BAQ.kz - Қазақстан жаңалықтары USD 370.11 BAQ.kz - Қазақстан жаңалықтары EUR 419.37 BAQ.kz - Қазақстан жаңалықтары RUB 5.58
استانا:

ٴبىرىڭعاي جيىنتىق تولەم جۇيەسىن ەنگىزۋدى كوزدەيتىن زاڭ جۇيەسى ماقۇلداندى

فوتو: ашық дереккөзден

استانا، baq.kz ٴتىلشىسى. ٴماجىلىستىڭ ٴبىرىنشى وقىلىمىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە حالىقتىڭ جۇمىسپەن قامتىلۋىن فورماليزاسيالاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ماقۇلداندى.

اتالعان قۇجات ەلباسىنىڭ ٴوزىن-وزى جۇمىسپەن قامتىعان حالىقتىڭ قىزمەتىن فورماليزاسيالاۋ جانە الەۋمەتتىك قامسىزداندىرۋ جۇيەلەرىنە قاتىسۋىن قامتاماسىز ەتۋ ماقساتىندا ازىرلەنىپ وتىر.

«زاڭ جوباسىنىڭ نەگىزگى جاڭالىعى بەيرەسمي جۇمىسپەن قامتىلعانداردىڭ قىزمەتىن 2019 جىلعى 1 قاڭتاردان باستاپ سالىق ورگاندارىندا تىركەۋدىڭ جەڭىلدەتىلگەن ٴتارتىبىن كوزدەيتىن جاڭا قۇقىقتىق رەجىمدى، ياعني ٴبىرىڭعاي جيىنتىق تولەمدى (بجت) ەنگىزۋ بولىپ سانالادى. رەسپۋبليكا ەكونوميكاسىندا جالپى جۇمىسپەن قامتىلعانداردىڭ 16% (1 ملن 376 مىڭ ادام) بەيرەسمي جۇمىسپەن قامتىلعاندار، ونىڭ ىشىندە 800 مىڭعا جۋىق جالدامالى جۇمىسكەر ەڭبەك شارتىنسىز جۇمىس ىستەيدى جانە 588 مىڭ ادام ٴوزىن-وزى جۇمىسپەن قامتىعاندار»، - دەدى ەڭبەك جانە حالىقتى الەۋمەتتىك قورعاۋ ٴمينيسترى ٴمادينا ٴابىلقاسىموۆا.

زاڭ جوباسى اياسىندا 3 كودەكسكە جانە 6 زاڭعا وزگەرىستەر مەن تولىقتىرۋلار ەنگىزۋ كوزدەلەدى.

وسى ورايدا مينيستر بەيرەسمي جۇمىسپەن قامتىلعانداردىڭ قىزمەتىن تىركەۋدى جەڭىلدەتۋ ٴۇشىن ٴبىرىڭعاي جيىنتىق تولەمدى ەنگىزۋ ۇسىنىلعانىن اتاپ ٴوتتى.

«ٴبىرىڭعاي جيىنتىق تولەمدى تولەۋ بەيرەسمي جۇمىسپەن قامتىلعانداردىڭ قىزمەتىن تىركەۋمەن قاتار، مىندەتتى مەديسينالىق جانە الەۋمەتتىك ساقتاندىرۋ، زەينەتاقىمەن قامسىزداندىرۋ جۇيەلەرىنە قاتىسۋعا مۇمكىندىك بەرەدى. بجت جۇمىس ىستەيتىن قازاقستان ازاماتتارى ٴۇشىن 4 مىندەتتى تولەمدى ٴبىر تولەممەن الماستىرادى»، - دەدى ول.

ٴمادينا ٴابىلقاسىموۆانىڭ ايتۋىنشا، اتالعان جۇيە ازاماتتار ٴۇشىن كىرىس سالىعى جانە الەۋمەتتىك تولەمدەر بويىنشا ەڭ تومەن ستاۆكالار رەسپۋبليكالىق ماڭىزى بار قالالاردا، استانادا جانە وبلىستىق ماڭىزى بار قالالاردا 1 اەك -2 525 تەڭگە، باسقا ەلدى مەكەندەردە – 0،5 اەك (1 اەك -2405 تەڭگە) دەڭگەيىندە بەلگىلەندى.

ٴبىرىڭعاي جيىنتىق تولەمنىڭ ۇلەسى: جەكە تابىس سالىعى – 10 %; مەملەكەتتىك الەۋمەتتىك ساقتاندىرۋ قورىنا الەۋمەتتىك اۋدارىمدار – 20%; ٴبىرىڭعاي جيناقتاۋشى زەينەتاقى قورىنا زەينەتاقى تولەمدەرى – 30%; مىندەتتى الەۋمەتتىك مەديسينالىق ساقتاندىرۋ قورىنا اۋدارىمدار – 40% قۇرايدى.

ٴبىرىڭعاي جيىنتىق تولەم ساۋدا نىساندارىن قوسا العاندا، كوممەرسيالىق جىلجىمايتىن مۇلىك نىسان اۋماعىندا قىزمەت كورسەتەتىن جەكە تۇلعالارعا; تۇرعىن ٴۇيدى قوسپاعاندا، مۇلىكتى جالعا بەرەتىن ادامدارعا; جەكە پراكتيكامەن اينالىساتىن ادامدارعا; ورالمانداردى قوسپاعاندا، شەتەلدiكتەر مەن ازاماتتىعى جوق ادامدارعا; جەكە كاسىپكەر رەتىندە مەملەكەتتىك تىركەلگەن ادامدارعا قولدانىلمايدى.

سونىمەن قاتار مينيستر اتالعان جۇيەنى ەنگىزۋ ارقىلى 500 مىڭ بەيرەسمي جۇمىسپەن قامتىلعان ازاماتتىڭ قىزمەتىن زاڭداستىرۋعا مۇمكىندىك بەرەتىنىن جەتكىزدى.

«وسىلايشا، ٴبىرىڭعاي جيىنتىق تولەم جەكە تۇلعالارعا عانا قىزمەت كورسەتەتىن جانە جەكە قوسالقى شارۋاشىلىعىنان تۇسەتىن ونىمدەردى جەكە ازاماتتارعا ساتاتىن جەكە تۇلعالارعا قولدانىلادى. ازاماتتاردىڭ قالعان ساناتتارىنا سالىق پەن الەۋمەتتىك تولەمدەردى تولەۋدىڭ قولدانىستاعى ٴتارتىبى ساقتالادى. ٴبىرىڭعاي جيىنتىق تولەمدى ەنگىزۋ ناتيجەسىندە 500 مىڭ بەيرەسمي جۇمىسپەن قامتىلعان ادامنىڭ قىزمەتىن فورماليزاسيالاۋ كوزدەلەدى. سونداي-اق 65،4 مىڭ تولەۋشى پاتەنت جانە جەڭىلدەتىلگەن دەكلاراسيا نەگىزىندە قولدانىستاعى سالىق رەجيمىنەن اۋىسۋى مۇمكىن»، - دەدى ٴابىلقاسىموۆا.

وسى ورايدا ول بجت-نى ەنگىزۋ بەيرەسمي جۇمىسپەن قامتىلعاندارعا مىندەتتى الەۋمەتتىك مەديسينالىق ساقتاندىرۋ جۇيەسىنە قاتىسۋعا جانە مەديسينالىق مەكەمەلەردى تاڭداۋ قۇقىعىمەن سوماسى مەن تۇرلەرى شەكتەلمەگەن مەديسينالىق قىزمەتتەرگە قول جەتكىزۋگە مۇمكىندىك بەرەتىنىن ٴمالىم ەتتى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي