BAQ.kz - Қазақстан жаңалықтары USD 371.31 BAQ.kz - Қазақстан жаңалықтары EUR 419.32 BAQ.kz - Қазақстан жаңалықтары RUB 5.59
استانا:

كريستيان كلەممەتسەن: قازاقستاننىڭ تۋريستىك تە، ترانزيتتىك-لوگيستيكالىق مۇمكىندىكتەرى دە ٴبىزدى قىزىقتىرادى

استانا، baq.kz. ەلىمىزدىڭ ەلشىلىگىنىڭ ۇيىمداستىرۋىمەن وسلو قالاسىندا «نورۆەگياداعى قازاقستاننىڭ ۇلتتىق كۇنى» ٴوتتى. شاراعا نورۆەگيا كورولدىگىنىڭ بيلىك، ساياسي پارتيالار، مەملەكەتتىك ەمەس جانە قوعامدىق ۇيىمدار، باق، بيزنەس، ديپلوماتيالىق كورپۋس، سونداي اق جەرگىلىكتى قازاق دياسپوراسىنىڭ وكىلدەرى جينالدى.

قازاقستان ديپلوماتتارى قوناقتار نازارىنا ەلباسى نۇرسۇلتان نازاربايەۆتىڭ «قازاقستان جولى» كىتابىن نورۆەگ تىلىندە، سيرياداعى شيەلىنىستى جاعدايدى شەشۋدەگى استانانىڭ ۇلەسى تۋرالى «بىتىمگەر» ەڭبەگىن تاعى باسقا كىتاپتارىن اعىلشىن تىلىندە ۇسىندى.

جيىنعا قاتىسۋشىلار قازاقستان پرەزيدەنتىنىڭ «اتوم» باستاماسىنا قولداۋ ٴبىلدىرىپ، ىسكە اسىرۋ ماقساتىندا يادرولىق سىناقتاردى توقتاتۋ جونىندەگى پەتيسياعا قول كويۋ اكسياسىنا قاتىستى.

شاقىرىلعاندار ەلباسىنىڭ قازاقستان حالقىنا جولداۋىندا جاريا ەتىلگەن باستامالارىمەن جانە جاقىندا جارىق كورگەن « ۇلى دالانىڭ جەتى قىرى» ماقالاسىندا ايتىلعان ۇلتتىق تاريحىمىزدىڭ، مادەنيەتىمىزدىڭ جاھاندىق وركەنيەتكە قوسقان ۇلەسى تۋرالى كەڭىنەن تانىستى.

سونداي اق، قوناقتارعا قازاقستاننىڭ تۋريستىك مۇمكىندىكتەرى ارنايى تانىستىرىلدى. قازاقستاننىڭ تۋريستىك حابىنىڭ جاڭا مۇمكىندىكتەرى جايلى «قازاق تۋريزم» وتاندىق كومپانياسى مەن كەلەر جىلى تۇراقتى تۇردە ۇلى دالا ەلىنە تۋريستىك ساپارلار ۇيىمداستىرۋدى قولعا نورۆەگيالىق «ۆيتۋس» كومپانياسى جينالعاندارعا تولىققاندى اقپارات بەردى.

«قازاقستاننىڭ تۋريستىك مۇمكىندىكتەرىمەن قاتار ترانزيتتىك، لوگيستيكالىق مۇمكىندىكتەرى دە ٴبىزدى قىزىقتىرادى. ٴبىزدىڭ جۇك تاسىمالى تەمىرجول پوەزدارى ەۋروپادان ورتالىق ازياعا تاۋار تاسيدى. سوندىقتان قازاقستاننىڭ قۇرلىقتاعى لوگيستيكاسىنا سۇرانىس جوعارى. شىنىندا دا، بۇل وتە ٴتيىمدى مارشرۋت، تەڭىز جولىنان جىلدام، اۋە قاتىناسىنان الدەقايدا ارزان» - دەيدى «ماكسيشيپينگ» لوگيستيكالىق كومپانياسىنىڭ كوممەرسيالىق ديرەكتورى كريستيان كلەممەتسەن.

قازاقستان پرەزيدەنتىنىڭ ۇلتتىق سانانى تۇلەتكەن « ۇلى دالانىڭ جەتى قىرى» ماقالاسىندا ايتىلعان تەرەڭ ويلاردى جاھانعا جەتكىزۋ ماقساتىندا، قازاقتىڭ تاريحى مەن مادەنيەتىنەن مول ماعلۇمات بەرەتىن «ٴسان مەن ساحنا» حالىقارالىق فەستيۆالىنىڭ كورسەتىلىمى بولدى. فەستيۆال ديرەكتورى، بەلگىلى ەتنو ديزاينەر حانۋم ايداشتىڭ بۇل سكانديناۆيا ەلىنە ەكىنشى ساپارى. وسى جولى فەستيۆال شەڭبەرىندە نورۆەگيالىقتارعا قىزىلوردالىق ەتنوديزاينەر قارلىعاش ٴىلياسوۆا مەن اقتاۋلىق ٴمولدىر بەكىبايەۆانىڭ «شىن جۇرەكتەن» كوللەكسياسى تانىستىرىلىپ، جينالعانداردى تامساندىردى.

«مەن ٴۇشىن نورۆەگياداعى قازاقستان كۇنىنە قاتىسۋ ۇلكەن قۇرمەت. قازاق ۇلتتىق كيىم ۇلگىلەرى تانىستىرىلعان شوۋ وتە كەرەمەت بولدى. قازاقستان نورۆەگيادان وتە الىس، سوندىقتان مەن ميلليونداعان سكانديناۆيالىقتار ساناتىندا قازاق جەرىمەن، مادەنيەتىمەن تانىس ەمەس ەدىم. الايدا، بۇگىنگى شارانىڭ ارقاسىندا ۇلى دالا ەلىمەن دە، حالقىمەن جاقىنىراق تانىسىپ، ٴتانتى بولدىم. ٴتىپتى وزىمىزبەن ۇقساستىقتار تاۋىپ تاڭ قالدىم!» - دەيدى وسلو قالاسىنداعى «كون-تيكي» مۇراجايىنىڭ ديرەكتورى مارتين بيل.

سۋرەتتەرى الەمنىڭ ونداعان ەلدەرىندە جەكەلەگەن كوللەكسيالاردا ساقتالعان، بەلگىلى سۋرەتشى، قازاقستان ەڭبەك سىڭىرگەن مادەنيەت قايراتكەرى گۇلميرا تەلعوزيەۆانىڭ سۋرەت كورمەسى دە ۇلى دالا وركەنيەتى مەن ۇلتتىق بولمىسىمىزدى ۆيكينگتەر ەلىنە تانىتۋدىڭ زاڭدى جالعاسى ىسپەتتەس بولدى.

«نورۆەگياداعى قازاقستاننىڭ ۇلتتىق كۇنى» قازاقستان تاۋەلسىزدىگىنىڭ 27-جىلدىعىنا ارنالعان ديپلوماتيالىق قابىلداۋمەن اياقتالدى. جيىن بارىسىندا نورۆەگيا كورولدىگىندەگى قازاقستاننىڭ ۋاقىتشا سەنىمدى وكىلى ٴىلياس وماروۆ ەكى جاقتى بايلانىستى دامىتۋ باعىتىندا ۇستىمىزدەگى جىلى اتقارىلعان جۇمىستار جايلى ايتىپ بەردى. ديپلومات قازاقستان نورۆەگيا ەلىمەن جان جاقتى كەڭىنەن سەرىكتەستىك ورناتۋعا نيەتتى ەكەنىن، «سوندىقتان قازاقستاندىقتار فوردتار ەلى تۋرالى، ال نورۆەگيالىقتاردىڭ ۇلى دالا ەلى جايلى تانىمى بارىنشا وسەتىنى ٴسوزسىز» - دەيدى ول.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي