BAQ.kz - Қазақстан жаңалықтары USD 364.95 BAQ.kz - Қазақстан жаңалықтары EUR 416.99 BAQ.kz - Қазақстан жаңалықтары RUB 5.55
استانا:

قازاقستاندا بەتتى تۇمشالاۋعا تىيىم سالىنۋى مۇمكىن

فوتو: ашық дереккөзден

ماجىلىستە قارا جامىلۋعا تىيىم سالاتىن زاڭ جوباسى ٴبىرىنشى وقىلىمدا ماقۇلداندى، دەپ حابارلايدى baq.kz ٴتىلشىسى.

بۇگىن پارلامەنتتىڭ تومەنگى پالاتاسىندا «قر كەيبىر زاڭنامالىق اكتىلەرىنە ٴدىني قىزمەت جانە ٴدىني بىرلەستىكتەر ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى تالقىعا سالىندى. اتالعان قۇجاتتى دەپۋتاتتارعا ٴدىن ىستەرى جانە ازاماتتىق قوعام ٴمينيسترى دارحان كالەتايەۆ تانىستىردى.

«مەملەكەتتىڭ ٴدىني بوستاندىعىن قامتاماسىز ەتۋ سالاسىنداعى قۇقىقتىق بازاسى الەمدىك دەموكراتيالىق ستاندارتتارعا تولىقتاي سايكەس كەلەدى. مۇنى وسى باعىتتا زەرتتەۋ، تەكسەرۋ جۇرگىزەتىن حالىقارالىق، قۇقىقتىق ۇيىمدار دا، ساراپشىلار دا راستايدى. الايدا، سوڭعى جىلدارى الەمدە قالىپتاسقان گەوساياسي، ٴدىني احۋال، ەكسترەميزم مەن تەرروريزمنىڭ كۇشەيۋى ٴدىن سالاسىنداعى ۇستانىمدار مەن نورماتيۆتىك، قۇقىقتىق نورمالاردى جەتىلدىرۋدى تالاپ ەتىپ وتىر»، - دەدى مينيستر.

ونىڭ ايتۋىنشا، بۇل ماسەلە قازاقستاندى دا اينالىپ وتپەيدى. كالەتايەۆتىڭ پىكىرىنشە، ٴدىن سالاسىنداعى زاڭنامانى جەتىلدىرۋگە باعىتتالعان قادامدار مەملەكەتتىڭ قاۋىپسىزدىگى مەن تۇراقتىلىعى ٴۇشىن اۋاداي قاجەت.

كەيىن ۆەدومستۆو باسشىسى اتالعان زاڭ جوباسىنداعى ماڭىزدى نورمالارعا توقتالدى.

«زاڭ جوباسىن ٴۇش بلوككا بولدىك. ٴبىرىنشى بلوكقا ٴدىندى دەسترۋكتيۆتى ماقساتتارعا قولدانۋعا جول بەرمەۋگە باعىتتالعان تۇزەتۋلەر كىرەدى. اتاپ ايتقاندا، «دەسترۋكتيۆتى ٴدىني اعىم» جانە «ٴدىني راديكاليزم» دەگەن جاڭا ۇعىمدار ەنگىزىلەدى. بۇل ۇعىمداردى ەنگىزۋ جانە دەسترۋكتيۆتى ٴدىني اعىمداردىڭ يدەولوگياسىن، اتريبۋتتارى مەن سىرتقى بەلگىلەرىن تاراتۋعا تىيىم سالۋ ارقىلى سىرتتان ەلىمىزگە جات يدەولوگيانىڭ ەنۋىنە توسقاۋىل قويۋعا مۇمكىندىك بەرەدى. جوبادا بەت-الپەتتى تانۋعا كەدەرگى كەلتىرەتىن كيىم-كەشەكتى قوعامدىق ورىنداردا كيىپ جۇرۋگە تىيىم سالۋ كوزدەلگەن»، - دەدى ول.

سونىمەن قاتار، مينيستر زاڭ جوباسىنىڭ تاعى ٴبىر ماڭىزدى بولىگىنە توقتالدى.

«نورمالاردىڭ ەكىنشى جيىنتىعى ٴدىني قىزمەت سۋبەكتىلەرىنىڭ قۇقىقتارى مەن مىندەتتەرىن ناقتىلاۋ بويىنشا ەرەجەلەردى قامتيدى. جوبادا مەملەكەتتىك قىزمەتشىلەردىڭ ٴدىن سالاسىنداعى ادەبىنە بايلانىستى ٴبىرقاتار تالاپتار ناقتىلانعان. جوباعا مەملەكەتتىك قىزمەتشىلەردىڭ ادەپ كودەكسىندە كوزدەلگەن ٴۇش شەكتەۋ ەنگىزىلگەن. اتاپ ايتقاندا: ٴوزىنىڭ قىزمەتتىك مۇمكىندىكتەرىن ٴدىني بىرلەستىكتەردىڭ مۇددەلەرىنە پايدالانباۋ; وزىنە باعىنىستاعى قىزمەتشىلەردى ٴدىني قىزمەتكە ماجبۇرلەمەۋ; ٴدىني بىرلەستىكتى قۇرۋعا باستاماشى نەمەسە ونىڭ مۇشەسى بولماۋ. ٴتيىستى نورمانى «قازاقستان رەسپۋبليكاسىنىڭ مەملەكەتتىك قىزمەتى تۋرالى» زاڭىنا ەنگىزۋ ۇسىنىلادى»، - دەدى ول.

دارحان كالەتايەۆتىڭ ايتۋىنشا، اتالعان زاڭ جوباسى اياسىندا ٴدىني احۋالعا مونيتورينگ جۇرگىزۋ بويىنشا جەرگىلىكتى اتقارۋشى ورگاندارعا جاڭا مىندەتتەر جۇكتەلەدى.

«بۇگىنگى تاڭدا وبلىستاردىڭ، استانا جانە الماتى قالاسى اكىمدىكتەرىنىڭ ٴدىن ىستەرى باسقارمالارى ٴدىني احۋالدى، سونداي-اق وڭىردە ارەكەت ەتەتىن ٴدىني بىرلەستىكتەردىڭ، ميسسيونەرلەردىڭ، ٴدىني ٴبىلىم بەرۋ ۇيىمدارىنىڭ قىزمەتىن زەردەلەۋ قۇقىعىنا يە. الايدا، اۋداندىق دەڭگەيدە مۇنداي وكىلەتتىك جوق. ال، اۋداندىق اكىمدىكتەر ٴدىن سالاسىنداعى ماسەلەلەرمەن اينالىسادى، سونىڭ ىشىندە وڭىردەگى ٴدىني احۋالعا تالداۋ جۇرگىزەدى، اكىمشىلىك قۇقىق بۇزۋشىلىق تۋرالى حاتتامالار تولتىرادى. وسىعان بايلانىستى، اۋدان اكىمدىكتەرىنە اتالعان قۇزىرەتتى زاڭنامالىق دەڭگەيدە بەكىتۋ ۇسىنىلادى»، - دەدى مينيستر.

سونداي-اق، ول اتالعان قۇجات اتەيستەردىڭ دە قۇقىعىن قورعاۋعا باعىتتالعانىن اتاپ ٴوتتى.

«زاڭناماعا دىنگە كوزقاراسىنا قاراماستان ازاماتتاردىڭ، سونىڭ ىشىندە دىنگە سەنۋشىلەر مەن سەنبەيتىندەردىڭ تەڭ قۇقىعىن قامتاماسىز ەتۋ بويىنشا نورمالاردى ەنگىزۋ ۇسىنىلادى. مۇنى قازاقستاننىڭ حالىقارالىق-قۇقىقتىق مىندەتتەمەلەرى تالاپ ەتەدى. بۇل بويىنشا ەسكەرتۋدى بىرىككەن ۇلتتار ۇيىمىنىڭ ادام قۇقىقتارى جونىندەگى كوميتەتى بەرگەن. بۇگىنگى تاڭدا شامامەن 14،5% قازاقستاندىق وزدەرىن اتەيستەر نەمەسە اگنوستيكتەر رەتىندە كورسەتىپ وتىر. ولاردىڭ قۇقىقتارى دىنگە سەنۋشىلەردىڭ قۇقىقتارى قورعالاتىن دەڭگەيدە قورعالۋى ٴتيىس»، - دەدى ول.

دارحان كالەتايەۆ زاڭ جوباسى اياسىندا كامەلەتكە تولماعانداردى ٴدىني قىزمەتكە زاڭسىز تارتۋدان قورعاۋ دەڭگەيى كۇشەيەتىنىن، ٴارى شەتەلدەردە ٴدىني ٴبىلىم الۋ رەتتەلەتىنىن جەتكىزدى.

«بالالار مەن جاسوسپىرىمدەردى اتا-انالارىنىڭ نەمەسە زاڭدى وكىلدەرىنىڭ كەلىسىمىنسىز سالتتار مەن جورالارعا تارتپاۋدى نورماتيۆتىك تۇرعىدا بەكىتۋ ۇسىنىلادى. شەتەلدەردە ٴدىني ٴبىلىم الۋ رەتتەلەتىن بولادى. جوباعا قازاقستان ازاماتتارىنىڭ شەت مەملەكەتتەردە ٴدىني ٴبىلىم الۋىنا ەلىمىزدە جوعارعى ٴدىني ٴبىلىم العاننان كەيىن عانا جول بەرىلەتىنى تۋرالى نورما ەنگىزىلەدى»، - دەدى مينيستر.

ۇزاق تالقىلاۋلاردان كەيىن «قر كەيبىر زاڭنامالىق اكتىلەرىنە ٴدىني قىزمەت جانە ٴدىني بىرلەستىكتەر ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن دەپۋتاتتار ماقۇلدادى. زاڭ جوباسى 12 زاڭ اكتىسىنە، سونىڭ ىشىندە 3 كودەكس پەن 9 زاڭعا 53 تۇزەتۋ ەنگىزۋ كوزدەلەدى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي