BAQ.kz - Қазақстан жаңалықтары USD 367.3 BAQ.kz - Қазақстан жаңалықтары EUR 419.68 BAQ.kz - Қазақстан жаңалықтары RUB 5.58
استانا:

جانىبەك داۋرەنبەكوۆ، سيرك ٴارتىسى: جىلقى دەگەن تەحنيكا ەمەس ەكسكليۋزيۆ

استانا، baq.kz ٴتىلشىسى. ات قۇلاعىندا وينايتىن جاس ٴارتىس جانىبەك جانگەلدى ۇلى استانا سيركتە ونەر كورسەتىپ جۇرگەنىنە التى جىلدان استى. سيرك ونەرىنىڭ قىر-سىرىن جەتىك مەڭگەرگەن جاس جىگىت جاقىندا قىتايدىڭ 20-عا جۋىق قالاسىندا 9 ايدان استام ۋاقىت ونەر كورسەتىپ، قازاق جىگىتىنىڭ، قازاق جىلقىسىنىڭ، قازاق ەلىنىڭ ونەرىن كورسەتىپ قايتتى.

جاس سيرك ارتىسىمەن اڭگىمە بارىسىندا بۇگىنگى قازاق سيرك ونەرىنىڭ مۇمكىندىكتەرى مول ەكەنىن باعامدادىق.

- جانىبەك، ٴوزىڭ جاستايىڭنان اۋىلدا وسكەن بالاسىڭ. سەنەن، «ات سپورتىنا قالاي كەلدىڭ؟» دەپ سۇراۋدىڭ ٴوزى ارتىق شىعار...

- ات دەسە، جىلقى دەسە جۇرەگىم ورەكپىپ، كوڭىلىم الاڭداپ كەتەتىن. جاقسى كورۋىمنىڭ سەبەبى دە جوق ەمەس قوي. اتا-بابامىزدىڭ بارلىعى ات ۇستىندە ٴوتتى. ات ۇستىندە وتكەن اتالارىمىزدىڭ رۋحى قانىمىزدا ٴالى بار. دەگەنمەن ٴبىز اتا-بابامىز ات ۇستىندە ٴوتتى دەسەك تە، قازىرگى كەزدە ات سپورتىنىڭ دامۋى كەنجەلەپ قالعان. اسىرەسە 21 عاسىردىڭ ۇرپاقتارى ٴۇشىن جىلقى، مال شارۋاشىلىعى دەگەن تۇسىنىك ەسكى كوزقاراس سەكىلدى. بۇل – ٴوز ويىم.

ال ٴوزىمنىڭ ات سپورتىنا كەلۋىمە وسى اتقۇمارلىعىم سەبەپ بولدى. اسىرەسە ماعان ات قۇلاعىندا ويناۋ، اتونەرى قاتتى ۇنايدى. 2012 جىلى ەلورداداعى «استانا سيرك» مەكەمەسىنە جۇمىسقا كەلدىم. تۇرلىبەك كۇنعوجينوۆ دەگەن قازاقستاننىڭ ەڭبەك سىڭىرگەن سيرك ٴارتيسى بار. سول جىگىتتەرمەن بىرگە جۇمىس ىستەدىم، سولاردان ۇيرەندىم بارلىعىن. ولار ماعان سيركتىڭ الىپپەسىنەن باستاپ، بارلىعىن ۇيرەتتى. اتپەن جۇمىس، ولاردى جاتتىقتىرۋ، ولاردى ساحناعا شىعارۋ، مۋزىكامەن جۇمىس ىستەۋ، ٴتىپتى قاراپايىم عانا اتتاردى جەمدەپ، ونىڭ استىن تازالاپ، ٴۇستىن جۋۋعا دەيىن سولاردىڭ ٴتالىمىن الدىم.

سول ۇيرەنگەنىمنىڭ بارلىعىن حالىققا ۇسىنعىم كەلدى. ونىڭ دا ٴساتى ٴتۇستى. 2017 جىلى قىتايعا بارىپ، ەلىمىزدىڭ كوك تۋىن جەلبىرەتىپ، قازاق حالقىنىڭ ابىرويىن كوتەرىپ قايتتىم. قىتاي ەلىنىڭ 20-عا جۋىق قالاسىن ارالادىق. ول جەردە ٴوزىمىزدىڭ اتتارىمىزدى، قازاق جىلقىسىنىڭ كەرەمەتىن تانىتا الدىق.

- اتتاردى وزدەرىڭ اپاردىڭدار ما؟

- ٴيا، ٴوزىمىزدىڭ اتتار. ٴبىراق بىرنەشە جىلدىڭ الدىندا بارعان ول جاققا. ناقتىراق ايتسام، 2012 جىلى ونەر كورسەتۋگە بارعان اتتار سول جەردە قالعان بولاتىن. سول اتتاردى پايدالاندىق.

- وسى جولى دا سوندا تاستاپ كەتتىڭدەر مە؟

- ٴيا، ولار سول جەردە باعىمدا تۇرادى.

- اتپەن جۇمىس ىستەۋ قيىن با؟

- اركىمگە ٴارقالاي. ەگەر اتونەرىنىڭ (دجيگيتوۆكا) تەحنيكاسىن مەڭگەرگەندەر ٴۇشىن قيىن ەمەس. بىر-ەكى ايدا بارلىعىن مەڭگەرۋگە بولادى.

- ال اتونەرىنىڭ تەحنيكاسى دەگەن قانداي بولادى؟

- اياقتى ٴتۇزۋ ۇستاۋ; ەر ۇستىندە دۇرىس وتىرۋ; شاۋىپ بارا جاتقان اتتىڭ ۇستىندە قيمىل جاساعان كەزدە قاۋىپسىزدىك پەن جىلدامدىقتى مەنگەرۋ; ساحناعا شىعاتىن اتتىڭ حاراكتەرىن ٴبىلۋ كەرەك. اتونەرىندە ماڭىزدى دۇنيەنىڭ ٴبىرى – ەر. ەرىڭىز وزىڭىزگە لايىق ٴارى ىڭعايلى بولعانى ورىندى.

- سەن سيرك ونەرىن وقىدىڭ با؟

- جوق، وقىمادىم.

- بىردەن سيرككە كەلىپ، سول جەردە بارلىعىن مەنگەرىپ الدىڭ؟

- ٴيا. بارلىعىن سول سيرك الاڭىنان ۇيرەندىم.

- سەن ٴوزىڭ ۇيرەنىپ الىپسىڭ. ال ناعىز سيرك ارتىستەرىن دايىنداپ، ولاردىڭ ونەرىن شىڭداۋ ەلىمىزدە جولعا قويىلعان با؟

- ارينە، بۇعان دەيىن الماتىدا سيرك ارتىستەرىن دايىندايتىن، ەندى استانادا دا بۇل ونەردىڭ مايتالماندارىن دايىنداۋ قولعا الىندى. اسىرەسە، وسى ات سپورتى – اتونەرىندە ونەر كورسەتەتىن جاستاردى وقىتاتىن ارنايى وقۋ ورىنى بار. ونىڭ سىرتىندا، بۇل سالانى دامىتۋ ماقساتىندا شەتەلدە جۇرگەن جاستار دا كوپ. مىسالى ٴبىز بارعان قىتاي قالالارىنىڭ وزىندە 40-قا جۋىق قازاق جاسى ٴبىلىم الىپ، ونەر كورسەتىپ ٴجۇر.

- سيرك اتتارىن باپتاۋ، باعىپ-كۇتۋ قيىن با؟

- سيركتە كوبىندە ەرەكشە تۇقىمدى اتتاردى پايدالانادى. سودان بولار ولار تەز ۇيرەنەدى.

- مىسالى قانداي تۇقىمدار؟

- مەنىڭ ٴبىر بايقاعانىم «ورلوۆ جەلگىشتەرى» مەن «فريزدەر» سيركتىڭ ساحناسىنا تەز ۇيرەنەدى. ولاردىڭ تەز ۇيرەنۋىمەن قاتار، بويشاڭ، سىمباتتى، سىرت بەينەسى قانشا سۇلۋ بولسا، ىشكى تۇيسىگى دە وتە جوعارى بولادى. مەن ٴوزىم «ورلوۆ جەلگىشتەرىمەن» جاتتىقتىم.

- سيرك اتتارىن باعىپ-كۇتۋ تۋرالى تولىقتاي كەتسەڭ. ولارعا ارنالعان ارنايى جەم-شوپ بولا ما؟

- ٴيا، ارنايى جەم بولادى. ونىڭ سىرتىندا ٴسابىز، قانت، كامپيتتەر دە بەرىلەدى. اسىرەسە تاتتى-تاپسەكتى ولار جاقسى ناتيجە كورسەتكەن كەزدە بەرەمىز. سەبەبى، جىلقى ٴوزىنىڭ جاقسى ىستەگەنىن، دۇرىس ىستەگەنىن ٴبىلۋى كەرەك. جىلقى قانتتى، ٴتاتتى تاعامداردى جاقسى بىلەدى. ال دۇرىس ىستەمەسە جازالايمىز.

- جازالاۋدىڭ ٴتۇرى قانداي؟

- ارينە، جازالاۋ دەگەندە اتتى تۇرمەگە قاماپ، قان-جوسا ەتىپ ساباماسىڭ بەلگىلى عوي. دەگەنمەن، قامشىنى كورسەتىپ، مىنەز تانىتىپ قوياسىڭ. ول دا ٴسابي بالا سەكىلدى، ادامنىڭ كوڭىل-كۇيىن بىردەن تۇسىنەدى. «اتتا 7 جاسار بالانىڭ ميى بار» دەيدى. دەمەك، اتتار دا سەنىڭ نە ايتقىڭ كەلىپ تۇرعانىن، نەنى مەڭزەگەنىڭدى 7 جاستاعى بالا سەكىلدى تۇسىنەدى دەگەن ٴسوز. سوندىقتان دا ٴبىز تەرىس جاساسا ۇرسىپ، دۇرىس ارەكەت كورسەتسە قولداپ، ماقتاپ، ەركەلەتىپ وتىرامىز. ات ٴبارىن تسۇىنەدى.

- ٴوزىڭ ونەر كورسەتەتىن اتتى ٴوزىڭ دايىندايسىڭ با، الدە دايىن اتپەن ساحناعا شىعا بەرەسىڭ بە؟

- اركىم ٴوز اتىن ٴوزى دايىنداۋى كەرەك. بۇل ەڭ اۋەلى ات پەن ادامنىڭ رۋحاني ۇيلەسۋىنە كومەگىن تيگىزەدى. ارينە، ۇيرەنگەن اتتار كىم ٴمىنىپ شىقسا دا قالىپتى ارەكەتىن جاساپ شىعاتىنى بەلگىلى. ٴبىراق، ٴوزىڭ دايىنداپ، ٴوزىڭ باپتاپ، ٴوزىڭ باعىپ-كۇتكەن اتتىڭ ساعان دەگەن سەنىمى، سەنىڭ ول اتقا دەگەن سەنىمىڭ نىق بولادى. ال ونەر كورسەتۋ كەزىندە ات پەن ادامنىڭ بىر-بىرىنە دەگەن سەنىمى ماڭىزدى ٴرول اتقارادى. سوندىقتان دا مەن ٴوزىم مىنەتىن اتتى ٴوزىم دايىندايمىن. وسى جولى قىتايعا بارعان ساپارىمىزدا دا ماعان 1 اي ۋاقىت بەرىلدى. ياعني، مەن ونەر كورسەتۋدەن ٴبىر اي بۇرىن بارىپ، ٴوزىم مىنەتىن اتتاردى ٴوزىم دايىندادىم.

اتتار 2012 جىلدان بەرى كوپ ونەر كورسەتپەي، اتقورادا تۇرا بەرىپ، تۇياقتارى ٴوسىپ كەتكەن. بۇرىنعى ۇيرەنگەندەرىن ۇمىتا باستاعان. ماعان ٴبىر ايدىڭ ىشىندە سولاردى مانەجگە (سيرك ساحناسى) ۇيرەتۋ كەرەك بولدى.

- ارنايى ەرەجە بار ما، «وسى ۋاقىتتا وسىنى جاساۋ كەرەك» دەگەن؟

- ارينە، ونسىز بولمايدى عوي. تاڭعى التىدا تۇرىپ، سۋارىپ، ٴشوبىن بەرگەن سوڭ ٴۇش ساعاتتان كەيىن ەتىن قىزدىرىپ، اراعا 4 ساعات ۋاقىت سالىپ، وسى ارەكەتتى قايتالاپ وتىرامىن. ونىڭ سىرتىندا، اتتى مانەجگە ۇيرەتۋ، سيرككە كەلگەن ادامداردان – كورەرمەندەردەن ۇرىكپەيتىندەي، ايعاي-شۋعا ەلىرىپ كەتپەيتىندەي، مۋزىكاعا ۇيلەسە الاتىنداي ەتىپ تاربيەلەيسىڭ.

- سيركتەگى سەنىڭ مىندەتىڭ نە؟ ياعني قانداي ونەر كورسەتەسىڭ؟

- مەن ات ۇستىندە تريۋكتەر جاسايمىن. ولاردىڭ ٴوز اتاۋلارى بار، ات ۇستىندە سەكىرۋ، ات قۇلاعىندا ويناۋ، ەر ۇستىندە ىشپەن تۇرۋ، شاپقان اتتىڭ ۇستىندە تۇرەگەپ تۇرۋ، شاۋىپ كەلە جاتقان اتتىڭ استىنان اينالىپ شىعۋ، ت.ب. قاتارلى كورىنىستەر كورسەتەمىن. ياعني، ات ۇستىندەگى وتراباتيكا.

- اتونەرى وتە ٴقاۋىپتى ونەر. قانشا ۇيرەتىلگەن دەسەڭ دە، جىلقى اقىلسىز جانۋار. ات سۇيرەپ كەتۋى مۇمكىن، جىعىلۋى مۇمكىن. وسىلاردى ەسكەرە وتىرىپ، اتا-اناڭ قارسى بولعان جوق پا؟

- وتباسىم قارسى بولعان جوق. جوعارىدا ايتقانىمداي، بالا كەزدەن كورگەنىم جىلقى بولعاندىقتان ول كىسىلەر دە سەنگەن بولۋى كەرەك. اتا-اناما ايتتىم، وسى سپورت تۇرىمەن اينالىسامىن دەپ. ولار كەلىستى. ەندى قۇداي دەنساۋلىق بەرسە، بۇل جولدى جالعاستىرا بەرەمىن.

ارينە، ۇيدەگىلەر بىلەدى، بۇل سپورتتىڭ، بۇل ونەردىڭ تىم ٴقاۋىپتى ەكەنىن. ٴبىر كۇنى بولماسا ٴبىر كۇنى ٴوزىڭ جىعىلىپ، نە ات جىعىلىپ مەرتىگىپ قالۋىڭ مۇمكىن، ٴتىپتى ومىرىڭمەن قوش ايتىسۋىڭ دا مۇمكىن، قۇداي بەتىن اۋلاق قىلسىن. ال جىلقى دەگەن تەحنيكا ەمەس، جانۋار. ونىڭ ميىندا، ساناسىندا نە بولىپ جاتقانىن ەشكىم بىلمەيدى. سوندىقتان دا جانىنا قانشا جاقىن بولساڭ، ول سونشالىقتى ساعان دا جاقىن بولۋعا تىرىسادى.

- قىتايدىڭ قانشا قالاسىندا بولدىڭدار؟

- 15-18 قالاسىن ارالاپ شىقتىق. اۋەلى ىشكى موڭعوليادا بولدىق. ونىڭ سينين دەگەن قالاسىندا ەكى اي جاتتىعۋ جاسادىق. جانە العاشقى ونەرىمىزدى سول جەردە كورسەتتىك. الەمنىڭ تۇكپىر-تۇكپىرىنەن سيرك ونەرىنىڭ مايتالماندارى جينالدى. سونىڭ ىشىندە اتپەن ونەر كورسەتكەن قازاقستان عانا بولدى. باسقا ارگەنتينادان، چەحيادان، فيليفيننەن، تاجىكستاننان، وزبەكستاننان كەلگەندەر سيركتىڭ باسقا سالالارى بويىنشا ونەر كورسەتتى.

- باسقا ەلدەر اتپەن ونەر كورسەتپەدى دەپ وتىرسىڭ عوي. دەگەنمەن سيرك ونەرىندە قازاقستاننىڭ اتپەن ونەر كورسەتۋىنە قانداي باعا بەرەسىڭ؟

- ٴوز ويىمشا جوعارى باعا بەرەر ەدىم. سەبەبى بىزگە دەيىن قىتايعا بارىپ اتپەن ونەر كورسەتكەن ەل جوق ەكەن. ٴبىز ٴبىرىنشى رەت باردىق. ولار دا ات ونەرى دەسە تاڭقالاتىن حالىقتىڭ ٴبىرى. ەڭ قاراپايىم قيمىلدار جاساعاننىڭ وزىندە تاڭدانىستارىن جاسىرا الماي: «مىنە ناعىز قازاقستان! مىنە ناعىز ات قۇلاعىندا ويناعان كوشپەندىلەر!» دەپ تاڭىرقاستى. سودان كەيىن قازاقستان جايلى بىلە باستايدى، بىزگە كەلىپ سۇراق قويىپ، «بۇنى قالاي جاسايسىزدار، قالاي ۇيرەتەسىزدەر اتتى، قاي جەردىڭ جىلقىسى؟» دەپ سۇرايدى كوبى. اسىرەسە وسىنداي ۇيرەتىلگەن اتتار ساتىلا ما دەپ سۇراعاندار كوپ بولدى.

بارعان جەرلەرىمىزدە وسىنداي ساۋالدار كوبەيگەندىكتەن، ٴبىز ارنايى كىتاپشالار جاساپ الدىق. ٴبىز تۋرالى بىلگىسى كەلىپ، ات ونەرى قىزىقتىرعاندارعا سونى سىيعا بەرەمىز. وندا جايلاۋىمىز، جىلقىلارىمىز، ۇلتتىق ونەرىمىز، ەلىمىز جايلى اقپارات جازىلعان.

- سيرككە الاتىن اتتى قالاي تاڭدايسىڭدار؟

- نەگىزى استانا سيركىندەگى جىلقىنىڭ بارلىعى مەملەكەتتىڭ قاراماعىندا. سوندىقتان ولار جىلقىنى تاي كەزىنەن ساتىپ الادى دا، بىزگە الىپ كەلەدى. ٴبىز سولاردى ۇيرەتەمىز.

- سيرك اتتارىن دايىنداۋدا ەركەكتەرى تەز ۇيرەنە مە، ۇرعاشىلارى تەز ۇيرەنە مە؟

- سيركتە ۇرعاشى جىلقى بولمايدى. ٴبارى ەركەك. سەبەبى سيركتەگى ايعىرلار بيەلەردى كورسە، قۇتىرىنىپ كەتەدى. ۇيرەتۋگە كونبەي، باعىنباي كەتەدى. سول سەبىپتى سيركتە تەك قانا ەركەك جىلقىلارمەن جۇمىس ىستەيمىز.

- 6 جىلدان بەرى وسى سالادا ٴجۇرسىڭ. تالاي قىزىقتى، ٴارى وقىس وقيعالارعا تاپ بولعان شىعارسىڭ؟

- ٴيا. بولىپ تۇرادى. ٴجيى بولادى دەپ ايتا المايمىن. دەگەنمەن، بولادى. مىسالى، ادامنىڭ ٴتۇرىن، بەت-الپەتىن كورسەڭ، ونىڭ نە ىستەگىسى كەلىپ تۇرعانىن، قانداي ارەكەت جاسايتىنىن بىلۋگە بولادى. ٴتىپتى ونىڭ بەت-جۇزىنەن اۋىرىپ تۇرعانىن، قۋانىعانىن، اشۋلانعانىن بىلەسىڭ. ال جىلقىنىڭ نە ويلاپ تۇرعانىن ٴبىلۋ قيىن. ونىڭ ساناسىندا قانداي وزگەرىس، قانداي سەزىمدەر ٴوتىپ جاتقانىن سارالاۋ وڭاي ەمەس.

مەنىڭ ٴوزىمنىڭ ونەر كورسەتەتىن اتىم بار، ەسىمى – گەكتور. ول ەكەۋمىز جاقسى دوسپىز. بارلىعىن ٴوزىم ۇيرەتىپ، ٴوزىم دايىنداپ، مانەجگە دە ٴوزىم ٴمىنىپ شىعامىن. ول مەنىڭ اتقوراعا كىرگەنىمدى بىردەن بىلەدى. وقىرانىپ، كىسىنەپ، قاسىنا جەتكەنىمشە تاعات تاپپاي كەتەدى. ول مەنىڭ قۇرقول كەلمەيتىنىمدى، كەلگەن سايىن قانت نە ٴتاتتى ٴسابىز الا كەلەتىنىمدى بىلەدى دە، مەنى قۋانا قارسى الادى.

ونىڭ تاعى ٴبىر ەرەكشە قاسيەتى – مەن قايدا بارسام دا، ونى جەتەلەپ جۇرمەيمىن. بوس جىبەرىپ قويسام بولدى، ارتىمنان ەرىپ وتىرادى. جۇرسەم ٴجۇرىپ، تۇرسام تۇرادى.

- مىسالى ٴبىر قالادان، كەلەسى قالاعا نەمەسە ٴبىر ەلدەن كەلەسى ەلگە بارعاندا اتتاردى قالاي الىپ جۇرەسىڭدەر؟

- بارلىق ات الىپ جۇرەتىندەر سەكىلدى، ٴبىز دە جىلقى ارتۋعا ارنالعان ۇلكەن كولىكتى (پۋرا) جالدايمىز. ٴبىراق، جولدا جۇرگەندە اتتارعا جەم بەرىلمەيدى. سۋ مەن ٴشوپ قانا بەرىلەدى. ال سيركتىڭ ٴوز ىرىمى بويىنشا، جول بويىندا اتتىڭ استىن تازالاۋعا بولمايدى.

- قىزىق ەكەن. نەگە؟

- ونى مەن دە بىلمەيدى ەكەم، شىنىمدى ايتسام.

- قىتايدا ونەر كورسەتكەن كەزدە، باسقا ەلدەر وزدەرىنە شاقىرۋ جاساعان جوق پا؟

- ونداي ۇسىنىستار بولدى. ٴبىراق ول جاققا بارۋ-بارماۋدى ٴبىز شەشپەيمىز. ونى سيرك باسشىلارى شەشەدى. ەگەر «وسى ەلگە باراتىن بولدىق، دايىندالىڭدار» دەسە، ٴارقاشان ٴازىرمىز. دەگەنمەن، شەتەلگە بارىپ ونەر كورسەتۋ كوپ قاراجاتتى قاجەت ەتەدى.

- سيرك الاڭىندا ورىن العان وقىس وقيعادان قالاي جول تاباسىڭدار؟

- ٴيا، ونداي ساتتەر بولادى. «جاڭىلمايتىن جاق، سۇرىنبەيتىن تۇياق جوق» دەگەندەي، اتتار كەيدە ٴسۇرىنىپ قۇلايدى. وز-وزىنە شالىنىسىپ قالادى. ٴتىپتى كەيدە مانەجدە تەمپەراتۋراسى كوتەرىلىپ كەتەتىن كەزدەر بولادى. ساحناعا شىعاردا ونى ٴبىز بىلمەيمىز. بارلىق دايىندىعىن جاساپ شىعارعاندا، ٴساتسىز ونەر كورسەتەتىن كەزدەر بولادى.

ٴبىر رەت سونداي جاعداي بولدى. ابىروي بولعاندا قۇداي ساقتاپ، ەش جەرىم اۋىرعان جوق. ات تا، ٴوزىم دە ٴدىن امان قالدىم. ٴبىراق، قانداي جاعداي بولماسىن سيرك الاڭىنداعى ونەر توقتاتىلمايدى. جالعاسىن تابا بەرۋى كەرەك.

- استانا سيركىندە ٴوزىڭ سەكىلدى جاستار كوپ پە؟

- بار. ٴبىراق كوپ ەمەس. مەنەن دە جاس ىنىلەرىم ونەر كورسەتىپ ٴجۇر. ولار مەنەن دە جاقسى ونەر كورسەتىپ، جاقسى جەتىستىككە جەتىپ ٴجۇر. جاستارى ەندى عانا 15-16-عا تولسا دا، ەلىمىزدىڭ ٴبىراز وڭىرىندە ٴوز ونەرلەرىن كورسەتىپ جۇرگەن جاستار بار. ٴقازىر جاسىم 24-تەن اسقان سوڭ مەن شەت ەلگە شىعا بەرەمىن. شەتەلدەرگە بارىپ ونەر كورسەتۋگە مۇمكىندىگىم بار. ال جاستار ازىرگە ەل كولەمىنە تانىلىپ جاتىر.

- استانا سيركىنە كەلگەنشە اۋىلدا ات سپورتى تۇرلەرىنە قاتىسىپ، تەڭگە ٴىلىپ نە اتقا شاۋىپ، كوكپارعا قاتىسىپ كورىپ پە ەدىڭ؟

- جوق. اۋىلداعى بارلىق قاراپايىم بالالار سەكىلدى، كۇندەلىكتى تۇرمىستا عانا اتقا مىنگەنىم بولماسا، ەرەكشە ات سپورتىنا قاتىسىپ كورمەپپىن.

- وندا سيرككە قالاي ٴارتىس بولىپ ٴجۇرسىڭ؟ ارنايى سىنالتىپ الدى ما؟

- سيرككە كەلگەن سوڭ ماعان 1-2 اي ۋاقىت بەردى. ٴوزىمنىڭ قانداي مۇمكىندىگىم بار ەكەنىن كورسەتۋىم كەرەك بولدى. سيرككە كەلگەنگە دەيىن بىلەتىنىمدەي ات ونەرىنە اكروباتيكانى، ارنايى سيرك كوللەدجىن بىتىرگەندەردى الاتىن ەدى. ال مەنىڭ ماماندىعىم – زاڭگەر. ەشقانداي اكروباتيكاعا قاتىسىم جوق. سوعان قاراماستان، اتا-بابامىزدان بەرىلگەن قان بار عوي دەپ، ٴوز مۇمكىندىگىمدى ٴتيىمدى پايدالانىپ، سىناق مەرزىمىنە بەرىلگەن 2 ايدى 1 ايدىڭ ىشىندە مەنگەرىپ، ٴوزىمدى جاقسى جاعىنان كورسەتە الدىم. سودان كەيىن مەنى سيرك قاتارىنا الدى.

- ايتپاقشى، ٴوزىڭنىڭ وقىعان ماماندىعىڭ تۋرالى ايتپادىڭ عوي؟

- ساۋدا-ەكونوميكالىق كوللەدجىن ٴبىتىردىم. قازىرگى ۋاقىتتا سىرتتاي جوعارى ٴبىلىم الۋ ۇستىندەمىن.

- سوندا ساعان بىرەۋ ۇسىنىس جاسادى ما، سيرككە بار دەپ. الدە ٴوزىڭ باردىڭ با؟

- ٴوزىم باردىم. استانا سيركىندە ات ونەرى، اتسايىستىڭ بارىن بايقادىم. سوعان ٴوز باعىمدى سىناپ كورەيىن دەپ باردىم. ٴقازىر، قۇدايعا شۇكىر، سول قاتاردا ٴجۇرمىن. جانە وتە قۋانىشتىمىن! وسى جولعى قىتاي ساپارىنىڭ وزىندە قازاق جىگىتىنىڭ، قازاق اتتارىنىڭ قانداي بولاتىنىن تانىتا الدىم. ٴوز شامامشا قازاق ەلىنىڭ تۋىن شەت ەلدە جەلبىرەتكەنىمدى ماقتانىشپەن ايتا الامىن.

- اڭگىمەڭە راحمەت!

فوتو: جانىبەكتىڭ جەكە قورىنان


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي