BAQ.kz - Қазақстан жаңалықтары USD 364.95 BAQ.kz - Қазақстан жаңалықтары EUR 416.99 BAQ.kz - Қазақстан жаңалықтары RUB 5.55
استانا:

پەرىشتەسى قاققان سابيلەر

استانا، baq.kz. استانا قالاسىنداعى №2 قالالىق بالالار اۋرۋحاناسىندا جىل باسىنان بەرى بالالاردىڭ اعزاسىنان تيىن، ينە، ماگنيت، ويىنشىق جانە تاعى دا باسقا ٴىرىلى-ۇساقتى 159 بوگدە زاتتار شىعارىلعان. باس دارىگەر ٴبىرجان سەرىكبەك ۇلى بالالار اراسىندا وسىنداي جاعدايلار ٴجيى كەزدەسەتىنىن ايتتى.

بالالاردىڭ اعزاسىنداعى بوگدە زاتتارعا قاتىستى پرەزەنتاسيا بارىسىندا №2 قالالىق بالالار اۋرۋحاناسىنىڭ باس دارىگەرى ٴبىرجان دوسمايلوۆ مۇنداي جاعدايلار كوبىنەسە 1-3 جاستاعى سابيلەر اراسىندا ٴجيى بولاتىنىن ايتتى.

«بوگدە زاتتار بالانىڭ اعزاسىنا كوبىنەسە قۇلاق، مۇرىن، اۋىز ارقىلى تۇسەدى. تىنىس الۋ جولدارى ارقىلى كىرگەن زات مۇرىن ىشىندە، كەڭىردەكتە، وكپە تىنىندە تۇرىپ قالۋى مۇمكىن. ەڭ ٴقاۋىپتى جەر – كومەي مەن كەڭىردەك. تەز ارادا مەديسينالىق كومەك كورسەتىلمەگەن جاعدايدا بالا اۋا جەتپەگەندىكتەن ارادا 1-2 مينۋت وتپەي-اق كوز جۇمۋى مۇمكىن»، - دەيدى ول.

بالالاردىڭ اعزاسىنان الىنعان بوگدە زاتتار

2017 جىلى بالالاردىڭ تىنىس الۋ جولىنداعى بوگدە زاتتاردى الۋ جاعدايى 30 رەت بولسا، 2018 جىلى قازىرگى ۋاقىتقا دەيىن 27 جاعداي بولعان. سونداي-اق، 2017 جىلى اسقورىتۋ جولىنداعى بوگدە زاتتاردى الۋ جاعدايى 129 رەت بولسا، 2018 جىلى 131 جاعداي تىركەلگەن.

«مىسالى، كىشكەنتاي بالا بىرنەشە ماگنيت جۇتىپ قويعان جاعداي بولدى. ويناپ جۇرگەن بالا جەردە جاتقان ينەنىڭ ۇستىنە قۇلاپ، ول باسىنا كىرىپ كەتكەن جاعداي دا بولدى. قالامساپتىڭ باسىن جاباتىن زاتتى بالا كوزىنە كىرگىزىپ الىپ، ول ميىنا قاراي ٴوتىپ كەتكەن وقيعا دا بولدى»، - دەيدى باس دارىگەر.

قۋانىشقا وراي، وسىنداي وقىس جاعدايعا تاپ بولعان بالالاردى دارىگەرلەر امان الىپ قالعان. ونىڭ ايتۋىنشا، كەز كەلگەن بالا كوزىنە كورىنگەن زاتتى قولمەن ۇستاپ، اۋزىنا سالىپ كورۋگە قۇمار بولادى. سول سەبەپتى ۇساق، جىلتىراق زاتتاردى بالانىڭ قولى جەتپەيتىن جەرگە قويعان دۇرىس.

«ەڭبەكتەپ جۇرگەن، ٴوسىپ كەلە جاتقان بالاعا وتە مۇقيات قاراۋ كەرەك. ٴوز دەنە مۇشەلەرىن «زەرتتەپ» وتىرعان ٴبۇلدىرشىن قىز بىرنەشە ماگنيتتى قۋىعىنا كىرگىزگەن جاعداي دا بولدى. ٴار اتا-انا، اپا مەن اتا بالالارىنىڭ، نەمەرەلەرىنىڭ ٴومىرى ٴۇشىن جاۋاپتى. وقىس دەگەن اياق استىنان بولادى، سوندىقتان ولاردى كوزدەن تاسا قىلماي، ٴقاۋىپتى زاتتاردى كوزگە كورىنبەيتىن، قول جەتپەيتىن جەرگە قويعان دۇرىس»، - دەيدى ول.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي