BAQ.kz - Қазақстан жаңалықтары USD 363.26 BAQ.kz - Қазақстан жаңалықтары EUR 420.11 BAQ.kz - Қазақстан жаңалықтары RUB 5.54
استانا:

شەرحان مۇرتازا شىندىقتىڭ شىراقشىسى ەدى – نۇرلان ورازالين

فوتو: ult.kz

شەرحان مۇرتازا دەپۋتات بولىپ تۇرعان كەزدە قالىڭ قازاق باسقادان كۇتپەسە دە، ودان ٴادىل، وتتى، جالىندى جانە شىن ٴسوزدى كۇتەتىن. بۇل تۋرالى اقىن، دراماتۋرگ، مەملەكەت جانە قوعام قايراتكەرى نۇرلان ورازالين جازۋشىمەن قوشتاسۋ كەزىندە ايتتى، دەپ حابارلايدى baq.kz ٴتىلشىسى.

«90 جىلدارى ۇلكەن الىپ يمپەريا ىدىراۋدىڭ الدىندا تۇرعان كەزدە «سوسيوليستىك قازاقستان» گازەتىنە شەراعاڭ كەلدى. وعان دەيىن «قازاق ادەبيەتى» گازەتىنىڭ تامىرىنا قان جۇگىرتىپ، ۇلتتىق ماسەلەنىڭ ٴبارىن كوتەرىپ جۇرگەن كەزى ەدى. ورتالىق كوميتەتىڭ شەشىمىمەن بۇل كىسى ورتالىق گازەتكە كەلدى، «سوسيوليستىك قازاقستان» دەگەن اتى 97 جىلى «ەگەمەن قازاقستان» بولىپ وزگەرتىلدى. مىنە، سول كەزدە بۇل كىسى پارلامەنتكە دەپۋتات بولىپ سايلاندى، سوندا قالىڭ قازاق باسقادان كۇتپەسە دە شەرحان مۇرتازادان ٴادىل، وتتى، جالىندى جانە شىن ٴسوزدى كۇتەتىن ەدى. ول كەزدەگى 360 دەپۋتاتتىڭ باسىم كوپشىلىگى قازاقتىڭ ينتەللەكتۋالدارى ەدى. سولاردىڭ اراسىنان داۋىسى ەڭ جارقىن شىققان جانە شىندىقتىڭ ٴبارىن شىڭعىرتىپ ايتىپ، كوشىمىزدى باسقارعان بىردەن-بىر تۇلعالاردىڭ ٴبىرى وسى شەرحان مۇرتازا بولاتىن. قالىڭ ەل تەلەديداردىڭ الدىنا شەرحاندى تىڭداۋ ٴۇشىن جينالاتىن. ويتكەنى ول ايتا بىلەتىن ەدى جانە ول ەشكىمنەن جاسقانباي، ەشكىمنىڭ الدىندا بۇگەجەكتەمەي ۇلتتىق قۇندىلىقتار جونىندە، ۇلتتىق ماسەلە جونىندە ٴدال سول كوشتىڭ باسىندا تۇردى. كەشەگى الاشتىڭ ارىستارى سەكىلدى قازاقتىڭ نامىسىنا قايراق، جىگەرىنە قامشى سالا بىلگەن ادام، سونىسىمەن ٴقادىرلى بولا ٴبىلدى»، - دەيدى ن. ورازالين.

سونىمەن قاتار ول، شەرحان مۇرتازانىڭ «قىزىل جەبە» كىتابىن جازۋ ٴۇشىن وتىز شاقتى جىلى كەتكەنىن، بۇكىل تاشكەننىڭ، ومبىنىڭ، سانكت-پەتەربۋرگتىڭ، ماسكەۋدىڭ، ورىنبوردىڭ ارحيۆتەرىنىڭ ٴبارىن اقتارعانىن ايتىپ ٴوتتى.

«رىسقۇلوۆتىڭ ٴومىر سۇرگەن كەزەڭى وتە كۇردەلى ەدى. الاش ارىستارىنىڭ بارلىعىنىڭ ٴسوزى ٴبىر جەردەن شىعىپ جاتپادى ول كەزدە. وسىنداي كۇردەلى زامان تۋرالى ەشقايسىسىنىڭ ٴالاجىبىن اتتاماي، سول كەزدەگى ۇلى تۇلعالارىمىز تۋرالى اقپارات الۋعا بولاتىنداي جانە سول كەزدەگى ٴومىردىڭ تاريحي شىندىعىن كوركەم جازعان شىعارما وسى «قىزىل جەبە» بولاتىن. سوندىقتان ٴبىز بۇگىن قاتارداعى جازۋشىنى عانا ەمەس، قازاق دەيتىن حالىقتىڭ ۇلى پەرزەنتىن، كەشەگى «الاش» دەيتىن ۇراندى كوتەرگەن ۇلى جۇرتتىڭ جالعاسى بولعان پەرزەنتىن سوڭعى ساپارعا اتتاندىرىپ وتىرمىز. شەرحان قازاقتىڭ، حالىقتىڭ پەرزەنتى بولىپ قازاقپەن بىرگە ماڭگى جاسايتىنى انىق»، - دەيدى ول.

جامبىل وبلىسىنان كەلگەن مەملەكەت جانە قوعام قايراتكەرى ومىربەك بايگەلدى جازۋشى جايىندا ەستەلىگىمەن ٴبولىسىپ، شەرحان مۇرتازانىڭ شىندىقتىڭ شىراقشىسى، قينالىپ جۇرگەن ادامداردىڭ سۇيەنىشى بولا بىلگەنىن جەتكىزدى.

«ٴومىر دەگەن قاراپ تۇرساڭ اعىپ تۇرعان ۇلكەن وزەن سياقتى. كۇنىنە ميلليوندار كەلەدى، ميللوندار كەتەدى. ٴبىراق سونىڭ ىشىندە كەلگەن، كەتكەن ۇلى ادامدار حالىقتىڭ ەسىندە ماڭگى ساقتالادى، حالىق ونى ەرەكشە اتاپ وتەدى. ٴقازىر ەلىمىزدە ٴىرى تۇلعا، ۇلى كىسى ومىردەن ٴوتىپ وتىر. بۇكىل حالقىمىز قايعىرىپ جاتىر. «از ٴومىر ٴسۇردى، ەرتە كەتتى» دەپ قايعىرىپ جاتقان جوق، ويتكەنى شەرحان جاقسى ٴومىر ٴسۇردى، 86 جاس جاسادى. ۇلكەن ادام كەتىپ قالدى، تازا ادام كەتىپ قالدى. حالىقتىڭ سۇيەنىشى، اقىلدىسى كەتىپ قالدى، دەپ سوعان وكىنىپ جاتىر. شەرحان شىندىقتىڭ شىراقشىسى بولدى، قينالىپ جۇرگەن ادامداردىڭ سۇيەنىشى بولا ٴبىلدى»، -دەيدى ول.

سونىمەن قاتار ول، جازۋشى ٴوز حالقىنىڭ ناعىز پاتريوتى بولعانىن، ٴوزىن ەمەس، ٴبىرىنشى حالقىن ويلاعانىن ايتىپ ٴوتتى.

«مەن سەناتتا ٴتوراعا بولىپ تۇرعاندا ول كىسى دەپۋتات بولدى، سوندا «مىنا كىسىگە ٴتورت بولمەلى پاتەر بەرىڭدەر» دەدىم. سوندا «نەعىلام مەن ونى، ٴۇيسىز ادامدار، بالا-شاعاسى كوپتەر السىن»، دەپ الماي قويدى. سونداي تازا، حالىقتى ويلايتىن ادام ەدى. جۇرتشىلىق وسىنداي ادامنىڭ كەتكەنىنە قايعىرىپ وتىر. ٴبىر جاعىنان بۇل دۇرىس تا شىعار، بۇل دا ەلگە ۇلگى. ەل وسىنى كورىپ سول ادامداي بولايىق دەيدى. جازۋشى كوپتى تاربيەلەگەن ادام، ۇلى بولعان ادامداردىڭ كوبى «شەراعاڭنىڭ شەكپەنىنەن شىعىپ ەدىك» دەگەن سوزدەردى ٴجيى ايتاتىن. بۇل سيرەك كەزدەسەتىن قۇبىلىس. مىقتى ادامداردىڭ ٴوزى «شەراعاڭنىڭ شەكپەنىنەن شىعىپ ەدىك» دەپ ماقتانىشپەن ايتقانىن كورىپ مەن تاڭقالاتىنمىن. سويتسەم ٴبارى دە شىنىن ايتقان ەكەن. قانشا تالانتتاردى اشتى، قازاقستاننىڭ ٴار تۇكپىرىنەن اكەپ تاربيەلەدى. سولاردىڭ ٴبارى ۇلى ادامدار بولدى، مىنە سونداي ەڭبەگىمەن قالعان كىسى. سودان كەيىن كۇيىپ-پىسىپ حالقىن ويلادى. سوندىقتان ارينە حالىق ول كىسىنى جاقسى كورەدى، سول ٴۇشىن دە بۇگىن قايعىرىپ جاتىر. ونداي ادام بولمايدى ەمەس، تاعى دا تۋادى. قازاقتىڭ قاسيەتتى جەرى، قاسيەتتى ەلىندە ۇلىلار كەلەدى. بۇل كىسى دە سوعان جول بوساتقان شىعار دەپ ويلايمىن. ەندى جاڭا ۇلىلار كەلەدى، شەرحاننىڭ وسى ٴومىرىن ارى قاراي جالعاستىراتىن تازا ادامدار كەلەدى دۇنيەگە، جاقسىلىق زامان بولادى دەگەن ويدامىن»، -دەدى ومىربەك بايگەلدى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي