BAQ.kz - Қазақстан жаңалықтары USD 367.06 BAQ.kz - Қазақстан жаңалықтары EUR 416.17 BAQ.kz - Қазақстан жаңалықтары RUB 5.56
استانا:

تۇركيامەن اراداعى تاۋار اينالىمىن 5 ميلليارد دوللارعا جەتكىزەمىز - نازاربايەۆ

فوتو: Ақорда

نۇرسۇلتان نازاربايەۆ تۇركيا رەسپۋبليكاسىنا رەسمي ساپارىنىڭ قورىتىندىسى بويىنشا بۇقارالىق اقپارات قۇرالدارىنىڭ وكىلدەرى ٴۇشىن بريفينگ وتكىزدى

بۇقارالىق اقپارات قۇرالدارى وكىلدەرىنىڭ الدىندا سويلەگەن سوزىندە مەملەكەت باسشىسى قوناقجايلىق كورسەتكەنى ٴۇشىن تۇركيا رەسپۋبليكاسىنىڭ پرەزيدەنتى رەجەپ ەردوعانعا ريزاشىلىق ٴبىلدىرىپ، وتكەن پرەزيدەنت سايلاۋىنداعى جەڭىسىمەن قۇتتىقتادى.

نۇرسۇلتان نازاربايەۆ قازاقستان مەن تۇركيا اراسىنداعى قارىم-قاتىناستاردىڭ ستراتەگيالىق سيپاتىن اتاپ ٴوتتى.

– ورتاق تاريح پەن رۋحاني قۇندىلىقتارعا نەگىزدەلگەن قارىم-قارىناستارىمىز قارقىندى دامىپ، بارلىق باعىتتار بويىنشا نىعايا تۇسۋدە، – دەدى قازاقستان پرەزيدەنتى.

مەملەكەت باسشىسى تۇركيا رەسپۋبليكاسىنىڭ پرەزيدەنتى رەجەپ ەردوعانمەن وتكەن كەلىسسوز ناتيجەلەرىنە جان-جاقتى توقتالدى.

– بۇگىن تۇركيا پرەزيدەنتىمەن مازمۇندى ٴارى ناتيجەلى كەلىسسوز وتكىزدىك. بۇل كەزدەسۋ وزەكتى ماسەلەلەر جونىندە پىكىر الماسۋعا مۇمكىندىك بەردى. جالپى، استانا مەن انكارا وڭىرلىك جانە حالىقارالىق پروبلەمالاردى ٴاردايىم اشىق تالقىلايتىنىن اتاپ وتكىم كەلەدى. بۇل ماسەلەلەر بويىنشا ٴبىزدىڭ ۇستانىمدارىمىز ۇقساس، – دەدى قازاقستان پرەزيدەنتى.

سونداي-اق، نۇرسۇلتان نازاربايەۆ بۇگىن وتكەن قازاقستان مەن تۇركيا اراسىنداعى جوعارى دەڭگەيدەگى ستراتەگيالىق ىنتىماقتاستىق كەڭەسىنىڭ ٴۇشىنشى وتىرىسى ەكى جاقتى قاتىناستارعا ودان ٴارى تىڭ سەرپىن بەرەتىنىنە سەنىم ٴبىلدىردى.

مەملەكەت باسشىسى ەكى ەلدىڭ ساياسي ديالوگ پەن باۋىرلاس حالىقتاردىڭ دوستىعىن ٴارى قاراي نىعايتىپ، تەرەڭدەتە تۇسۋگە مۇددەلى ەكەنىن ايتتى.

سونىمەن قاتار، قازاقستان پرەزيدەنتى ەكى مەملەكەت اراسىنداعى ساۋدا-ەكونوميكالىق جانە ينۆەستيسيالىق ىنتىماقتاستىق ماسەلەلەرىنە توقتالدى.

– ٴقازىر ەلىمىزدە تۇرىك كاپيتالىنىڭ قاتىسۋىمەن قۇرىلعان 1800-دەن استام كاسىپورىن بار. تاۋار اينالىمىنىڭ كولەمى وتكەن جىلى شامامەن 2 ميلليارد دوللار بولدى. بۇل كورسەتكىشتى بولاشاقتا 5 ميلليارد دوللارعا جەتكىزەمىز دەپ كەلىستىك، – دەدى نۇرسۇلتان نازاربايەۆ.

نۇرسۇلتان نازاربايەۆ «جاڭا سينەرگيا» اتتى بىرلەسكەن باعدارلامانى جۇزەگە اسىرۋدىڭ ارالىق قورىتىندىلارىن اتاپ ٴوتىپ، «تۇرىك بيزنەسىنىڭ كاپيتاندارىمەن» جۇرگىزىلگەن كەلىسسوزدەردىڭ ناتيجەلەرىنە توقتالدى.

– جالپى، ساپارىم بارىسىندا قۇنى 2 ميلليارد دوللارعا جۋىق كوممەرسيالىق جوبالارعا قاتىستى كەلىسىمدەرگە قول قويىلدى. الداعى ۋاقىتتا بۇگىنگى قول جەتكىزگەن ۋاعدالاستىقتاردى جۇزەگە اسىرۋ ٴۇشىن كۇش جۇمىلدىرۋىمىز قاجەت، – دەدى مەملەكەت باسشىسى.

قازاقستان پرەزيدەنتى تۇرىك ينۆەستورلارىن اقتاۋ جانە قۇرىق پورتتارى نەگىزىندە جۇمىس ىستەپ جاتقان كولىك-لوگيستيكا حابىن دامىتۋعا بەلسەندى اتسالىسۋعا شاقىردى.

– بۇگىنگى كەلىسسوزدەر بارىسىندا ٴبىز كولىك-ترانزيت، مۇناي-گاز، اسكەري-تەحنيكالىق، اۋىل شارۋاشىلىعى، تۋريزم، مادەنيەت، ٴبىلىم، عىلىم جانە تەحنولوگيا سالالارىنداعى ىنتىماقتاستىعىمىزدى تالقىلادىق. ٴبىز وسى باعىتتار بويىنشا ٴوزارا ىقپالداستىعىمىزدى نىعايتۋعا ۋاعدالاستىق، – دەدى نۇرسۇلتان نازاربايەۆ.

ر.ەردوعان قازاقستان پرەزيدەنتىنە رەسمي ساپارى ٴۇشىن ريزاشىلىق ٴبىلدىرىپ، وتكەن كەزدەسۋلەردىڭ ناتيجەسىن جوعارى باعالادى.

تۇركيا رەسپۋبليكاسىنىڭ پرەزيدەنتى ساۋدا-ەكونوميكالىق بايلانىستاردى كەڭەيتۋ، ٴبىلىم جانە مادەنيەت سالالارىنداعى ىنتىماقتاستىقتى تەرەڭدەتۋ ماسەلەلەرىنە قاتىستى كەلىسسوزدەردىڭ ماڭىزدى ناتيجەلەرىنە توقتالىپ، ونىڭ وڭ قارقىنىن اتاپ ٴوتتى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي