USD 335.71 EUR 357.36 RUB 5.23
استانا:

ەلباسى ترامپپەن تەلەفون ارقىلى سويلەستى

فوتو: ҚазАқпарат

مەملەكەت باسشىسى امەريكا قۇراما شتاتتارىنىڭ سايلانعان پرەزيدەنتى دونالد ترامپپەن تەلەفون ارقىلى سويلەستى. نۇرسۇلتان نازاربايەۆ د.ترامپتى پرەزيدەنت سايلاۋىنداعى جەڭىسىمەن قۇتتىقتاپ، وعان سايلاۋالدى باعدارلاماسىن ىسكە اسىرۋ بارىسىندا تابىس تىلەدى، دەپ حابارلايدى اقوردانىڭ ٴباسپاسوز قىزمەتى.

اقش-تىڭ سايلانعان پرەزيدەنتى مەملەكەت باسشىسىن قازاقستان تاۋەلسىزدىگىنىڭ 25 جىلدىعىمەن قۇتتىقتادى. د.ترامپ تاۋەلسىزدىك جىلدارىندا رەسپۋبليكامىز نۇرسۇلتان نازاربايەۆتىڭ باسشىلىعىمەن عاجاپ جەتىستىكتەرگە قول جەتكىزگەنىن اتاپ ٴوتتى.

اڭگىمە بارىسىندا الەمدەگى جانە ورتالىق ازيا وڭىرىندەگى قاۋىپسىزدىك پەن تۇراقتىلىقتى نىعايتۋ ماسەلەلەرى جونىندە پىكىر الماسىلدى.

قازاقستان پرەزيدەنتى ەلىمىزدىڭ يادرولىق قارۋ-جاراقتان ٴوز ەركىمەن باس تارتىپ، يادرولىق قارۋسىز الەم جولىنداعى كۇرەستى حالىقارالىق قوعامداستىقپەن بىرلەسە جالعاستىراتىنىن ايتتى.

د.ترامپ بۇل ۇستانىممەن تولىقتاي كەلىسەتىنىن جەتكىزدى.

– جاھاندىق دەڭگەيدە شەشىلۋگە ٴتيىس يادرولىق قارۋسىزدانۋ مەن ونى تاراتپاۋدان اسقان ماڭىزدى ماسەلە جوق، – دەدى اقش-تىڭ سايلانعان پرەزيدەنتى.

بۇدان بولەك، نۇرسۇلتان نازاربايەۆ د.ترامپتىڭ نازارىن رەسەي مەن امەريكا ىنتىماقتاستىعىن نىعايتۋعا مۇمكىندىك بەرەتىن باستى ٴۇش سالاعا اۋداردى. ولار: تەرروريزممەن كۇرەس، ۋكرايناداعى داعدارىستى رەتتەۋ جانە جاھاندىق يادرولىق قاۋىپسىزدىكتى نىعايتۋ.

رەسەي پرەزيدەنتى ۆ.پۋتينمەن بولعان تەلەفون ارقىلى سويلەسۋ قورىتىندىسىن ەسكەرىپ، اقش-تىڭ سايلانعان پرەزيدەنتى ۆاشينگتون مەن ماسكەۋ ىنتىماقتاستىعىن دامىتۋدىڭ پەرسپەكتيۆاسىنا ٴوزىنىڭ زور وپتيميزممەن قارايتىنىن اتاپ ٴوتتى.

تاراپتار قازاقستان مەن امەريكانىڭ دوستىق قارىم-قاتىناسىن، سونىڭ ىشىندە ساۋدا-ەكونوميكالىق سەرىكتەستىكتى جاڭا دەڭگەيگە كوتەرۋگە ٴازىر ەكەنىن مالىمدەدى. د.ترامپ جاقىن ارادا ەكى كوشباسشىنىڭ كەزدەسۋىن وتكىزۋگە مۇددەلىلىك ٴبىلدىردى.

اڭگىمەلەسۋ سوڭىندا اقش-تىڭ سايلانعان پرەزيدەنتى بارشا قازاقستان حالقىنا رەسپۋبليكا تاۋەلسىزدىگىنىڭ 25 جىلدىعى قارساڭىندا يگى تىلەگىن جولدادى.

كوممەنتاريي0

ۆاش كوممەنتاريي بۋدەت وپۋبليكوۆان پوسلە مودەراسيي