BAQ.kz - Қазақстан жаңалықтары USD 367.06 BAQ.kz - Қазақстан жаңалықтары EUR 416.17 BAQ.kz - Қазақстан жаңалықтары RUB 5.56
استانا:

بالعابەك مىرزايەۆ: جىلىنا 10 مىڭعا جۋىق اككاۋنتقا ساراپتاما جاسايمىز

استانا، baq.kz. استانادا ەكى كۇنگە جالعاساتىن وڭىرلەردەگى-اقپاراتتىق ٴتۇسىندىرۋ توپتارىنا ارنالعان «حالىقتىڭ ٴدىنتانۋ ساۋاتتىلىعىن ارتتىرۋ ماسەلەلەرى بويىنشا ٴاقپاراتتىق-تۇسىندىرۋ جۇمىسىنىڭ تيىمدىلىگى» تاقىرىبىنداعى رەسپۋبليكالىق سەمينار باستالدى.

قازاقستان رەسپۋبليكاسى قوعامدىق دامۋ مينيسترلىگىنىڭ قوعامدىق كەلىسىم كوميتەتى 8-9 قاراشا كۇندەرى ەلىمىزدەگى ٴدىن ماسەلەلەرىنە ارنالعان سەمينار وتكىزىپ جاتىر.

«ەكى كۇن ىشىندە جالپى ٴدىن سالاسىنا قاتىستى ورىن العان پروسەستەر جايىندا ساراپشىلار پىكىر ٴبىلدىرىپ، قازىرگى تاڭدا قازاقستانداعى ٴدىن سالاسىندا قانداي جاعدايلار ورىن الىپ جاتقاندىعى تۋراسىندا ايتىلادى. سونىمەن قاتار، ەل ىشىندەگى مەملەكەتتىك-كونفەسسيالىق قاتىناستار، ٴدىن مەن زايىرلىلىق اراقاتىناسىنىڭ الەۋمەتتىك-مادەني كونتەكستىندەگى سيپاتى، جانە دە ٴدىني ەكسترەميزم مەن تەرروريزمگە قارسى ٴىس-قيمىل بويىنشا مەملەكەتتىك ورگاندار قانداي جۇمىس جۇرگىزىپ جاتقاندىعى ايتىلادى» - دەيدى ۇيىمداستىرۋشىلار.

سەمينار بارىسىندا قوعامدىق كەلىسىم كوميتەتى ٴتوراعاسىنىڭ ورىنباسارى بالعابەك مىرزايەۆ، قازاقستاندىق جەتەكشى ۋنيۆەرسيتەتتەردىڭ پروفەسسورلارى مەن دوسەنتتەرى، سونداي-اق، ٴدىن جانە كونفەسسياارالىق قاتىناستار سالاسىنداعى ساراپشىلار بايانداما جاسايدى.

«ٴبىز جىل سايىن الەۋمەتتىك جەلى قولدانۋشىلار اراسىندا 10 مىڭعا جۋىق اككاۋنتقا ارنايى ساراپتاما جاساپ وتىرامىز. بيىل 6000 اككاۋنتقا ارنايى باقىلاۋ جۇرگىزدىك. سولاردىڭ ىشىندە 2000-نان استامى ٴدىني ەكسترەميزمدى ناسيحاتتاۋشى، وزگە اعىمداردى ناسيحاتتايتىن ەلەمەنتتەرى بار اككاۋنتتار بولىپ شىقتى. ٴبىز ولارعا ەسكەرتۋ جاسادىق» - دەيدى بالعابەك مىرزايەۆ.

سونىمەن قاتار ول جات اعىمداردىڭ جەتەگىندە كەتۋشىلەردىڭ نە سەبەپتى وسى باعىتقا كەتەتىنىن، ونىڭ جولدارى قانداي ەكەنىن ايتىپ بەردى.

«سەبەبى دە، جولى دا كوپ. مىسالى، ٴبىر جولى ٴبىر جىگىتتىڭ اناسى اۋىرىپ جاتقان. وعان وتا جاساۋ ٴۇشىن كوپ اقشا كەرەك. ال جاڭاعى جىگىت اقشا سۇراعان ادام، «جۇمىس ىستەپ وتەرسىڭ» دەپ كەرەك سومانى بەرەدى. سونداعى ۇسىنىپ وتىرعان جۇمىسى – قولدانىلعان سوتكا ساتۋ. «سەن وسى سوتكالاردى ساتقان كەزدە الۋشىعا، «ىشىنە ٴبىر جاقسى ۋاعىز ەنگىزىپ قويدىم، قالاساڭىز تىڭداي جۇرەرسىز» دەگەن ٴبىر اۋىز ٴسوزدى جاناشىرلىقپەن ايتساڭ بولدى» دەيدى. جاڭاعى جىگىت ٴدال سولاي جاسايدى. مىنە، ادامنىڭ بويىنداعى مۇقتاجدىقتى وزگەلەر قالاي پايدالانادى» - دەيدى قوعامدىق كەلىسىم كوميتەتى ٴتوراعاسىنىڭ ورىنباسارى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي