USD 334.31 EUR 355.17 RUB 5.31
استانا:

كۇرشىمدە «اعا بۋىن وكىلدەرىنىڭ اۋداندىق i فورۋمى» ٴوتتى

شىعىس قازاقستان وبلىسى كۇرشىم اۋدانىندا «ۇلت قۇندىلىعىنىڭ قازىناسى اعا بۋىن وكىلدەرى-ماڭگىلىك ەلدىڭ مىزعىماستىعىنىڭ كەپىلى» اتتى كۇرشىم اۋدانى «اعا بۋىن وكىلدەرىنىڭ اۋداندىق i فورۋمى» بولىپ ٴوتتى. شارانى «كۇرشىم اۋداندىق مەشىتىمەن» اۋدان اكىمدىگى بىرلەسىپ ۇيىمداستىردى، دەپ حابارلايدى baq.kz.

شىعىس قازاقستان وبلىستىق «حاليفا التاي» مەشىتىنىڭ ٴباسپاسوز قىزمەتىنىڭ مالىمەتىنشە، فورۋمعا قمدب وسكەمەن ايماعىنىڭ وكىل يمام ەرمەك قاجى تاسبولات ۇلى باستاعان يمامدار جانە كۇرشىم اۋدانىنىڭ اكىمى سەيسەنعازى چۋكايەۆ قاتارلى اۋدان باسشىلارى مەن مەملەكەتتىك مەكەمەلەردىڭ وكىلدەرى قاتىستى.

اۋداندا العاش رەت ۇيىمداستىرىلعان اتاۋلى شاراعا كۇرشىم، مارقاكول وڭىرىنە سىيلى، ەلگە بەدەلدى، ٴدىندار، قايراتكەر اقساقالدار مەن اجاۋلىقتى انالار جالپى سانى 200-دەن استام اعا بۋىن وكىلدەرى جينالدى.

سونىمەن قاتار كورشىلەس زىريان، قاتونقاراعاي، كوكپەكتى، زايسان اۋداندارىنىڭ باس يمامدارى مەن اعا بۋىن وكىلدەرى كەلدى.

فورۋم مەملەكەتىمىزدىڭ انۇرانىمەن باستالىپ، اۋدان اكىمى س.چۋكايەۆتىڭ قۇتتىقتاۋ سوزىمەن اشىلدى.

بۇدان سوڭ قمدب وسكەمەن ايماعىنىڭ وكىل يمام ەرمەك قاجى تاسبولات ۇلى «زايىرلى قوعامداعى اقساقالدار ينستيتۋتىنىڭ ٴرولى» جايلى بايانداما جاسادى. ول ٴوز سوزىندە ۇلتىمىزدىڭ يسلاممەن استاسقان تاماشا سالت-ساناسىن ساقتاي وتىرىپ، اقساقالدى اتالار مەن اقجاۋلىقتى انالارىمىزدى قۇرمەتتەپ، جاستاردى جات اعىمداردان ساقتاندىرۋ كەرەكتىگىن ايتا كەلە، ەلىمىزدە العاش رەت وسكەمەن ايماعى وكىلدىگىنىڭ باستاماسىمەن ۇيىمداستىرىلعان وسى فورۋمنىڭ ماڭىزدىلىعى جايلى تەرەڭ تالداپ بەردى.

سونىمەن قاتار باسقوسۋدا «كۇرشىم اۋدانى مەشىتىنىڭ» باس يمامى تىلەيبەك سويان ۇلى اعا بۋىن وكىلدەرىن قۇرمەتتەۋ، جانە سالت-cانانى ساقتاپ، ۇلتتىق قۇندىلىقتاردى ۇلىقتاۋداعى ولاردىڭ ٴرولى جايلى بايانداما جاسادى.

«وسكەمەن قالاسىندا وبلىستا تۇڭعىش رەت وتكىزىلگەن اقساقالدار فورۋمىنىڭ جالعاسى رەتىندە وسى شارانى ۇيىمداستىرىپ وتىرمىز. بۇل فورۋم ٴدىني باسقارمادان جاريالانعان «ٴدىن جانە تاريح تاعىلىمى جىلى» اياسىندا اتقارىلعان كەڭ اۋقىمدى ىستەرىمىزدىڭ ٴبىرى» دەپ اتاپ ٴوتتى كۇرشىم اۋدانىنىڭ باس يمامى تىلەيبەك سويان ۇلى.

القالى باسقوسۋدا اۋداندىق اقساقالدار كەڭەسىنىڭ ٴتوراعاسى ب.اقتەكەنوۆ، كۇرشىم اۋدانىنىڭ «قۇرمەتتى ازاماتى» ٴا.تۇرسىنحان ۇلى قاتارلى قارتتار ٴسوز سويلەپ، بۇگىنگى تاڭدا وسىنداي باسقوسۋدىڭ اسا ماڭىزدى، حالىققا قاجەتتىلىگىن ايتىپ، سىندارلى ۇسىنىستارىن ورتاعا سالدى.

فورۋمعا قاتىسۋشىلار ٴبىراۋىزدان ۇندەۋ قابىلدادى.

وسىناۋ يگى شارا اياسىندا كۇرشىم اۋدانىنىڭ باسشىلىعى اسىل ٴدىنىمىزدى ۇلىقتاپ، حالقىمىزعا عيبراتتى تاربيە بەرىپ كەلە جاتقان يمامداردى جانە اقساقالدى قارتتاردى ماراپاتتاپ، قۇرمەت كورسەتتى.

فورۋم جۇمىسى ٴساتتى اياقتالدى.

كوممەنتاريي0

ۆاش كوممەنتاريي بۋدەت وپۋبليكوۆان پوسلە مودەراسيي