BAQ.kz - Қазақстан жаңалықтары USD 368.28 BAQ.kz - Қазақстан жаңалықтары EUR 419.21 BAQ.kz - Қазақстан жаңалықтары RUB 5.59
استانا:

نازاربايەۆ ۇجىمدىق قاۋىپسىزدىك كەڭەسىنىڭ سەسسياسىن اشتى

فوتو: Бауыржан Жуасбаев

استانا، baq.kz ٴتىلشىسى. قازاقستان پرەزيدەنتى نۇرسۇلتان نازاربايەۆ ۇجىمدىق قاۋىپسىزدىك تۋرالى شارت ۇيىمىنىڭ (ۇقشۇ) ۇجىمدىق قاۋىپسىزدىك كەڭەسىنىڭ سەسسياسىن اشتى. ەلوردادا ٴوتىپ جاتقان جيىنعا ۇقشۇ-عا مۇشە ەلدەردىڭ باسشىلارى قاتىسىپ وتىر.

سەسسياعا رەسەي پرەزيدەنتى ۆلاديمير پۋتين، بەلارۋس پرەزيدەنتى الەكساندر لۋكاشەنكو، تاجىكستان پرەزيدەنتى ەمومالي راحمون، قىرعىزستان پرەزيدەنتى سوورونباي جەەنبەكوۆ، ال ارمەنيا تاراپىنان سول ەلدىڭ پرەمەر-مينيسترى نيكول پاشينيان قاتىسۋدا.

ٴقازىر ۇقشۇ-عا قازاقستان، ال ۇجىمدىق قاۋىپسىزدىك كەڭەسىنە قازاقستان پرەزيدەنتى نۇرسۇلتان نازاربايەۆ ٴتوراعالىق ەتىپ وتىر.

«ۇقشۇ ۇجىمدىق قاۋىپسىزدىك كەڭەسىنىڭ كەزەكتى سەسسياسىن اشىق دەپ جاريالاۋعا رۇقسات ەتىڭىزدەر. بۇگىن ٴبىز ۇقشۇ اياسىندا جاسالىپ جاتقان كوپتەگەن جۇمىس بويىنشا حاتشىلىق اقپاراتىن تىڭدايمىز. 2018 جىلعى قازاقستاننىڭ ٴتوراعالىعى تالقىلانادى. ەلدەرىمىزدىڭ ۇجىمدىق قاۋىپسىزدىگىنىڭ وزەكتى ماسەلەلەرى ٴسوز بولادى. قازىرگى حالىقارالىق احۋال جايىندا، ٴوزارا ارەكەتەستىكتىڭ ماڭىزدى ماسەلەلەرى جايلى پىكىر الماسامىز»، - دەدى نازاربايەۆ.

ەلباسى سەسسيانىڭ كۇن تارتىبىمەن تانىستىردى. جابىق فورماتتا وتەتىن وتىرىستا ۇقشۇ باس حاتشىسىنىڭ ورىنباسارى ۆالەريي سەمەريكوۆ بايانداماسى پىكىر الماسۋمەن جالعاسپاق. وسىلايشا، بۇگىن مەملەكەت باسشىلارى ٴبىرقاتار ماسەلەنى شاعىن قۇرامدا 1-1،5 ساعات تالقىلايدى. ال كۇن تارتىبىندەگى قالعان پۋنكتەردى كەڭەيتىلگەن پلەنارلىق وتىرىستا قاراستىرادى. وعان سىرتقى ىستەر مينيسترلەرى، قورعانىس مينيسترلەرى، ۇقشۇ-عا مۇشە ەلدەردىڭ قاۋىپسىزدىك كەڭەستەرىنىڭ حاتشىلارى مەن باق قاتىسادى.

«پلەنارلىق وتىرىستا ەكى ماسەلە قارالىپ، كۇن تارتىبىندە قاراستىرىلعان قۇجاتتارعا قول قويىلادى. اتاپ ايتساق، ۇجىمدىق قاۋىپسىزدىك كەڭەسىنىڭ شەشىمى مەن 4 حالىقارالىق كەلىسىمشارت بەكىتىلەدى. وتىرىس اياقتالعاننان كەيىن باق الدىنا شىعامىز. ەگەر قارسى بولماساڭىزدار، جۋرناليستەرمەن كەزدەسۋگە مەن بارامىن جانە ۇقشۇ باس حاتشىسىنىڭ ورىنباسارى ۆالەريي سەمەريكوۆ شىعادى»، - دەدى نۇرسۇلتان نازاربايەۆ.

بۇگىن ۇجىمدىق قاۋىپسىزدىك كەڭەسىنىڭ مۇشەلەرى حالىقارالىق جانە وڭىرلىك قاۋىپسىزدىك پروبلەمالارىن، ۇقشۇ-عا مۇشە ەلدەردىڭ ۇيىم فورماتىنداعى جانە حالىقارالىق ارەناداعى ٴوزارا ارەكەتتەستىگىن تالقىلايدى. رەسمي جيىندا ۇقشۇ ۇجىمدىق قاۋىپسىزدىك كەڭەسى دەكلاراسياسىن قابىلداۋ جوسپارلانىپ وتىر. سونداي-اق، 2018-2019 جىلدارى ۇقشۇ-عا قىرعىزستان ٴتوراعالىق ەتەتىندىكتەن سول ەلدىڭ پرەزيدەنتى سوورونباي جەەنبەكوۆ ٴسوز سويلەيدى دەپ كوزدەلۋدە.

ال ەرتەڭ نۇرسۇلتان نازاربايەۆ پەن شەتەلدىك دەلەگاتتار قازاقستان مەن رەسەيدىڭ ٴوڭىرارالىق ىنتىماقتاستىعىنىڭ xv فورۋمىنا قاتىسۋ ٴۇشىن پەتروپاۆل قالاسىنا بارادى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي