BAQ.kz - Қазақстан жаңалықтары USD 369.35 BAQ.kz - Қазақстан жаңалықтары EUR 421.47 BAQ.kz - Қазақстан жаңалықтары RUB 5.57
استانا:

ازاماتتاردىڭ سوت ادىلدىگىنە سەنىمسىزدىكپەن قاراۋىنا جول بەرمەۋ كەرەك - توقايەۆ

استانا، baq.kz ٴتىلشىسى. سەنات ٴتوراعاسى قاسىم-جومارت توقايەۆ «قۇقىق قورعاۋ قىزمەتىنىڭ پروسەستىك نەگىزدەرىن ودان ٴارى جاڭعىرتۋ» تاقىرىبىنا ارنالعان پارلامەنتتىك تىڭداۋلاردا قۇقىق قورعاۋ سالاسىن دامىتۋ جولدارىن ۇسىندى.

«ٴبىرىنشى، ۇكىمەت الدىندا قىزمەت كورسەتۋدىڭ سەرۆيستىك مودەلىن نەگىزگە الا وتىرىپ، قۇقىق قورعاۋ ورگاندارىنىڭ ازاماتتارمەن زاماناۋي فورماتتا جۇمىس ىستەۋ جۇيەسىن جەدەل قالىپتاستىرۋ مىندەتى تۇر. قىزمەت كورسەتۋدىڭ سەرۆيستىك مودەلى نەگىز رەتىندە الىنۋى ٴتيىس. ەكىنشى، ارىز تىركەلگەننەن باستاپ سوت شەشىمى شىعارىلعانعا دەيىن ىستەردى قاراۋدىڭ بارلىق ساتىلارىن جاپپاي سيفرلاندىرۋ قاجەت. سيفرلاندىرۋ سىبايلاس جەمقورلىقتىڭ ورىن الۋىن ازايتىپ، ونلاين رەجيمدەگى قولجەتىمدى كەرى بايلانىس ورناتۋدا شەشۋشى ٴرول اتقارادى. ٴۇشىنشى، سيفرلىق تەحنولوگيالاردىڭ كومەگىمەن ازاماتتاردى پوليسيانىڭ جانە سوتتىڭ قىزمەتىن باعالاۋ جۇمىسىنا كەڭىنەن تارتۋ قاجەت. ازاماتتاردىڭ جوعارى سەنىمى مەملەكەت جۇرگىزىپ وتىرعان ساياساتتىڭ تيىمدىلىگىن ايقىندايتىن تىكەلەي كورسەتكىش بولىپ تابىلادى. جالپى جۇمىستىڭ ساپاسى ىستەردىڭ ۋاقتىلى جانە ساپالى قارالۋى بويىنشا جانە ازاماتتاردىڭ تالاپ-تىلەكتەرىنىڭ ٴتيىستى دەڭگەيدە ورىندالۋى ارقىلى باعالانۋى ٴتيىس»، - دەدى توقايەۆ.

سەنات ٴتوراعاسىنىڭ ايتۋىنشا، تورتىنشىدەن، قىلمىستىق ىستەر بويىنشا پروسەسسۋالدىق شەشىمدەردى قابىلداۋدا ادىلدىكتى قامتاماسىز ەتىپ، تاۋەلسىز جانە ٴادىل سوت جۇيەسىن جەتىلدىرۋدى، سونداي-اق سوت ٴىسىن جۇرگىزۋدىڭ جەدەلدىگى مەن انىقتىعىن ارتتىرۋ قاجەت.

«بەسىنشى، ادۆوكاتتاردىڭ پروسەسسۋالدىق مۇمكىندىكتەرىن كەڭەيتۋ ارقىلى ايىپتاۋشى مەن قورعاۋشى تاراپ اراسىنداعى ٴسوز جارىستىرۋ قاعيداتىنىڭ ورىندالۋىن ودان ٴارى نىعايتا ٴتۇسۋ كەرەك. التىنشى، تەگىن قۇقىقتىق كومەك كورسەتۋدىڭ ەڭ تومەنگى ستاندارتتارىن، كورسەتىلگەن قىزمەتتەردى باعالاۋدىڭ ٴادىل جۇيەسىن بەلگىلەۋ كەرەك. بۇل نارىقتاعى باسەكەلەستىكتى دامىتۋعا جانە ونىڭ ساپاسىن ارتتىرۋعا كۇشتى سەرپىن بەرەرى انىق. جەتىنشى، تاراپتاردىڭ ٴوزارا بىتىمگە كەلۋى جانە كەلتىرىلگەن زياننىڭ ورنىن تولتىرۋى نەگىزىندە سوت تورەلىگىنىڭ قالپىنا كەلتىرۋشى سيپاتتاعى جاڭا فورماتتارىن دامىتۋ قاجەت، سونداي-اق، ٴىستى جەدەل جۇرگىزۋگە جانە ٴىستى قاراۋ ۋاقىتىن ۇنەمدەۋگە مۇمكىندىك بەرەتىن قىلمىستىق ىستەر اۋقىمىن كەڭەيتۋ كەرەك»، - دەدى ول.

سەنات ٴتوراعاسىنىڭ مالىمەتىنشە، سەگىزىنشىدەن، وكىلەتتىكتەردىڭ قايتالانۋىن جانە قىزمەت شەڭبەرىنەن تىس فۋنكسيالاردى بارىنشا شەكتەۋ قاجەت، سوتقا دەيىنگى تەرگەۋ، قاداعالاۋ جانە سوت ورگاندارى اراسىنداعى مىندەتتەردىڭ ناقتى بەلگىلەنۋىن قامتاماسىز ەتۋ بويىنشا جان-جاقتى جۇمىس جۇرگىزۋ كەرەك.

«قىلمىستىق پروسەسس – بۇل ادامنىڭ قۇقىقتارى مەن بوستاندىعىنا بيلىك كوبىرەك ىقپال ەتەتىن تاۋەكەلى جوعارى سالا. سوندىقتان دامىعان ەلدەردە جازىقسىزدىق پرەزۋمپسياسىنا نەگىزدەلگەن ىزگىلىك، ادامنىڭ جەكە باسىنا جانە مەنشىككە قول سۇقپاۋشىلىق، ادامنىڭ ار-نامىسى مەن قادىر-قاسيەتىن قۇرمەتتەۋ قاعيداتتار رەتىندە تاريحي تۇرعىدا ورنىققان. ازاماتتاردىڭ قۇقىق قورعاۋ ورگاندارىنىڭ جۇمىسىنا جانە سوتتىڭ ادىلدىگىنە سەنىمسىزدىكپەن قاراۋىنا جول بەرۋگە بولمايدى. مۇنداي جاعداي قازاقستاندىقتاردىڭ ٴال-اۋقاتى مەن ٴومىر ٴسۇرۋ ساپاسىنا تەرىس اسەرىن تيگىزەرى داۋسىز. قىلمىستىق-پروسەستىك زاڭناما ازاماتتاردىڭ كونستيتۋسيالىق قۇقىقتارى مەن بوستاندىقتارىن قورعاۋعا نەگىزدەلۋى ٴتيىس»، - دەدى قاسىم-جومارت توقايەۆ.

بۇعان دەيىن سەنات ٴتوراعاسى نەگىزسىز قىلمىستىق قۋدالاۋدان قورعاۋ - قازىرگى وتكىر سۇراقتاردىڭ ٴبىرى ەكەنىن ايتقان بولاتىن.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي