلى قازاقستاننىڭ باي مادەني مۇراسىنا، ٴتول تاريحىنا، ۇلتتىق باستاۋىنا دەگەن ماحابباتى مەن قۇرمەتىن كورسەتۋدى الدارىنا ماقسات ەتىپ قويىپ وتىر.

«فوتو كورمەنى زەر سالا قاراساڭىزدار قازاقستان رەسپۋبليكاسى العاش رەت تاۋەلسىزدىگىن جاريالاعان قازىرگى قبتۋ-دىڭ، سول كەزدەگى مينيسترلەر كەڭەسىنىڭ عيماراتىنان باستالىپ، كەشە عانا تارازدا وتكەن «قازاق حاندىعىنىڭ 550» جىلدىق سالتاناتتى جيىنىندا قوس حاننىڭ ەسكەرتكىشى الدىندا ٴسوز سويلەپ تۇرعان ەلباسىمىزدىڭ بەينەسىمەن اياقتالادى. ياعني ٴبىز وسى تاۋەلسىزدىكتىڭ شيرەك عاسىرىندا ٴتۇپ-تاريحىمىزدى تانۋعا قول جەتكىزدىك دەگەن ٴسوز» - دەيدى كورمەنى ۇيىمداستىرۋشى «national geographic قازاقستان» جۋرنالىنىڭ جاۋاپتى شىعارۋشىسى ماقسات ياسىلباي ۇلى.

ازاتتىعىمىزدىڭ 25 جىلدىق مەرەيتويىنا ارنالعان فوتوكورمە قاراشانىڭ 30-نان باستاپ جىل سوڭىنا دەيىن استاناداعى تاۋەلسىزدىك سارايىنىڭ نەگىزگى كورمە زالىندا وتەدى.

سسىلكي پو تەمە:
كوممەنتاريي0

ۆاش كوممەنتاريي بۋدەت وپۋبليكوۆان پوسلە مودەراسيي