BAQ.kz - Қазақстан жаңалықтары USD 371.31 BAQ.kz - Қазақстан жаңалықтары EUR 419.32 BAQ.kz - Қазақстан жаңалықтары RUB 5.59
استانا:

«ۇلتتىق مۋزەيگە سىي تارتۋ» اكسياسىمەن 3000 استام قۇندى جادىگەر قابىلداندى

فوتو: Нұржас Жақсыбай

استانا، baq.kz ٴتىلشىسى. قر ۇلتتىق مۋزەيىندە «ۇلتتىق مۋزەيگە سىي تارتۋ» اكسياسىنىڭ ٴۇش جىلدىق قورىتىندىسى بويىنشا وتكەن كورمەگە تاريحي تۇلعالاردىڭ جادىگەرلەرى قويىلدى.

بۇل اكسيا 2015 جىلدىڭ 18 ناۋرىزىنان بەرى ٴداستۇرلى تۇردە ۇيىمداستىرىلىپ كەلەدى. اكسيانىڭ نەگىزگى ماقساتى – ۇلتتىق تاريحي-مادەني مۇرالارىمىزدى ساقتاۋ ماسەلەسىنە قوعام نازارىن اۋدارۋ، ەل اراسىندا ەلەۋسىز جاتقان تاريحي ماڭىزى زور قۇندى زاتتاردى، ۇلتىمىزدىڭ ۇلى تۇلعالارىنىڭ جادىگەرلەرىن كاسىبي تۇرعىدا ساقتاۋ، كوپشىلىك نازارىنا ۇسىنۋ.

وسى ۋاقىتقا دەيىن اتالمىش شارا استانا، الماتى، قىزىلوردا، شىمكەنت، اقتوبە، قوستاناي، ورال، پەتروپاۆل، تاراز، تالدىقورعان قالالارىندا وتكىزىلدى. ٴۇش جىلعا ۇلاسقان اكسياعا 300 استام جەكە تۇلعالار قاتىسىپ، ەلىمىزدىڭ باس مۋزەيىنىڭ قورىنا بارلىعى 3000 استام اسا قۇندى جادىگەر قابىلداندى.

«اكسيا تۋرالى ەل اۋزىنان ەستىپ باسقا وڭىرلەردەن كەلگەن كىسىلەر كوپ بولدى. ٴار وتباسىندا اتا-بابالارىنان، اجەلەرىنەن قالعان زاتتاردى ايتىپ، ولاردى مۋزەيگە تاپسىرۋ مارتەبە سانالدى. ول زاتتاردى مۋزەيدىڭ ارنايى قىزمەتكەرلەرى ساراپتاما-ىرىكتەۋ كوميسسياسىنان وتكىزىپ، تاجىريبەلى ماماندار شەشىمىن ايتىپ، رەتتەپ، وسى مۋزەيگە لايىقتى دەپ قورعا تاپسىرىلدى»، - دەدى ۇلتتىق مۋزەيدىڭ قورلاردى ەسەپكە الۋ ٴبولىمىنىڭ جەتەكشىسى باتەش اقباسوۆا.

ول 2018 جىلى اكسيا الدىقورعان مەن تاراز قالالارىندا جوعارى دەڭگەيدە وتكىزىلگەنىن اتاپ ٴوتتى. اتالعان جەرلەردە 50-دەن استام ادام 500-دەن استام زاتتى مۋزەيگە تاپسىرعان.

«باۋىرجان مومىش ۇلىنا قاتىستى زاتتاردى زەينەپ احمەتوۆا ٴوز قولىمەن تاپسىردى. بەلگىلى ساياساتكەر د.قونايەۆقا تيەسىلى زاتتار كەلدى. جۋىردا دۇنيەدەن وتكەن جازۋشى شەرحان مۇرتازاعا قاتىستى كوپ زاتتار كەلىپ ٴتۇستى. اكىم تارازي زاتتارىن ٴوزى تابىس ەتتى. قورىتىندى كورمەگە ارنايى دايىندالىپ، تانىمال تۇلعا ج.تاشەنوۆتىڭ، ر.باعلانوۆانىڭ زاتتارى قويىلدى. سىرىمبەت دەگەن جەردەن شوقان ٴۋاليحانوۆتىڭ اجەسى ايعانىم اپامىزدىڭ تەگەنەسى كەلدى. ۇلتتىق مۋزەيىمىز قاسيەتتى ورىنعا اينالىپ وتىر. بولاشاق ۇرپاققا كورسەتەر ۇلگىمىز مول دەپ سانايمىز»، - دەدى ول.

باتەش اقباسوۆا اكسياعا ۇلەس قوسقان، مۋزەي قورىن بايتىقان ازاماتتارعا العىسىن ايتتى. ونىڭ ايتۋىنشا، كەز كەلگەن ادام مۋزەيگە جادىگەرلەردى تاپسىرا الادى.

بۇگىن قورىتىندى كورمەگە 2015 جىلدان باستاپ بۇگىنگى تاڭعا دەيىنگى «ۇلتتىق مۋزەيگە سىي تارتۋ» اكسياسى بويىنشا جيناقتالعان قۇندى جادىگەرلەر قويىلدى.

ولاردىڭ اراسىندا د. قونايەۆتىڭ باس كيىمى مەن كوستيۋم-شالبارى، جەكە زاتتارى، كسرو حالىق ٴارتىسى س.قوجامقۇلوۆتىڭ شاپانى مەن تاياعى، م.ماقاتايەۆتىڭ جەكە زاتتارى، ج.تاشەنوۆتىڭ جەكە زاتتارى بار.

ٴا.قاستەەۆتىڭ سۋرەتتەرى، پلەنەردە قولدانعان قولشاتىرى، ك.اقىشەۆتىڭ قۇجاتتارى مەن جەكە زاتتارى، ش.مۇرتازانىڭ شاپانى، قولجازباسى، ٴا.مامبەتوۆتىڭ قول سومكەسى، ە.سەركەبايەۆتىڭ جەكە زاتتارى، ع.جۇبانوۆانىڭ كوزىلدىرىك سالعىشى، ە.راحماديەۆتىڭ باس كيىمى، ٴانىنىڭ نوتاسى، ٴا.كەكىلبايەۆتىڭ قويىن داپتەرى، فوتوسۋرەتى بار.

ٴو.جانىبەكوۆتىڭ اڭىزعا اينالعان «سەنزور» قايشىسى، باكىسى، ٴا.ٴتارازيدىڭ جەكە زاتتارى، جازۋ ماشينكاسى، م.ەراليەۆانىڭ بايانى مەن ساحنالىق كيىمدەرى، م.جارقىنبەكوۆتىڭ مۋزىكالىق اسپاپتارى، ن.تىلەنديەۆتىڭ ديريجەر تاياعى مەن كوزىلدىرىگى، ش.قالداياقوۆتىڭ باس كيىمى مەن پيانينوسى بار.

ج.ۇشكەمپىروۆتىڭ مەدالى، ۆ.سميرنوۆتىڭ سپورتتىق كيىمى، ر.باعلانوۆانىڭ ساحنالىق كيىمى، م.تولەبايەۆتىڭ ٴومىربايانى، ع.قايىربەكوۆ پەن ج.ناجىمەدەنوۆتىڭ قولجازبالارى، ى.جاقايەۆ قولدانعان وراق بار.

ا.ۆينوكۋروۆتىڭ ۆەلوسيپەدى جانە قازاقستاندىق وليمپيادا چەمپيوندارى مەن جۇلدەگەرلەرىنىڭ سپورت كيىمدەرى مەن زاتتارى بار.

شاراعا مەملەكەت جانە قوعام قايراتكەرى د.ا.قونايەۆتىڭ جيەنى جاننەتا سەرىكبايەۆا، قازاقستاننىڭ ەڭبەك سىڭىرگەن ونەر قايراتكەرى، ايتىسكەر اقىن نادەجدا لۋشنيكوۆا كەلدى.

سونىمەن بىرگە، ٴابىلحان قاستەەۆتىڭ شوبەرەسى ايسانىم قاستەەۆا، «امىرە» فيلمىندەگى باس كەيىپكەردىڭ ٴوولىن سومداۋشى، اكتەر سانجار ماديەۆ، ماريام جاگورقىزىنىڭ نەمەرەسى قابيبا نۇربەكوۆا جانە ت.ب. قاتىستى.

سونداي-اق، بۇگىن امىرە قاشاۋبايەۆتىڭ كۇمىس مەدالى مەن، «امىرە» فيلمىنە ارنايى جاسالعان ەكى دومبىرا مۋزەيگە تابىس ەتىلدى.

فوتو/ۆيدەو: نۇرجاس جاقسىباي


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

سسىلكي پو تەمە:
كوممەنتاريي