BAQ.kz - Қазақстан жаңалықтары USD 370.49 BAQ.kz - Қазақстан жаңалықтары EUR 421.06 BAQ.kz - Қазақстан жаңалықтары RUB 5.54
استانا:

نازاربايەۆ: 2025 جىلعا قاراي ٴوزارا ساۋداداعى بارلىق كەدەرگىنى جويۋ قاجەت

استانا، baq.kz. نۇرسۇلتان نازاربايەۆ جوعارى ەۋرازيا ەكونوميكالىق كەڭەسىنىڭ وتىرىسىنا قاتىستى. بۇل تۋرالى اقوردانىڭ ٴباسپاسوز قىزمەتى حابارلادى.

وتىرىستا جوعارى ەۋرازيا ەكونوميكالىق كەڭەس مۇشەلەرى كۇن تارتىبىندەگى سيفرلاندىرۋ ماسەلەلەرىن ىسكە اسىرۋ بارىسى جونىندەگى باياندامانى تىڭداپ، گاز، مۇناي جانە مۇناي ونىمدەرى سالالارىندا ورتاق نارىق قالىپتاستىرۋدىڭ، سونداي-اق ينتەگراسيالىق بىرلەستىك اياسىنداعى ٴوزارا ىقپالداستىقتىڭ وزەكتى ماسەلەلەرىن تالقىلادى.

قازاقستان پرەزيدەنتى ەۋرازيا ەكونوميكالىق وداعىنىڭ تاريحىندا 2018 جىلدىڭ ەرەكشە ورىن الاتىنىن ايتتى.

– الەمدىك ەكونوميكانىڭ قۇبىلمالىلىعىنا بايلانىستى سىرتقى جاعدايلار مەن تاۋەكەلدەرگە قاراماستان، ٴبىز ٴوسىمنىڭ وڭ قارقىنىن ساقتاپ قالا الدىق. بيىلعى قاڭتار-قىركۇيەك ايلارىندا سىرتقى جانە ٴوزارا ساۋدا-ساتتىق كولەمى ايتارلىقتاي ارتتى، – دەدى مەملەكەت باسشىسى.

سونىمەن قاتار، نۇرسۇلتان نازاربايەۆ بىرلەسكەن كاسىپورىندار جۇمىسىندا وڭ ٴۇردىستىڭ بار ەكەنىن اتاپ ٴوتتى.

قازاقستان پرەزيدەنتى بيىل ەۋرازيا ەكونوميكالىق وداعىنىڭ جاڭا كەدەن كودەكسى كۇشىنە ەنگەنىن ايتتى. وندا كەدەن ٴىسىن اكىمشىلەندىرۋگە، سونىڭ ىشىندە بيزنەس ۇدەرىستەرىن اۆتوماتتاندىرۋعا جانە «ٴبىر تەرەزە» قاعيداتىن ەنگىزۋگە قاتىستى زاماناۋي تاسىلدەردى قولدانۋ قاراستىرىلعان.

سونداي-اق، مەملەكەت باسشىسى كۇن تارتىبىندەگى سيفرلاندىرۋ ماسەلەلەرىنىڭ 2025 جىلعا دەيىنگى نەگىزگى باعىتتارىن ىسكە اسىرۋ جونىندەگى جۇمىستاردىڭ ناتيجەلەرىنە توقتالدى.

– قازاقستان جانە رەسەي كەدەن قىزمەتتەرى اراسىندا ترانزيتتىك جۇكتەرگە سپۋتنيك ارقىلى مونيتورينگ جۇرگىزۋ جونىندەگى سىناق ٴساتتى ٴوتتى. ٴوزارا ساۋداداعى كەدەرگىلەر مەن شەكتەۋلەردى جويۋ ٴۇشىن ٴتيىستى جۇمىستار جۇرگىزىلۋدە. حالىقارالىق ىنتىماقتاستىق تا بەلسەندى دامىپ كەلەدى، – دەدى نۇرسۇلتان نازاربايەۆ.

قازاقستان پرەزيدەنتى ەۋرازيا ەكونوميكالىق وداعى اياسىنداعى ٴوزارا ىقپالداستىقتى ودان ٴارى كەڭەيتۋ ۇدەرىسىنە قولداۋ ٴبىلدىرىپ، ەۋرازيا ەكونوميكالىق كوميسسياسى مەن وعان مۇشە ەلدەردىڭ ۇكىمەتتەرى تاراپىنان جاڭا جۇمىس باعىتتارىنىڭ ٴارقايسىسىنىڭ ەكونوميكالىق تۇرعىدان ماقساتقا قانشالىقتى ساي كەلەتىندىگىنە تەرەڭ تالداۋ جاساۋ قاجەتتىگىن اتاپ ٴوتتى.

– جالپى، ٴبىز ەۋرازيا ەكونوميكالىق وداعىنىڭ نەگىزگى ماقساتتارىنا – تاۋارلار مەن قىزمەتتەردىڭ، كاپيتال مەن جۇمىس كۇشىنىڭ ەركىن اينالىمىن قامتاماسىز ەتۋگە باتىل قادام جاساپ كەلەمىز. سونىمەن بىرگە، ەۋرازيا ەكونوميكالىق وداعىنىڭ تولىققاندى جۇمىس ىستەۋىن قامتاماسىز ەتۋ ٴۇشىن تاعى دا كۇش جۇمىلدىرۋىمىز كەرەك، –دەدى مەملەكەت باسشىسى.

نۇرسۇلتان نازاربايەۆ ٴتورت «ەركىندىكتى» قامتاماسىز ەتۋگە باعىتتالعان قۇجاتتار، سونىڭ ىشىندە ەۋرازيا ەكونوميكالىق وداعىنا مۇشە ەلدەردىڭ ازاماتتارىن زەينەتاقىمەن قامتۋ تۋرالى كەلىسىم جونىندەگى جۇمىستاردى اياقتاۋدىڭ ماڭىزدىلىعىن ايتتى.

– بىزگە 2025 جىلعا قاراي ٴوزارا ساۋداداعى بارلىق كەدەرگىنى جويۋ قاجەت. بۇل – بىرلەستىگىمىزدىڭ تولىققاندى قىزمەت ەتۋىنىڭ ماڭىزدى تالابى. كوميسسيا مەن ۇكىمەتتەر وسى باعىتتاعى جۇمىستاردى جانداندىرۋى كەرەك، – دەدى قازاقستان پرەزيدەنتى.

مەملەكەت باسشىسى ەكونوميكانىڭ باستى سەكتورلارىنداعى ٴىرى جوبالاردى ىسكە اسىرۋ قاجەت ەكەنىنە توقتالدى. وسىعان بايلانىستى، كوميسسيا مەن ەۋرازيا ەكونوميكالىق وداعىنا مۇشە ەلدەردىڭ ۇكىمەتتەرىنە وسىنداي جوبالاردىڭ ٴتىزىمىن جاساۋ ۇسىنىلدى.

– مەن سوناۋ 1994 جىلى ماسكەۋ مەملەكەتتىك ۋنيۆەرسيتەتىنىڭ قابىرعاسىندا وسى ينتەگراسيالىق جوبانى قۇرۋ يدەياسىن العاش رەت جاريا ەتىپ، تەڭ قۇقىلىق پەن ەركىندىك قاعيداتتارى جونىندە ايتتىم. سول كەزدە بىرتە-بىرتە حالىقارالىق ارەنانىڭ بەلدى مۇشەسىنە اينالاتىن قۋاتتى ەكونوميكالىق وداق قالىپتاسادى دەپ ويلادىم. بۇگىندە بۇل يدەيا شىندىققا اينالدى. كەلەسى جىلى ەۋرازيا ەكونوميكالىق وداعى تۋرالى كەلىسىمگە قول قويىلعانىنا 5 جىل جانە ەۋرازيالىق ينتەگراسيا يدەياسىنا 25 جىل تولادى. وسى ەكى مەرەيلى ساتكە ارنالعان كەزەكتى وتىرىستى كەلەسى جىلى مامىر ايىندا استانادا وتكىزۋدى ۇسىنامىن، – دەدى نۇرسۇلتان نازاربايەۆ.

سوڭىندا قازاقستان پرەزيدەنتى بۇگىنگى وتىرىستىڭ قورىتىندىسى بويىنشا قابىلداناتىن شەشىمدەر ۇيىمنىڭ ودان ٴارى دامۋىنا تىڭ سەرپىن بەرەتىنىنە سەنىم ٴبىلدىردى.

– 2019 جىلى ەۋرازيا ەكونوميكالىق وداعىنىڭ ورگاندارىنا ارمەنيا ٴتوراعالىق ەتەدى. سىزدەردىڭ ٴتوراعالىقتارىڭىز حالىقتارىمىزدىڭ يگىلىگى ٴۇشىن تابىستى وتۋىنە تىلەكتەسپىن، – دەدى مەملەكەت باسشىسى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

سسىلكي پو تەمە:
كوممەنتاريي