BAQ.kz - Қазақстан жаңалықтары USD 338.78 BAQ.kz - Қазақстан жаңалықтары EUR 392.82 BAQ.kz - Қазақстан жаңалықтары RUB 5.35
استانا:

«كۇنىنە ەكى سۋرەت سالعان كەزىمىز بولدى». الەمنىڭ تانىمال شەبەرلەرى استانانى بەينەلەدى

فوتو: Автор

استانا قالاسىنىڭ 20 جىلدىعى اياسىندا «نۇر كەلبەتتى استانا» حالىقارالىق كوركەمونەر فەستيۆالى ٴوتتى. اتالعان فەستيۆالگە اقش، رەسەي، برازيليا، جاپونيا جانە ٴۇندىستان مەملەكەتتەرىنىڭ وكىلدەرى قاتىستى، دەپ حابارلايدى baq.kz ٴتىلشىسى.

ماۋسىم ايىنىڭ ٴ12-شى جۇلدىزىندا قر ۇلتتىق مۋزەيى عيماراتىندا «نۇر كەلبەتتى استانا» حالىقارالىق كوركەمسۋرەت فەستيۆالى كورمەسىنىڭ اشىلۋ سالتاناتى ٴوتتى. وعان وتاندىق قىلقالام شەبەرلەرىمەن قوسا اقش، ەۋروپا، رەسەي، برازيليا جانە ازيانىڭ جاپونيا، ٴۇندىستان سىندى ەلدەرىنەن ۇزدىك سۋرەتشىلەر قاتىستى. ولاردىڭ قاتارىندا ۇلىبريتانيا كورولدىك ونەر قاۋىمىنىڭ مۇشەسى الەكساندرا كوننور، جاپونيا اكۆارەلمەن بەينەلەۋ ونەرىنىڭ شەبەرى اكيرا مۋراتا، برازيلياداعى پانامەريكا ونەر مەكتەبىنىڭ تالىمگەرى جيزەل ۋليسس، ٴۇندىستاننىڭ زاماناۋي كوركەمونەر شەبەرى رام ۆيرانيان، اقش ۇلتتىق ونەر گرانتىنىڭ يەگەرى ارتەم ميرولەۆيچ، گوللانديانىڭ رەتروسپەكتيۆالىق كوركەمونەر شەبەرى ديميتريس ۆويازوگلوۋ، رەسەيلىك يگور دۋبوۆوي، تۇركيالىق وركۋن مۋفتۋوگلۋ، بەلورۋسسيادان يننا بولۋند، كورەيادان كلەمەنس بەۋنگۋن سۋۋ، حورۆاتيالىق ماركو زۋباك، قىرعىزستاننان ادىلبەك بايتەرەك، يتاليالىق دجوۆانني توماسسي فەرروني، سونىمەن قاتار، گۇلميرا تەلعوزيەۆا، باقتىگەرەي تەلەۋباي، امانگەلدى كەنەنبايەۆ، نۇربازار قوجين، قايىر ورازعاليەۆ، اينابەك وسپانوۆ، تىلەۋجان باتانوۆ سىندى ايگىلى وتاندىق سۋرەتشىلەر دە قاتىستى.

«بۇل جوبانى شەتەلدىك سۋرەتشىلەرمەن بىرگە جۇزەگە اسىردىق. الەم ەلدەرىنەن مايتالمان، كاسىپقوي سۋرەتشىلەر كەلدى. سونداي-اق، اتالعان جوباعا قازاقستاندىق 5-6 سۋرەتشى اتسالىستى. ٴبىز دە قالىس قالماي ٴبىراز سۋرەت سالدىق. (كۇلدى.) استانانىڭ از ۋاقىت ىشىندە جاڭارعانىنا شەتەلدىك ارىپتەستەرىمىز قاتتى تاڭعالدى. وسى تاڭدانىستارىن سۋرەتتەرى ارقىلى بەرە ٴبىلدى. جاقسى ناتيجەلەرگە قول جەتكىزدىك. دەمەۋشىلەرىمىز كوپ كومەك كورسەتتى. بارلىق سۋرەتشى قاتار ٴجۇرىپ تە، ۇلكەن شەبەرحانادا وتىرىپ تا سۋرەت سالدىق. مايلى بوياۋدىڭ ٴتۇر-تۇرى بەرىلدى. اركىم وزىنە ىڭعايلىسىن پايدالاندى. ٴارقايسىمىز جالپى 5-6 سۋرەتتەن سالدىق. اراسىندا ٴبىر كۇندە ەكى سۋرەت سالعان كەزدەرىمىز دە بولدى.

بارلىق سۋرەت كەرەمەت. اسىرەسە، شەتەلدەن كەلگەن سۋرەتشىلەر ٴبىزدىڭ سالت-داستۇرلەرىمىزدى، ۇلتىمىزدى ٴبىرىنشى رەت كورىپ تۇرعاندارىنا قاراماستان ەرەكشە ەتىپ بەينەلەدى. قۇسبەگىلىك سەكىلدى قازاققا ٴتان تاقىرىپتاردى الدى. سونداي-اق، ولار جاڭا قالانىڭ ۇلتتىق ناقىشىن جوعالتپاعانىنا تاڭعالدى. كۇنى كەشە ٴبارىمىز ەتنواۋىلعا بارىپ قايتتىق. ولارعا تىنىس-تىرشىلىگىمىز ۇنادى. شىعارماشىلىعىمىزدىڭ ادەمى جولعا قويىلعانىن ولار ىشتەي سەزىپ تە تۇر. سەبەبى، استانا وتە ىڭعايلى، تىنىش جەر. مەنىڭشە، استانادا تەك اقكوڭىل، جاقسى ادامدار تۇرادى»، - دەدى سۋرەتشى تلەۋجان باتانوۆ.

كورمەدە جوعارىدا اتالىپ وتكەن شەتەلدىك جانە وتاندىق سۋرەتشىلەردىڭ استانا جايلى ونەر تۋىندىلارى ۇسىنىلدى. اشىلۋ سالتاناتى بارىسىندا بارشا سۋرەتشى ارنايى سەرتيفيكاتپەن ماراپاتتالدى.

«بۇگىن اشىلىپ جاتقان «نۇر كەلبەتتى استانا» حالىقارالىق كوركەمسۋرەت فەستيۆالىمەن سىزدەردى شىن جۇرەكتەن قۇتتىقتايمىن. قازاقستان رەسپۋبليكاسىنىڭ پرەزيدەنتى نۇرسۇلتان ٴابىش ۇلى نازاربايەۆ «قازاقستان مادەنيەتىن بۇكىل الەم تانۋى ٴتيىس. ول الەمنىڭ بارلىق باستى تىلدەرىندە سويلەيتىن بولادى» دەپ اتاپ وتكەن ەدى. مىنە، سول مادەني ىنتىماقتاستىقتى حالىقارالىق دەڭگەيدە ٴارى قاراي قارىشتاپ جۇرگىزۋ ٴۇشىن وسىنداي فەستيۆال بەلگىلەنىپ، مەملەكەتتىك، ٴبىزدىڭ ۇلتتىق برەندىمىزگە اينالعان استانانىڭ 20 جىلدىعىنىڭ قارساڭىندا وسىنداي ۇلكەن شارا ٴوتىپ وتىر. بۇل شارانىڭ باستى ماقساتى شەتەلدەگى قىلقالام شەبەرلەرى استاناعا كەلىپ، اسەم قالانى ٴوز كوزدەرىمەن كورىپ، ٴوز ويلارىمەن، ٴوز تۇيسىكتەرىمەن جاقسى تۋىندىلار شىعارۋ. ودان كەيىن سول تۋىندىلاردى بۇكىل الەمگە ناسيحاتتاۋ. ياعني قازاقستاننىڭ ۇلتتىق برەندى بولعان استانانى الەمگە ناسيحاتاۋدىڭ ٴبىر كورىنىسى. الەمنىڭ بىرنەشە مەملەكەتتەرىنەن كەلگەن ٴوز ىستەرىنىڭ ماماندارى وسى جەردە توقايلاسىپ، وزدەرىنىڭ جۇمىستارىن ۇسىنىپ وتىر. ول كىسىلەرگە العىس ايتىپ، شىعارماشىلىق تابىس تىلەيمىن»، - دەدى قازاقستان رەسپۋبليكاسى مادەنيەت جانە سپورت مينيسترلىگىنىڭ جاۋاپتى حاتشىسى ۋاليەۆ قۋاتجان.

ماۋسىم ايىنىڭ 6-شى جۇلدىزىنان باستاپ قىلقالام شەبەرلەرى استانا بويىنشا تانىمدىق ەكسكۋرسياعا قاتىسىپ، استانانىڭ كورىكتى ايماقتارىن سۋرەتتەگەن بولاتىن. فەستيۆال ماقساتى – ەلوردا قوناقتارىن ونىڭ 20 جىلدىق تاريحىمەن، تاريحي-مادەني كەرەمەتتەرىمەن، قوناقجاي حالقىمەن تانىستىرۋ.

كوركەمسۋرەت فەستيۆالى شەتەلدىك، ۇلتتىق بەينەلەۋ تۋىندىلارىن كوپشىلىك نازارىنا ۇسىنىپ، ونەر سالاسىنىڭ دامۋ دەڭگەيى، باعىت-باعدارى جايلى مامانداردىڭ، ونەرتانۋشىلار مەن شەبەرلەردىڭ پىكىرلەسۋىنە مۇمكىندىك بەردى.

حالىقارالىق دەڭگەيدە وتكىزىلگەن شارا اياسىندا قر مادەنيەت جانە سپورت مينيسترلىگىنىڭ باستاۋىمەن قازاق ۇلتتىق ونەر ۋنيۆەرسيتەتىندە وقىتۋشىلار مەن ستۋدەنتتەرى جانە قالالىق وقۋشىلار سارايىندا مەكتەپ وقۋشىلارى كوركەمونەر سالاسىنىڭ مايتالماندارىنان شەبەرلىك ساباقتارىن الدى. ٴىس-شارا ناتيجەسىندە كوركەمسۋرەت تۋىندىلارى قر ۇلتتىق مۋزەيى قورىنا تابىستالدى.

سۋرەتتەر: قارلىعا بۇيەنباي

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي