BAQ.kz - Қазақстан жаңалықтары USD 364.95 BAQ.kz - Қазақстан жаңалықтары EUR 416.99 BAQ.kz - Қазақстан жаңалықтары RUB 5.55
استانا:

ٴححى عاسىرداعى ٴ21-شى «شابىت» فەستيۆالى

استانا، baq.kz ٴتىلشىسى. ونەرلى جاستار جىل سايىن قاراشانى اسىعا كۇتەدى. سەبەبى بۇل ايدا قازاقستاننىڭ تۇكپىر-تۇكپىرىندەگى، الىس-جاقىن شەت ەلدەگى جاستار «شابىت» شىعارماشىل جاستار فەستيۆالىندە باس قوسادى. بيىل بەس كۇنگە جالعاساتىن باسەكەگە 350-گە جۋىق ادام قاتىسىپ وتىر. ولاردىڭ ىشىندە 163 جاس استانا قالاسىنىڭ اتىنان باق سىنايدى. قازاقستاننان بولەك، ازەربايجان، بەلارۋس، گرۋزيا، يزرايل، قىرعىزستان، باشقۇرتستان، رەسەي، ۋكراينا جانە وزبەكستاننان كەلگەن دارىندى جاستار ونەرلەرىن ورتاعا سالادى.

جاس تالانتتاردىڭ باسىن قوسقان «شابىت» شىمىلدىعىن ٴتۇردى

5 قاراشا كۇنى «شابىت» فەستيۆالى اشىلدى. استانا قالاسى اكىمىنىڭ ورىنباسارى ەرمەك امانشايەۆ جاستاردى قۇتتىقتاپ، ساتتىلىك تىلەدى. ول ٴوز سوزىندە مەملەكەت باسشىسى نۇرسۇلتان نازاربايەۆتىڭ شىعارماشىل جاستاردىڭ دامۋىنا ەرەكشە كوڭىل بولەتىنىن اتاپ ٴوتتى.

«پرەزيدەنت كەزەكتى جولداۋىندا كەلەر جىلدى «جاستار جىلى» دەپ جاريالادى. شىعارماشىل جاستاردى قولداۋعا ارنالعان كەشەندى باعدارلاما ازىرلەنىپ جاتىر. ەشتەڭەگە قاراماي «شابىت» فەستيۆالىنە كەلگەن قوناقتارعا اكىمدىكتىڭ اتىنان العىس ايتامىن. وسى جىلداردىڭ ىشىندە فەستيۆال جاڭا ەسىمدەردى شىعاردى. بۇگىندە ولار اۋقىمدى الاڭداردا ونەر كورسەتىپ، قايتالانباس مادەنيەتىمىزدى ناسيحاتتاپ ٴجۇر»، - دەدى ول.

(فوتو: استانا قالاسى مادەنيەت جانە سپورت باسقارماسى)

يدەيا اۆتورى تولەگەن مۇحامەدجانوۆتىڭ ايتۋىنشا، مەملەكەت باسشىسى العاشقى فەستيۆالدى اشىپ، زالدا وتىرىپ قاتىسۋشىلارعا قوشەمەت كورسەتكەن. سودان بەرى «شابىت» قر پرەزيدەنتىنىڭ جەكە قولداۋىمەن ٴوتىپ كەلەدى. ال ٴبىر كەزدەرى ونەر كورسەتكەن جاستاردىڭ كەيبىرى بۇگىندە قازىلار القاسىنىڭ قۇرامىندا وتىر. فەستيۆال 1998 جىلى رەسپۋبليكالىق مارتەبە الدى. ال 2000 جىلدان باستاپ حالىقارالىق دەڭگەيگە كوتەرىلىپ، شەتەلدىڭ تالانتتى جاستارىنا ەسىك اشتى.

بيىل باعدارلاماعا «كلاسسيكالىق مۋزىكا»، «حالىق مۋزىكاسى»، «ەسترادالىق ۆوكال»، «حورەوگرافيا» جانە «جۋرناليستيكا» اتتى بەس اتالىم ەندى. العاشقى جىلدارى جيىرما اتالىمعا دەيىن بولسا، ۇيىمداستىرۋشىلار ولاردىڭ سانىن قىسقارتىپ، جىل سايىن اۋىستىرىپ وتىرۋدى دۇرىس دەپ شەشتى. مىسالى، «جۋرناليستيكا» اراعا 6 جىل سالىپ قايتا قوسىلىپ وتىر. ال وسىعان دەيىن «سيرك ونەرى»، «اكتەرلىق شەبەرلىك»، «بەينەلەۋ ونەرى»، «ۇزدىك ادەبي شىعارما»، «بالەت»، «سپورتتىق بال بي»، «كامەرالىق حور» سەكىلدى اتالىمدار بولعان. ولار دا الداعى جىلدارى باعدارلاماعا قوسىلاتىن بولادى.

«ەسترادالىق ۆوكال» نوميناسياسىندا باسەكە جوعارى

فەستيۆالدىڭ ەكىنشى كۇنى قاتىسۋشىلار سىنعا ٴتۇستى. تىڭدالىمدار ٴقازۇوۋ ورگان زالى مەن №2 كورپۋسىنىڭ ۇلكەن زالىندا، ج.جابايەۆ اتىنداعى زالدا، «استانا» كونسەرت زالىندا وتسە، «جاستار» تەاترىندا «حورەوگرافيا» اتالىمى بويىنشا ۇمىتكەرلەر ونەرلەرىن ورتاعا سالدى.

جىگىتتەر ايگىلى «دوس-مۇقاسان» توبىنىڭ «قۋانىشىم مەنىڭ» ٴانىن مۋزىكالىق سۇيمەلدەۋسىز ورىنداپ شىقتى.

قاتىسۋشىلاردىڭ ونەرىمەن تانىسۋ ٴۇشىن ەڭ الدىمەن «استانا» كونسەرت زالىنا باردىق. «ەسترادالىق ۆوكال» نوميناسياسى بويىنشا 1-اينالىمدى تىڭداۋ ٴوتىپ جاتتى. جاس انشىلەر ساحنادا قازاقستانعا بەلگىلى اندەردى ورىنداپ جاتىر.

جانسايا نۇرماعامبەتوۆا بەلگىلى ٴانشى گاۋھار قاسپاقوۆانىڭ «العاشقى كوكتەم» ٴانىن ورىنداپ، داۋىسىىنڭ كەڭدىگىن كورسەتتى.

ساحنادا ونەر كورسەتكەن رۋدنىي قالاسىنان كەلگەن مەيىرىمحان نازارحانوۆپەن سۇحباتتاستىق. ول سايىس تۋرالى ينتەرنەتتەن ٴبىلىپ، كەرەكتى قۇجاتتاردى تولتىرىپ جىبەرگەنىن ايتتى. سودان كەيىن «كەلەسى اينالىمعا ٴوتتىڭىز» دەگەن قۋانىشتى حات كەلگەن. «ەسترادالىق ۆوكال» نوميناسياسىندا باسەكە جوعارى، سەبەبى 109 ادام باق سىناپ جاتىر.

«شابىت» فەستيۆالى بىرىنشىدەن، مادەنيەتكە باۋليدى، ونەردى دامىتۋدى ۇندەيدى. ادامنىڭ وزىنە جەكە دايىندىقتى قاجەت ەتەدى. قاتىسۋشىلاردىڭ بارلىعى جەڭىسكە جەتكىسى كەلەدى. ٴبىر-بىرىمىزدى تانىماساق تا، دوس رەتىندە قارايمىز. جامان كوزقاراس جوق. باسەكە وتە مىقتى.»، - دەدى مەيىرىمحان.

19 جاستاعى مەيىرىمحان حالىقارالىق سايىستاردا جۇلدە الىپ جۇرگەن ٴدۇلدۇل.

ول 1 جىل بۇرىن ماسكەۋ قالاسىندا وتكەن «روزا ۆەتروۆ» حالىقارلىق بايقاۋىندا باس جۇلدەگە، بيىل كوكتەمدە وتكەن «التىن ميكروفون» بايقاۋىندا 1-ورىنعا يە بولعان.

يبراھيم داۋلەت مەيىرىمحانمەن بىرگە رۋدنىي مۋزىكالىق كوللەدجىندە «ٴداستۇرلى ٴانشى» ماماندىعىندا ٴبىلىم الادى. «شابىت» تۋرالى الەۋمەتتىك جەلىدەن ٴبىلىپ، ٴوتىنىش جولداعان. ول فەستيۆالدىڭ تاربيەلىك ٴمانى وتە زور دەپ سانايدى.

«قازاق ونەرىنىڭ دامۋىنا ٴوز ۇلەسىن قوسىپ جاتىر. ٴححى عاسىردا 21-رەت ٴوتىپ جاتقان فەستيۆالگە قاتىسىپ جاتقانىمىزعا قۋانىشتىمىز. ٴار ٴانشى وسى سايىسقا قاتىسۋ ارقىلى مول تاجىريبە جينايدى. ماقسات – جەڭۋ ەمەس، تاجىريبە الماسۋ. حالىقارالىق سايىستا شەتەلدەن كەلگەن قاتىسۋشىلاردى تىڭداپ، بىر-بىرىمىزبەن سالىستىرىپ، داميتىن بولامىز»، - دەدى جاس ٴانشى.

ول العاشقى اينالىمدا ەستايدىڭ اتاقتى ٴانى «قۇسني-قورلاندى» ورىندادى. جانىنا جاقىن بولعان سوڭ وسى ٴاندى تاڭداعانىن ايتادى. يبراھيم ٴداستۇرلى ٴانشى بولعاننان كەيىن بۇل ٴاندى دومبىرامەن سۇيمەلدەپ ورىندايدى. بۇگىن «قۇسني-قورلاندى» ەسترادالىق جانردا ايتىپ شىقتى.

جانەركە ساعىمجان ەسترادا ٴانشىسى ٴمولدىر اۋەلبەكوۆانىڭ «وسيەت» ٴانىن ناقىشىنا كەلتىرىپ ورىنداپ شىقتى.

ساحنا ارتىندا كەزەگىن كۇتكەن ۇمىتكەرلەردى كورەسىز. ولاردىڭ جۇزدەرىنەن ساحناعا شىعار الدىندا قوبالجىپ تۇرعاندارىن بايقاۋعا بولادى.

ۇلتتىق اسپاپتا وينايتىن جاستارىمىز ٴتانتى ەتتى

«استانا» كونسەرت زالىنىڭ قوس بىردەي اۋديتورياسىندا «حالىق مۋزىكاسى» نوميناسياسىنىڭ 1-اينالىمى ٴوتتى. ۇمىتكەرلەر «قوبىز»، «پريما قوبىز»، «شەرتەر»، «باس شەرتەر»، «پريما دومبىرا» ىشكى سەكسيالارى بويىنشا ونەر كورسەتتى.

«حالىقتىق مۋزىكا» اتالىمى ۇلتتىق مۋزىكالىق اسپاپتاردى كەڭىنەن ناسيحاتتاۋعا ىقپال ەتەدى. قازاقتىڭ ۇلتتىق اسپابى دەگەندە كوز الدىمىزعا ەڭ ٴبىرىنششى دومبىرا كەلەتىن ٴبىزدى شەرتەر، قوبىز سەكىلدى اسپاپتاردىڭ قۇلاعىندا وينايتىن جاستار قۋانتتى.

جانەركە ساعىمجان ەسترادا ٴانشىسى ٴمولدىر اۋەلبەكوۆانىڭ «وسيەت» ٴانىن ناقىشىنا كەلتىرىپ ورىنداپ شىقتى.

بايقاۋ قاتىسۋشىلارىنا ناقتى تاپسىرمالار بەرىلگەن. ولار كومپوزيتورلاردىڭ شىعارمالارىن، سوناتالار مەن سيۋيتالاردى، قازاقتىڭ كۇيلەرىن ورىنداۋى ٴتيىس.

ساحنا ارتىندا كەزەگىن كۇتكەن ۇمىتكەرلەردى كورەسىز. ولاردىڭ جۇزدەرىنەن ساحناعا شىعار الدىندا قوبالجىپ تۇرعاندارىن بايقاۋعا بولادى.

فەستيۆال قاتىسۋشىلارىنىڭ ونەرىن باعالاۋدا قازىلار القاسى ۇلكەن جۇمىس اتقاراتىنىن ايتا كەتكەن ٴجون. ولار قانشاما ونەرپازدىڭ اراسىنان حاس تالانتتى جاستاردى انىقتايتىن بولادى. قازىلار القاسىندا ەلىمىزگە بەلگىلى قوعام قايراتكەرلەرى مەن ونەر، مادەنيەت سالاسىنىڭ مايتالماندارى بار.

اتىراۋلىق قىدىركەلدى تاجىعاليەۆ مەكتەپ كەزىنەن شەرتەر قۇلاعىندا وينايدى.

بۇگىندە قىدىركەلدى اتىراۋداعى دينا نۇرپەيىسوۆا اتىنداعى حالىقتىق مۋزىكا اكادەمياسىندا جۇمىس ىستەيدى.

«شابىت» بىزگە دەم بەرەدى. بايقاۋدا جۇلدەلى ورىنعا يە بولىپ، تابىسقا جەتىپ، شابىتتانۋعا، باسقا دا بايقاۋلارعا قاتىسىپ، بۇدان دا جوعارى دەڭگەيگە شىعۋعا مۇمكىندىك بەرەدى. بۇل فەستيۆال باسقا سايىستارمەن سالىستىرعاندا كەرەمەت ۇيىمداستىرىلعان. جاتاتىن جەرىمىز، تاماعىمىز ٴبارى قامتاماسىز ەتىلگەن. ٴوتىپ جاتقان دەڭگەيى وتە كەرەمەت، ٴبىزدىڭ شابىتتاندىرادى. ورىن الماساق تا بايقاۋعا قاتىسا بەرگىمىز كەلەدى. ٴار وبلىستان دوستار تاپتىم. الداعى جوسپارىم كەرەمەت شاكىرتتەر تاربيەلەپ، ٴوزىمدى بۇدان دا جوعارى دەڭگەيدە كورگىم كەلدى»، - دەيدى ول.

فەستيۆالگە ٴقازۇوۋ مەن ت.جۇرگەنوۆ اتىنداعى ٴقازۇوا، قۇرمانعازى اتىنداعى قازۇك ستۋدەنتتەرى بەلسەندى قاتىسادى. سولاردىڭ ٴبىرى – ديدار ابەنوۆ. ول بايقاۋعا پريما-دومبىراسىمەن كەلدى. ونىڭ ايتۋىنشا، «شابىت» فەستيۆالى العا قويعان ماقساتىنڭا جەتۋگە اسەر ەتەدى جانە مۋزىكانت رەتىندە قالىپتاسۋعا تيەر پايداسى وتە كوپ.

«بۇل جەردە تاجىريبە الماسۋعا بولادى. سول ارقىلى ٴوزىڭنىڭ دەڭگەيىڭدى بىلەسىڭ جانە دامىتقىڭ كەلەدى. دومبىرا-پريما اسپابى بايقاۋىنا ۇمىتكەرلەر ماسكەۋدەن، قازاننان كەلىپ قاتىسادى. قازاقستاندا بۇل اسپاپ جاقسى دەڭگەيدە دامىعان، ٴبىراق ماسكەۋ، قازاننان كەلەتىن دومبىراشىلارعا ەسە جىبەرەمىز. ٴبىز بۇل جاقتا دومبىرادا قالاي وينايمىز، ولار سول جاقتا ٴدال سولاي پريمادا وينايدى. سولاردىڭ ويناعانىن كورىپ، تاجىريبە الماسىپ، مۋزىكانت رەتىندە ۇلكەن قور جينايسىڭ»، - دەدى ديدار.

كەلەسى اۋديتورياعا باس سۇققانىمىزدا قولىنا قوبىزى مەن پريما قوبىزىن ۇستاعان اسەم ارۋلار دايىندالىپ جاتتى. راسىمەن دە، قورقىتتان قالعان قوبىزدىڭ ٴۇنى قۇلاققا جاعىمدى ەستىلىپ، جۇرەك قىلىن تەربەيدى.

قازىلار الدىنا شىققالى وتىرعان اقتاۋلىق اينۇر ٴابجاپپارتى اڭگىمەگە تارتتىق. ول فەستيۆالگە العاش رەت قاتىسىپ وتىر. ۇستازى – جۇپار كەمەلبەكوۆا.

«ٴدال ٴقازىر شىعايىن دەپ جاتىرمىن. قوبالجىپ تۇرمىن. اتا-انامنىڭ، ۇستازدارىمنىڭ ەڭبەكتەرىن، ۇمىتتەرىن اقتاۋىم كەرەك. «شابىت» فەستيۆالى ەڭ ٴبىرىنشى قازاق ونەرىن ودان ٴارى دامىتۋعا، بۇرىنعى اتا-بابامىزدان كەلە جاتقان قازاقتىڭ ۇلتتىق مۋزىكالىق اسپاپتارىن ٴوسىپ كەلە جاتقان كىشكەنتاي ۇرپاققا جەتكىزۋگە، ناسيحاتتاۋعا شابىت بەرەدى»، - دەيدى جاس قوبىزشى.

«حالىقتىق مۋزىكا» نوميناسياسى قاتىسۋشىلارىن كورىپ قازاقتىڭ ۇلتتىق مۋزىكا ونەرى ۇمىتىلمايتىنىن، ونى ساقتايتىن جاس بۋىننىڭ ٴوسىپ كەلە جاتقانىن اڭعاردىق.

«استانا» كونسەرت زالىندا قولىنا بەينەكامەراسى مەن فوتواپپاراتىن ۇستاعان جاس جۋرناليستەر ٴجۇر. ولارعا دا ارنايى تاپسىرمالار بەرىلگەن. فەستيۆال قاتىسۋشىلارىنان سۇحبات الىپ، كادرلاردى كامەراسىنا ٴىلىپ الەك.

ومىرشەڭ كلاسسيكالىق مۋزىكا

«استانا» كونسەرت زالىنان شىعىپ ٴقازۇوۋ ۇلكەن زالىنا بارىپ سوقپالى اسپاپتار، مىس ۇرمەلى اسپاپتار نوميناسياسى قاتىسۋشىلارىنىڭ ونەرىن تاماشالادىق.

استاناداعى ٴقازۇوۋ ستۋدەنتىنىڭ 1-كۋرس ستۋدەنتى الىبەك تۇگەلبايەۆ «مىس ۇرمەلى اسپاپتار» نوميناسياسى بويىنشا باق سىناپ جاتىر. 1-اينالىمدا ويناپ شىققان ول دالىزدە قورىتىندىسىن كۇتىپ تۇردى. فەستيۆال تۋرالى اسەرىن سۇراعاندا ول بۇگىندىككە وسىمەن ٴۇشىنشى رەت جۋرناليسكە سۇحبات بەرىپ تۇرعانىن ايتتى.

«ٴمۇعالىمىم فەستيۆالگە قاتىسايىق دەدى. ٴبىر ايدىڭ ىشىندە شىعارمانى جاتتاپ، ويناپ ۇيرەندىم. ادامدار ساحناعا قورىقپاۋ ٴۇشىن، وز-وزىنە سەنىمدى بولۋ ٴۇشىن شىعادى. مەن سول ٴۇشىن عانا قاتىسىپ جاتىرمىن. ەكىنشى تۋرعا وتەمىز بە، ونى كورە جاتارمىز. قاتىسۋشىلاردى كوردىم. جاقسى، ٴبارى جاقسى دايىندىقپەن كەلگەن. ەكى-اق ادام ٴوتتى دەپ ەستىپ جاتىرمىز. سونى ۋايىمداپ تۇرمىن. جالپى مۇنداي بايقاۋلار ٴوزىڭدى سىناۋدا تاپتىرماس مۇمكىندىك دەپ ويلايمىن»، - دەپ اسەرىمەن ٴبولىستى ول.

زالدا كورەرمەندەر كوپ. فەستيۆال قاتىسۋشىلارىنىڭ جانىندا ولاردى قولداۋ ماقساتىندا دوستارى ٴجۇر. ولار ونەرپازداردى ساحنا سىرتىنان كۇتىپ الىپ، قالاي ويناپ شىققانى جونىندە پىكىر الماسىپ، قولداۋ كورسەتىپ جاتىر.

وسىلايشا سايىستىڭ ەكىنشى كۇنى اياقتالدى. ۇزاق جارىس كۇنىنەن سوڭ فەستيۆال قاتىسۋشىلارى ٴبىز سەكىلدى ۇيلەرىنە تارقاستى.

«شابىت» جاستاردىڭ قاناتىن قاتايتادى

«شابىت» حالىقارالىق شىعارماشىل جاستار فەستيۆالى وسىمەن 21-رەت وتكىزىلىپ وتىر. بۇل الاڭ شىعارماشىل جاستاردىڭ ۇلكەن ساحناعا شىعۋىنا جول اشىپ كەلەدى. 1998 جىلدان بەرى ٴداستۇرلى تۇردە وتكىزىلەتىن شارا ونداعان مىڭ جاستىڭ ونەرگە قادام باسۋىنا ىقپال ەتتى. جاڭا ەسىمدەردى ەلگە تانىتىپ، تالانتتاردىڭ قاناتىن قاتايتتى. قانشاما دارىندى جاس ونەردەگى جولىن «شابىتتان» باستادى. ٴقازىر ولاردىڭ كوپشىلىگى ونەر سالاسىندا قىزمەت ەتىپ، نە حالىق سۇيىكتىسىنە اينالىپ، بيىك بەلەستەردى باعىندىرىپ ٴجۇر.

«شابىت» جەڭىمپازدارىنا زەر سالساق، بۇگىندە ەلىمىزگە، الەمگە تانىلعان ازاماتتاردىڭ ەسىمىن كورەمىز. مىسالى، 2014 جىلى پرەزيدەنت كۋبوگىنىڭ يەگەرى راحات-بي ابىساگين بۇگىندە الەمگە تانىمال كومپوزيتور، پيانيست. سونداي-اق، ٴار جىلدارى اقىن قالقامان سارين مەن ەرلان ٴجۇنىس، بالەت ٴارتيسى ايگەرىم بەكەتايەۆا، وپەرا ٴانشىسى ايگۇل نيازوۆا، «مەلومەن» توبى، ٴانشى اشا ماتاي، اكتەر نۇركەن وتەۋىل بەلگىلى تۇلعالار جەڭىمپاز اتاندى. ال 2000 جىلى «اكتەرلىق شەبەرلىك» نوميناسياسىنىڭ گران-پريىنە يە بولعان تۇرسىنبەك قاباتوۆ تۇرسىنبەك «شابىت» فەستيۆالى ۇلكەن ونەرگە قادام باسۋىنا باسپالداق بولعانىن ايتادى.

«مەن ٴدال سول جىلى فەستيۆالگە قاتىسىپ، باعىم با، الدە بابىم با ەكەن، توپ جاردىم. وندا جيىرما جاستان ٴسال عانا اسقان ەدىم، ايتەۋىر بايقاۋ ماعان ەرەكشە اسەر سىيلادى. ۇلكەن ونەرگە كەلۋىمە باسپالداق بولعانىن دا نەسىن جاسىرايىن. بالكىم، العاشقى جىلدارى فەستيۆال حالىق اراسىنا كەڭ تانىلا قويماعان شىعار، ٴبىراق ٴوزىم قاتىسقان تۇڭعىش ۇلكەن شارا بولعاننان كەيىن «شابىت-2000» ماعان «ٴبىر توبە» بولادى دا تۇرادى. جالپى ايتسام، از ۋاقىتتا بايقاۋ رەسپۋبليكالىق دەڭگەيدەن حالىقارالىق دارەجەگە كوتەرىلدى. دەمەك، شەتەلدەردە دە «شابىتقا» قىزىعۋشىلىق بار دەگەن ٴسوز. وسىمەن-اق ٴبارى تۇسىنىكتى شىعار، فەستيۆالدىڭ دەڭگەيى جىلدان-جىلعا ارتىپ كەلەدى»، - دەدى ول «استانا اقشامى» گازەتىنە بەرگەن سۇحباتىندا.

2013 جىلى «حورەوگرافيا» نوميناسياسى بويىنشا گران-پري يەگەرلەرى «شابىت» بي ۇجىمىنىڭ مۇشەسى انەل مىرزاعۇلوۆا فەستيۆالدە قازاق ٴبيىنىڭ دەڭگەيىن كورسەتۋ ماڭىزدى بولعانىن ايتتى.

«سول جىلى قازىلار القاسىنىڭ ٴتوراعاسى كسرو ٴارتيسى رامازان باپوۆ بولدى. بىزگە قازىلىق ەتكەنىنە، ونەرىمىزدى تاماشالاعانىنا قاتتى قۋاندىق. سودان ٴبىر جىلدان كەيىن ول كىسى قايتىس بولدى. ٴبىزدىڭ ونەرىمىزدى باعالاپ، گران-پري بەردى. جەتەكشىمىز، تەحنيكا جاعىنان كۇردەلى، قىزىقتى ٴبيىمىزدى قويعان ايگۇل كۋلبەكوۆانىڭ جۇمىسىن ايتا كەتكەن ٴجون. قازاق ٴبيىنىڭ دەڭگەيىن كورسەتۋ مىندەتىمىز بولدى. ٴارى تەحنيكالىق، ٴارى كۇردەلى، اسەم ٴبيدى شىعاردىق. سودان كەيىن وسى قازاق بيىمەن ۆولگوگرادقا بارىپ، التىن جۇلدەگە يە بولدىق»، - دەپ ەسكە الدى ٴبيشى.

ول ٴار جىل سايىن «شابىت» فەستيۆالىندە نوميناسيالاردىڭ اۋىسىپ وتىرۋىن قۇپتايتىنىن ايتتى.

«بيىل حالىق ٴبيى بولسا، كەلەر جىلى كلاسسيكالىق، سودان كەيىن قازىرگى زامانعى بي ەنگىزىلەدى. بۇل وتە جاقسى، سەبەبى وسى جىلدار ىشىندە قازاق ٴبيىنىڭ، حالىق ٴبيىنىڭ قانشالىقتى وسكەنىن كورسەتەدى. وسىنداي بايقاۋلار كوپتەپ ۇيىمداستىرىلۋى ٴتيىس. ۇلتتىق بي بولعاننان كەيىن ٴبىز مۇنى دامىتۋىمىز كەرەك. گرۋزيندەر ٴبيىن حالىقارالىق دەڭگەيدە تانىتىپ جاتىر. سول سياقتى وسىنداي دەڭگەيدەگى سايىستار ٴجيى وتكىزىلۋى ٴتيىس»، - دەدى «شابىت-2013» جەڭىمپازى.

2016 جىلى قر پرەزيدەنتى كۋبوگىنا يە بولعان اقىن ەربول الشىنباي «شابىت» حالىقارالىق فەستيۆالىن جاس قالامگەرلەردى شىڭداۋدا ماڭىزدى بايقاۋ دەپ سانايدى.

«كۇللى رەسپۋبليكاداعى قالام ۇستاپ جۇرگەن جاس تالانتتاردىڭ استانادا باس قوسۋى وسى شىعارماشىل جاستاردىڭ جاڭا وي-جۇيەلەرەنىڭ، قانداي ادەبي جاڭالىقتارىنىڭ بار ەكەنىن بىلۋگە، بىر-بىرىمەن بولىسۋگە كوپىر بولادى. حالىقارالىق دارەجەدەگى بايقاۋ بولعاندىقتان كورشى ەلدەردەن دە قالامداس جاستار كەلىپ جاتادى. ولارمەن دە تانىسىپ، سول ارقىلى كورشى ەلدەردەگى زامانداس جاستاردىڭ قازىرگى قارىم-قابىلەتىن، جاي-كۇيىن، ادەبي دامۋ دەڭگەيىن ٴبىلىپ وتىرامىز. بۇل بايقاۋ – شەتەلدىك ادەبيەتشىلەر مەن قازاق ادەبيەتشىلەرى ارسىنداعى كوپىر. جيىرما جىلدا قانشاما قازاق قالامگەرلەرى جۇلدە الىپ، قالقامان سارين، ەرلان ٴجۇنىس سەكىلدى بۇكىل الاشقا ايتۋلى اقىندارعا اينالدى. بۇل بايقاۋ ادەبي ومىرىمىزگە وتە كەرەكتى، جاستاردى بىر-بىرىمەن تانىستىراتىن، ارالاستىراتىن جاقسى جوبا دەپ ويلايمىن»، - دەيدى ەربول الشىنباي.

توقەتەرى. ٴححى «شابىت» فەستيۆالىندە قازاقستانعا عانا ەمەس، ەسىمى الەمگە تانىلاتىن جاس تالانتتار انىقتالماق. جەڭىمپازدار ەسىمى 9 قاراشا كۇنى بەلگىلى بولادى. قازىلاردىڭ شەشىمىمەن ەڭ دارىندى دەپ تانىلعان قاتىسۋشى قازاقستان رەسپۋبليكاسى پرەزيدەنتىنىڭ كۋبوگىنا يەلەنەدى. ٴار نوميناسيا بويىنشا گران-پري يەگەرى مەن جۇلدەلى ٴۇش ورىننىڭ يەلەرى انىقتالادى.

ۆيدەو/فوتو: نۇرجاس جاقسىباي


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي