BAQ.kz - Қазақстан жаңалықтары USD 374.47 BAQ.kz - Қазақстан жаңалықтары EUR 421.43 BAQ.kz - Қазақстан жаңалықтары RUB 5.54
استانا:

ەلباسى: قازاقستان «نۇرلى جول» ارقىلى ورتالىق ازياداعى لوگيستيكالىق حابقا اينالۋدى كوزدەيدى

فوتو: Бауыржан Жуасбаев

مەملەكەت باسشىسى قازاقستان مەن تۇركيا اراسىنداعى جوعارى دەڭگەيدەگى ستراتەگيالىق ىنتىماقتاستىق كەڭەسىنىڭ ٴۇشىنشى وتىرىسىنا قاتىستى، دەپ حابارلايدى baq.kz اقپارات اگەنتتىگى اقوردانىڭ ٴباسپاسوز قىزمەتىنە سىلتەمە جاساپ.

قازاقستان پرەزيدەنتى وتىرىسقا قاتىسۋشىلار الدىندا سويلەگەن سوزىندە ەكى جاقتى ىنتىماقتاستىقتىڭ قازىرگى ماسەلەلەرىنە جان-جاقتى توقتالدى.

– قازاقستان مەن تۇركيا اراسىنداعى قارىم-قاتىناس ستراتەگيالىق سەرىكتەستىك رۋحىندا دامىپ كەلەدى. ساۋدا-ەكونوميكالىق بايلانىستار ىنتىماقتاستىعىمىزدىڭ ماڭىزدى بولىگى سانالادى، – دەدى مەملەكەت باسشىسى.

نۇرسۇلتان نازاربايەۆ تۇركيانىڭ ماڭىزدى ينۆەستيسيالىق ارىپتەستەرىمىزدىڭ ٴبىرى ەكەنىن ايتتى.

قازاقستان پرەزيدەنتى ەكى جاقتى بايلانىستاردى ودان ٴارى نىعايتۋدىڭ ناقتى شارالارىنا توقتالدى.

نۇرسۇلتان نازاربايەۆ ٴوزارا ىنتىماقتاستىق ماسەلەلەرىن شەشۋ ٴۇشىن قازاقستان مەن تۇركيا اراسىنداعى ۇكىمەتارالىق كوميسسيانىڭ مۇمكىندىكتەرىن ٴتيىمدى پايدالانۋ قاجەتتىگىن اتاپ ٴوتتى.

سونىمەن قاتار، مەملەكەت باسشىسى «جاڭا سينەرگيا» اتتى بىرلەسكەن باعدارلامانى جۇزەگە اسىرۋ ناتيجەلەرىنە توقتالىپ، ينۆەستيسيالىق ارىپتەستىكتى دامىتۋ پەرسپەكتيۆالارى تۋرالى اڭگىمەلەدى.

– بۇگىندە قازاقستان «نۇرلى جول» باعدارلاماسى اياسىندا كولىك ينفراقۇرىلىمىن جاڭارتۋدا. ٴبىز وسى باعدارلامانى ىسكە اسىرۋ ناتيجەسىندە ورتالىق ازياداعى جەتەكشى لوگيستيكالىق حابقا اينالۋدى جوسپارلاپ وتىرمىز. وسىعان بايلانىستى، بىزگە ەلدەرىمىزدىڭ ترانزيتتىك الەۋەتىن ٴتيىمدى پايدالانۋ قاجەت، – دەدى قازاقستان پرەزيدەنتى.

نۇرسۇلتان نازاربايەۆ مۇناي-گاز جانە اسكەري-ونەركاسىپ سالالارىنداعى قاتىناستاردى نىعايتۋ ماسەلەلەرىنە نازار اۋداردى.

سونداي-اق، مەملەكەت باسشىسى اگروونەركاسىپ كەشەنىندە، تۋريستىك جانە عىلىمي-تەحنيكالىق سالالاردا ٴتيىمدى بايلانىستار ورناتۋدىڭ ماڭىزدى ەكەنىن اتاپ ٴوتتى.

كەڭەس بارىسىندا مادەني-گۋمانيتارلىق ىنتىماقتاستىق ماسەلەلەرىنە دە ەرەكشە ٴمان بەرىلدى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي