BAQ.kz - Қазақстан жаңалықтары USD 368.28 BAQ.kz - Қазақстан жаңалықтары EUR 419.21 BAQ.kz - Қазақстан жаңалықтары RUB 5.59
استانا:

پاۆلودارداعى شاعىن اۋداندا قۇبىر جارىلىپ، كوشەلەردى سۋ باستى

فوتو: тұрғындар түсірген

پاۆلودار، baq.kz ٴتىلشىسى. وبلىس ورتالىعىنداعى اليۋمينستروي شاعىن اۋدانىنداعى جىلۋ ماگيسترالىنىڭ قۇبىرى جارىلىپ، كوشەلەردى سۋ باستى.

تۇرعىنداردىڭ ايتۋىنشا، كەشە تۇندە ۇيلەرى سالقىنداي باستاعان. ال تاڭەرتەڭ كۆارتال اراسىنداعى قۇبىر جارىلىپ، ىستىق سۋ اققان.

«تاڭەرتەڭ تۇرساق، كوشەنى تۇمان باسقان. ىستىق سۋ پودەزدگە كىرىپ كەتىپتى. بىلتىرعى جىلى وسى قۇبىر جارىلعان ەدى. كەزەكشى سانتەحنيكتەر كەلدى، قولدان كەلگەننىڭ ٴبارىن جاسادى. سۋدى قۇدىققا اعىزۋ ٴۇشىن ارىق قازدىق. ٴبىزدىڭ ماگيسترالدىڭ بويىندا سەگىز ەكى قاباتتى ٴۇي بار. قازىرگى ۋاقىتتا بارلىعىندا جىلۋ جوق»، - دەدى گالينا گايفۋللينا.

پاۆلودار قالالىق تۇرعىن ۇي-كوممۋنالدىق شارۋاشىلىق ٴبولىمى وكىلدەرىنىڭ ايتۋىنشا، جەلىدەگى قۇبىردىڭ اقاۋىن جوندەۋگە جىلۋمەن قامتۋشى ۇيىم ماماندارىنا حابار جەتكەن. كەيىن جوندەۋ جۇمىستارى باستالادى.

«شوكين كوشەسى 165/2 مەكەنجايىنداعى تۇرعىن ٴۇيدىڭ ماڭىنداعى جىلۋ جەلىسى جارىلدى. جوندەۋ جۇمىستارى بارىسىندا نىسانداردى جىلۋ جەلىسىنەن اجىراتپايمىز، سەبەبى كۇن سۋىق. اليۋمينستروي شاعىن اۋدانىنداعى ۇيلەر ابدەن ەسكىرگەنىن ەسكەرسەك، قۇبىرلاردىڭ جارىلۋى زاڭدى قۇبىلىس سياقتى. كوپ جىل بويى جوندەۋ كورمەي، سۋىققا شىداس بەرمەگەن. تەحنيكالىق جاعدايى ناشار. سونىمەن قاتار، 50 جىلدىق تاريحى بار ۇيلەر كەلەر جىلى ٴسۇرىلۋى ٴتيىس. تۇرعىندار جاڭا باسپانالارعا كوشىرىلەدى. وعان قوسا، بۇل ۇيلەرگە قىزمەت كورسەتەتىن پاتەر يەلەرىنىڭ كووپەراتيۆى جوق. كوممۋنالدىق پروبلەمالار كوپ بولعاندىقتان، كاسىپورىندار جاۋاپكەرشىلىكتى ٴوز موينىنا العىسى كەلمەيدى. دەگەنمەن، جىلۋمەن قامتۋشى ۇيىم قىس مەزگىلىندە تۇرعىندارعا قامقورلىق كورسەتەدى»، - دەيدى قالالىق تۇرعىن ۇي-كوممۋنالدىق شارۋاشىلىق ٴبولىمىنىڭ وكىلى تەمىر قاسقابايەۆ.

اليۋمينسترويداعى ۇيلەرگە جىلۋ كەش بەرىلدى. سەبەبى، باسپانالاردىڭ جىلۋ ماۋسىمىنا دايىندىعى بولماعان.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي