BAQ.kz - Қазақстан жаңалықтары USD 370.04 BAQ.kz - Қазақстан жаңалықтары EUR 420.99 BAQ.kz - Қазақстан жаңалықтары RUB 5.58
استانا:

24 ماۋسىمنان استانادا بالەت مارافونى باستالادى

استانادا ماۋسىمنىڭ 24 مەن 30 ارالىعىندا بالەت سالتاناتى ورنايدى: الەمنىڭ ايگىلى بالەت ترۋپپالارىنىڭ گاسترولى، كلاسسيكا جاۋھارى سانالاتىن «جيزەل» پرەمەراسى مەن الەمدىك بالەتتىڭ ھاس شەبەرلەرىنىڭ كونسەرتى وتەدى، دەپ حابارلايدى baq.kz اقپارات اگەنتتىگى.

حورەوگرافيالىق ونەردى ٴپىر تۇتۋشىلاردىڭ جۇرەگىن باۋراپ العان «eurasian dance festival»، بيىل، استانانىڭ 20 جىلدىق مەرەيتويىنىڭ اياسىندا وتەتىن مەرەكەلىك شارالاردىڭ ىشىندەگى ماڭىزدىسى بولماق. قازاقستان رەسپۋبليكاسى مادەنيەت جانە سپورت مينيسترلىگى ۇيىمداستىرعان عالامات شارا ٴبىر اپتا بويى «استانا بالەت» تەاترىنىڭ ساحناسىندا وتەتىن بولادى.

بيىل فەستيۆالگە قىتاي ۇلتتىق بالەتى، يسپانيانىڭ ايگىلى «castro romero» ۇجىمى، سلوۆەنيا ۇلتتىق بالەتى، سونىمەن قاتار، پورتۋگاليا مەن گوللانديا ۇلتتىق بالەتىنىڭ، ۇلكەن تەاتردىڭ (رەسەي)، شتۋتگارد بالەتىنىڭ، «استانا وپەرا»، اباي اتىنداعى ماوبت جانە «استانا بالەت» تەاترىنىڭ جەتەكشى سوليستەرى قاتىسادى.

«بالەت الەمى استانانى ەۋرازيانىڭ مادەني ورتالىعى رەتىندە تانيدى. سول سەبەپتى، فەستيۆالگە قاتىسۋعا قىزىعۋشىلىق تانىتىپ وتىر. ٴبىز ٴۇشىن، بولاشاقتا «eurasian dance festival» بالەت الەمى ٴۇشىن ٴداستۇرلى شارالاردىڭ بىرىنە اينالىپ، تاجىريبە الماسۋ الاڭى ٴارى ونەر سۇيەر قاۋىم ٴۇشىن سالتاناتتى مەرەكە بولعانى وتە ماڭىزدى»، - دەيدى «استانا بالەت» تەاترىنىڭ ديرەكتورى ۆالەريي كۇزەمبايەۆ.

ۇيىمداستىرۋشىلاردىڭ ايتۋىنشا، فەستيۆال كورەرمەن قاۋىم مەن قاتىسۋشىلارعا ارتىستەردىڭ ورىنداۋشىلىق شەبەرلىگىنە تاعى ٴبىر ٴتانتى بولۋ مۇمكىندىگىن بەرىپ، الەمدىك حورەوگرافيا ونەرىنىڭ دامۋ تەندەنسيالارىن كورسەتپەك.

فەستيۆال باعدارلاماسى مازمۇندى: مەرەكەلىك شارانىڭ شىمىلدىعىن العاشقى بولىپ، «استانا بالەت» تەاترى «جيزەل» بالەتىنىڭ پرەمەراسىمەن اشپاق. كەيىن سلوۆەنيا ۇلتتىق بالەتى ميلكو شپارەمبلەك ل.ۆ.بەتحوۆەن مۋزىكاسىنا قويعان «پاستورال سيمفونياسى» قويىلىمىن جانە حورەوگراف حانس ۆان مانەن ا.پياسوللا مۋزىكاسىنا قويعان «بەس تانگو» سپەكتاكلىن تاماشالاي الاسىز. اباي اتىنداعى ماوبت يۋ.گريگوروۆيچ س.پروكوفەۆ مۋزىكاسىنا قويعان «رومەو مەن دجۋلەتتا» بالەتىن دايىنداپ وتىر. يسپانيالىق فلامەنكو ٴبيىنىڭ ايگىلى شەبەرلەرى فەستيۆالدىڭ ٴتورتىنشى كۇنى ونەر كورسەتەدى. قىتاي ۇلتتىق بالەتىنىڭ ارتىستەرى «سارى وزەننەن ٴومىر داستانىنا دەيىن» اتتى سپەكتاكل ۇسىنباقشى. فەستيۆالدىڭ جابىلۋ سالتاناتىندا كورەرمەن قاۋىم جەتەكشى بالەت ارتىستەرىنىڭ شەبەرلىكتەرىن تاماشالايتىن بولادى.

فەستيۆالدىڭ قويۋشى-رەجيسسەرى رەسەيدىڭ ايگىلى بالەتمەيستەرى اليشەر حاسانوۆ فەستيۆالدىڭ اشىلۋ سالتاناتىنا كەشىكپەي كەلۋدى تاپسىردى. سەبەبى، فەستيۆالدىڭ اشىلۋ راسىمىنەن بۇرىن بي مۋزاسى تەرپسيحورانى اسپەتتەيتىن شاعىن قويىلىم كورسەتىلمەك.

«استانا بالەت» تەاترىنىڭ باس بالەتمەيستەرى مۋكارام اۆاحري «جيزەل» سپەكتاكلى وسى كۇنگە دەيىن كورەرمەن كوڭىلىن باۋراپ الار قۇدىرەتىنەن ايىرىلعان جوق.

«ٴمىنسىز دراماتۋرگيا، بەينەلەر، مۋزىكا، ەستەتيكا مەن ستيل – وسى سپەكتاكلدىڭ ٴساتتى شىعۋىنىڭ باستى سەبەبى وسى. تەاترىمىزدا شاقىرىلعان حورەوگراف رەتىندە قىزمەت اتقاراتىن ريكاردو امارانتە قويعان بالەت ەكسپرەسسياعا، نازىكتىك پەن تابيعيلىققا باي. وسى كۇنى ميزانسسەنانى ويلاستىرىپ وتىرمىز. سسەنوگرافيا مەن كوستيۋمدەر تەاترىمىزدىڭ سەحتارىندا، شاقىرىلعان سۋرەتشى رەنە سالازاردىڭ قاداعالاۋىمەن دايىندالىپ جاتىر. بالەت ۇجىمىمىز ٴۇشىن «جيزەل» قويىلىمى ٴبيدىڭ كلاسسيكالىق كانوندارىن ۇيرەنۋدە مول تاجىريبە بولماق»، - دەيدى ول.

ايگىلى بالەت شەبەرلەرىنىڭ گالا-كونسەرتىنىڭ باعدارلاماسى زاماناۋي حورەوگرافتاردىڭ نومىرلەرىنەن، حح عاسىرداعى ايگىلى بالەتتەردىڭ ۇزىندىلەرىنەن، سونىمەن قاتار، الدەقاشان كلاسسيكالىق حورەوگرافيانىڭ جاۋھارىنا اينالعان قويىلىمداردان دۋەتتەر مەن سولو ورىندالادى.

فەستيۆالدىڭ اتقارۋشى ديرەكتورى جانىبەك قايىردىڭ ايتۋىنشا، فەستيۆالدىڭ اشىلۋ سالتاناتىنا الەمنىڭ ۇزدىك تەاترلارىندا قىزمەت ىستەيتىن بالەتتىڭ ايگىلى جۇلدىزدارى شاقىرىلعان. بالەت ونەرىن سۇيەر قاۋىم «استانا بالەت» تەاترىنىڭ ساحناسىندا تۇڭعىش رەت، الەمنىڭ ۇزدىك تەاترلارىنىڭ ايگىلى ارتىستەرىن كورە الادى: يۆان ۆاسيلەۆ – ميحايلوۆ جانە ۇلكەن تەاتردىڭ پرەمەرى، american ballet theater شاقىرىلعان جۇلدىزى، ونىڭ سەرىكتەسى رەتىندە ۇلكەن تەاتردىڭ (رەسەي) پريما بالەريناسى اناستاسيا ستاشكەۆيچ ونەر كورسەتەدى. ليسسابوننان ارنايى شاقىرىلعان قوناقتار كاسترو مەن كارلوس پينيلوس – پورتۋگاليا ۇلتتىق بالەتىنىڭ پرەمەرلەرى، شتۋتگارت ۇلتتىق بالەتىنىڭ ەتۋالدەرى فريدەمان فوگەل مەن ەلىمىزدىڭ تۋماسى، الماتى حورەوگرافيا ۋچيليششەسىنىڭ تۇلەگى ماريا ەيحۆالد «مانون» مەن «مونا ليزا» بالەتتەرىنەن دە كورسەتەدى.

سونىمەن قاتار، ۇيىمداستىرۋشىلاردىڭ حابارلاۋىنشا، فەستيۆالدىڭ اشىلۋىنا ٴالى ەكى اپتا بارىنا قاراماستان، كەيبىر قويىلىمدارعا انشلاگ بولعالى تۇر.

استاناداعى ەۋرازيالىق بالەت فەستيۆالى الەمدىك بالەت جۇلدىزدارىمەن قاتار، جاس دارىندار ٴۇشىن دە ٴداستۇرلى ٴارى قىزىقتى دۇنيەگە اينالعانىن ايتپاقشىمىز. دۇنيەجۇزىنىڭ ٴتۇرلى ستيلدە جۇمىس ىستەيتىن زاماناۋي بالەتمەيستەرلەرىنىڭ ىزدەنىستەرى، زاماناۋي باعىتتار تاعى دا ٴبىزدىڭ ەلىمىزدە كەزدەسىپ، حورەوگرافيا ونەرىن جاڭا قىرىنان تانىتپاقشى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي