BAQ.kz - Қазақстан жаңалықтары USD 370.11 BAQ.kz - Қазақстан жаңалықтары EUR 419.37 BAQ.kz - Қазақстан жаңалықтары RUB 5.58
استانا:

«پرجەۆالسك» – مۇزبەل، «كيروۆ» – ەگىندى. قاراعاندى وبلىسىندا اۋىل اتاۋلارى وزگەرەدى

فوتو: kerekinfo.kz

قاراعاندى وبلىسىندا اتاۋى ەسكىرىپ، ۋاقىت تالابىنا ساي جاڭارتۋدى قاجەت ەتەتىن ەلدى مەكەندەر مەن كوشە اتتارى وزگەرەدى. سونداي-اق، ٴبىلىم بەرۋ مەكەمەلەرىنە الاشوردالىقتاردىڭ ەسىمىن بەرۋ جوسپارلانۋدا، دەپ حابارلايدى baq.kz ايماقتاعى ٴتىلشىسى.

«ەلۋ جىلدا – ەل جاڭا» دەمەكشى، ايماقتا تاريحي، يدەولوگيالىق تۇرعىدا ەسكىرگەن، ماعىناسى جوق اۋىل اتاۋلارى مەن كوشە اتتارى وزگەرىپ، جاڭا تىنىس، جاڭا ومىرگە يە بولۋدا.

«قازاقستان رەسپۋبليكاسى پرەزيدەنتى ونوماستيكالىق اتاۋلاردى رەتكە كەلتىرۋ جانە تاريحي اتالىمداردى جاڭالاۋ ماقساتىندا اكىمدەرگە يدەولوگيالىق تۇرعىدان ەسكىرگەن ەلدى مەكەندەر مەن كوشە اتتارىن وزگەرتىپ، ولاردى ۇلتتىق ٴسالت-داستۇر مەن تاريحقا ساي اتاۋ جايلى تاپسىرما بەرگەن بولاتىن. اتا-بابامىز مىڭداعان جىلدار بويى اڭساعان تاۋەلسىزدىگىنە قول جەتكىزگەن ەلىمىز 27 جىلدىق ٴتول تاريحى بار مەملەكەتكە اينالدى. وسىعان بايلانىستى ەشقانداي ماعىناسى جوق، يدەولوگيالىق تۇرعىدا ەسكىرگەن كوشە اتتارىن وزگەرتۋ قاجەت»، - دەيدى قاراعاندى قالاسىنىڭ مادەنيەت جانە تىلدەردى دامىتۋ ٴبولىمىنىڭ جەتەكشىسى بايان نۇرتايەۆا.

بۇگىندە ەلدى مەكەندەر مەن كوشە اتاۋلارىن اۋىستىرۋ ٴتارتىبى زاڭنامامەن بەكىتىلىپ، ول كەزەڭ-كەزەڭمەن ىسكە اسىرىلادى. ٴبىرىنشى كەزەكتە تۇرعىنداردىڭ قاتىسۋىمەن قوعامدىق تىڭداۋلار ٴوتىپ، حالىقتىڭ پىكىرى تىڭدالادى. بارلىق ۇسىنىس-پىكىرلەر نازارعا الىنادى. وسىدان كەيىن وزگەرتۋلەر وبلىستىق ٴماسليحاتتا قارالادى. قاراعاندىنىڭ قاراجال جانە ساران قالالارىنداعى كوشە اتتارىن جاڭارتۋ جايلى ماسەلە وبلىستىق ٴماسليحاتتا قارالدى. حالىق قالاۋلىلارى قاراجالدىڭ ستەپنايا كوشەسىنىڭ ەندى «قاينار» دەپ اتالۋىنا، ساران قالاسىنداعى كومسومولسكايا كوشەسىنە «سارىارقا» اتاۋىنىڭ بەرىلۋىنە قارسىلىق بىلدىرمەي، ٴبىر اۋىزدان قولدادى. ەرەجەگە ساي ەندى شەشىم اكىمدىكپەن كەلىسىلىپ، زاڭ ورگاندارىندا تىركەۋگە الىنۋى ٴتيىس. وسىدان كەيىن اتالعان كوشەلەردەگى مەكەن-جاي تاقتايشالارى وزگەرتىلەتىن بولادى.

«رەسپۋبليكالىق ونوماستيكالىق كوميسسياعا اتالعان ەكى قالادا ەكى-ەكىدەن 4 كوشەنىڭ اتاۋىن وزگەرتۋ جايلى ٴوتىنىم جولداعانىمىزبەن تەك ەكى كوشەنىڭ اتىن وزگەتۋگە رۇقسات الدىق. ونوماستيكالىق كوميسسيادا بۇقار جىراۋ جانە نۇرا اۋداندارىندا يدەولوگيالىق تۇرعىدان ەسكىرگەن اتاۋلاردى جاڭارتۋ قاراستىرىلىپ جاتىر. بولاشاقتا قاراعاندىنىڭ كيروۆ جانە پرجەۆالسك ەلدى مەكەندەرىنىڭ دە اتاۋى جاڭارتىلماق. نۇرا اۋدانىنداعى كيروۆ اۋىلدىق وكرۋگىنە تاريحي اتاۋى قايتارىلىپ، ول «ەگىندى» دەپ اتالسا، پرجەۆالسك اۋىلى بولاشاقتا «مۇزبەل» دەپ اتالاتىن بولادى. سونداي-اق، نۇرا اۋدانىنداعى 8 ٴبىلىم بەرۋ مەكەمەسىنە اتاقتى الاشوردالىقتاردىڭ ەسىمى بەرىلمەك»، - دەيدى قاراعاندى وبلىسىنىڭ تىلدەردى دامىتۋ جونىندەگى باسقارماسىنىڭ باسشىسى گۇلنارايىم قاڭتاربەكوۆا.

ەسكە سالايىق، وسىدان ەكى جارىم جىل بۇرىن سول ۋاقىتتاعى قاراعاندى وبلىسىنىڭ اكىمى نۇرمۇحامبەت ابدىبەكوۆ وكتيابر اۋدانىنا ٴاليحان بوكەيحاننىڭ اتى بەرىلەتىندىگىن ايتقان بولاتىن. دەگەنمەندە، بۇرىنعى اكىمنىڭ ٴسوزى سول كۇيىندە قالىپ، وكتيابر اۋدانىنىڭ اتى وزگەرمەدى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي