USD 336.23 EUR 360.3 RUB 5.28
استانا:

عيبراتقا تولى عۇمىر: كىتاپتىڭ تۇساۋكەسەرى

16-شى قازان كۇنى اباي اتىنداعى كىتاپحانادا بەلگىلى جۋرناليست اسان وماروۆ پەن پۋبليسيست، اۋدارماشى تىلەگەن احمەت ۇلىنىڭ بىرلەسىپ جازعان «عيبراتقا تولى عۇمىر» اتتى كىتابىنىڭ تۇساۋكەسەرى ٴوتتى. اتالمىش كىتاپ سەمەيلىك اتاقتى پەداگوگ، «قازاقتىڭ ماكارەنكوسى» اتانعان مايدانگەر ۇستاز، اڭىز ادام – توكەن جۇمانوۆتىڭ ٴومىر جولىنا ارنالعان. شاراعا زيالى قاۋىم وكىلدەرى، ٴوزى قىزمەت ەتكەن №1 مەكتەپ-ينتەرناتتىڭ ۇستازدارى، شاكىرتتەرى، تۋىستارى، كوزىن كورگەن زامانداستارى، باق وكىلدەر قاتىستى.

شارانىڭ باسىندا قاتىسۋشىلار باقيلىق بولعان ۇستازدارىن ٴبىر مينۋت ۇنسىزدىكپەن ەسكە الدى. بۇل كۇندەرى ەلىمىزدىڭ تۇپكىر-تۇپكىرىندە قىزمەت ەتىپ جۇرگەن ۇستازدىڭ شاكىرتتەرى ونىڭ عيبراتقا تولى عۇمىرىن تەبىرەنە ايتىپ، اتاقتى ۇستازدى قيماس ساعىنىشپەن ەسكە الدى. ٴارقايسىسى ۇستاز-اكە تۋرالى شىنايى ماحابباتپەن، جىلى جۇرەكپەن سىر شەرتىپ، ول كىسىنىڭ ادامگەرشىلىگىن، قامقورلىعىن، ادالدىعىن تەبىرەنە باياندادى. اتاقتى ۇستاز تۋرالى شاعىن ساحنالىق قويىلىم قويىلىپ، فوتوسۋرەتتەر مەن ٴومىرىنىڭ كەيبىر ساتتەرىنەن سىر شەرتەتىن سلايد كورسەتىلدى. ۇستازداردىڭ ۇستازى بولعان سەمەيدەن شىققان فەنومەن تۇلعا، «قازاقتىڭ ماكارەنكوسى» توكەن جۇمانوۆقا ارنالعان وسى كىتاپ – ەسكەرتكىشتەردىڭ ەڭ بيىگى بولىپ قالا بەرمەك. كىتاپ تۇساۋكەسەرىنىڭ سوڭى «ۇستازىم» ٴانى مەن «ينتەرنات مارشىن» شىرقاۋمەن اياقتالدى.

كوممەنتاريي0

ۆاش كوممەنتاريي بۋدەت وپۋبليكوۆان پوسلە مودەراسيي