USD 334.89 EUR 361.61 RUB 5.28
استانا:

قىران بۇركىت پەن جۇيرىك تازى - قازاق ۇلتىنىڭ اڭشىلىق مادەنيەتىنىڭ باستاۋى

فوتو: Ержан Жаубай

قر ۇلتتىق مۋزەيىندە «قانسونار» اڭشىلاردىڭ قوعامدىق بىرلەستىگى مەن اڭشىلىق شارۋاشىلىعى سۋبەكتىلەرى رەسپۋبليكالىق قاۋىمداستىعى ۇيىمداستىرعان قازاقستان رەسپۋبليكاسى تاۋەلسىزدىگىنىڭ 25 جىلدىعىنا ارنالعان «كادردا تازى، توبەت جانە اۋشى جىرتقىش قۇستار» فوتوكورمەسىنىڭ اشىلۋ سالتاناتى ٴوتتى، دەپ حابارلايدى baq.kz ٴتىلشىسى.

كورمەنىڭ ماقساتى – قازاق حالقىنىڭ مادەني-تاريحي مۇراسىنىڭ ەلەمەنتى رەتىندە تازى جانە توبەت، سول سياقتى اۋشى جىرتقىش قۇستاردىڭ ۇلتتىق تۇقىمىن دارىپتەۋ بولىپ تابىلادى. ەكسپوزيسياعا يت پەن قۇس يەلەرىنىڭ 50 فوتوتۋىندىلارى قويىلعان.

«بۇگىنگى كورمەدە نازارلارىڭىزعا ۇسىنىلىپ وتىرعان يتتەر مەن اۋشى قۇستاردىڭ ٴبىزدىڭ ۇلتتىق مادەنيەتىمىزدىڭ ۇلكەن سالاسى ەكەنى بەلگىلى. ونىڭ ۇستىنە كەشەگىدەن قالعان باعا جەتپەس مۇرا دەپ ەسەپتەيمىز. ەندىگى مىندەت وسىنىڭ ٴبارىن ساقتاپ قالۋ اسىل تۇقىمدى يتتەر مەن اۋشى قۇستاردى قورعاۋ ٴارى تۇقىمىن جوعالتپاي ٴوسىرۋ»، – دەدى، كورمەنىڭ ماڭىزدىلىعىنا توقتالعان «قانسونار» رەسپۋبليكالىق قاۋىمداستىعىنىڭ ٴتوراعاسى ورالباي ابدىكارىموۆ كورمەنىڭ اشىلۋ سالتاناتىندا.

ٴوز كەزەگىندە ۇلتتىق مۋزەي ديرەكتورى دارحان مىڭباي ٴتول مادەنيەتىمىزدىڭ ٴبىر سالاسى اڭشىلىق جانە قۇسبەگىلىك ونەردى ناسيحاتتاپ جۇرگەن «قانسونار» رەسپۋبليكالىق قاۋىمداستىعىنا العىسىن ٴبىلدىردى.

«ٴبىزدىڭ مادەنيەتىمىزدىڭ تاريحى وتە تەرەڭدە. قازىرگىدەي تاۋەلسىزدىك العان شاعىمىزدا سونىڭ ٴبارىن حالىققا كورسەتۋىمىز كەرەك. تاۋەلسىزدىگىمىزدىڭ 25 جىلدىعى قارساڭىندا بۇگىنگىدەي كورمە اشۋ ارقىلى بۇل سالانى دا ۇمىت قالدىرىپ جاتپاعانىمىزدى كورسەتكىمىز كەلەدى. يت جۇگىرتىپ، قۇس سالۋ ٴبىزدىڭ بەكزاتتىق ونەرىمىزگە جاتادى. شىن مانىندە اڭشىلىقپەن ونىڭ ٴقادىرىن بىلەتىن ادامدار عانا اينالىسقان»، – دەدى مۋزەي ديرەكتورى.

قازاقستانداعى حالىقتىق داستۇرلەردىڭ ەڭ بەينەلىلەرىنىڭ ٴبىرى ەجەلدەن-اق تازى يتتەرمەن جانە جىرتقىش قۇستارمەن اڭعا شىعۋ بولاتىن. وسى جاقىن ۋاقىتقا دەيىن تازى مەن توبەت جويىلىپ كەتۋگە شاق قالعان ەدى. يتتەردىڭ تۇقىمدارىن ساقتاپ قالعان ەنتۋزياستتاردىڭ ارقاسىندا جانە «قانسونار» اڭشىلاردىڭ قوعامدىق بىرلەستىگى مەن اڭشىلىق شارۋاشىلىعى سۋبەكتىلەرى رەسپۋبليكالىق قاۋىمداستىعىنىڭ باستاماسىمەن تازى مەن توبەت زاڭنامالىق تۇرعىدان مويىندالدى. وسى وقيعاعا بايلانىستى قازاقستان ۇلتتىق بانكى تازى مەن توبەت بەينەلەنگەن كوللەكسيالىق مونەتالار توپتاماسىن شىعاردى. كەلەسى قادام قازاقستاننىڭ اۋشى جىرتقىش قۇستارىن ساقتاۋ بولىپ وتىر.

فوتوكورمەنىڭ قوعام نازارىن جانۋارلار دۇنيەسىن قورعاۋعا جانە ساقتاۋعا اۋدارۋ، سول سياقتى ٴاربىر ادامنىڭ بويىندا جانۋارلار الەمىنە دەگەن قايىرىمدىلىقتى وياتۋ سىندى الەۋمەتتىك ماڭىزدى مىندەتى دە بار. كورمەگە قويىلعان تۋىندىلار ٴار ادامعا وسى مىندەتتى جەتكىزۋگە شاقىرادى.

كوممەنتاريي0

ۆاش كوممەنتاريي بۋدەت وپۋبليكوۆان پوسلە مودەراسيي