USD 336.23 EUR 360.3 RUB 5.28
استانا:

«ازىرەت سۇلتانداعى» قۇندى باسىلىمدار، قولجازبالار كورمەسى

حالىقارالىق يۋنەسكو ۇيىمى تاراپىنان 2016 جىل - «ياساۋي جىلى» دەپ بەلگىلەنۋى مەن ەل تاۋەلسىزدىگىنىڭ 25 جىلدىعى مەرەيتويى اياسىندا قر مادەنيەت جانە سپورت مينيسترلىگى «ازىرەت سۇلتان» مەملەكەتتىك تاريحي-مادەني قورىق-مۇراجايى «قوجا احمەت ياساۋي مۇراسى مەن ٴىلىمىنىڭ زەرتتەلۋ ماسەلەلەرى» تاقىرىبىنداعى حالىقارالىق عىلىمي-تاجىريبەلىك كونفەرەنسياسىن ۇيىمداستىردى. كونفەرەنسيا اياسىندا كوپتەگەن ٴىس-شارالار اتقارىلدى. سولاردىڭ ٴبىرى - قوجا احمەت ياساۋي كەسەنەسىنىڭ اقساراي بولمەسىندەگى «اقيقات جولىن ۇلگى ەتكەن دانالار مۇراسى» تاقىرىبىنداعى كىتاپ كورمەسى.

كورمەدە مۇراجاي قورىنداعى ساقتالعان كوپتەگەن قۇندى كونە باسپا جانە قولجازبا كىتاپتار قويىلدى. سونىمەن قاتار جازبا جۇمىستارىندا پايدالانىلعان ەتنوگرافيالىق بۇيىمدار - شىراعدان، سياساۋىت سەكىلدى بايىرعى اتا-بابالارىمىزدىڭ تۇتىنعان زاتتارى كورەرمەنگە ۇسىنىلدى.


مۇراجاي قورىندا ٴياساۋيدىڭ تانىمال شاكىرتتەرىنىڭ كوپتەگەن شىعارمالارى ساقتالعان. تاقىرىپتى اشۋ ماقساتىندا قاسيەتتى قۇران كىتاپتارى، مۇحاممەدكە (س.ع.س) قاتىستى جازبالار، حانافي ٴمازحابىنىڭ نەگىزىن سالۋشى، «فيكھۋل اكبار» ەڭبەگىنىڭ اۆتورى ٴابۋ حانيفا سەكىلدى عۇلامالاردىڭ شىعارمالارى قويىلدى. كىتاپ كورمەسىنە قويىلعان باستى جادىگەرلەر - ۇلى عۇلاما قوجا احمەت ياساۋي ٴىزباسارلارىنىڭ مۇرالارى. اتاپ ايتساق، سوفى اللايار، حوجا حافيز، مىرزا بيدەردىڭ بىرنەشە ولەڭ جيناقتارى، الىشەر ناۋاي، سۇلەيمەن باقىرعاني، فيزۋلي، ٴمىر الىشەر، ابدۋل قادير ٴجالانيدىڭ كىتاپتارى، اتاقتى ٴرابعۋزيدىڭ «قيسساسۋل ٴانبيا» جانە فاريداددين اتتاردىڭ «تازكيراتۋل ٴاۋليا» اتتى شىعارمالارى. وسىلاردىڭ ىشىندە ەرەكشەسى – اسا تانىمال بولماعانىمەن، يسلامنىڭ ياساۋي سالعان سوپىلىق باعىتىندا جازىلعان شەيح حۋدايداد تاش-مۋحاممەد ٴال-بۋحاريدىڭ ياساۋيا سيلسيلاسىنىڭ تەوريالىق، پراكتيكالىق عۇرىپتارى جونىندە وتە تەرەڭ ماعلۇمات بەرەتىن «بۋستان ۋل-مۋحيببين» اتتى شىعارماسى.

سونىمەن قاتار، قازاق قولونەرىنىڭ بيىك شىڭى ىسپەتتەس بۇل تۋىندىلار اتا-بابالارىمىزدىڭ عيبراتتى عۇمىرىنان سىر شەرتەتىن شىنايى ەستەلىكتەر رەتىندە قۇندى. كورمەدە قيلى زاماننىڭ كۋاگەرى بولعان كونە جادىگەرلەر وزىنە تامساندىرىپ قانا قويماي، سول داۋىرگە قىسقاشا ساياحات جاساعانداي كۇيگە بولەرى انىق.
كورمەگە كونفەرەنسيا قوناقتارى، جەرگىلىكتى اكىمدىك وكىلدەرى، قالا تۇرعىندارى، باق وكىلدەرى جانە مۇراجاي قىزمەتكەرلەرى قاتىستى.

كوممەنتاريي0

ۆاش كوممەنتاريي بۋدەت وپۋبليكوۆان پوسلە مودەراسيي