BAQ.kz - Қазақстан жаңалықтары USD 360.12 BAQ.kz - Қазақстан жаңалықтары EUR 409.67 BAQ.kz - Қазақстан жаңалықтары RUB 5.33
استانا:

مەملەكەتتىك تىزىمگە كىرمەگەن، ٴبىراق ەل قاسيەتتى دەپ تانىعان ەسكەرتكىشتەر دە بار — ٴابدىعالي ۇلى

«قازاقستاننىڭ كيەلى جەرلەرى گەوگرافياسى» ارنايى جوباسى اياسىندا ەلىمىزدە رەسپۋبليكالىق دەڭگەيدەگى بوزوق، بوتاي جانە سارايشىق — ٴۇش مۋزەي-قورىعى اشىلدى. بۇل تۋرالى بۇگىن ۇكىمەتتىڭ ٴباسپاسوز ورتالىعىندا وتكەن بريفينگتە «قاسيەتتى قازاقستان» ولكەتانۋدى دامىتۋ ورتالىعىنىڭ ديرەكتورى، ساياسي عىلىمدار كانديداتى بەرىك ٴابدىعالي ۇلى ايتتى، دەپ حابارلايدى baq.kz اقپارات اگەنتتىگى primeminister.kz-كە سىلتەمە جاساپ.

ەسكەرتكىشتەردى قورعاۋ ٴۇشىن مەملەكەتتىك مەكەمە بولۋى قاجەت ەكەنىن ايتقان ورتالىق باسشىسى بۇل ولاردى قارجىلاندىرۋدى جەڭىلدەتەتىنىن دە جەتكىزدى.

«وسى ورايدا، رەسپۋبليكالىق دەڭگەيدە ٴۇش قورىق اشىلدى. بۇل ۇلكەن جەتىستىك. ونىڭ ىشىندە، العاشقىسى – سارايشىق، ەكىنشىسى – جىلقى مالى العاش قولعا ۇيرەتىلگەن جەر ەكەنىن بۇكىل الەم مويىنداعان سولتۇستىك قازاقستانداعى بوتاي. ٴۇشىنشىسى – بوزوق»، — دەدى ول.

سونداي-اق سپيكەر جوبانىڭ تۇڭعىش رەت جالپىۇلتتىق دەڭگەيدە ىسكە اسىرىلىپ جاتقانىن ايتتى. ەلىمىزدەگى ٴاربىر اۋىلدا، ەلدە مىڭجىلدىق تاريحى بار قاسيەتتى جەرلەر بۇرىننان بار. بۇل جوبا سونىڭ ٴبارىن ٴبىر جۇيەگە كەلتىرۋ ماقساتىندا قولعا الىنعان.

«كيەلى جەرلەر ارقىلى ەل ٴوز-وزىن تانۋ، تاريحىن، ٴداستۇرىن تانۋدىڭ ماڭىزىن تۇسىنەدى. تۋريستىك ساپارمەن سول جەرلەردى ارالاپ شىققاندا باتىستاعى اعايىندار شىعىستاعى قاسيەتتى جەرلەردى بىلسە، شىعىستاعى اعايىندار وڭتۇستىكتەگى جەرلەردى بىلسە، ٴسويتىپ، بۇكىل قازاقستانداعى قاسيەتتى جەرلەر بارىنە بىردەي بەلگىلى بولسا، بۇل ەلدىڭ باسىن قوسادى. جوبانىڭ نەگىزگى ماقساتى دا وسى»، — دەدى ب. ٴابدىعالي ۇلى.

سارايشىقتا وتىز ورىندىق جۇمىس ورنى اشىلادى. سولتۇستىكتەگى بوتاي مۋزەي-قورىعىندا دا وتىز ادامدىق جۇمىس ورنى قۇرىلماق. سول وڭىرلەردەگى ازاماتتار بۇل كيەلى جەرلەردى قىسى-جازى كۇتىپ-باپتاپ ۇستايتىن بولادى.

«سونىمەن قاتار بۇگىندە ٴۇش جەردە ساپار ورتالىقتارى سالىنىپ جاتىر. ماسەلەن، الماتىداعى تامعالى تاسقا بارساڭىزدار، نە كۇتىپ الاتىن ادام جوق، نە كۇتۋشى جوق. وسى ولقىلىقتى جويۋ ماقساتىندا ساپار ورتالىعى سول جەردە اشىلادى. قالعان ەكەۋى وتىرار جانە ۇلىتاۋدا اشىلاتىن بولادى. ەندىگى جىلى سارايشىق قوسىلادى، ٴسويتىپ جىل سايىن ينفراقۇرىلىم ارتا بەرەدى»، — دەپ مالىمدەدى سپيكەر.

وڭىرلەردە كيەلى جەرلەر ٴۇشىن قاراجات ٴبولىنىپ جاتىر. مىسالى، شىعىس قازاقستاندا بەرەلگە، قورىق رەتىندە اشۋ كوزدەلگەن شىلىكتىگە قاراجات بولىنۋدە.

«ٴسويتىپ، ٴار وبلىس ٴوز وڭىرىندەگى ٴتۋريزمدى دامىتۋعا ٴوز ۇلەستەرىن قوسۋدا»، — دەپ ناقتىلادى ول.

ب. ٴابدىعالي ۇلى وڭىرلەردە تاعى قانداي قاسيەتتى جەرلەردى قوسۋعا قاتىستى تالقىلاۋلار ٴجۇرىپ جاتقانىن ايتتى. ماقساتى — ەسكەرىلمەي قالعان كيەلى جەرلەردى ەسەپكە الۋ. ياعني، كيەلى جەرلەر ٴتىزىمى ٴالى وزگەرۋى مۇمكىن، بۇل جۇمىستار جالعاسىن تابا بەرمەك.

«كيەلى جەرلەردى انىقتاعاندا ٴبىز ەسكەرەتىن نەگىزگى كريتەرييلەردىڭ ٴبىرى ول – اڭىز. ويتكەنى بىزدە تەك قانا مازارلار مەن ۇڭگىرلەر عانا ەمەس، سونىمەن قاتار تاس بار، سۋ بار، تاۋ بار. ولاردىڭ كونەلىگى ەمەس، حالىقتىڭ سوعان سەنىپ تاعزىم ەتۋىمەن، اڭىزىمەن مىقتى»، — دەدى ول.

ەسكەرتكىشتەردى قورعاۋ تۋرالى زاڭعا «قاسيەتتى نىساندار» بابى ەنگىزىلسە، زاڭ قابىلدانعاننان كەيىن زاڭدى تۇردە كيەلى جەرلەر قورعاۋعا الىنادى.

«ارنايى پاسپورت جاسالىپ، بەكىتىلگەن مەملەكەتتىك ٴتىزىلىمى بولادى. ونداي ەسكەرتكىشتەرىمىز مەملەكەتتىك قورعاۋعا الىنادى. بۇگىن كوپتەگەن ەسكەرتكىشتەرىمىز مەملەكەتتىڭ قورعاۋىندا. مەملەكەتتىك تىزىمگە كىرمەگەن، ٴبىراق ەل قاسيەتتى دەپ تانىعان ەسكەرتكىشتەر دە بار، سولاردى ەسكەرەتىن بولامىز»، — دەپ ناقتىلادى بەرىك ٴابدىعالي ۇلى.

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي