BAQ.kz - Қазақстан жаңалықтары USD 370.49 BAQ.kz - Қазақстан жаңалықтары EUR 421.06 BAQ.kz - Қазақстан жаңалықтары RUB 5.54
استانا:

نازاربايەۆ: پەداگوگتەر مارتەبەسىن ارتتىرۋ – ماڭىزدى مىندەتتەردىڭ ٴبىرى

فوتو: Ақорда

استانا، baq.kz. نۇرسۇلتان نازاربايەۆ اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ رەكتورى تاكير بالىقبايەۆتى قابىلدادى. بۇل تۋرالى اقوردانىڭ ٴباسپاسوز قىزمەتى مالىمدەدى.

كەزدەسۋدە مەملەكەت باسشىسىنا جوعارى وقۋ ورنىنىڭ قىزمەتى جانە «قازاقستاندىقتاردىڭ ٴال-اۋقاتىنىڭ ٴوسۋى: تابىس پەن تۇرمىس ساپاسىن ارتتىرۋ» اتتى جولداۋدى ىسكە اسىرۋ اياسىندا اتقارىپ جاتقان جۇمىستارى جونىندە ەسەپ بەرىلدى.

قازاقستان پرەزيدەنتى ەلىمىزدەگى جوعارى ٴبىلىم بەرۋ جۇيەسىن قالىپتاستىرۋ جانە دامىتۋ ۇدەرىسىندەگى اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ ٴرولىن اتاپ ٴوتتى.

– بۇل ۋنيۆەرسيتەت – قازاقستاننىڭ العاشقى جوعارى وقۋ ورىندارىنىڭ ٴبىرى. ەلىمىزدەگى جوعارى ٴبىلىم بەرۋ جۇيەسىنىڭ نەگىزى وسى وقۋ ورداسىنان باستاۋ الادى دەۋگە بولادى. ٴسىز جانە بۇكىل وقىتۋشى-پروفەسسورلار قۇرامى وتاندىق ٴبىلىم بەرۋ ىسىنە الداعى ۋاقىتتا دا ۇلەس قوساتىندارىڭىزعا سەنەمىن، – دەدى ەلباسى.

نۇرسۇلتان نازاربايەۆ بيىلعى جولداۋدا وقىتۋ جانە اعارتۋ قىزمەتى مەن ستۋدەنت جاستاردىڭ جاعدايىن جاقسارتۋ ماسەلەلەرىنە باسا ٴمان بەرىلگەنىن ايتتى.

– پەداگوگتەر مارتەبەسىن ارتتىرۋ – ماڭىزدى مىندەتتەردىڭ ٴبىرى. وسى مىندەتتى جۇزەگە اسىرۋ بارىسىندا ۋنيۆەرسيتەتتەرىڭىز الدىڭعى شەپتە بولۋعا ٴتيىس. بۇل ماسەلەنى جان-جاقتى پىسىقتاۋ قاجەت، – دەدى مەملەكەت باسشىسى.

سونىمەن قاتار، قازاقستان پرەزيدەنتى ۋنيۆەرسيتەتتىڭ قازىرگى زامانعى عىلىمي-تەحنيكالىق پروگرەسس تالاپتارىنا ساي بولۋ كەرەك ەكەنىن اتاپ ٴوتتى.

– الەمنىڭ الدىڭعى قاتارلى وقۋ ورىندارىمەن ىنتىماقتاسىپ، بايلانىس ورناتقان ٴجون. تاجىريبە الماسىپ، بىرلەسە جۇمىس ىستەۋ قاجەت. سونداي-اق، اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ مارتەبەسىن ارتتىرۋ جونىندەگى جۇمىستاردى جالعاستىرۋدىڭ ماڭىزى زور. ٴسىز باسقاراتىن ۋنيۆەرسيتەت پەداگوگيكالىق ٴبىلىم بەرەتىن باستى وقۋ ورنى بولۋعا ٴتيىس، – دەدى مەملەكەت باسشىسى.

كەزدەسۋ بارىسىندا قازاقستان پرەزيدەنتى قازۇپۋ رەكتورىن ۋنيۆەرسيتەتتىڭ 90 جىلدىق مەرەيتويىمەن قۇتتىقتاپ، وسى ايتۋلى كۇنگە وراي بارلىق وقىتۋشى-پروفەسسورلار قۇرامى مەن ستۋدەنتتەرگە قۇتتىقتاۋ ٴسوزىن جولدادى.

ت.بالىقبايەۆ نۇرسۇلتان نازاربايەۆقا بيىلعى جولداۋدىڭ ەرەجەلەرىنە سايكەس وقۋ ورنى الدىنا قويىلعان مىندەتتەردى ورىنداۋ بارىسى جانە ۋنيۆەرسيتەتتى دامىتۋ جوسپارىنىڭ جۇزەگە اسىرىلۋى جونىندە باياندادى. رەكتوردىڭ مالىمەتىنە سايكەس، ۋنيۆەرسيتەت qs world university rankings 2019 ەسەبى بويىنشا ۇزدىك توپ-500 جوعارى وقۋ ورىندارىنىڭ قاتارىنا ەنگەن.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي