BAQ.kz - Қазақстан жаңалықтары USD 364.35 BAQ.kz - Қазақстан жаңалықтары EUR 419.95 BAQ.kz - Қазақстан жаңалықтары RUB 5.56
استانا:

كوكشەتاۋدا اشىلعان ەتنواۋىل قالالىقتارعا ەرەكشە كوڭىل-كۇي سىيلادى

فوتو: Автор

كوكشەتاۋداعى ەكوساياباقتا «رۋحاني جاڭعىرۋ» باعدارلاماسى اياسىندا «تۋعان جەر – تۇنعان تاريح» تاقىرىبىندا ەتنواۋىل اشىلدى، دەپ حابارلايدى baq.kz ايماقتاعى ٴتىلشىسى.

بۇقپا تاۋىنىڭ ەتەگىنەن ورىن تەپكەن ەتنواۋىلدا قازاقتىڭ ٴسالت-داستۇرى ناسيحاتتالدى. وسى اۋماقتا ۇلتتىق سپورت تۇرلەرى، «حان ورداسىنداعى كەڭەس» تەاترلاندىرىلعان قويىلىمى، جىراۋلاردىڭ تەرمەلەرى جانە قازاقتىڭ ۇلتتىق تاعامدارىنىڭ كورمەسى ٴوتتى. ەلىمىزدىڭ وتكەن تاريحى، وسى وڭىردەن شىققان ارعى-بەرگى تانىمال تۇلعالار، قىزىق دەرەك، كونە سۋرەتتەر ۇسىنعان كورمەلەر، مۋزەي مۇراعاتتارى كوپتىڭ كوڭىلىنەن شىقتى.

«باستى ماقسات – قالا تۇرعىندارىنا، اسىرەسە جاستارعا سالت-تۇرمىسىمىزدى تانىستىرۋ، قولما-قول، كوز الدىندا كورسەتۋ بولاتىن. جاڭا جوبانىڭ بەرەرى كوپ، تاعلىمى مول، تانىمدىق تۇسى تولعاندىرارلىق ەكەنىن باسا ايتقىمىز كەلەدى»، - دەيدى قالالىق ٴبىلىم ٴبولىمىنىڭ جەتەكشىسى بەيبىت ٴجۇسىپوۆ.

ارنايى تىگىلگەن 12 اقشاڭقان كيىز ۇيلەردەگى تەكەمەت-كىلەمدەر، توقىما ۇلگىلەرى، تاقيا مەن قامزول-كاجەكەيلەر، جۇننەن جاسالعان نەبىر كادەسىي زاتتارى حالقىمىزدىڭ قولونەر شەبەرلىگىنىڭ شىڭىن پاش ەتىپ تۇرعانداي. جايىلعان اق داستارحاندا ۇلتتىق تاعامدار دامدىلىگىمەن ەلدى تامساندىردى. اسىرەسە، كوكشەنىڭ قىمىزى، قۇرتى مەن مايى، جەنتى جانە بالقايماعىنان ٴدام تاتقان قوناقتار تاڭدايلارىن قاعىپ، ريزا بولدى.

«كەزىندە اقمولادا قوياندى جارمەڭكەسى وتكىزىلگەندىگىن تاريحتان بىلەمىز. الاڭدا مۇنداي شارانىڭ ۇيىمداستىرىلۋى قالا قازاقتارىنا ەرەكشە كوڭىل كۇي سىيلادى. ەتنواۋىل وزىندىك ەرەكشەلىگىمىنەن ايشىقتالدى، كورمەلەردەن كوپ نارسەنى ويعا تۇيۋگە بولادى. ٴداستۇرلى ٴانشى رەتىندە ەتنواۋىلدا كوكشەنىڭ سال-سەرىلەرىنىڭ اندەرىن تارتۋ ەتتىك»، - دەيدى ٴداستۇرلى ٴانشى سارسەنباي حاسەنوۆ.

ەتنواۋىل اياسىندا مادەني جانە تاريحي ەسكەرتكىشتەر مەن تۇلعالار، ولكە تاريحىنا قاتىستى زەرتتەۋ ماتەريالدارى ۇسىنىلدى. ٴبىلىم بەرۋ مەكەمەلەرى قولدانبالى ونەر كورمەسىن ۇسىندى. وعان مەكتەپ وقۋشىلارىنىڭ ۇزدىك جۇمىستارى قويىلدى.

جەرگىلىكتى قولونەر شەبەرلەرىنىڭ كورمەسىندە زەرگەرلەردىڭ قولىنان شىققان اسىل دۇنيەلەر، ۇلتتىق بۇيىمدار كوپتىڭ نازارىنا ۇسىنىلدى. كەلۋشىلەر كيىز باسۋ، كورپە تىگۋ، ٴجۇن ٴيىرۋ، اعاشتان ىدىس ويۋ ونەرىن تاماشالادى. قولونەرشىلەر ارنايى كەلىپ، ٴوز جۇمىسىمەن تانىستىردى. ال، ىسمەرلەر قىزىعۋشىلىق تانىتقان ٴاربىر تۇرعىنعا شەبەرلىك ساعاتىن وتكىزدى.

«قازىرگى جاستارىمىز ويۋ-ورنەكتىڭ تۇرلەرىن بىلە مە؟ تاپ ٴوزىم كەستەنىڭ جەتى ٴتۇرىن توقي الامىن. سولاردىڭ ىشىندە قايىم كەستە، جازىق كەستە، بۇزاۋ ٴتىس كەستە، ٴۇشبۇرىش كەستە دەيتىندەرى بار. ودان باسقا كىلەم توقۋدىڭ بىرنەشە ٴادىسىن بىلەمىن. سىرماق سىرۋ، تەرى يلەۋ، ودان باس كيىمدەر تىگۋ، اياق-كيىم تىگۋ، ٴبارى اتا جۇرتىمىزدان كاسىپكە اينالعان دۇنيەلەر. كەيىنگى بۋىننىڭ كوبىسى قايىستان تاسپا ٴتىلۋدى بىلە بەرمەيدى. بىلسە دە ونى ٴتورت تاسپا، التى تاسپا، سەگىز تاسپا، ون ەكى تاسپا ەتىپ ورە المايدى. ٴوز حالقىنىڭ باعا جەتپەس اسىل مۇراسىنا شىن جانى اشيتىن ادام ٴوزىنىڭ ٴىزىن باساتىن كەيىنگى ٴىزباسارلارىنىڭ كوپ-كوپ بولۋىنا دا سۇبەلى ۇلەس قوسقانىن ٴجون سانايمىن»، - دەيدى كوكشەتاۋلىق قولونەر شەبەرى ٴشامشيا ايتجانوۆا.

ۇلتتىق ونەردى ۇلىقتاپ، ٴسالت-داستۇردى دارىپتەۋگە اتسالىسقان حالىقتىڭ قاراسى قالىڭ بولدى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي