USD 336.23 EUR 360.3 RUB 5.28
استانا:

احيكو تەسۋرو. تۇنەكتەن شىققان ساۋلە...

ٴبىز ميداي ارالاسقان اقپارات زامانىنىڭ تىم-تىم اسىعىس ادامدارى تاريحتى سەزىنبەي، جۇرەگىمىزدەن ونىڭ ٴاربىر ٴساتىن وتكىزبەي جاتىپ ۇرانداپ، الدەبىر ناۋقانشىلدىققا ىلەسىپ بەلسەندىلەردىڭ لەپىرمە سوزىنە ەلىگىپ كەتىم جاتامىز. ٴارى وسىنداي ارەكەتتەردى ٴجيى قايتالايمىز... تاريح ٴبىزدىڭ ويلاعانىمىزداي بولسا، ٴبىزدىڭ قازىرگى ارەكەتىمىز بەن ۇراندارىمىزعا ىڭعايلانسا دەپ ويلايمىز. ٴبىراق، ەشقاشان ولاي بولمايدى! بۇگىنگى كۇن كەشەگى تاريحتىڭ ٴجۇرىپ وتكەن جولى، جاساعان ەڭبەگى. ٴبىز كەشەگى تاريحتىڭ جەمىسى. قالاي دەسەڭىز دە... تاريحقا بۇيرىق بەرە المايسىز، ۇكىم شىعارا المايسىز، ىقپال ەتە المايسىز! تاريحقا بيلىك جۇرمەيدى. الايدا، تاريحتى - وتكەن كۇننىڭ ٴار كەزەڭىن جانىڭىزبەن سەزىنىپ، بۇگىنگى كۇنگە دەگەن كەيبىر ويلارىڭىز بەن كوزقاراستارىڭىزدى قايتا قاراۋعا ابدەن بولادى... ول ٴۇشىن كارى تاريحتىڭ ٴتىرى كۋاگەرىنىڭ ٴومىر جولىنا ۇڭىلسەڭىز دە مول ماعۇلمات الاسىز.

قاراعاندى وبلىسىنا قاراستى اقتاس اۋىلىندا سەكسەن بەس جاستاعى احيكو تەسۋرو ەسىمدى اقساقال تۇرادى. ۇلتى – جاپون. 11 نەمەرە، 5 شوبەرە ٴسۇيىپ وتىرعان احيكو اقساقالدىڭ قانداي تاعدىر يەسى ەكەنىن جالپاق جۇرت بىلە بەرمەيدى.

احيكو تەسۋرو 15 جاسىندا تاعدىردىڭ ايداۋىمەن گۋلاگ-تىڭ قازاقستانداعى ەڭ ٴىرى لاگەرى – كارلاگ تۇرمەسىنە تۇسەدى. ون بەس جاستاعى بالا تەرگەۋشىلەردىڭ قيناۋىنا كونە الماي اقىرى وزىنە تاعىلعان «جاپون تىڭشىسى» دەگەن جالعان ايىپتى مويىندايدى. ٴسويتىپ، كارلاگ قارا تۇنەككە ورانعان توزاق اپانىنا تۇسەدى. كارلاگ تا سول كەزەڭدەگى زيالىلار، عالىمدار، وقىمىستىلار وتىرعانى، ولاردىڭ ادام توزگىسىز قيناۋ، زورلىق كورگەنى تاريحتاعى ستاليندىك كەزەڭنىڭ قاندى بەتتەرىنەن بەلگىلى. جاستىق شاعىن كارلاگ تۇرمەسىندە وتكىزگەن احيكو ون جىلدان سوڭ، 25 جاسىندا بوساپ شىعادى. بوستاندىققا شىقتى دەگەن اتى بولماسا، كەۋدەسىندە جانى عانا بار ٴولىمشى كۇيدە قۋ سۇيەگىن سۇيرەتىپ شىعادى. كارلاگ تان شىققان 25 جاستاعى جىگىتتىڭ سالماعى 24 كگ بولعان ەكەن. وسىدان-اق، احيكونىڭ قانداي كۇيدە بولعانىن تۇسىنۋگە بولادى. جات جەردە، ەشكىمگە كەرەكسىز، ٴولىم اۋزىندا تۇنەكتەن جارىققا شىققان احيكونى ەس-تۇسسىز جاتقان جەرىنەن قازاق ايەلى تاۋىپ الىپ، اۋزىنا سۋ تامىزىپ، قارعىس اتقىر سوعىس جۇتقان ۇلدارىنىڭ ورنىنا بالاسىنداي باۋىرىنا باسىپ، ادام قاتارىنا قوسادى.

كەيىن زامان وڭالعاندا احيكو اتا جۇرتى – جاپونياعا بارىپ، اكەسىمەن، باۋىرلارىمەن، تۋعان-تۋىسىمەن تابىسادى. جاپونيا احيكونى قاھارمان رەتىندە قارسى الىپ، تۇرمىسىنا، ومىرىنە قاجەتتى جاعدايدى جاساپ بەرەدى. ٴبىراق، احيكو جاپونيادا تۇراقتاي الماي، اقتاسقا قايتا ورالادى. قانداي قۇدىرەت قايتا الىپ كەلگەنىن احيكونىڭ وزىنە ايان! وزىنە ايان بولاتىنى ەكىنشى رەت دۇنيەگە اكەلگەن قازاق اناسى، ادام قاتارىنا قوسقان قازاق ورتاسى، قازاق جەرى...

قانشا جەردەن ناۋقان سالىپ، ۇرانداعانىمىزبەن كارلاگ تۇرمەسىن كورگەن تاعدىر يەلەرى، ونىڭ قازاققا وزگە جۇرت وكىلدەرىنە اكەلگەن قاسىرەتىن، جازىلماستاي جانعا سالعان جاراسىن، سانادا قالعان تەرەڭ ٴىزىن كورسەتەتىن درامالىق شىعارما وسى كۇنگە دەيىن قويىلماعان ەكەن. مىنە، ەندى سول ولقىلىقتىڭ ورنى تولىپ، تاۋەلسىزدىكتىڭ 25 جىلدىعى قارساڭىندا م.اۋەزوۆ تەاترى احيكو تەسۋرونىڭ ٴومىر جولىنىڭ نەگىزىندە جازىلعان سپەكتاكلدى قازان ايىنىڭ 22 كۇنى تۇساۋىن كەسىپ، ساحناعا شىعارماق. دراماتۋرگ ٴمادينا وماروۆا جازىپ، رەجيسسەر اسحات ماەميروۆ ساحنالايتىن «اقتاستاعى احيكو» دەرەكتى دراماسىنىڭ باستى يدەيالىق تۇعىرى ول – ادامنىڭ جاسامپاز، جىگەرلى رۋحى. ياعني، احيكو بەينەسى ارقىلى ستاليندىك قان قاساپ جىلدارى عازيز باسى ازاپقا تۇسكەن ۇلت ۇلىلارىنان باستاپ، قاراپايىم جازىقسىز سان مىڭداعان ادامنىڭ بەينەسىن، ولاردىڭ تۇتاس جۇيە سىندىرا الماعان بولاتتاي بەرىك رۋحىن، قانشا قيناۋ، زورلىق-زومبىلىق كورسە دە ومىرگە قۇشتارلىعىن، جارقىن بولاشاققا دەگەن ۇمىتتەرىن ولتىرمەي، ادامي بەينەسىن ساقتاي بىلگەن بولمىسى كورسەتىلەدى.

م.اۋەزوۆ تەاترىنىڭ 91 ماۋسىمداعى العاشقى پرەمەراسى – «اقتاستاعى احيكو» سپەكتاكلىنە قاتىستى وتكەن ٴباسپاسوز ٴماسليحاتىندا تەاتر ديرەكتورى، اكتەر ەرلان ٴبىلال قاراعاندىعا جولى تۇسكەن ٴبىر ساپار كەزىندە پارلامەنتى ٴماجىلىسىنىڭ دەپۋتاتى نۇرلان دۋلاتبەكوۆپەن جولىعىپ، اڭگىمە بارىسىندا كارلاگ جايلى تىڭ مالىمەتتەر ەستىگەنىن ايتا كەلىپ: «مۋزەيدى ارنايى بارىپ، كوزىممەن كوردىم.كوزبەن كورىپ، سەزىنۋ بولەكشە اسەر ەتتى. وتە اۋىر كۇيدە بىرنەشە كۇن ٴجۇردىم. اقىرى، نۇرلان دۋلاتبەكوۆ مىرزامەن بىرلەسە وتىرىپ، احيكونىڭ تاعدىرىن ارقاۋ ەتكەن ساحناعا لايىقتالعان شىعارما جازۋدى جوسپارلادىق. سودان تەاترىمىزدىڭ دراماتۋرگى ٴمادينا وماروۆا احيكو تەسۋروعا ادەيىلەپ بارىپ، باسىنان كەشكەن ٴومىرىن ٴوز اۋزىنان جازىپ الىپ كەلدى دە، شىعارماعا كىرىستى. ٴسويتىپ، وزىندىك ەرەكشە قولتاڭباسىمەن كورەرمەن ىقىلاسىنا بولەنگەن رەجيسسەر اسحات ماەميروۆتى شاقىرىپ، قويىلىمدى ساحنالاۋدى ۇسىندىق. مىنە، بۇيىرتسا، قازاننىڭ 22-23 كۇندەرى پرەمەراسىن وتكىزگەلى وتىرمىز» دەدى.

مىنە، وسىلايشا، تاريحىمىزداعى قارالى بەتتەردىڭ ٴبىرى كوركەمدىك بيىك پەن تەرەڭ پسيحولوگيالىق تارتىسقا تولى وبرازدار ارقىلى «اقتاستاعى احيكو» قويىلىمىمەن كورەرمەنگە جول تارتادى.

كارلاگ قاپاسىندا جاستىق شاعىن جەرلەگەن احيكوداي ادامداردى قۇر سۇلدەرىن سۇيرەتىپ بوستاندىققا شىعارعان كۇش ول – ومىرگە قۇشتارلىق! ول قۇشتارلىق تۇنەكتەن شىققان ساۋلە ىسپەتتەس...

تەاتردا كەزدەسەيىك!

كوممەنتاريي0

ۆاش كوممەنتاريي بۋدەت وپۋبليكوۆان پوسلە مودەراسيي