USD 335.71 EUR 357.36 RUB 5.23
استانا:

جارىسقا بارا جاتقان مەكتەپ وقۋشىلارى جول اپاتىنا ۇشىرادى

ەلىمىزدىڭ سولتۇستىگىندە جارىسقا بارا جاتقان مەكتەپ وقۋشىلارى مەن دەنەشىنىقتىرۋ ٴپانىنىڭ ٴمۇعالىمى جول اپاتىنا ۇشىرادى.

اپاتتان وقۋشىلاردىڭ ۇستازى وقيعا ورنىندا بىردەن كوز جۇمدى. ال ٴتورت وقۋشىنىڭ ەكەۋى العان جاراقاتتاردان اۋىر حالدە اۋرۋحاناعا تۇسكەن.

جول اپاتى زارەچنىي جانە ياۆلەنكا اۋىلدارى اراسىنداعى تاس جولدا بولعان. بۇل اۋدان ورتالىعىنان 1-2 شاقىرىمدا. وقيعا ورنىندا كولىكتەردىڭ بىر-بىرىمەن سوقتىعىسقانى بايقالادى.ويتكەنى ەكى كولىكتىڭ بولشەكتەرى اينالاعا شاشىلىپ جاتىر.

ٴبىرىنشى كولىكتەگى ٴتورت وقۋشى مەن دەنە شىنىقتىرۋ ٴپانىنىڭ ٴمۇعالىمى قازاق كۇرەسىنەن وبلىستىق جارىسقا بارا جاتادى. قاتتى كوكتايعاقتان كولىك قارسى باعىتقا شىعىپ كەتكەن. كولىك رولىندە بولعان جاتتىقتىرۋشى رۋسلان وركەشوۆ سول جەردە قايتىس بولادى. ال ٴتورت وقۋشىنىڭ ەكەۋى اۋىر جاراقات الادى

«ەكەۋى وتە كوپ جاراقات العان. جامباس سۇيەكتەرى سىنىپتى. وعان قوسا قاتتى شوشىنىپ قالعان»، - دەيدى ەسىل اۋداندىق ورتالىق اۋرۋحاناسىنىڭ باس دارىگەرى الەكساندر باراباش.

جول اپاتىنان قاتتى زارداپ شەككەن ەكى وقۋشىنى امان الىپ قالۋ ٴۇشىن اق حالاتتىلار ٴۇش ساعاتقا دەيىن وتا جاساعان. ال اۋرۋحاناعا جەتكىزىلگەندە ەس-تۇسسىز بولعان ەكەۋى ەندى وز-وزىنە كەلىپ جاتىر دەيدى دارىگەرلەر. كولىكتە بولعان 15 پەن 17 جاس ارالىعىنداعى ٴۇش ٴجاسوسپىرىم لەنين ورتا مەكتەبىنىڭ وقۋشىسى، بىرەۋى وبلىستىق سپورت ينتەرناتتىڭ تاربيەلەنۋشىسى ەكەنى بەلگىلى بولدى. قايتىس بولعان رۋسلان وركەشوۆ تە لەنين ورتا مەكتەبىندە ۇستازدىق ەتكەن.

«ٴمۇعالىم ٴوز كولىگىمەن نەگە جولعا شىققانىن ٴوزىمىز دە بىلمەيمىز. بۇيرىق بويىنشا اۋداندىق سپورتشىلار بىرىگىپ، ٴبىر اۆتوبۋسپەن شىعۋ كەرەك ەدى. مۇمكىن بارلىعى جەڭىل كولىككە سياتىن بولعاندىقتان ٴمۇعالىم ٴوزى جەكە اپارۋ تۋرالى شەشىم قابىلداعان بولار»، - دەيدى لەنين ورتا مەكتەبىنىڭ ديرەكتورى اسلان تىلەۋبەرگەنوۆ.

مەكتەپكە تيەسىلى شاعىن اۆتوبۋس بولعان. ٴبىراق نەگە ەكەنى بەلگىسىز جاتتىقتىرۋشى وقۋشىلارىن الىپ جارىسقا ٴوزىنىڭ جەكە كولىگىمەن شىققان. ال بۇيرىق بويىنشا ارنايى كولىك تە، ەرىتىپ جۇرەتىن ارنايى ورگاندار دا بولۋى ٴتيىس ەدى، - دەيدى ماماندار.

«ولار و باستا «گازەل» كولىگىمەن جانە جول-پاتۋرلدىك پوليسيا قىزمەتكەرلەرىمەن بىرگە جولعا شىعۋى كەرەك ەدى. ولاي بولماعانىن اپات بولعان سوڭ عانا ٴبىلىپ وتىرمىز»، - دەپ ٴتۇسىندىردى سقو ٴبىلىم باسقارماسىنىڭ ٴبولىم باسشىسى سۆەتلانا لەتۋچايا.

قازاق كۇرەسىنەن ٴوتۋى ٴتيىس بولعان جارىسقا دەنەشىنىقتىرۋ جانە سپورت باسقارماسى مۇرىندىق بولعان. ياعني، ۇيىمداستىرۋ ٴىس شارالارىنا دا ولار جاۋاپتى ەكەن. دەگەنمەن ٴقازىر ارنايى كوميسسيا قاي مەكەمەنىڭ كىنالى ەكەنىن انىقتاپ جاتىر.

31.kz

كوممەنتاريي1
الاش
مەكتەپ ديرەكتورى مەن ٴبىلىم بەرۋ باسقارماسى باسشىسىنىڭ تۇك بىلمەيمىز دەۋى ەشقانداي قيسىنعا كەلمەيدى. ولار وزدەرىنىڭ جەكە باستارىن جاۋاپكەرشىلىكتەن اراشالاپ وتىر. مۇنداي جاعدايلار بارلىق مەكتەپتەردە ورىن الاتىنى جاسىرىن ەمەس. بۇعان قوسا مۇنداي شارالار باسشىلىقتىڭ تىنىش قانا باس شۇلعۋىمەن جۇزەگە اسىرىلادى. سوندىقتان ، مارقۇم بولعان ٴمۇعالىمدى كىنالاۋ تىپتەن ۇيات.

ۆاش كوممەنتاريي بۋدەت وپۋبليكوۆان پوسلە مودەراسيي