USD 334.31 EUR 355.17 RUB 5.31
استانا:

«تۇركىستان جانە ەلباسى»  كورمەسىنىڭ اشىلۋ ٴراسىمىن وتكىزەدى

«ازىرەت سۇلتان» مەملەكەتتىك تاريحي-مادەني قورىق-مۇراجايى 2016 جىلدىڭ 30 قاراشا كۇنى ساعات 11.00-دە «قازاقستان رەسپۋبليكاسىنىڭ تۇڭعىش پرەزيدەنتى كۇنى» مەرەكەسىنە وراي «تۇركىستان جانە ەلباسى» كورمەسىنىڭ اشىلۋ ٴراسىمىن وتكىزەدى.

قازاقستان تەرريتورياسىندا ەجەلگى تەمىر عاسىرىنان باستاپ ساق، سارمات، ٴۇيسىن، قاڭلى، اق عۇندار، تۇركى، قارلۇق، وعىز، قيدان، قاراحان، قىپشاق، التىن وردا، اق وردا، كوك وردا، كوشپەلى وزبەك جانە قازاق حاندىعى سياقتى كوپتەگەن مەملەكەتتەر قالىپتاسىپ، ٴومىر سۇرگەن جانە ىدىراپ وتىرعاندىعى تاريحتان ٴمالىم. ٴوز زامانىندا اتاقتى توميريستەن باستاپ ەستەمى قاعان، وعىز حان، قاراحان سىندى تۇلعالارمەن تەڭدەس قازاقتىڭ قاسىم حان، ەسىم حان، تاۋكە حان جانە ۇلى ابىلاي سىندى تاريحتىڭ دامۋىنا ىقپال ەتكەن بىرەگەي ساياساتكەرلەر شىقتى. اسىرەسە «ورىس ايۋىن ورمانىندا، قىتاي ايداھارىن قورعانىندا، جوڭعار جىلانىن ىنىندە» ۇستايتىن ساياسات جۇرگىزە بىلگەن ۇلى ابىلايدىڭ ٴرولى ەرەكشە ەدى. سودان سوڭ-اق بوداندىققا تۇسكەن ەلىمىز 200 جىلدان اسقاندا عانا بارىپ تاۋەلسىزدىگىنە قايتا قول جەتكىزدى.

تۇڭعىش پرەزيدەنتىمىز ن.ٴا.نازاربايەۆتىڭ تاريح ساحناسىنا شىعىپ كورەگەن ساياسات جۇرگىزە وتىرىپ، سولتۇستىكتەگى رەسەي، شىعىستاعى قىتاي، باتىستاعى ەۋروپا ەلدەرىنىڭ، مۇحيت اسىپ اقش باسشىلارىمەن يىعى تەڭ دارەجەدە كەلىسسوز جۇرگىزە بىلگەندىگىن بۇگىندە الەم مويىنداپ وتىر. سونداي-اق ەلىمىز 2010 جىلى ەىقۇ ٴتورعاسى بولىپ، استانادا ەلۋ ٴتورت ەلدىڭ باسشىلارىن جيناپ ساميت وتكىزدى. 2011 جىلى ەلىمىزدىڭ تاريحىندا بولماعان قىسقى ازيا ويىندارى الماتى مەن استانا قالاسىندا جالاۋى كوتەرىلدى. 2017 جىلى دۇنيەجۇزىلىك expo كورمەسىنىڭ استانادا وتەتىنى دە تەگىن ەمەس-تى.

كيەلى تۇركىستان قالاسىنداعى قوجا احمەت ياساۋي كەسەنەسى تۇركى حالىقتارىنىڭ، ونىڭ ىشىندە ٴيسى قازاقتىڭ ايرىقشا قۇرمەت ەتىپ، تابارىك تۇتار مەكەنى. ۇلى ۇستازدىڭ رۋحاني ٴىلىمى باعزى زاماننان بەرى شىنايى ەركىندىككە، تاۋەلسىزدىككە جەتكىزەتىن جول رەتىندە تانىلعان. «ەسىم حاننىڭ ەسكى جولى»، «قاسىم حاننىڭ قاسقا جولى» دەپ وتكەن كەشەگى قازاقتىڭ حان-سۇلتاندارى ەل باسقارۋ ىسىندە ياساۋي قاعيدالارىن نەگىزگە العان. ەلباسى ن.ٴا.نازاربايەۆ «تۇركىستان مەن ونىڭ ۇلى عيماراتىن بۇگىنگى ۇرپاق قازاق مەملەكەتتىلىگى تاعدىرمەن تىعىز بىرلىكتە قاراستىرادى. ۇلتتىق بوستاندىعىمىز بەن ىرگەلى ەلدىگىمىزدىڭ اق ورداسى، اسىل كوزى دەپ ارداق تۇتادى» دەپ كيەلى مەكەننىڭ دارەجەسىن ودان ٴارى ايقىنداي ٴتۇستى.

وسى التىن ساباقتاستىقتىڭ بۇگىنگى كۇنگە دەيىن ٴتىنى ۇزىلمەي جەتكەندىگىن ەلباسىمىز نۇرسۇلتان نازاربايەۆتىڭ وتكەن تاريحىمىزعا، رۋحاني مۇرامىزعا دەگەن ىزگى نيەتىمەن، ىلتيپاتىمەن بايلانىستىرۋعا بولادى. اركەز بابالار داستۇرىنە اينىماس ادالدىقتىڭ ۇلگىسىن كورسەتىپ كەلە جاتقان ەلباسىمىز ازىرەت سۇلتان كەسەنەسىنىڭ يۋنەسكو-نىڭ بۇكىلالەمدىك مۇرالار تىزىمىنە ەنۋىنە تىكەلەي مۇرىندىق بولدى.

ەلباسى ن.ٴا.نازاربايەۆ ەڭ الدىمەن، 1985-1988 جىلدارى قازاق سسر مينيسترلەر كابينەتىنىڭ باسشىسى قىزمەتىن اتقارىپ جۇرگەن تۇستا، قوجا احمەت ياساۋي كەسەنەسىنە ارنايى ات باسىن بۇرىپ، مۇنداعى اتقارىلىپ جاتقان ىس-شارالارمەن تانىسادى. سودان بەرى ەلباسى تاراپىنان اۋليە بابامىزعا تاعزىم رەتىندە سانالاتىن يگى جۇمىستارعا اق جول اشىلدى دەپ ەسەپتەۋگە بولادى. ەلىمىز تاۋەلسىزدىگىنە ەندى قول جەتكىزىپ، ەگەمەندى مەملەكەت رەتىندە ەڭسەسىن تىكتەپ جاتقان جاۋاپتى كەزەڭدە ەلباسى ن.ٴا.نازاربايەۆ تۇركىستان قالاسىنىڭ ابىرويىن اسقاقتاتار، كۇللى تۇركى جۇرتىنىڭ باسىن قوسۋعا باعىتتالعان جوبالاردى بەكىتتى. تۇڭعىش رەت كيەلى مەكەننەن قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتى اشىلدى. سونىمەن قاتار كەسەنەنىڭ كورىك-كەلبەتىن قالپىنا كەلتىرۋگە كۇش جۇمىلدىرىپ، 2000 جىلى تۇركىستان قالاسىنىڭ 1500 جىلدىق مەرەيتويىن يۋنەسكو دەڭگەيىندە اتاپ وتۋگە بارلىق جاعدايدى جاسادى. پرەزيدەنتتىڭ ازىرەت سۇلتان كەسەنەسىنە جاساپ وتىرعان قامقورلىعىنىڭ ارقاسىندا «مادەني مۇرا» باعدارلاماسىنىڭ اياسىندا كونە شاھاردىڭ شىنايى شەجىرەسىن ايقىنداۋ قولعا الىندى. بۇل باعدارلاما بويىنشا ورىندالعان ناتيجەلى ەڭبەكتەردىڭ ٴوزى ٴبىر توبە.

ەلباسى ن.ٴا.نازاربايەۆتىڭ ٴوز قالامىنان تۋىنداعان كىتاپتاردا، وي-تولعامدارىندا قوجا احمەت ٴياساۋيدىڭ رۋحاني ٴىلىمى مەن ونىڭ قازىرگى كەزدەگى قاجەتتىلىگىنە باسا نازار اۋدارىلعان. ونىڭ تاريحي-مادەني ماڭىزىنا قاتىستى ەلەۋلى تىڭ تۇجىرىمدار كەلتىرىلگەن. «تاريح تولقىنىندا»، «سىندارلى ون جىل»، «عاسىرلار توعىسىندا» اتتى كىتاپتارىندا ياساۋي قالىپتاستىرعان ٴىلىمنىڭ قۇندىلىعى جونىندە وڭ پىكىرلەر ايتىلعان.

ەلباسىمىزدىڭ قاسيەتتى شاھارعا ٴار ساپارى جاقسى جاڭالىعىمەن جانعا جەبەۋ، ويعا دەمەۋ بولا كەلەدى.

ەلباسىمىز تۇركىستان قالاسىنا 2010 جىلدىڭ 26 مامىرىندا جاساعان ساپارى كەزىندە قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىندەگى كەزدەسۋدە جينالعان جاستاردىڭ الدىندا كۇللى الەم مويىنداعان ياساۋي مۇراسىن وقىپ-ۇيرەنۋ جونىندە، ونىڭ ٴمانى جونىندە ٴسوز قوزعادى. دەمەك، بۇل ياساۋيتانۋدىڭ، ياساۋي مۇراسىن يگەرۋ سالاسىنىڭ جاڭا بەلەسكە كوتەرىلۋىنە العىشارت بولا الادى.

كورمە ەكسپوزيسياسىنا قورىق-مۇراجاي قورىنان 50-دەن استام جادىگەرلەر قويىلادى. ونىڭ ىشىندە ەلباسى ن.ٴا.نازاربايەۆتىڭ 1985 جىلى قازاق سسر مينيسترلەر كابينەتىنىڭ باسشىسى، ەگەمەندى، تاۋەلسىز قازاقستاننىڭ تۇڭعىش پرەزيدەنتى تۇسىنداعى، باۋىرلاس تۇركيا رەسپۋبليكاسىنىڭ پرەزيدەنتتەرى تۇرعىت وزال، سۇلەيمەن دەميرەل، احمەت سەزار، ابدۋللا گۇل، ر.ت.ەردوعان، وزبەكستان رەسپۋبليكاسىنىڭ پرەزيدەنتى ي.كاريموۆتارمەن تۇركىستانداعى رەسمي كەڭەستەرى مەن ەلباسى ن.ٴا.نازاربايەۆتىڭ قازاق، ورىس، اعىلشىن، تۇرىك تىلدەرىندە جارىق كورگەن «عاسىرلار توعىسىندا»، «تاريح تولقىنىندا»، «سىندارلى ون جىل»، «قازاقستان جولى»، «كازاحستانسكيي پۋت»، «بەيبىتشىلىك كىندىگى»، «تۋعان ەلىم — تىرەگىم»، «ەۆرازييسكيي سويۋز يدەي، پراكتيكا پەرسپەكتيۆى»، «kutup yildizi»، «nursultan nazarbayev» اتتى جارىق كورگەن كىتاپتارى كورمەگە قويىلادى.

كورمە 2016 جىلدىڭ 30 قاراشاسىنان 30 جەلتوقسانىنا دەيىن جالعاسادى. بارشاڭىزدى كورمەنى تاماشالاۋعا شاقىرامىز.

«ازىرەت سۇلتان» قورىق مۇراجايى سىزدەردى كورمەنى تاماشالاۋعا شاقىرادى!

سسىلكي پو تەمە:
كوممەنتاريي0

ۆاش كوممەنتاريي بۋدەت وپۋبليكوۆان پوسلە مودەراسيي