BAQ.kz - Қазақстан жаңалықтары USD 370.49 BAQ.kz - Қазақстан жаңалықтары EUR 421.06 BAQ.kz - Қазақстан жаңалықтары RUB 5.54
استانا:

قىزىلوردالىق شەبەر مۋزىكالىق اسپاپتىڭ 52 ٴتۇرىن جاسايدى

فوتو: Автор

قىزىلوردا، baq.kz ٴتىلشىسى. قىزىلوردا وبلىسى شيەلى اۋدانىنا قاراستى دوسبول بي اۋىلىندا تۇراتىن شەبەر ٴبىرجان ٴدىلمانوۆ مۋزىكالىق اسپاپتىڭ 52 ٴتۇرىن جاسايدى.

ٴبىرجان بيىل 33 جاسقا تولدى. ونىڭ قولونەرگە قىزىعۋشىلىعى بالالىق شاقتا ويانعان. مەكتەپ قابىرعاسىندا وقىپ جۇرگەندە اكەسىنىڭ شەبەرحاناسىنا ٴجيى باس سۇعىپ، اعاشتاردان ٴتۇرلى بۇيىم جاساۋعا ماشىقتانادى.

اكەسىنەن ۇيرەنگەن تاجىريبەسىن ودان ٴارى شىڭداۋ ٴۇشىن الماتى قالاسىنداعى «شەرتەر» كومپانياسىندا ەڭبەك ەتەدى. سەگىز جىل سوندا جۇمىس ىستەپ، ۇستالىق ونەردىڭ قىر-سىرىنا ابدەن قانىعادى. سوسىن اۋىلىنا ورالىپ، كاسىبىن ٴوز بەتىنشە جالعاستىرۋدى ٴجون كورەدى.

«اۋىلعا كەلىپ، «جەتىگەن ساز اسپاپتارى» سەرىكتەستىگىن قۇرىپ، شەبەرحانا اشىپ، ۇلتتىق اسپاپتار جاساۋمەن اينالىسا باستادىم. ۇستا بولىپ، ادال كاسىپ ىستەپ، ەلگە قىزمەت ەتسەم دەگەن بالالىق ارمانىم ورىندالدى. وزىمىزگە كەرەكتى ۇيەڭكى، قايىڭ، پولەساندرا، قىزىل اعاش، بۋك اعاشتارىن ەلىمىزدىڭ باسقا ايماقتارىنان الدىرامىز. تاپسىرىستار بار. دومبىرا مەن قوبىزعا سۇرانىس جوعارى. جالپى، ٴار قازاقتىڭ ٴۇيىنىڭ تورىندە ٴبىر دومبىرا تۇرۋى ٴتيىس. ونى كورگەن قارادومالاقتاردىڭ ۇلتتىق ونەرگە – ٴتول اسپابىمىزعا قىزىعۋشىلىعى ويانادى دەپ ويلايمىن. اتا-بابامىزدان كەلە جاتقان سىرلى ساز دا، اسىل ٴسوز دە وسى دومبىرامەن تارادى ەمەس پە؟!» - دەيدى ۇستا.

ٴبىرجان ٴدىلمانوۆتىڭ ايتۋىنشا، ٴار اسپاپقا قاجىرلى كۇش جۇمسالادى. سوندىقتان، ۇستاعا شىعارماشىلىق قابىلەت پەن شىدامدىلىق قاسيەت قاجەت.

«ٴبىز قازاقتىڭ مۋزىكالىق اسپابىنىڭ 52 ٴتۇرىن بىلەمىز جانە سولاردىڭ بارلىعىن جاساي الامىز. اتاپ ايتساق، دومبىرانىڭ قۇراما، شابىلعان تۇرلەرى بار. قۇراستىرعان دومبىرا 5-6 كۇن ۋاقىتتى السا، شاۋىپ جاسايتىن دومبىرانىڭ دايىن بولۋى ون بەس كۇنگە سوزىلادى. جاس ەرەكشەلىككە دە ٴمان بەرەمىز. التى جاسقا دەيىنگى بالالارعا كولەمى 32 سانتيمەترلى دومبىرا جاسالادى. التى مەن ون ەكى جاس ارالىعىنداعى ورەندەرگە 40 سانتيمەترلىگىن ازىرلەيمىز. ال قازاق حالقىنىڭ كوپ ىشەكتى شەرتپەلى اسپابى جەتىگەننىڭ جاسالۋى دا، وينالۋ ٴادىسى دە كۇردەلى. تۇرقى ۇزىن، جاشىك سياقتى. بەتىن جۇقا تاقتايمەن جابامىز. ٴۇن بەرەتىن ويىقتارىن سالۋ دا ماشاقات جۇمىس. دومبىرا، جەتىگەننەن بولەك، شەڭكىلدەك، سىبىزعى، دومبىرا سەكۋندا، پريما دومبىرا، الت دومبىرا، باس دومبىرا، كونتراباس، جەتىگەن، پريما قوبىز، سكريپكالى پريما قوبىز، قىلقوبىز، نارقوبىز، الت قوبىز، باس قوبىز، تەمىر ىشەكتى پريما شەرتەر، الت شەرتەر، باس شەرتەر، داۋىلپاز، دابىل، كەپشىك، ماراكاس، اسا تاياق، شارتىلداق، تايتۇياق جانە تاعى باسقا تۇرلەرىن جاسايمىز. وسىنىڭ بارلىعى وركەستردە وينالادى»، – دەيدى ۇستا.

قىزىلوردالىق شەبەر قاسىنا اۋىلىنىڭ ٴتورت ازاماتىن جۇمىسقا العان. ولار جاساعان اسپاپتار ساپالى. سوندىقتان، تاپسىرىس بەرۋشىلەر كوپ.

«دومبىرا، جەتىگەن جانە باسقا دا اسپاپتارعا ەلىمىزدىڭ ٴار قيىرىنان ارنايى تاپسىرىستار ٴتۇسىپ تۇرادى. اسىرەسە، استانا، الماتى، ورال قالالارىنان جانە قىزىلوردا وبلىسىنان سۇرانىس كوپ»، – دەيدى ٴبىرجان ٴدىلمانوۆ.

ۇلتتىق اسپاپ جاسايتىن ۇستانىڭ قولىنان شىققان دومبىرانىڭ باعاسى 35 مىڭ تەڭگەدەن باستالادى. ەڭ ساپالىسى، ەڭ قىمباتى 350 مىڭ تەڭگەگە باعالانادى. جەتىگەن اسپابىنىڭ ەڭ ارزانىن 180 مىڭ تەڭگەگە ساتىلادى. ال كانتراباستى كەمىندە 300 مىڭ تەڭگەگە جاسايدى.

ٴبىرجانعا تاپسىرىس بەرىپ، دومبىرا ساتىپ العانداردىڭ ٴبىرى – التىناي ابۋباكىروۆا.

«مەن قىزىلوردا قالالىق ونەر مەكتەبىندە بالالارعا دومبىرادا ويناۋدى ۇيرەتەمىن. دومبىرامدى ٴبىرجانعا جاساتتىم. ۇستانىڭ جۇمىسى ماقتاۋعا تۇرارلىق. سەبەبى، جاساعان دومبىرالارىنىڭ دىبىسى تازا، ٴتۇرى كوز تارتارلىقتاي ادەمى. باعاسى دا قالتاعا قولايلى. ارزانعا باعالاعان دومبىرالارىنىڭ دىبىسى دا كوڭىلىمىزدەن شىعىپ وتىر. نەگىزى، ماتەريالىنىڭ ساپاسىنا قاراي باعاسى قىمباتتاي بەرەدى عوي. ۇستانىڭ تاعى ٴبىر ەرەكشەلىگى، ونەرگە قىزىعىپ جۇرگەن بالالاردىڭ دەنە پىشىمىنە ساي دومبىرالار جاسايدى»، - دەيدى التىناي ابۋباكىروۆا.

ٴبىرجان ٴدىلمانوۆ مۋزىكالىق اسپاپتاردان بولەك، ساندىق، بەسىكتەردى، ەستەلىككە بەرەتىن كادەسىيلاردى جاسايدى. باسقا دا اعاشتان جاسالاتىن بۇيىمداردى قۇراستىرا بەرەدى. بولاشاقتا كاسىبىن كەڭەيتۋدى جوسپارلاپ وتىر. شەبەرحاناسىن شيەلى اۋدانىنىڭ ورتالىعىنان اشۋ ويىندا بار. قازىرگى تاڭدا ۇستا وسى ماقساتتا ىزدەنىپ ٴجۇر.

فوتو: اۆتور


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي