USD 334.31 EUR 355.17 RUB 5.31
استانا:

ەلباسى ۇكىمەتكە استىقتى ەكسپورتتاۋ ماسەلەسىن پىسىقتاۋدى تاپسىردى

فوتو: akorda.kz

مەملەكەت باسشىسى نۇرسۇلتان نازاربايەۆ پرەمەر-مينيستر باقىتجان ساعىنتايەۆتى قابىلدادى، دەپ حابارلايدى اقوردانىڭ ٴباسپاسوز قىزمەتى. كەزدەسۋ بارىسىندا ب.ساعىنتايەۆ مەملەكەت باسشىسىنا ەلدىڭ بيىلعى 9 ايداعى الەۋمەتتىك-ەكونوميكالىق دامۋىنىڭ ناتيجەلەرى جانە باستى مەملەكەتتىك باعدارلامالاردىڭ ورىندالۋ بارىسى تۋرالى باياندادى.

قازاقستان پرەزيدەنتى قازىرگى ۋاقىتتا جۇزەگە اسىپ جاتقان بارلىق باستامانى كەلەسى جىلى ودان ٴارى ٴتيىمدى ىسكە اسىرۋ ٴۇشىن قاجەتتى نەگىز قالىپتاسقانىن اتاپ ٴوتتى.

«بىرىنشىدەن، بيۋدجەتكە ٴتيىستى وزگەرىستەر ەنگىزىلدى. سونداي-اق، بارلىق قاجەتتى مەملەكەتتىك باعدارلامالار قابىلداندى. اتاپ ايتقاندا، رەسپۋبليكانىڭ قارقىندى يندۋستريالىق-يننوۆاسيالىق دامۋىن قامتاماسىز ەتۋ جانە ٴتيىمدى كولىك-لوگيستيكا ينفراقۇرىلىمىن قالىپتاستىرۋدى كوزدەيتىن «نۇرلى جول» دامۋ باعدارلاماسى اياسىندا تۇرعىنداردىڭ ٴال-اۋقاتىن ارتتىرۋ ٴۇشىن شارالار قابىلداۋدىڭ ماڭىزدىلىعى انىق»، – دەدى ەلباسى.

بايانداماسىندا پرەمەر-مينيستر رەسپۋبليكانىڭ الەۋمەتتىك-ەكونوميكالىق دامۋىنىڭ بارلىق نەگىزگى كورسەتكىشتەرى جونىنەن وڭ سەرپىن بارىن ايتتى.

ب.ساعىنتايەۆ قازاقستان پرەزيدەنتىنىڭ بيىلعى 9 قىركۇيەكتەگى كەڭەيتىلگەن ۇكىمەت وتىرىسىندا بەرگەن تاپسىرمالارىنىڭ ۋاقىتىندا ورىندالىپ جاتقانىن مالىمدەدى. اتاپ ايتقاندا، ەل ەكونوميكاسىنىڭ ودان ٴارى دامۋىنا ىقپال ەتۋ ماقساتىمەن قوسىمشا 481 ملرد تەڭگە كولەمىندە قاراجات ٴبولۋ ماسەلەسى شەشىلدى.

پرەمەر-مينيستر كۇنىنە 90 مىڭ باررەل وندىرىلەتىن قاشاعان مۇناي-گاز كەن ورنىنىڭ ىسكە قوسىلعانىنا نازار اۋداردى.

بۇدان بولەك، ب.ساعىنتايەۆ ەلباسىعا ەڭ الدىمەن ازىق-تۇلىك پەن اسا قاجەتتى تاۋارلار باعاسى، تۇرعىندار مەن الەۋمەتتىك مەكەمەلەردى ۇزدىكسىز جىلۋمەن قامتاماسىز ەتۋ ماسەلەسى، سونداي-اق تۇرعىن ٴۇي قۇرىلىسى باعدارلاماسى اياسىندا جوسپارلانعان نىسانداردى ۋاقتىلى تاپسىرۋ تۇراقتى باقىلاۋدا ەكەندىگىن مالىمدەدى.

سونداي-اق، نۇرسۇلتان نازاربايەۆقا ەلدىڭ ەكسپورتتىق الەۋەتىن ودان ٴارى ارتتىرۋ ٴۇشىن قابىلدانىپ جاتقان شارالار تۋرالى حابارلاندى.

قازاقستان پرەزيدەنتى رەسپۋبليكادا جيىن-تەرىن ناۋقانىنىڭ اياقتالعانىنا توقتالىپ، ەندى ۇكىمەتكە استىقتى ەكسپورتتاۋ ماسەلەسىن پىسىقتاۋ قاجەت ەكەندىگىن اتاپ ٴوتتى.

«ٴىرى ٴداندى-داقىلدار ٴوسىرۋشى بولىپ سانالاتىن كوپتەگەن ەلدەردە ەگىننىڭ جاقسى شىققانىن بايقاپ وتىرمىز. وسىعان بايلانىستى بۇل نارىقتا باسەكە جوعارى بولادى. ٴبىز وسىعان دەيىن ٴبىرقاتار ەلدەرمەن استىق ەكسپورتى جونىندە كەلىسىم جاسادىق. وسى ۋاعدالاستىق اياسىندا جەتكىزىلەتىن ٴونىم كولەمىن انىقتاپ الۋ قاجەت»، – دەدى مەملەكەت باسشىسى.

نۇرسۇلتان نازاربايەۆ كەزدەسۋ قورىتىندىسى بويىنشا ٴبىرقاتار ناقتى تاپسىرما بەردى

كوممەنتاريي0

ۆاش كوممەنتاريي بۋدەت وپۋبليكوۆان پوسلە مودەراسيي