BAQ.kz - Қазақстан жаңалықтары USD 359 BAQ.kz - Қазақстан жаңалықтары EUR 420.1 BAQ.kz - Қазақстан жаңалықтары RUB 5.41
استانا:

سقو-دا دارى-دارمەك باعاسى قىمباتتادى

فوتو: MedElement

سولتۇستىك قازاقستان وبلىسىندا كوكونىس پەن جەمىس باعاسى 4،5 پايىزعا، ٴسۇت ونىمدەرى 3،1 پايىزعا، شۇجىق جانە ەت ونىمدەرى 1،9 پايىزعا، ال كوممۋنالدىق قىزمەتتەردىڭ قۇنى 8،5 پايىزعا ٴوستى. وبلىستىق ستاتيستيكا دەپارتامەنتىنىڭ ماماندارى اقپان ايىن قورىتىندىلادى، دەپ حابارلايدى baq.kz ايماقتىق ٴتىلشىسى.

اقپان ايىنىڭ قورىتىندىسى بويىنشا سولتۇستىك قازاقستان وبلىسىنداعى ينفلياسيا دەڭگەيى 1،7 پايىزدى قۇرادى. رەسپۋبليكادا بۇل كورسەتكىش 0،7 پايىزعا تەڭ. سولتۇستىك قازاقستان ستاتيستيكا دەپارتامەنتى ماماندارىنىڭ ايتۋىنشا، ينفلياسيا دەڭگەيىنىڭ كوتەرىلۋىنە جىل باسىنان بەرى كوممۋنالدىق قىزمەتتەر ٴتاريفىنىڭ كوتەرىلۋى اسەر ەتكەن.

«وتكەن ايدا ازىق تۇلىك تاۋارلارىنىڭ باعاسى 2 پايىزعا، ازىق-تۇلىك ەمەس تاۋارلاردىڭ قۇنى 0،6 پايىزعا ٴوستى. اقىلى قىزمەت كورسەتۋ 2،3 پايىزعا قىمباتتادى. تاريفتەر دەڭگەيىنە كەلەر بولساق، سۋ جانە كارىز جۇيەسى 8،5 پايىزعا، ورتالىق جىلۋ بەرۋ قىزمەتى 6،3 پايىزعا، ەلەكترمەن قامتاماسىز ەتۋ 5،1 پايىز، ال، ىستىق سۋ باعاسى 5 پايىزعا كوتەرىلدى. وسىنىڭ اسەرىنەن اقپان ايىندا وبلىستاعى ينفلياسيا دەڭگەيى جوعارى بولىپ وتىر»، - دەيدى سقو ستاتيستيكا دەپارتامەنتى باسشىسىنىڭ ورىنباسارى قۋانىشبەك قاليجانوۆ.

ال دارى-دارمەك باعاسى 1،6 پايىزعا كوتەرىلگەن. تۇرمىستىق تەحنيكانىڭ باعاسى 0،6 پايىزعا، ال كيىم 0،3 پايىزعا قىمباتتادى. جانار-جاعارماي قۇنى 0،7 پايىزعا كوتەرىلگەن. وسى وزگەرىستەر ٴوڭىر تۇرعىندارىنىڭ كۇندەلىكتى شىعىندار كولەمىن ارتتىرىپ، ٴومىر ٴسۇرۋ دەڭگەيىنە اسەرىن تيگىزبەي قويماسى انىق.

«باعا كۇندە كوتەرىلىپ جاتىر. ٴبارى قىمبات. كۇندەلىكتى نان مەن ٴسۇت قانا الاۋعا تۋرا كەلەدى. قىمبات ازىق-تۇلىكتى تۇتىنۋدى قويدىق. دارىلەر دە قىمبات. كوممۋنالدىق قىزمەتتەرگە زەينەتاقىنىڭ تەڭ جارتىسىن جۇمسايمىز»، - دەيدى پەتروپاۆلدىق زەينەتكەر زەينەپ ارعىنوۆا.

تاۋارلار تىزىمىندە ارزانداعاندار دا بار. ماسەلەن، ۇننىڭ باعاسى 0،2، ال جارمالاردىڭ باعاسى 1 پايىزعا تومەندەگەن.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي