BAQ.kz - Қазақстан жаңалықтары USD 368.28 BAQ.kz - Қазақстан жаңалықтары EUR 419.21 BAQ.kz - Қазақстан жаңалықтары RUB 5.59
استانا:

پەتروپاۆلدا ٴوڭىرارالىق فورۋم اياسىندا گالا-كونسەرت ٴوتتى

فوتو: Автор

سولتۇستىك قازاقستان، baq.kz ٴتىلشىسى. پەتروپاۆلدا قازاقستان مەن رەسەي ٴوڭىرارالىق ىنتىماقتاستىق فورۋمى اياسىندا ەكى ەلدىڭ ونەر ۇجىمدارى قاتىسقان «دوستىق كوپىرى» اتتى گالا-كونسەرت ٴوتتى. سولتۇستىك قازاقستان، ومبى، قورعان، تۇمەن وبلىستارىنىڭ ۇجىمدارى مەن جەكە ورىنداۋشىلارى حالىق الدىندا 3 ساعات بويى ونەر كورسەتتى.

جاستار سارايىندا وتكەن گالا-كونسەرتتە ينە شانشار ورىن بولمادى. ۇيىمداستىرۋشىلارعا كورەرمەندەر ٴۇشىن قوسىمشا ورىندىقتار دا قويۋعا تۋرا كەلدى. رەسەيدىڭ حورەوگرافيالىق جانە ۆوكالدىق ونەر ۇجىمدارى قازاقستان كورەرمەندەرى ٴۇشىن وزدەرىنىڭ ەڭ ۇزدىك نومىرلەرىن الىپ كەلدى. كونسەرت بارىسىندا انشىلەر قۇيقىلجىتا ٴان سالىپ، مىڭ بۇرالعان بيشىلەر ٴوز ونەرلەرىن حالىققا تارتۋ ەتتى. سولتۇستىكقازاقستاندىقتار دا ايانىپ قالمادى. جەرگىلىكتى ورىنداۋشىلار دا ساحنا تورىنەن تابىلدى.

«ٴبىز فورۋمعا دايىندىقتى جازدا باستادىق. مەيمانداردى قابىلدايتىن بولعاندىقتان، جاۋاپكەرشىلىكتى سەزىندىك. وسى شارادا ونەر كورسەتۋ ماقساتىندا ارنايى ەكى ۇجىم قۇرىلدى. قىركۇيەك، قازان ايلارىندا كوپ ەڭبەك ەتتىك. ەڭ باستىسى، كورەرمەن كونسەرتتى وتە جاقسى قابىلدادى»، - دەيدى سولتۇستىك قازاقستان وبلىستىق فيلارمونياسىنىڭ ديرەكتورى بوتاگوز اقماعامبەتوۆا.

رەسەيلىك ونەر ۇجىمدارىنىڭ اراسىندا پەتروپاۆلعا العاش رەت كەلگەندەرى دە بار. شەتەلدىك مەيماندار قىزىلجارلىق كورەرمەن وزدەرىن زور ىقىلاسقا بولەپ، ٴبىر قۋانتىپ تاستاعانىن جاسىرمادى.

«التىن قورىمىزداعى ەڭ ۇزدىك نومەرلەردى اكەلدىك. كورەرمەندەر كەرەمەت ەكەن، ٴبىزدى قول سوعىپ قارسى الدى. قابىلداۋعا ريزا بولدىق. بۇل بىزگە شابىت سىيلادى. سوندىقتان جوعارى دەڭگەيدە ونەر كورسەتتىك دەپ ويلايمىن. بۇعان دەيىن استانا قالاسىنا بىرنەشە رەت بارعانبىز. پەتروپاۆلعا ٴبىرىنشى رەت كەلدىم. قالا ۇناپ قالدى»، - دەيدى رەسەيدىڭ ومبى قالاسىنان كەلگەن بالەت ٴارتىسى داريا پودۆورنايا.

كونسەرت بارىسىندا ومبى، تۇمەن جانە قورعان وبلىسىنان كەلگەن جانە پەتروپاۆلدان 200-دەن استام ونەرپاز حالىققا كوتەرىڭكى كوڭىل-كۇي سىيلادى. فورۋم اياسىندا قازاقستان-رەسەي كينولارىنىڭ كۇنى دە اشىلدى. ونىڭ اياسىندا پەتروپاۆل قالاسىنداعى كينوتەاترلاردا «اناعا اپارار جول»، «امىرە»، «ورالمان»، «ورەحوۆوە دەرەۆو»، «28 پانفيلوۆشى» سىندى تاعى باسقا فيلمەردى تەگىن كورسەتۋ جوسپارلانعان. ال دراما تەاترلارىندا «قاراگوز»، «شولپاننىڭ كۇناسى» اتتى تاعى باسقا سپەكتاكلدەر ساحنالانادى.

فوتوسۋرەتتەر: اۆتور


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي