USD 334.89 EUR 361.61 RUB 5.28
استانا:

وسكەمەن تۇرعىنى اناسىن ۇسكىرىك ايازدا دالاعا قۋىپ شىققان

وسكەمەن تۇرعىنى تۋعان اناسىن ۇسكىرىك ايازدا دالاعا قۋىپ شىققان. ەگەر بەيتانىس جاندار 83 جاستاعى قارتقا كومەك كورسەتپەگەندە، كەيۋانانىڭ قىستىڭ قاھارلى كۇندەرىندە امان قالۋى ەكىتالاي ەدى. جانە مۇنداي جاعدايلار بۇگىنگى قوعامدا وتە كوپ كەزدەسەدى. وسىنداي ەڭ قيىن كەزەڭدەردە شىعىس قازاقستاننىڭ گەندەرلىك ساياساتىنىڭ ارقاسىندا اشىلعان كۇيزەلىس ورتالىعىنىڭ ماماندارى كومەككە كەلەدى.

الەۋمەتتىك-پسيحولوگيالىق كومەك بەرەتىن كۇيزەلىس ورتالىعىندا جاتقان سەكسەن ٴۇش جاستاعى اننا لوشكارەۆا ٴۇشىن ٴجۇرىپ-تۇرۋدىڭ ٴوزى قيىن. ويتكەنى بىرنەشە كۇن بۇرىن تۋعان ۇلى اياۋسىز ۇرىپ، ۇيدەن قۋىپ شىققان. قىستىڭ قىرىق گرادۋس ايازىندا دالادا قالعان كەيۋانا بويىن جىلىتپاق بولىپ دۇكەنگە كىرەدى. قاريانىڭ جاعدايىن كورگەن دۇكەن قىزمەتكەرلەرى ٴتارتىپ ساقشىلارىن شاقىرتادى. پوليسەيلەر قارتتى بىردەن وسى ورتالىققا ورنالاستىرعان.

«كىشكەنە قىزىپ العان ۇلىم مەنى جاتقان جەرىمنەن سۇيرەپ، تۇنشىقتىرا باستادى. تەۋىپ، ۇرىپ، «سەنى پىشاقتايمىن» دەپ ايعايلادى»، - دەيدى وسكەمەن قالاسىنىڭ تۇرعىنى اننا لوشكارەۆا.

وسكەمەندەگى الەۋمەتتىك-پسيحولوگيالىق كومەك كورسەتەتىن كۇيزەلىس بولىمشەسى ون جىلدان بەرى قيىن جاعدايعا تاپ بولعان قىز-كەلىنشەكتەرگە جاردەم بەرىپ كەلەدى. ورتالىق نەگىزگى ٴۇش باعىتتا جۇمىس ىستەيدى تاۋلىك بويى سەنىم تەلەفونى، كەڭەس بەرۋ جانە ٴوز قامقورلىقتارىنا الۋ بويىنشا. ونى گەندەرلىك ساياساتتىڭ ايماقتىق جوسپارىن جۇزەگە اسىرۋ نەگىزىندە اشقان.

«بيىلعى جىلدىڭ قاڭتار ايىنان باستاپ ٴبىزدىڭ كەڭەسىمىزگە 500 اسا ايەل جۇگىندى. ورتالىقتا 62 ادام بولسا، تاعى 2000-ى سەنىم تەلەفونىنا قوڭىراۋ شالعان. ال ون جىلدا 30 000 ادام كومەك سۇراعان»، - دەيدى الەۋمەتتىك-پسيحولوگيالىق كومەك كورسەتۋ كۇيزەلىس ٴبولىمىنىڭ مەڭگەرۋشىسى سالتانات نۇرعازينوۆا.

ايماقتا قىز-كەلىنشەكتەردىڭ ەرلەرگە قاراعاندا ون پايىز ارتىق بولۋىنا قاراماستان، نازىك جاندىلارعا كومەك كوبىرەك قاجەت. سوندىقتان وڭىردە وتباسى-دەموگرافيالىق ساياسات جانە ايەلدەر ٴىسى بويىنشا كوميسسيا جۇمىس ىستەيدى. ال ەل تاۋەلسىزدىگىنىڭ 25 جىلدىعىنا وراي، 25 كاسىپورىندا ايەلدەر كەڭەسى قۇرىلدى.

«كوبىنە بۇل جاس انالار مەن كوپ بالالى وتباسىلاردىڭ پروبلەماسى. ولاردى شامامىز كەلگەنشە دەمەۋگە تىرىسامىز»، - دەيدى «ماشزاۆود» اق كاسىپوداق ٴتوراعاسى رايسا پانتەلەەۆا.

ال وبلىستىق اكىمدىكتەگىلەر كاسىپوداق ٴتوراعالىعىندا 75 پايىز ايەلدەردىڭ بولۋىنان-اق ولاردىڭ ازاماتتىق بەلسەندىلىگىن بىلۋگە بولادى دەيدى. ٴبىراق گەندەرلىك ساياسات دەگەنىمىز تەك ايەلدەردىڭ قۇقىعى دەگەندى بىلدىرمەيدى.

«بۇگىندە ازاماتتاردى دا قورعاۋ كەرەك. ادام قۇقىقتارى بۇزىلعان جاعدايلاردىڭ ۇلەس سالماعى 50 دە 50. ياعني ايەلدەر مەن ەركەكتەر دەگەن ٴسوز»، - شقو كاسىپوداق ورتالىعىنىڭ ٴتوراعاسى نۇرجان ٴتۇسىپوۆا.

گەندەرلىك ساياساتتىڭ نەگىزگى باسىمدىلىعى انا مەن بالانى قورعاۋعا بەرىلەدى. وسكەمەندەگى «انالار ۇيىندە» بالالى انالارعا ٴبىلىم الىپ، تۇرمىس جاعدايىنا ۇيرەتەدى. ال ازىق-تۇلىك، كيىم-كەشەك، تازالىق زاتتارىن ولارعا قالتالى جاندار بەرەدى.

31 ارنا

كوممەنتاريي0

ۆاش كوممەنتاريي بۋدەت وپۋبليكوۆان پوسلە مودەراسيي