BAQ.kz - Қазақстан жаңалықтары USD 327.42 BAQ.kz - Қазақстан жаңалықтары EUR 383.51 BAQ.kz - Қазақстан жаңалықтары RUB 5.29
استانا:

نازاربايەۆ اەف-كە قاتىسۋعا كەلگەن ٴبىرقاتار كومپانيا باسشىلارىمەن كەزدەستى

فوتو: Ақорда

نۇرسۇلتان نازاربايەۆ استانا ەكونوميكالىق فورۋمىنا قاتىسۋعا كەلگەن «apple» كومپانياسىنىڭ نەگىزىن قالاۋشىلاردىڭ ٴبىرى ستيۆ ۆوزنياك جانە «ياندەكس» كومپانيالار توبىنىڭ جەتەكشىسى اركاديي ۆولوجبەن كەزدەستى، دەپ حابارلايدى اقوردانىڭ ٴباسپاسوز قىزمەتى.

نۇرسۇلتان نازاربايەۆ استانا ەكونوميكالىق فورۋمىنا قاتىسۋعا كەلگەنى ٴۇشىن س.ۆوزنياكقا ريزاشىلىق ٴبىلدىرىپ، ونىڭ پلەنارلىق وتىرىستا سويلەگەن ٴسوزىنىڭ مازمۇندى ٴارى وزەكتى بولعانىن ايتتى.

قازاقستان پرەزيدەنتى ەميسسيالىق ورتالىقتار ارقىلى باقىلانبايتىن كريپتوۆاليۋتالاردىڭ پايدا بولۋ سەبەبى الەمدە ٴبىر عانا ۆاليۋتانىڭ ۇستەمدىك ەتۋىنە بايلانىستى ەكەنىن ايتتى. مەملەكەت باسشىسى قازاقستان ەسەپ ايىرىسۋ كەزىندە ۇلتتىق ۆاليۋتامەن قاتار باسقا دا ۆاليۋتالاردى پايدالاناتىنىن اتاپ ٴوتتى.

س.ۆوزنياك وسىنداي جوعارى دەڭگەيدەگى ٴىس-شاراعا قاتىسۋعا، جاھاندىق سىن-تەگەۋرىندەرگە قاتىستى ٴوز ويىن ورتاعا سالۋعا مۇمكىندىك بەرگەنى ٴۇشىن نۇرسۇلتان نازاربايەۆقا العىس ٴبىلدىردى.

«ۆاليۋتالاردىڭ سىمسىز بايلانىستان ايىرماشىلىعى، ەشقاشان ۋنيۆەرسالدى بولعان ەمەس. دەي تۇرعانمەن، كريپتوۆاليۋتالاردىڭ ۇلكەن ارتىقشىلىعى ولاردىڭ باقىلاۋعا الىنبايتىندىعىندا، دامۋىنىڭ تەجەلمەيتىندىگىندە جانە ۋنيۆەرسالدى ٴارى جاھاندىق ۆاليۋتاعا اينالاتىندىعىندا»، – دەدى كومپانيا جەتەكشىسى.

كەزدەسۋ بارىسىندا تاراپتار سيفرلاندىرۋدىڭ جەكەلەگەن ماسەلەلەرىن جانە كريپتوۆاليۋتالاردى دامىتۋ پەرسپەكتيۆالارىن تالقىلادى.

فوتو: اقوردا

سونىمەن قاتار، نۇرسۇلتان نازاربايەۆ اركاديي ۆولوجدىڭ قازاقستاننىڭ تۋماسى جانە ونىڭ تمد-داعى سيفرلىق ەكونوميكانى العاش قولعا العانداردىڭ ٴبىرى ەكەنىن اتاپ ٴوتتى.

مەملەكەت باسشىسى سيفرلاندىرۋ سالاسىندا رەسەيلىك كومپانيالارمەن بىرلەسە جۇمىس جۇرگىزۋدىڭ ماڭىزدىلىعىنا توقتالىپ، الماتىدا تاقىرىپتىق فورۋم وتكەنىن ايتتى.

ا.ۆولوج رەسەيدە دە، قازاقستاندا دا جاھاندىق جانە جەرگىلىكتى كومپانيالار ٴبىر نارىقتا اشىق جۇمىس جۇرگىزۋ ٴۇشىن قالىپتاسقان قولايلى جاعدايدى پايدالانا ٴبىلۋ كەرەكتىگىن اتاپ ٴوتتى.

اڭگىمەلەسۋ بارىسىندا تاراپتار ٴىت-حاب جانە «استانا» حالىقارالىق قارجى ورتالىعى اياسىنداعى ىنتىماقتاستىق ماسەلەلەرىن دە تالقىلادى.

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي