USD 335.61 EUR 361.32 RUB 5.26
استانا:

«ابايدىڭ اقىن شاكىرتتەرى» اتتى كورمە اشىلدى

ابايدىڭ «جيدەباي-بورىلى» مەملەكەتتىك تاريحي-مادەني جانە ادەبي-مەموريالدىق قورىق-مۇراجايىندا قازان ايىنىڭ 14 كۇنى «ابايدىڭ اقىن شاكىرتتەرى» كورمەسى اشىلدى. كورمە ۇلى اقىن اباي قۇنانباي ۇلىنىڭ شاكىرتتەرى – ٴارىپ تاڭىربەرگەن ۇلىنىڭ (1856-1924) – 160، كوكباي جاناتاي ۇلىنىڭ (1861-1925) – 155، اقىلباي اباي ۇلىنىڭ (1861-1904) – 155، اۋباكىر اقىلباي ۇلىنىڭ (1881-1934) – 135، شاكىر ابەن ۇلىنىڭ (1901-1994) – 115 جىلدىعىنا وراي ۇيىمداستىرىلىپ وتىر.

كورمەنىڭ نەگىزگى ماقساتى – ابايدىڭ اقىندىق مەكتەبىنىڭ تالانتتى وكىلدەرىنىڭ شىعارماشىلىق مۇراسىن ناسيحاتتاۋ، مۋزەي قورىنداعى قۇندى جادىگەرلەردى، قولجازبا، ەستەلىكتەردى، كىتاپتار، ارحيۆ دەرەكتەرى مەن فوتوسۋرەتتەردى كورەرمەن نازارىنا ۇسىنۋ.

ابايدىڭ اقىندىق مەكتەبى بۇگىندە قازاق ادەبيەتى تاريحىندا وزىندىك ورنى بار ەرەكشە ۇعىم. اباي ٴوز شاكىرتتەرىن تاربيەلەپ، ولارعا ومىردەگى ادامشىلىق ماقساتتى ٴتۇسىندىرىپ، سول جولعا باۋلىپ وسيەت، اقىل ايتۋعا ارنالعان ٴومىر كەزەڭدەرىن ٴوزىنىڭ ەڭ قىمباتتى، ەڭ ماعىنالى ۋاقىتىم دەپ ەسەپتەگەن. وسى قۇندىلىقتاردى كورمە ارقىلى كورسەتىپ، ۇرپاق زەردەسىنە ٴسىڭىرۋ باستى نازارعا الىنعان.

كورمەدە قازاق ادەبيەتىنىڭ كورنەكتى ابايتانۋشى عالىم-زەرتتەۋشىلەرى م.اۋەزوۆ، ق.مۇحامەدحانوۆتىڭ كىتاپتارى، زەرتتەۋ جۇمىستارى مەن مونوگرافيالارى باستى نازارعا الىندى.

كورمەنىڭ ەرەكشەلىگى – كورەرمەندەردى مۋزەي قورىنىڭ قۇندى جادىگەرلەرىمەن تانىستىرۋ. مىسالى، ٴارىپ، كوكباي، اقىلباي، اۋباكىر، شاكىرگە قاتىستى سيرەك كەزدەسەتىن قولجازبالار، ٴا.تاڭىربەرگەن ۇلىنىڭ ەڭىرەكەي بولىسىنا بي، بولىس بولىپ سايلانعانى تۋرالى ارحيۆ قۇجاتتارى، اقىلباي اباي ۇلىنىڭ «داعىستان» پوەماسىنىڭ قولجازباسى، كوكباي جاناتاي ۇلىنىڭ «قاندىجاپ» داستانىنىڭ قولجازباسى، اۋباكىر ولەڭدەرىنىڭ قولجازباسى، اقىلباي زامانداستارىنىڭ ەستەلىك قولجازبالارى، اقىن ش.ابەن ۇلىنىڭ جەكە زاتتارى كورمەگە قويىلدى.

كوممەنتاريي0

ۆاش كوممەنتاريي بۋدەت وپۋبليكوۆان پوسلە مودەراسيي