BAQ.kz - Қазақстан жаңалықтары USD 366.43 BAQ.kz - Қазақстан жаңалықтары EUR 420.11 BAQ.kz - Қазақстан жаңалықтары RUB 5.58
استانا:

ورالماندارعا سالىنعان ۇيلەر زاڭسىز پايدالانىلىپ وتىر

فوتو: Автор

«نۇرلى كوش» باعدارلاماسى ارقىلى سالىنعان ۇيلەر زاڭسىز جالعا بەرىلىپ وتىر. بۇل تۋرالى كوكشەتاۋ قالالىق تۇرعىن ۇي-كوممۋنالدىق شارۋاشىلىعى ٴبولىمىنىڭ ماماندارى مالىمدەدى، دەپ حابارلايدى baq.kz تiلشiسi.

اۋىلدا وتكەن كەزدەسۋدە قالالىق ٴماسليحاتتىڭ دەپۋتاتتارى تۇرعىنداردىڭ وتىنىشتەرىنە قۇلاق ٴتۇردى.

«نۇرلى كوش» باعدارلاماسىنىڭ شيكىلىكتەرى توڭىرەگىندەگى داۋ-دامايعا ٴالى نۇكتە قويىلماي تۇر. قۇرىلىستى سالۋ كەزىندە كەتكەن كەمشىلىكتەردى تۇرعىندار ٴالى تۇزەتۋمەن الەك.

«وسىندا ون جىلدان اسا ۋاقىت تۇرىپ جاتىرمىز. مۇنداعى تۇرمىستىق-الەۋمەتتىك ماسەلەلەردىڭ ٴتۇيىنى قاشان شەشىلەرى بەلگىسىز. اۋىلدى تۇرعىزار الدىندا ينفراقۇرىلىم تولىق جاسالادى دەپ سەندىرگەن. ٴبىراق ٴبارى اياقسىز قالدى. بارىنەن بۇرىن ۇيلەردىڭ اپاتتى جاعدايدا ەكەنى جانىمىزعا باتادى. باستاپقىدا ٴجوندى سالىنبادى، ىرگەتاسى دۇرىس قالانبادى، ۇيلەر جازعى باسپانالارعا ارنالعان قۇرىلىس ماتەريالدارىنان سالىنعان. قابىرعالارىندا اۋقىمدى سىزاتتار پايدا بولىپ، جاۋىندى كۇندەرى سۋ تامشىلايدى. ەدەنگە سەمەنت قانا توسەلگەن. ٴۇيىمىز ۇنەمى دىمقىل تارتىپ تۇرادى، ٴارى سۋىق»، – دەيدى «نۇرلى كوش» اۋىلىنىڭ باستاماشىل توبىنىڭ اتىنان كەلگەن جىرعاۋ تۋعانباي.

تۇرعىن ۇي-كوممۋنالدىق شارۋاشىلىعى ٴبولىمىنىڭ مالىمەتتەرىنە ۇڭىلسەك، 274 ٴۇيدىڭ بىرەۋى عانا جەكەشەلىندىرىلگەن. 2009 جىلدان بەرى جالداۋ قۇنى تولەنبەگەن. كوبى زاڭسىز پايدالانىلىپ وتىر. باسپانانىڭ ٴبىر شارشى مەترى 88 تەڭگە، ايىنا 6 مىڭ تەڭگەدەن ەسەپتەلەدى.

«قونىستانۋشىلار اۋەل باستا «تۇرعىن ٴۇي قۇرىلىس جيناق بانكىندە» دەپوزيت اشىپ، قاجەتتى سومانى جيناپ، پاتەردى ٴوز اتتارىنا رەسىمدەپ، كەيىن قالعان سومانى وتەۋگە ٴتيىس بولاتىن. باسپانا 3 ملن تەڭگەگە باعالانعان. ٴبىراق جىلدار وتە ٴۇي ەسكىرەتىندىكتەن، بۇل سوما تومەندەيدى. قازىرگى ۋاقىتتا اكت جاسالۋدا. تۇرعىندارعا جاڭا تولەم بويىنشا كەلىسىمشارت بەرىلەدى. ٴبىراق ولاردىڭ كوبى جىلدار بويى جالعا الۋ قۇنىن تولەمەگەندىكتەن، قارىزدارى شاش-ەتەكتەن. بالالارىن دا تىركەۋگە قويا الماي وتىر. پاتەرلەردىڭ 70% زاڭسىز جالعا بەرىلىپ وتىر»، – دەيدى قالالىق ٴتۇرعىن-ۇي كوممۋنالدىق شارۋاشىلىق ٴبولىمىنىڭ باس مامانى جانار راحمەتوۆا.

تۇرعىنداردىڭ ايتۋى بويىنشا، بۇل ۇيلەردە ٴالى كۇنگە دەيىن ەشقانداي قۇجات جوق. سول سەبەپتى دە وعان تىركەۋگە تۇرۋ مۇمكىندىگى قاراستىرىلماعان.

«ٴبىز تولەم جاساۋدان قاشپايمىز، الايدا بۇل ۇيلەر تۇرۋعا مۇلدەم جارامسىز. جىل سايىن جوندەۋ جۇرگىزەمىز. بۇعان دەيىن ەكى ۇيىمعا جالعا الۋ قۇنىن تولەدىك. ٴبىراق ول ۇيىمدار بانكروتقا ۇشىراعاندىقتان، الاڭداۋلىمىز. قانشا سوما قالعانىنان دا بەيحابارمىز، سول سەبەپتى ٴۇيدى جەكەشەلەندىرە الماي وتىرمىز»، – دەيدى تۇرعىندار.

كراسنىي يار سەلولىق وكرۋگىنىڭ اكىمى نۇرلان ٴايسيننىڭ ايتۋىنشا، اۋىلداعى تۇرعىنداردىڭ سانى 1400-دەي. 194 بالا مەكتەپتە وقىسا، 192 ٴبۇلدىرشىن بالاباقشادا تاربيەلەنۋدە.

«اۋىلدا جەكە كاسىپكەرلەر 180 ٴتۇپ اعاش وتىرعىزعان ەدى. ٴبىراق كۇتىپ-باپتالماعاندىقتان، ٴبارى قۋراپ قالدى. بيىل جەرگىلىكتى بيۋدجەتتەن بولىنەتىن 3 ملن تەڭگە قاراجاتقا اۋىل اينالاسىنا اعاش ەگۋ جوسپارلانىپ وتىر. سونداي-اق جول جوندەۋگە دە قاراجات ٴبولىندى. سپورت الاڭىن قالىپقا كەلتىردىك»، – دەيدى كراسنىي يار سەلولىق وكرۋگىنىڭ اكىمى نۇرلان ايسين.

تۇرعىندار «نۇرلى كوشتە» بالاباقشا، مەكتەپ سالۋدى، اۋىلدى اباتتاندىرىپ، جول سالۋدى سۇراپ وتىر. بالالار ويىن الاڭى ساپاسىز سالىنعان. ەكى رەت جوندەۋ جۇرگىزىلسە دە، قۇرالدار تاعى قيراعان.

«كراسنىي يار سەلولىق وكرۋگى اكىمدىگىنەن ٴبىر مامان ٴبولىپ، وسىندا «رۋحاني جاڭعىرۋ» باعدارلاماسى اياسىندا ەتنواۋىل اشىلعانىن قالايمىز. ول ٴۇشىن بىزدە ٴبارى دايىن. ون شاقتى كيىز ٴۇيىمىز، ٴۇي جانۋارلارى بار. 30-دان اسا ۇلتتىق تاعام تۇرلەرىن جانە 100-گە جۋىق حالىقتىق-قولدانبالى ونەر ۇلگىلەرىن دايىنداي الامىز. سونداي-اق، بىرنەشە جىلىجاي ورناتىلسا، وبلىس ورتالىعىن كوكونىسپەن قامتىر ەدىك. ٴارى قوسىمشا جۇمىس ورىندارى اشىلىپ، سەلوداعى جۇمىسسىزدىق دەڭگەيىن ازايتۋعا مۇمكىندىك بەرەر ەدى. جۇمىس ىزدەپ 40 وتباسى باسقا وڭىرلەرگە كوشىپ كەتتى، 80 ٴۇي جالعا بەرىلۋدە»، – دەيدى جىرعاۋ تۋعانباي.

ماماندار «نۇرلى كوش» تۇرعىندارى جىلدار بويى كوممۋنالدىق تولەمدەرگە اقى تولەمەي كەلەتىندىگىن ايتادى.

«قالا اكىمدىگى مەن تۇرعىن ۇي-كوممۋنالدىق شارۋاشىلىعى بولىمىنە جالعا بەرىلىپ وتىرعان پاتەرلەر يەلەرىن انىقتاۋدى جالعاستىرۋ تاپسىرىلدى. ەگەر كەلىسىمشارت جاساۋدان باس تارتقان جاعدايدا سوت ارقىلى ۇيدەن شىعارۋعا دەيىنگى شارالار قولدانىلماق»،–دەيدى قالالىق ٴتۇرعىن-ۇي كوممۋنالدىق شارۋاشىلىق ٴبولىمىنىڭ باس مامانى جانار راحمەتوۆا.

كەزدەسۋدە اۋىلداعى بالا سانىن ناقتىلاۋ قاجەتتىلىگى ايتىلدى. اكىمدىك مالىمەتىنە سۇيەنسەك، جالپى 386 بالا تىركەلگەن. 45 ٴبۇلدىرشىن بالاباقشا كەزەگىندە تۇر. ال تۇرعىنداردىڭ ايتۋلارىنا قاراعاندا، اۋىلدا 600-دەن اسا بالا بار. نۇرلى كوشتە زاڭدى قۇجاتتارى بولماعاندىقتان، كوپ اتا-انالار بالالارىن باسقا ەلدى مەكەندەرگە تىركەۋگە ٴماجبۇر بولىپ وتىر.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي