BAQ.kz - Қазақстан жаңалықтары USD 367.06 BAQ.kz - Қазақстан жаңалықтары EUR 416.17 BAQ.kz - Қазақстан жаңалықтары RUB 5.56
استانا:

مەملەكەت باسشىسى تۇركيانىڭ ىسكەر توپتار وكىلدەرىمەن كەزدەستى

فوتو: Ақорда

قازاقستان پرەزيدەنتى تۇركيانىڭ بيزنەس وكىلدەرى الدىندا سويلەگەن سوزىندە ەكى مەملەكەت اراسىنداعى ساۋدا-ەكونوميكالىق ىنتىماقتاستىق وڭ قارقىن الىپ كەلە جاتقانىن اتاپ ٴوتتى، دەپ حابارلايدى اقوردانىڭ ٴباسپاسوز قىزمەتى.

– قازاقستان مەن تۇركيا اراسىنداعى قاتىناستار ٴوزارا دوستىققا، باۋىرلاستىق پەن سەنىمگە نەگىزدەلگەن. ساۋدا اينالىمى جونىنەن تۇركيا قازاقستاننىڭ ستراتەگيالىق سەرىكتەستەرىنىڭ العاشقى وندىعىنا كىرەدى. ەكى ەل اراسىنداعى تاۋار اينالىمى 2017 جىلى 27 پايىزعا ٴوسىپ، 2 ميلليارد اقش دوللارىنا جۋىقتادى، – دەدى نۇرسۇلتان نازاربايەۆ.

مەملەكەت باسشىسى ينۆەستيسيالىق ىنتىماقتاستىق پەن ەكونوميكانىڭ ٴتۇرلى سالالارىنداعى بىرلەسكەن جوبالاردى ىسكە اسىرۋ ماسەلەلەرىنە توقتالدى. اتاپ ايتقاندا، تاۋەلسىزدىك العاننان بەرى ەلىمىزگە تۇركيا 3 ميلليارد اقش دوللارىنان استام ينۆەستيسيا قۇيعانىن جانە بۇگىندە قازاقستاندا تۇرىك كاپيتالىنىڭ قاتىسۋىمەن 2 مىڭعا جۋىق كاسىپورىن جۇمىس ىستەپ وتىرعانىن اتاپ ٴوتتى.

سونىمەن قاتار، قازاقستان پرەزيدەنتى ەكى ەل كاسىپكەرلەرىن قولداۋعا باعىتتالعان «جاڭا سينەرگيا» باعدارلاماسىنىڭ جۇزەگە اسىرىلۋ ناتيجەلەرى جونىندە ايتتى.

– وسى باعدارلاما اياسىندا قۇنى 800 ميلليون دوللار بولاتىن 23 جوبا ىسكە قوسىلىپ، 3 مىڭ جاڭا جۇمىس ورنىنىڭ اشىلۋىنا مۇمكىندىك بەردى. كەشە ەلدەرىمىزدىڭ بيزنەس وكىلدەرى قۇنى 1،7 ميلليارد دوللاردان اساتىن 24 كەلىسىم-شارتقا قول قويدى. بۇل – ٴبىزدىڭ ٴوزارا سەنىم مەن ىنتىماقتاستىعىمىزدىڭ جارقىن مىسالى، – دەدى نۇرسۇلتان نازاربايەۆ.

كەزدەسۋ بارىسىندا مەملەكەت باسشىسى قازاقستاننىڭ ەكونوميكالىق ارتىقشىلىقتارىنا جانە ەلىمىزدە بيزنەس جۇرگىزۋ ٴۇشىن جاسالعان قولايلى جاعدايلارعا نازار اۋداردى.

– قازاقستاندا ينۆەستيسيالىق احۋالدى جاقسارتۋ جونىندە كەشەندى جۇمىستار جۇرگىزىلۋدە. كاسىپكەرلىكتى دامىتۋ ٴۇشىن زاڭناماعا ٴتيىستى وزگەرىستەر ەنگىزىلدى. دۇنيەجۇزىلىك بانكتىڭ «بيزنەس جۇرگىزۋ جەڭىلدىگى» رەيتينگىندە قازاقستان 190 ەلدىڭ اراسىندا 36-ورىندا. ٴبىزدىڭ مەملەكەت ەكونوميكالىق ىنتىماقتاستىق جانە دامۋ ۇيىمى ينۆەستيسيالىق كوميتەتىنىڭ مۇشەسى بولىپ سانالادى، – دەدى قازاقستان پرەزيدەنتى.

اقوردا

سونداي-اق، نۇرسۇلتان نازاربايەۆ قازاقستان رەسپۋبليكاسىنىڭ پرەزيدەنتى جانىنداعى شەتەلدىك ينۆەستورلار كەڭەسى مەن «قازاق ينۆەست» كومپانياسىنىڭ جۇمىسى جانە ينۆەستورلار ٴۇشىن قاراستىرىلعان ٴتۇرلى جەڭىلدىكتەر جونىندە ايتتى.

– قازاقستاندا 11 ارنايى ەكونوميكالىق جانە 24 يندۋستريالىق ايماق بار. ولاردىڭ جۇمىسىنا قاتىسۋشىلار ٴۇشىن سالىقتىق جانە وزگە دە جەڭىلدىكتەر قاراستىرىلعان. تۇرىك كومپانيالارىن قازاقستاندا ٴوز بيزنەستەرىن وركەندەتۋگە شاقىرامىن، – دەدى مەملەكەت باسشىسى.

سونىمەن قاتار، قازاقستان پرەزيدەنتى ەلىمىزدىڭ كولىك-ترانزيت الەۋەتىنىڭ مۇمكىندىكتەرىنە جان-جاقتى توقتالدى.

– قازاقستان ەۋروپا مەن ازيا اراسىنداعى ترانسكونتينەنتالدى مۋلتيمودالدى جۇك تاسىمالىن بەلسەندى دامىتۋدا. ەلىمىز ارقىلى 5 تەمىر جول جانە 6 حالىقارالىق اۆتوموبيل جولى وتەدى. ترانسكاسپيي مۋلتيمودالدى جۇك تاسىمالىن دامىتۋ ٴۇشىن كوپ جۇمىس اتقارىلۋدا. اقتاۋ پورتىن جاڭعىرتىپ، ونىڭ مۇمكىندىكتەرىن كەڭەيتتىك، – دەدى نۇرسۇلتان نازاربايەۆ.

مەملەكەت باسشىسى قازاقستانداعى ونەركاسىپ كاسىپورىندارىن جەكەشەلەندىرۋ ۇدەرىسىنە جانە اگروونەركاسىپ كەشەنىندەگى يننوۆاسيالىق جوبالاردى ىسكە اسىرۋعا شەتەلدىك ينۆەستورلاردىڭ قاتىسۋ مۇمكىندىگى بار ەكەنىن دە اتاپ ٴوتتى.

سونىمەن قاتار، قازاقستان پرەزيدەنتى تۇرىك بيزنەسمەندەرىن نازاربايەۆ ۋنيۆەرسيتەتى مەن يننوۆاسيالىق تەحنولوگيالار پاركى بازاسىندا قۇرىلعان يننوۆاسيالىق كلاستەرلەردىڭ جۇمىسىنا اتسالىسىپ، تۋريستىك سالاداعى بىرلەسكەن جوبالاردى جۇزەگە اسىرۋ مۇمكىندىكتەرىن قاراستىرۋعا شاقىردى.

– «ەكسپو-2017» كورمەسىنىڭ بازاسىندا «استانا» حالىقارالىق قارجى ورتالىعى جۇمىسى ىستەي باستادى. بۇل ورتالىق نيۋ-يورك، سينگاپۋر، لوندون جانە دۋباي قالالارىنداعى قارجى ورتالىقتارىنىڭ ۇزدىك مودەلى نەگىزىندە جۇمىس جۇرگىزەدى. ونىڭ قۇقىقتىق مارتەبەسى كونستيتۋسيالىق زاڭمەن بەكىتىلدى، جۇمىس ٴتىلى – اعىلشىن ٴتىلى. بۇل – وڭىردەگى قىزمەتى اعىلشىن قۇقىعىنا نەگىزدەلگەن بىردەن-بىر ورتالىق، – دەدى نۇرسۇلتان نازاربايەۆ.

مەملەكەت باسشىسى «استانا» حالىقارالىق قارجى ورتالىعىنىڭ نەگىزگى ارتىقشىلىقتارى جونىندە ايتىپ، بۇل ورتالىقتىڭ جۇمىسىنا قاتىسۋشىلار ٴۇشىن ارنايى سالىق، ۆاليۋتا، ۆيزا جانە ەڭبەك رەجىمدەرى ەنگىزىلگەنىن اتاپ ٴوتتى.

سوڭىندا قازاقستان پرەزيدەنتى ەكى ەل بيزنەسمەندەرىن بۇگىنگى جاسالىپ وتىرعان مۇمكىندىكتىڭ ٴبارىن پايدالانا وتىرىپ، مەملەكەتارالىق بايلانىستاردى دامىتۋ جانە نىعايتۋ ىسىنە بەلسەندى اتسالىسۋعا شاقىردى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي