BAQ.kz - Қазақстан жаңалықтары USD 374.2 BAQ.kz - Қазақстан жаңалықтары EUR 420.34 BAQ.kz - Қазақстан жаңалықтары RUB 5.52
استانا:

قاراعاندى وبلىسىنىڭ تۇرعىنى ٴوزىن پوليسەيلەر سابادى دەپ ارىزداندى

قاراعاندى وبلىسىنىڭ وساكاروۆ اۋدانى مولودەجنىي ەلدى مەكەنىنىڭ تۇرعىنى قۇقىق قورعاۋ ورگانىنىڭ قىزمەتكەرلەرىنە ۇردى دەگەن ايىپ تاعۋدا. پوليسەيلەردەن تاياق جەگەن جىگىتتىڭ اناسى ٴتارتىپ ساقشىلارىنىڭ ۇستىنەن شاعىم تۇسىرگەن، دەپ xابارلايدى baq.kz اگەنتتىگىنىڭ ايماقتاعى ٴتىلشىسى.

وقيعا 8 قىركۇيەك كۇنى مولودەجنىي ەلدى مەكەنىندەگى «سۆيتانوك» دۇكەنىنىڭ الدىندا تاڭعى ساعات 4-5 ارالىعىندا بولعان. دۇكەنگە كەلگەن 22 جاستاعى نيكولاي سميرنوۆتى ٴۇش جىگىت وڭدىرماي ساباپ، بەت-اۋزىن كوك الا قويداي قىلعان. تاياق جەگەن جىگىتتىڭ تۋىستارىنىڭ ايتۋىنشا نيكولايدى ساباعان جىگىتتەردىڭ ەكەۋى قۇقىق قورعاۋ ورگاندارىندا جۇمىس ىستەيدى. ولار پوليسياعا شاعىم تۇسىرگەنىمەن ٴىستىڭ شىنايى تەكسەرىلەتىندىگىنە كۇمان كەلتىرىپ، الەۋمەتتىك جەلى ارقىلى xالىقتان كومەك سۇراۋدا.

«باۋىرىمدى وڭدىرماي ساباعان. قولمەن ۇرىپ، اياقپەن تەۋىپ، ٴتىپتى باسىن ماشيناعا ۇرعىلاعان. پوليسياعا شاعىم تۇسىردىك. الايدا قۇقىق قورعاۋ قىزمەتكەرلەرى ٴىستى جۇرگىزۋگە اسىعار ەمەس»، - دەيدى نيكولايدىڭ اپكەسى ناتاليا سميرنوۆا.

نيكولايدىڭ ٴوزى تاياق جەۋىنىڭ سەبەبىن بىلاي تۇسىندىرەدى:

«مەن كاسىپورىندا تۇنگى اۋىسىمدا جۇمىس ىستەيمىن. تاڭعا قاراي دۇكەنگە كەلدىم. ەسىكتىڭ الدىندا ٴۇش جىگىت تۇر ەكەن. ونىڭ بىرەۋى مەنىڭ اياعىمدى باسىپ كەتتى. مەن ەسكەرتۋ جاسادىم. سول-اق ەكەن ول ماعان دۇرسە قويا بەردى دە جۇدىرىعىن الا جۇگىردى. قالعان ەكەۋى دە جابىلىپ كەتتى. توبەلەستى كورگەن دۇكەننىڭ ساتۋشىسى پوليسيا شاقىردى. ولار مەنى ۇرعاندارمەن قول الىسىپ امانداستى. پوليسەيلەر ەشكىمنىڭ ولمەگەنىن كوردى دە، كەتىپ قالدى»، - دەيدى نيكولاي.

ونىڭ اپكەسىنىڭ ايتۋىنشا باۋىرىن ۇرعان پوليسەيلەردىڭ بىرەۋى قىزمەتتىك كۋالىگىن كورسەتىپ، ٴوزىنىڭ قۇقىق قورعاۋ ورگاندارىندا قىزمەت ەتەتىندىگىن ايتقان. ال ەكىنشىسى جول پاترۋلدىك پوليسيا قىزمەتكەرى بولعان.

«باۋىرىم كولىگىنە ازەر جەتىپ، جۇمىسىنا كەتكەن. ەرتەڭىندە تاڭەرتەڭ انامىز پوليسياعا بارىپ، شاعىم ٴتۇسىردى. ساراپتاما دەنە جاراقاتىنىڭ بار ەكەنىن راستادى. نيكولاي پوليسيا پۋنكتىندە ەكى ساعات بولدى. پوليسەيلەردىڭ وعان نە ايتقانى بىزگە بەيمالىم، ٴبىراق ول «نارازىلىعىم جوق» دەپ جازىپ بەرىپتى»، - دەيدى ناتاليا.

دەگەنمەندە جابىرلەنۋشى سميرنوۆتار وتباسى ٴىستى سوڭىنا دەيىن جەتكىزبەك.

«تەرگەۋشى اناما ەشتەڭەنى دە دالەلدەي المايسىزدار دەپتى. ٴتىپتى اكەمىزدىڭ جۇمىسىنا دا پوليسەيلەر كەلىپ، انامىزدىڭ شاعىمىن قايتارىپ الۋلارىن سۇراپتى. باۋىرىمدى ٴتارتىپ ساقشىلارىنىڭ ۇرعانى انىق. ٴبىراق باسقا پوليسەيلەر ولاردى جاۋاپقا تارتۋعا اسىقپايدى»، - دەيدى ناتاليا.

قاراعاندى وبلىستىق ىشكى ىستەر دەپارتامەنتى اتالعان وقيعاعا بايلانىستى ٴىس قوزعالعاندىعىن ايتادى.

«فاكت سوتقا دەيىنگى تەرگەۋدىڭ ٴبىرىڭعاي تىزىلىمىنە «بۇزاقىلىق» بابى بويىنشا تىركەلدى. ماتەريال وسكاروۆ اۋداندىق ىشكى ىستەر بولىمىنەن وبلىستىق ٴىىد-نىڭ وزىندىك قاۋىپسىزدىك باسقارماسىنا بەرىلدى»، - دەيدى وبلىستىق ٴىىد-نىڭ ٴباسپاسوز xاتشىسى باقىتجان قۇدياروۆ.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي