USD 336.23 EUR 360.3 RUB 5.28
استانا:

"اقتاستاعى احيكو" ەل تاۋەلسىزدىگىڭ 25 جىلدىعىنا ارنالىپ ساحنالانادى

بۇگىن م.اۋەزوۆ اتىنداعى قازاق مەملەكەتتىك اكادەميالىق دراما تەاترىندا 22، 23 قازان كۇندەرىنە تۇساۋكەسەرى جوسپارلانىپ وتىرعان 91-ماۋسىمنىڭ العاشقى پرەمەراسى "اقتاستاعى احيكو" دراماسىنا ارنالعان پرەسس-كونفەرەنسيا ٴوتتى.

پرەسس كونفەرەنسياعا تەاتر ديرەكتورى، قازاقستاننىڭ ەڭبەك سىڭىرگەن قايراتكەرى ەرلان ٴبىلال، قويىلىم رەجيسسەرى، "قازاق اۋەندەرى" اق پرەزيدەنتى، قازاقستاننىڭ ەڭبەك سىڭىرگەن قايراتكەرى اسحات ماەميروۆ، پەسا اۆتورى، تەاتر دراماتۋرگى مادينا وماروۆا، سپەكتاكلدە باستى احيكو ٴرولىن ورىنداۋشى اكتەر، قازاقستاننىڭ ەڭبەك سىڭىرگەن قايراتكەرى دۋلىعا اقمولدا، انا ٴرولىن ورىنداۋشى اكتريسا، قازاقستاننىڭ ەڭبەك سىڭىرگەن قايراتكەرى داناگۇل تەمىرسۇلتانوۆا قاتىستى.

تەاتر ديرەكتورى ەرلان ٴبىلال: "ەل تاۋەلسىزدىگىنىڭ 25 جىلدىعىنا تەاتر الەمىنىڭ دە قوسار ۇلەسى بار. ولاي دەيتىنىمىز، وسىناۋ اتاۋلى كۇنگە ارنالىپ، كەڭەس وداعى كارلاگ لاگەرىنىڭ تۇتقىنى احيكونىڭ ٴومىرى مەن باستان كەشكەن وقيعالارى تۋرالى "اقتاستاعى احيكو" دراماسىنىڭ پرەمەراسىنا دايىندىق جۇمىستارى جۇرگىزىلىپ جاتىر. بۇل سپەكتاكلدىڭ يدەياسى بۇدان بىر-ەكى جىل بۇرىن گاسترولدىك ساپاردا جۇرگەن كەزىمدە پايدا بولدى. سوندا كارلاگ تۋرالى ون سەگىزگە جۋىق كىتاپ جازعان قازىرگى قازاقستان رەسپۋبليكاسى پارلامەنتى ٴماجىلىسىنىڭ دەپۋتاتى نۇرلان دۋلاتبەكوۆپەن جولىم ٴتۇيىسىپ، اڭگىمە ۇستىندە مەنىڭ كارلاگقا بارىپ قايتۋىمدى وتىنگەن بولاتىن. مەن كەلە سالىسىمەن، اتالعان لاگەر تۋرالى ٴبىر پەسانىڭ دۇنيەگە كەلۋىنە سەبەپكەر بولساق دەگەن ويىن ايتتى. مىنە، سول يدەيانىڭ ناتيجەسىندە بۇگىندە قالىڭ كورەرمەنگە "اقتاستاعى احيكو" دراماسىن ۇسىنباقشىمىز"، - دەدى.

سپەكتاكل رەجيسسەرى اسحات ماەميروۆ ٴوز كەزەگىندە: "تاۋەلسىزدىك العاننان كەيىن بۇرىن تىيىم سالىنعان ۇلتىمىزدىڭ اقتاڭداق تۇستارىنداعى قاسىرەتتى ارىپتەرمەن جازىلعان جاعدايلار تۋرالى تاقىرىپتار ونەر سالالارىنىڭ ٴارقايسىسىندا باس كوتەرە باستادى. وسى قاسىرەتتىڭ ٴبىرى - 30 جىلدارداعى ۇلت زيالىلارىنىڭ، سونىمەن قاتار پولياك، ورىس، نەمىس، ەۆرەي سىندى وزگە ۇلت وكىلدەرىنىڭ قۋعىن-سۇرگىن كورىپ، جاپپاي لاگەرلەردە نەبىر ازاپتى كەزەڭدى باستان كەشكەندىگى. بۇگىندە سول زۇلمات زاماننىڭ كورىنىسى رەتىندە تەاتر ساحناسىندا "اقتاستاعى احيكو" سپەكتاكلى قويىلماقشى. بۇل سپەكتاكلدىڭ كورەرمەندەرگە، اسىرەسە جاستارعا تاربيەلىك ٴمانى زور بولادى دەپ ويلايمىن"، - دەدى.

قازاقستاننىڭ ەڭبەك سىڭىرگەن قايراتكەرى، رەجيسسەر اسحات ماەميروۆ ساحنالاعان بۇل قويىلىم - تەاتر ۇجىمىنىڭ قازاقستان رەسپۋبليكاسىنىڭ تاۋەلسىزدىگىنىڭ 25 جىلدىعىنا ارناعان ۇلكەن جوباسى.

كوممەنتاريي0

ۆاش كوممەنتاريي بۋدەت وپۋبليكوۆان پوسلە مودەراسيي