BAQ.kz - Қазақстан жаңалықтары USD 371.31 BAQ.kz - Қазақстан жаңалықтары EUR 419.32 BAQ.kz - Қазақстан жаңалықтары RUB 5.59
استانا:

باعا ٴوستى، ٴبىراق الۋشى جوق. تۇركىستاندا ٴۇي مەن جەر قانشا بوپ جاتىر؟

فوتو: Автор

«تۇركىستان وبلىس ورتالىعىنا اينالدى. ەندى سو جاقتا ٴۇي مەن جەردىڭ باعاسى قىمباتتايدى ەكەن». ٴدال ٴقازىر وڭتۇستىكتە ەكى ادامنىڭ باسى قوسىلا قالسا، اينالىپ وتپەيتىن تاقىرىپتىڭ ٴبىرى – وڭتۇستىك قازاقستان وبلىسىنىڭ اكىمشىلىك ورتالىعى تۇركىستانعا كوشىرىلەتىنى مەن سونداعى جىلجىمايتىن مۇلىك باعاسى بولدى. بۇعان دەيىن رۋحاني استانا رەتىندە تانىلىپ كەلگەن مەكەننىڭ وبلىس ورتالىعى بولاتىنى جونىندەگى اقپار جەرگىلىكتى جىلجىمايتىن مۇلىك نارىعىن ٴارى-سارى كۇيگە ٴتۇسىرىپ كەتتى. ٴۇيىن نە جەرىن ساتۋعا شىعارعاندارى باعاسىن كۇرت كوتەرسە، پاتەر يەسى جالعا بەرۋ اقىسىن قىمباتتاتىپ تا جىبەردى. ايتكەنمەن، بۇل ابىر-سابىر ٴوزىن قانشالىقتى اقتاپ جاتىر؟ سىرتتاعىنى ەلىتىپ، تالايدى تۇركىستان نارىعىنا ٴۇڭىلتىپ قويعان حاباردىڭ راسىندا اسەرى قالاي بولدى؟ بۇل تۋرالى baq.kz ارنايى تىلشىسىمەن اڭگىمەلەسكەن تۇركىستاندىق ريەلتورلار مەن مۇلىك يەلەرى ايتىپ بەردى.

ٴالقيسساسى...

تۇركىستان ٴقازىر وبلىس ورتالىعى بولۋعا دايىن با؟

ەلباسىنىڭ وڭتۇستىك قازاقستان وبلىسىنىڭ اكىمشىلىك ورتالىعىن شىمكەنتتەن تۇركىستان قالاسىنا كوشىرۋ تۋرالى جارلىعىنىڭ جوباسى رەسمي باسىلىمدا جاريالانىپ، وبلىس اكىمدىگى مەن وبلىستىق ٴماسليحاتتىڭ سايكەس ۇسىنىسى ۇكىمەتكە جولدانعان 5 ماۋسىمنان بەرى تۇركىستانداعى قاربالاس كۇشەيگەن. ٴبارىنىڭ قۇلاعى ەلەڭدەۋلى. ٴبارىنىڭ كۇتكەنى – ەلباسىنىڭ جارلىعى.

فوتوسۋرەت: اۆتور

ازىرگە بەلگىلىسى – تۇركىستان ٴدال قازىرگى قالپىندا وبلىس ورتالىعىن قابىلداپ الۋعا دايىن ەمەس. مۇنىڭ ٴبارى كەلەشەكتىڭ شارۋاسى. بۇل ٴۇشىن تۇركىستاننىڭ بۇعان دەيىنگى وبلىستىق باعىنىستاعى قالا رەتىندە ازىرلەنگەن باس جوسپارى مەن ەگجەي-تەگجەيلى جوسپارلاۋ جوباسى قايتا قارالىپ، بەكىتىلەدى. ياعني، وبلىس ورتالىعىنا اينالاتىنى سەبەپتى دە رەسپۋبليكالىق باعىنىستاعى قالا رەتىندە وزگەرىستەر ەندىرىلەدى. سوعان سايكەس قالانىڭ وڭتۇستىك-شىعىسىنان 670 گەكتار جەر بولىنگەن. «وتىرار» شاعىناۋدانى دەپ اتاۋ بەرىلگەن. جاڭا اكىمشىلىك-ىسكەرلىك ورتالىق وسىندا تۇسەدى ەكەن. مۇندا اكىمشىلىك نىساندارىنان بولەك، 100-گە تارتا كوپقاباتتى تۇرعىن ٴۇي، بيزنەس عيماراتتارى جانە تاعى دا باسقا قالا ينفراقۇرىلىمىنا قاتىستى نىساندار سالىنادى. ارنايى جۇمىس توبى قۇرىلعان. ولار 1 قىركۇيەككە دەيىن باس جوسپارى مەن ەگجەي-تەگجەيلى جوسپارلاۋ جوباسىن ازىرلەيدى. سوسىن ول بەكىتىلۋى ٴتيىس.

قالا وڭتۇستىك-شىعىس باعىتتا داميدى. بۇل باعىتتىڭ قالاي ەكەنىن بىلاي تۇسىندىرۋگە بولادى: شىمكەنتتەن تۇركىستانعا جەتكەندە قالا قاقپاسى كورىنەدى. سول قاقپاعا جەتپەي وڭ جاققا قاراي اينالما جول شىعادى. سول قالا قاقپاسىنىڭ وڭ جاق بەتىن الىپ، اينالما جولدى جاعالايتىن جەر جاڭا تۇركىستان تۇسەتىن 670 گەكتاردى قۇرايدى. مۇندا ٴقازىر 12 كوپقاباتتى تۇرعىن ٴۇي مەن قالالىق ەمحانا، بالالار اۋرۋحاناسى سالىنىپ، پايدالانۋعا بەرىلگەن.

700 000 مىڭ گەكتاردان اسا جەر كەنتاۋعا بەرىلدى

تۇركىستان قالاسىن وبلىس ورتالىعىنا اينالدىرۋ بارىسىندا قالا اۋماعىنداعى بارلىق 12 اۋىل وكرۋگىن كورشىلەس جاتقان كەنتاۋ قالاسىنىڭ قۇرامىنا قوسىلادى. ياعني، بۇعان دەيىن تۇركىستان قالاسىنىڭ قۇرامىندا بولىپ كەلگەن 12 اۋىلدىق وكرۋگى جەرىمەن، حالقىمەن بىرگە كەنتاۋعا وتەدى. وسىلايشا تۇركىستاننىڭ اۋماعى ەداۋىر كىشىرەيىپ، بار-جوعى 19 627 گەكتاردى قۇرايدى. قالا اكىمى تاجىبەك مۇسايەۆتىڭ ايتۋىنشا، مۇنىڭ ٴبارى دە بيۋدجەت قارجىسىن ۇنەمدەۋ ٴۇشىن جاسالىنىپتى.

تۇركىستان قالاسىنىڭ اكىمى تاجىبەك مۇسايەۆ

فوتوسۋرەت: اۆتور

بۇرىن «تۇركىستان قالاسى 12 اۋىلدىق وكرۋگىمەن» دەپ اتالاتىن. ەندى وبلىس ورتالىعى بولسا، ونداي بولۋى مۇمكىن ەمەس. 1997 جىلعا دەيىن تۇركىستان قالا مەن اۋدان، ياعني تۇركىستان اۋدانى جانە تۇركىستان قالاسى بولعان. 1997 جىلى وڭتايلاندىرۋ كەزىندە ەكەۋىن بىرىكتىرگەن. مۇسايەۆتىڭ ايتۋىنشا، قازىرگى قالا قۇرامىنداعى اۋىلدىق وكرۋگتەردى قايتادان اۋدان قىلىپ شىعارۋ ٴۇشىن ٴبىر اۋىلدى اۋدان ورتالىعى ەتىپ سالۋ كەرەك. ال كەنتاۋدا دايىن ينفراقۇرىلىم تۇر.

«ٴبىزدىڭ 721 745 گەكتار جەردى 12 اۋىل وكرۋگىمەن كەنتاۋعا اپارىپ قوسادى. بولدى. بيۋدجەتكە سالماق تۇسپەيدى. ال جاڭا اۋدان ورتالىعىن سالۋ ٴۇشىن قانشاما قارجى كەرەك. دايىن ينفراقۇرىلىمدى پايدالانىپ، كەنتاۋعا اپارىپ قوسۋداعى ماسەلە وسى بولىپ وتىر. بۇعان دەيىن تۇركىستان قالاسىنىڭ اۋماعى 12 اۋىلدىق وكرۋگىمەن بىرگە 744 000 گەكتار جەر ەدى. ەندى سودان 19 627 گەكتار جەر قالدى» دەيدى تاجىبەك مۇسايەۆ.

ونىڭ ايتۋىنشا، 721 745 گەكتار جەر كەنتاۋعا بەرىلىپ جاتىر. بۇكىل اۋىلدىڭ جەرى، جايىلىمى بار، سۋارمالى جەرى بار، ٴبارى دە كەتەدى. 12 اۋىلدىق وكرۋگتەگى 101 525 ادام كەنتاۋعا وتەدى. ستاتيستيكالىق مالىمەتتەر بويىنشا، 161 251 ادام تۇركىستاندا قالادى.

"اپا، ساتىلاتىن جەر بار ما؟"

جوعارىدا ايتىلعان ەكى ۇلكەن جاڭالىق تۇركىستانداعى جىلجىمايتىن مۇلىك نارىعىنا وزگەرىس الىپ كەلدى. ەڭ الدىمەن ادامدار ساتۋعا شىعارعان جەرىن ساتۋدى دوعارىپتى. ويتكەنى، مۇلىك يەلەرى باعا تاعى ٴوسىپ قالا ما ەكەن، ٴقازىر ەرتە ساتىپ قويمايمىن با دەپ ەكىۇداي ويدا ٴجۇر. مۇنى قالانىڭ بايىرعى تۇرعىنى سارا دۇيسەنبەكوۆا ايتتى. تۇركىستاندا تۋىپ، وسىندا قىزمەت ەتىپ، زەينەتكە شىققان سارا دۇيسەنبەكوۆا قالا ىشىندەگى ۇلكەن داڭعىلداردىڭ ٴبىرىنىڭ بويىندا تۇرادى.

«تەلەديداردان «تۇركىستاندى وبلىس بولادى» دەپ ەستىپ، قۋانىپ جاتىرمىز. تۇركىستانىمدى ەشبىر قالاعا، ەشبىر مەملەكەتكە ايىرباستامايمىن. رۋحاني قالا. ەكىنشى مەككە. تۇركىستانىمىز وبلىس ورتالىعى بولىپ، كوركەيە بەرسىن»، - دەيدى اعىنان جارىلعان ول.

فوتوسۋرەت: اۆتور

«جەر دە، ٴۇي دە قىمباتتاپ جاتىر. بايقالادى. ٴوزىم ۇلكەن كوشەنىڭ بويىندا تۇرامىن. بۇرىشتاعى جەر. ناعىز ٴوتىمدى ورىن. دالاعا شىعىپ قالسام، ەسىك الدىندا قىمبات شەتەلدىك كولىكتەرگە مىنگەن ادامدار جۇرەدى. «اپا، جەر بار ما ساتىلاتىن؟» دەپ سۇرايدى. ٴبىر تۋىسىمنىڭ قىزىلوردا تاسجولىنىڭ بويىندا ساتۋعا قويعان جەرى بار ەدى. استانادان بىرەۋ حابارلاسىپ: «ٴقازىر بارامىن دا ٴسىزدىڭ جەرىڭىزدى ساتىپ الامىن. قانشا دەيسىز؟ 2 ميلليون؟ 1،8 ميلليونعا بەرىڭىز. ٴقازىر ۇشاقپەن بارىپ، اقشاسىن بەرىپ، جەرىڭىزدى ساتىپ الامىن» دەسە، تۋىسىم: «قويا تۇر، بالا-شاعاممەن اقىلداسايىن» دەپ، تەلەفوندى قويا سالدى. مەن وعان جەرىڭدى ساتپا دەدىم. «وبلىس ورتالىعى بولادى» دەگەن حابار باعاعا بىردەن اسەر ەتتى. الماتىدا قاينىم بار ەدى. سول جەرىن ساتىپ، ىنىسىنە الماتىدان ٴۇي سالىپ بەرەمىن دەپ ٴجۇر ەدى. كەشە حابارلاسىپ «ول جەردى ساتپايتىن بولدىم. ينتەرنەتتەن كوردىم. وبلىس ورتالىعى بولايىن دەپ جاتىر ەكەن. سول جەرىمە ٴۇي سالىپ، ٴوزىم كوشىپ بارامىن» دەدى. مەن بىلتىر 1 ملن دەپ تۇرعان جەرىمدى 850 مىڭ تەڭگەگە ساتتىم. ٴقازىر 1 ملن تەڭگەگە جەر جوق. مىنا قالانى ارالاپ ٴجۇرىپ، بوس جەردىڭ يەسىنە حابارلاسساڭ، كەمى 1،5-2 ملن تەڭگە سۇرايدى»، - دەيدى سارا دۇيسەنبەكوۆا.

"5 ميلليون تەڭگە سۇراپ وتىرعاندار بار"

بۇل وسىنداعى ٴبىر تۇرعىننىڭ ٴسوزى. ٴوز بىلگەنى مەن كورگەنىن، ەستىگەنىنەن تۇيگەنى. سوندىقتان دا تۇركىستانداعى جىلجىمايتىن مۇلىك نارىعىنىڭ جاي-جاپسارىنان حاباردار جەرگىلىكتى ريەلتورلارمەن اڭگىمەلەستىك.

«كەرەگە» جىلجىمايتىن مۇلىك اگەنتتىگىنىڭ ريەلتورى گۇلنار مۇرتازايەۆنىڭ ايتۋىنشا، ٴقازىر قالادا جەرى ٴوتىمدى ياعني قىمبات جانە سۇرانىس از، ياعني ارزان ەلدىمەكەندەر بار ەكەن.

تۇركىستان كوشەلەرى

فوتوسۋرەت: اۆتور

"كەنتاۋعا شىعاتىن، قىزىلورداعا باراتىن جول بويىنداعى جەر تەلىمدەرى ارزانداۋ. كەنتاۋعا شىعاتىن جولدىڭ وڭ جاعىنداعى 10 سوتىق جەرگە شامامەن 1-1،2 ملن تەڭگە سۇرايدى. ەڭ ٴوتىمدىسى شىمكەنتتەن تۇركىستانعا كىرەبەرىس تۇسىنداعى (شنوس جاق دەپ ايتامىز) مىنە سول جاقتاعى جەرلەر قىمباتتادى» دەيدى ول. مۇرتازايەۆا كەلتىرگەن مالىمەتتەرگە قاراعاندا 10 سوتىق جەر تەلىمى ٴقازىر 2،5-3 ملن تەڭگە شاماسىندا بولىپ جاتىر. ازىرگە گاز جوق. جالپى «ورالمان» ەلدىمەكەنى مەن تۇران شاعىناۋدانىندا جەر ٴبىرشاما ارزان. ورتاشا باعا «جۋكوۆسكيي» رايونى مەن جەتىنشى باعىتتىڭ جولىندا، سوسىن بوتانيكالىق باقتىڭ اينالاسىندا. «ويتكەنى، ول جاقتا سارى قۇمىرسقا بار كورىنەدى. سارى قۇمىرسقا ٴۇيدىڭ قابىرعاسىن جەپ قويادى. ال «جولدىڭ استىنداعى» جەرگە سۇرانىس جوق. ٴبىراق جاقسى اۋدان. قىمبات جەر سول قالاعا شىمكەنتتەن كىرەبەرىس جاق بولىپ تۇر. كەلەشەگى بار، جاڭا قۇرىلىس تۇسەتىن، ٴوتىمدى ورىن» دەيدى گۇلنار مۇرتازايەۆا.

ونىڭ بۇل ٴسوزىن سەرىكتەسى گۇلزادا تويشىبەكوۆا دا راستايدى. ايتۋىنشا، ٴقازىر 3 ملن تەڭگە بولىپ جاتقان 10 سوتىق جەردىڭ باعاسى بۇرىن 1-1،5 ملن تەڭگە تۇرىپتى.

"ٴتىپتى 5 ملن تەڭگە سۇراپ جاتقاندار بار. شىمكەنتتەن كىرەبەرىستەگى، «كوممۋنيزم» اۋماعىنداعى، يسا تويحاناسى ماڭايىنداعى جەرلەر قىمباتتاپ جاتىر. «كوممۋنيزمدە» 3-4 ملن تەڭگە بولىپ جاتىر. بىلتىر مىسالى سول جەرلەر 1،5-2 ملن تەڭگە بولعان. تاعى كوتەرىلەدى. ادامدار تۇركىستان وبلىس ورتالىعى بولسا، قارىق بولامىز دەپ جاتىر. ساتۋعا قويعاندار: «ەرتەڭ تاعى كوتەرىلەدى، 1-2 جىلدا كوتەرىلسە، نە ىستەيمىز؟» دەپ وتىر. ال «ورالمان» مەن «جولدىڭ استىنداعى» جەر قىمباتتامادى" دەيدى گۇلزادا.

تۇركىستانداعى قوعامدىق كولىك

فوتوسۋرەت: اۆتور

تۇركىستان قالالىق turan zharnama گازەتىندەگى «جەر ساتىلادى» ايدارىنداعى حابارلاندىرۋلاردا كورسەتىلگەن تەلەفون نومىرلەرىنە قوڭىراۋ سوقتىق.

ٴوزىن «نۇرلانمىن» دەپ تانىستىرعان تۇرعىن قالا ىشىندەگى ورتاق اتتى ەلدىمەكەندە ورنالاسقان 10 سوتىق جەرىن ساتۋعا شىعارىپتى.

«تەمىرجول ۆوكزالى جاقتا، «رەمزاۆودتا» ورنالاسقان جەر. قىزىل سىزىققا تۇسپەگەن. بوس جاتقان جەر. مەملەكەتتىك اكتىسىن ىستەتىپ جاتىرمىن. كەلەشەكتە گاز كەلەدى. قۇدىق قازىلعان. ەلەكتر جەلىسىن وزدەرى تارتىپ جاتىر. اينالادا 2-3 ٴۇي تۇرىپ جاتىر دەگەن نۇرلان جەرىن 1،2 ملن تەڭگەگە باعالايدى.

ال كەلەسى ٴبىر تۇرعىن ارىس-تۇركىستان كانالى ماڭىنان 10 سوتىق جەرىن ساتۋعا قويىپتى.

«قۇجاتتارى تۇگەل. ساتپايتىن ەدىم. اقشا كەرەك بولدى. تۇركىستان وبلىس ورتالىعى بولىپ جاتىر عوي. جاڭا قالا دا سول جاقتان تۇسەدى. سۋ دا جارىق تا كەلىپ تۇر. گاز كەلەدى. ٴدال جانىنان ورتالىق كارىز جۇيەسى وتەدى. ەكى جىل بۇرىن 1،5-2 ملن تەڭگە بولعان جەر ەدى. ەندى وبلىس ورتالىعى تۇركىستانعا اۋاتىن بولعان سوڭ، قىمباتتادى» دەگەن ايەل كىسى جەرىن 2،5 ملن تەڭگەگە ساتاتىنىن ايتتى.

ريەلتور گۇلزادا تويشىبەكوۆانىڭ سوزىنشە، بيزنەس جۇرگىزۋگە ارنالعان جەردىڭ دە باعاسى ٴوسىپتى. مىسالى، قالاعا شىمكەنتتەن كىرەبەرىس اۋماقتاعى كوممەرسيالىق ماقساتتاعى جەر باعاسى 15 ملن تەڭگەدەن 20 ملن تەڭگەگە، 10 ملننان 15 ملن تەڭگەگە قىمباتتاعان. اينالما جول بويىنداعى جەر دە، قىزىلوردا تاسجولى بويىنداعى بيزنەسكە قولايلى جەردىڭ قۇنى قىمباتتاعان.

تۇركىستان ارباتى

فوتوسۋرەت: اۆتور

ٴۇي دە قىمباتتادى

ريەلتورلاردىڭ سوزىنە قاراعاندا، قالانىڭ شىمكەنت جاق كىرەبەرىسىندەگى ۇيلەردىڭ باعاسى قىمبات. شىمكەنت جاقتان تۇركىستانعا كىرگەندە جولدىڭ سول جاق بەتىندە، №23 مەكتەپ پەن مەشىت ماڭىنداعى ۇيلەر قىمبات سانالادى.

«جەر ۇيلەرىن 20، 30، ٴتىپتى 40 ملن تەڭگەگە باعالايدى. ٴبىراق ەشكىم سۇراپ جاتقان جوق. ال 5-6 ملن تەڭگە، 7-8 ملن تەڭگەگە «ورالمان» جاقتا ۇيلەر كوپ. كەنتاۋعا بارا جاتقان جولدىڭ سول جاعىنداعى 10 ملن تەڭگە شاماسىندا ۇيلەر بار» دەيدى گۇلنار مۇرتازايەۆا.

ريەلتور گۇلزادانىڭ ايتۋىنشا، قالا ىشىندەگى «جولدىڭ استى»، «حلوپ زاۆود»، «رەمزاۆود» دەپ اتالىناتىن ەلدىمەكەندەردەگى ۇيلەرگە سۇرانىس جوق ەكەن. «3،5-4 ملن تەڭگەگە جەر ٴۇي تابۋعا بولادى» دەگەن ول: بۇل شاعىناۋدانداردىڭ دا جاقسى، قونىستانۋعا قولايلى ەكەنىن ايتادى. ىزدەستىرسە، «كوممۋنيزمنەن» دە 10 ملن تەڭگەگە 1995-200 جىلدارى سالىنعان، ەسكى ٴۇي تابۋعا بولادى ەكەن.

ريەلتورلارمەن اڭگىمەلەسە وتىرىپ بىلگەنىمىزدەي، تۇركىستاندىقتاردى سارى قۇمىرسقا مازالايدى.

"ٴۇيىمدى ساتىپ بەرىڭىز» دەپ حابارلاسادى. سامان ۇيلەردى سارى قۇمىرسقا جەپ قويادى. سوندىقتان دا ساتىپ جاتىر" دەيدى گۇلزادا تويشىبەكوۆا.

وسى ورايدا شىمكەنتتەن تۇركىستانعا كىرەبەرىس قاقپاداعى تۇيە مۇسىندەرىنىڭ ارتقى جاعىندا ورنالاسقان ٴۇيىن ساتۋعا شىعارعان گۇلناز ەسىمدى تۇرعىنعا حابارلاستىق.

«جولدىڭ سول جاق بەتىندەگى ۇيلەردىڭ اراسىندا. كىرپىشتەن قالانعان. الدىندا ۆرەميانكاسى بار. ۆاننا-دارەتحاناسى دا بار. بۇرىشتاعى ٴۇي. 26 ملن تەڭگە دەپ وتىرعان ەدىم. 20 ملن تەڭگەگە ٴتۇسىردىم. جاقسى رايون. قۇر جەردىڭ ٴوزىن 3،5-4 ملن تەڭگە دەپ جاتىر عوي. مىنا جاعىمىزدا جاڭا اكىمدىك تۇسەدى. باياعىدان سونى ەستىپ، وسى جەردى الىپ، ٴۇي سالعانمىن» دەگەن گۇلناز ٴۇيىنىڭ باعاسىن اقشا كەرەك بولعان سوڭ، امال جوق، 20 ملن تەڭگەگە تۇسىرگەنىن ايتتى.

تۇركىستاندا ٴقازىر پاتەر قانشا تۇرادى؟

تۇركىستانداعى كوپقاباتتى تۇرعىن ۇيلەر شوعىرلانعان شاعىناۋداندار دا بار. قالا اكىمدىگىنىڭ بەرگەن مالىمەتىنشە، سول 105 كوپقاباتتى تۇرعىن ٴۇيدىڭ وسى كۇنگە دەيىن 44-ىنە مودەرنيزاسيا جۇرگىزىلىپتى. بيىل تاعى ٴ12-ى، كەلەر جىلى تاعى 40 ٴۇي مودەرنيزاسيادان وتەدى ەكەن. بۇل كوپقاباتتى تۇرعىن ۇيلەردىڭ ٴبارى دە تابيعي گازعا قوسىلماعان. گاز قۇبىرلارى كىرگىزىلىپ جاتىر. تۇرعىندارى باللونداعى گازدى جاعىپ، تىرشىلىك ەتەدى. «الداعى 2-3 جىل ىشىندە تولىقتاي تابيعي گاز كەلەدى» دەپ كۇتىپ وتىر.

فوتوسۋرەت: اۆتور

«تۇركىستان وبلىس ورتالىعىنا اينالادى» دەگەن حابار جەتكەلى وسى شاعىناۋداندارداعى پاتەر قۇنى دا وسكەن. بۇرىنعى باعاسىنا 1 ملن تەڭگەدەي قوسقان.

«شاعىناۋداندارداعى پاتەرلەر اسا قىمباتتاي قويمادى. 2-3 بولمەلى پاتەر ٴۇشىن 5-8 ملن تەڭگە سۇرايدى. ەۋروجوندەۋدەن وتكەن پاتەرلەردى 8 ملن تەڭگە دەپ ايتادى، ٴبىراق ساۋدالاسسا 7 ملن تەڭگەگە دە بەرىپ قالادى. ال 4-5 قاباتتا ورنالاسقان 3 بولمەلى جوندەۋ كورمەگەن پاتەرلەردى 5-6 ملن تەڭگەگە دە الۋعا بولادى» دەيدى گۇلنار مۇرتازايەۆا.

گۇلزادا تويشىبەكوۆانىڭ سوزىنشە، بۇرىن 5 ملن تەڭگە بولعان پاتەرلەرگە ٴقازىر 6 ملن تەڭگە سۇراپ جاتىر. كىرپىش ۇيلەردەگى پاتەر باعاسى وسكەن. ٴقازىر 2 بولمەلى پاتەر - 6 ملن تەڭگە، 3 بولمەلىسى - 8 ملن شاماسىندا كورىنەدى. بۇرىن ولاردىڭ باعاسى 5-5،5 ملن تەڭگە اينالاسىندا بولعان. پانەل ۇيلەردەگى 4 ملن تەڭگەلىك پاتەرلەرگە ٴقازىر 5-6 ملن تەڭگە سۇرايدى.

«8 ملن تەڭگەگە كىرپىش ٴۇيدىڭ 2-3 قاباتىنان 3 بولمەلى، جاعدايى جاقسى، جوندەلگەن پاتەر ساتىپ الۋعا بولادى. 4 بولمەلىسى دە تابىلادى. ال جوندەۋ كورمەگەن، جوعارى قاباتتاعى 2 بولمەلى پاتەردى 5 ملن تەڭگەگە الۋعا بولادى. تۇركىستانداعى ۇيلەردە ىستىق سۋ - اريستون بار. گاز كىردى. گاز كولونكاسىن قويىپ جاتىر» دەيدى ول.

تويشىبەكوۆانىڭ ايتۋىنا قاراعاندا، الداعى بىر-ەكى جىل ىشىندە قازىرگى 6 ملن تەڭگەلىك ۇيلەر 12 ملن تەڭگە بولادى.

«العان ادام ۇتىلمايدى. «ٴقازىر الىپ قويىپ، كەيىن ۇستىنەن قويامىن» دەپ ويلايدى. مىنا جاڭادان ٴتۇسىپ جاتقان «وتىرار» مولتەكاۋدانىندا سالىناتىن كوپقاباتتى تۇرعىن ۇيلەردەگى پاتەرلەر ساتىلمايدى. مەملەكەتتىك باعدارلامامەن، يپوتەكامەن بەرىلەدى. ٴقازىر «2-3 ملن تەڭگەگە جوندەلمەگەن، ارزان پاتەرلەر بار ما» دەپ حابارلاسادى.

بۇرىن قالا ىشىندەگى ەكىقاباتتى ۇيلەردەگى 2 بولمەلى پاتەرلەر 3 ملن تەڭگە بولعان. ٴقازىر سونىڭ وزىنە 5 ملن تەڭگە سۇراپ وتىر. بۇرىن الۋشىلار ونداعى پاتەرلەردى سۇرامايتىن دا، قارامايتىن. باعا ٴساۋىردىڭ سوڭى مەن مامىردىڭ باسىندا بىردەن كوتەرىلگەن.

ەسىم حان اتىنداعى ورتالىق الاڭ

فوتوسۋرەت: اۆتور

پاتەراقى دا ٴوستى

باعانىڭ كوتەرىلۋى ساتىلاتىن پاتەردەن بولەك، جالعا بەرىلەتىن پاتەراقىسىن اينالىپ وتپەگەن. مۇنى جەرگىلىكتى حابارلاندىرۋ گازەتتەرىندەگى جالعا بەرىلەتىن پاتەرلەر تۋرالى جارنامالارداعى تەلەفون نومىرلەرىن حابارلاسىپ بىلدىك.

«1 شاعىناۋدانداعى 3 بولمەلى پاتەرىمدى ايىنا 35 مىڭ تەڭگەگە بەرەمىن. قالانىڭ ورتالىعى. ىشىندە دە ٴبىراز زاتتارى بار. شيفونەر، كەرەۋەت، توڭازىتقىشى مەن سالقىنداتقىشى (كونديسيونەر) بار. تەك توسەيتىن كىلەمىڭىز بەن كورپە-توسەگىڭىزدى، ىدىس-اياعىڭىزدى اكەلەسىز» دەيدى باۋىرجان ەسىمدى ازامات.

بۇعان دەيىن ول پاتەرىن ايىنا 30 مىڭ تەڭگەگە بەرىپ كەلگەن. ايتۋىنشا، كوبىسى ٴقازىر بار جاعدايى جاسالعان 3 بولمەلى پاتەرىن 50 مىڭ تەڭگەگە بەرىپ جاتىر.

ايتكەنمەن، ٴۇيدىڭ دە، جەردىڭ دە، پاتەردىڭ دە قۇنى ٴوسىپ، مۇلىك يەلەرى باعانى قالاۋىنشا قويعانىمەن انىق كەلىپ، اقشاسىن تولەپ، ساتىپ الىپ جاتقاندار از ەكەن. ريەلتورلاردىڭ ايتۋىنشا، تۇركىستاننىڭ وزگەرۋىنە ٴالى 1-1،5 جىل كەرەك. ويتكەنى، ساتۋعا قويىلعان جەرلەر تۇر. سۇراۋشىلاردىڭ كوبى كوممەرسيالىق نىساندارعا قىزىعادى. ايتسە دە، اقشاسىن بەرىپ الىپ جاتقاندار جوق.

«سوڭعى بىر-ەكى ايدا ەشتەڭە وتپەدى. نەگىزىنەن، شىمكەنتتىڭ تۇرعىندارى مەن تاشكەنتتىڭ قازاقتارى سۇراپ كەلىپ جاتادى. ٴبىراق اجيوتاج بايقالمايدى. جەكە كاسىپكەرلەر دە حابارلاسىپ، سۇرايدى. ال نەگىزگى حالىق اسا قىزىقپايدى. ەندى وبلىس اكىمدىگى وسىندا اۋىسقاننان كەيىن، قوزعالىس بولماسا، ازىرگە ساتۋ-ساتىپ الۋدا تىنىشتىق» دەيدى ريەلتور گۇلنار مۇرتازايەۆا.

وتىرار شاعىن اۋدانى

فوتوسۋرەت: اۆتور

سەرىكتەسىنىڭ ٴسوزىن گۇلزادا تويشىبەكوۆا دا راستادى. ونىڭ ايتۋىنشا، ادامدار وزدەرى باعانى قويىپ جاتىر. وبلىس بولادى دەگەندى ەستىگەن سوڭ، كليەنت جوق بولسا دا، الىپ جاتقان ەشكىم جوق بولسا دا، وزدەرى كەلىسىپ العانداي باعانى ايتادى. ٴبىراق الىپ جاتقان ادام از. ساۋدا بولىپ جاتقان جوق. سىرتتان كەلىپ، سۇرايتىندار كوبەيگەن.

«مۇنداعى ايتىلاتىن باعا شىمكەنتتىڭ باعاسىمەن بىردەي بولىپ جاتىر. مىسالى شىمكەنتتە كىرپىشتەن سوعىلعان ەكىقاباتتى ٴۇيدى 30 ملن تەڭگەگە دە الۋعا بولادى. ال بىزدە 30 ملن تەڭگەگە جاي ٴبىر قاباتتى ٴۇيىن ساتادى. تۇركىستاندا ەكى قاباتتى ٴۇيدى 50 ملن تەڭگەگە الاسىڭ. مۇنى ەستىگەندەر «تۇركىستاندا قىمبات ەكەن» دەپ جاتادى» دەيدى تويشىبەكوۆا.

«تۇركىستان ماڭىنداعى اۋىلداردا ٴۇي ارزان»

وسى ورايدا ريەلتورلاردان تۇركىستان قالاسىنا جاقىن ورنالاسقان اۋىلدارداعى ٴۇيدىڭ باعاسىن دا سۇرادىق.

«ٴبىز نەگىزىنەن قالادا جۇمىس ىستەيمىز. ٴبىراق اۋىلداردان 2-3 ملن تەڭگەگە ۇلكەن ٴۇي، ال 3 ملن تەڭگەگە ٴزاۋلىم ٴۇي الۋعا بولادى. اۋىلدارداعى جاقسى ٴۇيدىڭ جوعارى باعاسى – 3 ملن تەڭگە» دەيدى گۇلزادا.

«ال قولىندا 2-3 ملن تەڭگەسى بار ادام قالا ىشىنەن ٴۇي تابا ما» دەپ سۇراعانىمىزدا: «مىنا قالانىڭ شىمكەنت جاق كىرەبەرىسىنەن 3 ملن تەڭگەگە جەر الاسىز. ۆرەميانكاسى دا بولىپ قالۋى مۇمكىن» دەپ جاۋاپ بەردى.

ەگەر قالتاڭىزدا بار-جوعى 1 ملن تەڭگە بولىپ، تۇركىستاننان ايتەۋىر ٴبىر جىلجىمايتىن نىسان ساتىپ الۋدى كوزدەسەڭىز، وندا ريەلتورلاردىڭ ۇسىناتىنى – مىنا تۇركىستاننان كەنتاۋعا شىعاتىن جول بويىنداعى ورالمان اتتى ەلدىمەكەن اۋماعىنان 10 سوتىق جەر الىڭىز. گۇلزادا تويشىبەكوۆانىڭ ايتۋىنشا، ول جاق تا كەلەشەكتە ورتالىق بولادى.

تۇركىستانعا گاز قاشان كەلەدى؟

ەسكە سالساق، بۇعان دەيىن وقو اكىمى جانسەيىت تۇيمەبايەۆ وڭتۇستىك قازاقستان وبلىسىنىڭ اكىمشىلىك ورتالىعى شىمكەنتتەن تۇركىستان قالاسىنا اۋىساتىن بولسا، سول جاققا قونىس اۋداراتىندار كوبەيىپ، ٴۇي باعاسى كوتەرىلەتىنىن ايتقان بولاتىن.

«شىمكەنت – رەسپۋبليكالىق دارەجەدەگى قالا بولعاندىقتان، مۇنداعى شتات سانى كوبەيەدى. سوندىقتان بۇل ماسەلە بولمايدى. ٴقازىر تۇركىستانعا بارىپ جەر الۋشىلار، ٴۇي الۋشىلار، عيمارات ساتىپ الۋشىلار كوبەيدى. ٴۇيدىڭ باعاسى كوتەرىلىپ كەتتى» دەگەن وبلىس اكىمىنىڭ ٴسوزىن تۇركىستان قالاسىنىڭ اكىمى تاجىبەك مۇسايەۆ تا قوستايدى.

«سونداي سوزدەر بار. ازىرگە ناقتى ەشتەڭە ايتا المايمىن»، - دەدى تاجىبەك مۇسايەۆ.

ونىڭ ايتۋىنشا، ٴقازىر تۇركىستان قالاسى 90 پايىز اۋىز سۋمەن قامتىلعان. الداعى ٴۇش جىلدىڭ كولەمىندە 99 پايىز اۋىز سۋمەن قامتىلادى. ال ازىرگە تەك 16 پايىز تۇرعىنى عانا تابيعي گازدى پايدالاناتىن قالانىڭ تولىقتاي كوگىلدىر وتىننىڭ راحاتىن كورۋىنە 2-3 جىل كەرەك.

(فوتولار اۆتوردىكى)


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي