BAQ.kz - Қазақстан жаңалықтары USD 356.54 BAQ.kz - Қазақстан жаңалықтары EUR 419.43 BAQ.kz - Қазақстан жаңалықтары RUB 5.42
استانا:

قوپا كولىندە جازعى دەمالىس ايماعى اشىلدى

فوتو: Автор

بيىل كوكشەتاۋلىقتاردىڭ جانە قالا مەيماندارىنىڭ جازعى دەمالىسىن ۇيىمداستىرۋ شارالارى بەلسەندى تۇردە جۇرگىزىلۋدە. ايدىن كولدىڭ جاعالاۋىنا قونىستانعان قالا بولعاندىقتان، كەلۋشىلەرگە تۋريستىك جانە سەرۆيستىك قىزمەت كورسەتۋ ماقساتىندا جازعى دەمالىس ايماعى اشىلدى، دەپ حابارلايدى baq.kz ايماقتاعى ٴتىلشىسى.

بيىلعى جىلدىڭ 6 ايى ىشىندە قالاعا 10 مىڭنان اسا تۋريست ات باسىن تىرەگەن.

شىلدەنىڭ ىستىعىندا شومىلۋ ماۋسىمى كۇنىنە 2 مىڭداي كوكشەتاۋلىقتى جيناۋدا. وسىدان ٴتورت جىل بۇرىن كولگە جاقىن ورنالاسقان جەكەمەنشىك تۇرعىن ۇيلەر الىنىپ، ونىڭ ورنىنا وسى زامانعى وسكەلەڭ تالاپتارعا ساي دەمالىس جانە ساۋدا ورىندارى، تۇتاس تۇرعىن ٴۇي كەشەندەرى بوي كوتەرۋدە. نەگىزگى جاعاجاي گوركيي كوشەسى بويىنداعى تەننيس ورتالىعى مەن «جانسايا» جاڭا تۇرعىن ٴۇي كەشەنى ماڭىندا جاسالدى.

«كۋيبىشەۆ جانە گوركيي كوشەلەرى تۇسىنان قوپا كولىنىڭ جاعالاۋىندا جاعاجاي ايماعى اباتتاندىرىلدى، ماڭايى قورشالىپ، قۇمى رەتكە كەلتىرىلدى، كيىنىپ-شەشىنۋ كابينالارى، ورىندىقتار، بيوتۋالەتتەر ورناتىلدى، جازعى ٴدامحانا سالىندى. جالپى، جوبا قۇنى 7 ميلليون تەڭگەنى قۇراپ وتىر. قازىرگى ۋاقىتتا قىسقى ٴدامحانا قۇرىلىسى جۇرۋدە»، - دەيدى اقمولا وبلىستىق تۋريزم باسقارماسىنىڭ باسشىسى دانيار يدياتوۆ.

كولدىڭ ەكولوگياسىنا كەرى اسەر تيگىزبەۋ ماقساتىندا جاعاجايدا تازالىق بەيسەنبىلىكتەرى ۇيىمداستىرىلۋدا.

«جازعى دەمالىستىڭ قازىرگىدەي قىزعان شاعىندا قالامىزدىڭ تازالىعىن ساقتاۋعا ٴبىز دە ٴوز ۇلەسىمىزدى قوسقىمىز كەلەدى. سول سەبەپتى تازالىق بەيسەنبىلىگىنە ٴوز ۇجىمىمىز بولىپ ٴبىر كىسىدەي قاتىستىق. مۇنداي شارانى الداعى ۋاقىتتا داستۇرگە اينالدىرۋ كەرەك. ويتكەنى، قالامىزدىڭ تازالىعى ەشكىمدى بەيجاي قالدىرماۋعا ٴتيىس»، - دەيدى كوكشەتاۋ قالاسى قارجى ٴبولىمىنىڭ بيۋدجەتتىك سەكتور مەڭگەرۋشىسى گۇلنار قۇستايەۆا.

بۇعان دەيىن قوپا كولىنىڭ جاعالاۋىندا ينفراقۇرىلىمى تولىق ساقتالعان جاعاجاي بولعان ەمەس. دەمالىسقا لايىقتى كوممۋنالدىق جانە سەرۆيستىك قىزمەت كورسەتىلمەگەندىكتەن اركىم ٴوز بەتىنشە سۋعا شومىلۋدى ادەتكە اينالدىردى. ەندى رەسمي تۇردە اشىلعان جاعاجايدىڭ سۋدان قۇتقارۋشىلارى، ٴتارتىپتى قاداعالاۋشىلارى بار.

«ٴبىز جاعاجايعا كەلۋشىلەرگە قازاق جانە ورىس تىلدەرىندە دايىندالعان جادىنامالاردى تاراتامىز. تيىم سالىنعان ەرەجەلەردى تۇسىندىرەمىز، كەڭەس بەرەمىز. قاراپايىم دا قاجەتتى ەسكەرتپەلەر بار. ودان ارىعا ٴجۇزۋدىڭ ٴقاۋىپتى ەكەنىن ەسكەرتەتىن بەلگىلەر ورناتىلعان، بيىك باقىلاۋ مۇنارىنان قۇتقارۋشىلار قاراپ تۇرادى، قايىق، باسقا قۇرال-جابدىقتىڭ ٴبارى دايىن»، - دەيدى شۇعىل قۇتقارۋشىلار وتريادى جەتەكشىسىنىڭ ورىنباسارى تالعات ايتپايەۆ.

جاعاجايعا كەلىپ دەمالۋشىلار كاتاماران جانە سۋ سكۋتەرلەرىنىڭ قىزمەتىن، باتۋتتى پايدالانا الادى. كۇنگە قىزدىرىنىپ كەتپەۋ ٴۇشىن جاعاجاي بويىنشا زونتتار ورناتىلدى جانە شەشىنەتىن ورىندار جاسالدى.

«سۋ قاشاندا ادامعا كوتەرىڭكى كوڭىل سىيلايدى، سەرگىتەدى. سۋعا تۇسسەڭ، شارشاعانىڭ باسىلىپ، جانىڭ جادىرايدى. جاز شىعا جۇرتتىڭ سۋ ىزدەپ، كولىككە وتىرىپ، وزەن-كولدى جاعالاپ كەتەرى سوندىقتان. ال، قالا ىرگەسىندە قوپاداي شالقىعان شالقار كولدىڭ بولۋى ۇلكەن قۋانىش، تاپتىرماس ولجا. مىنە، قالانىڭ كۋيبىشەۆ كوشەسىنىڭ كولگە تىرەلەتىن تۇسىنان ارنايى جاعاجايدىڭ اشىلۋى قالا حالقىنا جاڭا ٴبىر تىنىس بولدى»، - دەيدى قالا تۇرعىنى ەرمەك تالاسبايەۆ.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي