BAQ.kz - Қазақстан жаңалықтары USD 374.2 BAQ.kz - Қазақстан жаңалықтары EUR 420.34 BAQ.kz - Қазақстан жаңалықтары RUB 5.52
استانا:

بيىل كوكشەتاۋدى كوك ٴتۇتىن باسپاي ما؟

فوتو: интернеттен

«كوكشەتاۋ جىلۋ» كاسىپورنى اۋاعا تارالاتىن زياندى قالدىقتاردى ازايتۋ ماقساتىندا جىلۋ قازاندىعىنىڭ ەلەكتر سۇزگىلەرىن تولىقتاي جاڭارتتى. وسىلايشا كاسىپورىن ماماندارى قازاندىقتان شىعاتىن ۋلى ٴتۇتىن زالالسىزداندىرىلاتىنىنا سەندىرىپ وتىر، دەپ حابارلايدى baq.kz ايماقتاعى ٴتىلشىسى.

«كوكشەتاۋ جىلۋ» مەكەمەسىنىڭ باس ديرەكتورى سەرگەي جۋكوۆتىڭ ايتۋىنشا، جىلۋ قازاندىقتارىنىڭ جوندەۋىنە بيۋدجەتتەن 1،5 ملرد تەڭگەدەن اسا قاراجات بولىنگەن.

«جىلۋ جۇيەلەرىندەگى تەمپەراتۋرالىق، گيدراۆليكالىق رەجيمدەردى ۇزدىكسىز، ٴبىرقالىپتى ۇستاپ تۇرۋعا ارنالعان دەربەس قازاندىقتار جوندەلدى. قالاداعى ماگيسترالدىق جىلۋ تراسسالارى قايتا جاڭعىرتىلدى. بۇل ماقساتقا 249 ملن تەڭگە جۇمسالدى. رك-2 جىلۋ قازاندىعىنداعى جەلىلىك قۇبىرلار مەن سورعىلارعا اعىمدىق جوندەۋ جۇمىستارى 100 پايىزعا ورىندالعان. №2، 3، 4، 7 اگرەگاتتارىنا دەمونتاج جاسالدى. قاتتى وتىننىڭ 20 كۇنگە جەتەرلىك قورى بار. قالادا جاڭا ۇيلەر بوي كوتەرىپ جاتقاندىقتان، كومىرمەن جاعىلاتىن №1 قازاندىق قوسىمشا دايىندالىپ جاتىر»، – دەيدى كاسىپورىن ديرەكتورى.

زياندى قالدىقتاردى ازايتۋ ماقساتىندا كاسىپورىنداعى №8 بۋ قازاندىعىنىڭ ەلەكتر سۇزگىلەرىن جاڭارتۋ جۇمىستارىنا 600 ملن تەڭگە قاراجات بولىنگەن. ماماندار 1997 جىلدان بەرى جۇمىس ىستەپ كەلە جاتقان ەلەكتر سۇزگىنىڭ ەسكىرگەنىن ايتادى.

«قىستا ٴار ساعات سايىن جاعىلاتىن 28 توننا كومىر قالدىقتارى وسى سۇزگىدەن وتكىزىلىپ، تازارتىلادى. مۇنىڭ ٴوز كەزەگىندە ۋلى ٴتۇتىندى زالالسىزداندىرۋعا اسەرى مول. جىلۋ قازاندىعىنان شىعاتىن ٴتۇتىننىڭ 99،4 پايىزى تازالانادى. قازىرگى كۇنى مۇندا مونتاجداۋ جۇمىستارى اياقتالدى. قولعا العان شارالاردىڭ ناتيجەسىندە اۋاعا شىعارىلاتىن زياندى قالدىقتاردىڭ مولشەرى ەداۋىر كەميدى»، – دەيدى «كوكشەتاۋ جىلۋ» كاسىپورنىنىڭ باس ينجەنەرى دانيار اقىبايەۆ.

قىس باستالسا قالادا كوك تۇتىنگە تۇنشىعىپ جاتىرمىز دەپ شاعىمداناتىندار كوبەيەتىنى راس. تۇرعىنداردىڭ ٴبىرازى مۇنى جەر ۇيلەردىڭ مۇرجالارىنان بۋداقتاپ شىققان قويۋ تۇتىنمەن بايلانىستىرسا، ەندى ٴبىرى قالانى جىلىتاتىن بۋ قازاندىعىنان اۋاعا تاستالاتىن زياندى قالدىقتاردىڭ كوپتىگىنەن دەپ ەسەپتەيدى. ەندى بىرەۋلەر بۇل جاعاتىن كومىردىڭ ساپاسىز بولۋىنان تۋىنداعان ماسەلە دەيدى.

«ٴوزىم تۇراتىن ٴۇيدىڭ توعىزىنشى قاباتىنان قاراعاندا قالا كوك تۇمان استىندا سياقتى كورىنەدى. دالاعا شىقساق سىرت كيىمىمىز ىس ساسىپ كەلەدى. رك-2 بۋ قازاندىعىنان شىققان قويۋ قارا ٴتۇتىن قالانى تۇگەل جايلاپ الادى»، – دەيدى قالا تۇرعىنى ٴنازيرا بەكتاسقىزى.

ماماندار كومىر تۇتىنىنەن اۋاعا كۇكىرت ديوكسيدى، ازوت ديوكسيدى سەكىلدى اسا ٴقاۋىپتى لاستاعىش زاتتاردىڭ تارالاتىنىن ايتادى. الايدا ارقانىڭ قىسىنىڭ ۇزاقتىعى مەن قاتتىلىعى تۇرعىندارعا ٴبىرشاما سالماق سالاتىنىن ايتۋ كەرەك. ٴاربىر ٴۇي قىستان قىسىلماي شىعۋ ٴۇشىن ورتاشا ەسەپپەن 9-10 توننا كومىر جاعىپ شىعادى.

«قازگيدرومەت» اقمولا وبلىستىق فيليالى ماماندارىنىڭ مالىمەتىنشە، جەلسىز اۋا رايى زياندى زاتتاردىڭ جيناقتالۋىنا اكەلەدى. مۇنداي اتموسفەرادا اۋا اعىندارى الماسپايدى. سونىڭ سالدارىنان زياندى زاتتار جينالىپ، كوك ٴتۇتىن تۇزىلەدى.

جەر ۇيلەردىڭ پەشتەرى مەن كومىر ارقىلى جىلىتىلاتىن قازاندىق مۇرجالارىنان شىعاتىن ٴتۇتىن اينالانى كوك تۇمانعا كومىپ، تۇرعىنداردىڭ تىنىسىن تارىلتادى. بۇل جاعداي جالپى قالا حالقىنا، اۋماق ەكولوگياسىنا زيان كەلتىرىپ وتىر. تۇرعىندار پايدالاناتىن كومىردىڭ ساپاسى دا كۇمان تۋدىراتىنىن ايتادى.

«التى اي كومىر جاعامىز. بيىل شىلدە ايىنا دەيىن پەش جاقتىق. قولقانى قاباتىن ٴيىس شىعارسا دا ٴۇيدى جىلى ۇستاپ تۇرۋ ٴۇشىن شەلەكتەپ كومىر جاعۋعا تۋرا كەلەدى. بىلتىر ٴبىراز ۋاقىت قالادا كومىر تاپشى بولعانى جاسىرىن ەمەس. ارزان دەپ العان كومىرىمىز تاس ارالاس، كۇلى دە كوپ شىعادى»، – دەيدى ەسىمبەك توققوجين ەسىمدى قالا تۇرعىنى.

كوكشەتاۋدا جەر ۇيلەر كوپ. ٴبارى كومىر جاعادى. قالاداعى جەكەمەنشىك سەكتوردىڭ بارلىعىن جىلۋ ماگيسترالىنە قوسۋعا مۇمكىندىك جوق. ايتالىق، بارماشينودا جىلۋ تراسساسى مۇلدە جوق.

قالا بويىنشا اۋانى لاستايتىن كاسىپورىندار اراسىندا رك-2 بۋ قازاندىعى اۋاعا تارايتىن زياندى زاتتار شىعارىپ وتىر. الايدا كاسىپورىن باسشىلىعى قورشاعان ورتانىڭ جاعدايىن جاقسارتۋ ٴۇشىن بيىل جۇيەلى جۇمىس جۇرگىزىلگەنىن، قالانىڭ ەكولوگيالىق احۋالى تۇراقتى ەكەنىنە سەندىرىپ وتىر.

«قازىرگى ۋاقىتتا قازاندىقتا بولىنەتىن گازدىڭ 88% زالالسىزداندىرۋعا مۇمكىندىگى بار ەلەكتر سۇزگى ورناتىلعان. ٴتۇتىن تۇرباسىنىڭ بيىكتىگى 150 مەتر. جەل قالا ورتالىعىنا باعىتتالعان كۇننىڭ وزىندە زياندى گازدار 130-150 مەتر بيىكتىكتە تارالاتىندىقتان، قالانى ٴتۇتىن باسۋى مۇمكىن ەمەس»، – دەيدى «كوكشەتاۋ جىلۋ» كوممۋنالدىق كاسىپورنىنىڭ ديرەكتورى سەرگەي جۋكوۆ.

ەلىمىزدىڭ ەكولوگتارى قاراجىرا مەن شۇباركول كومىرىندە قارا ماي تۇنىپ تۇرعانىن راستاپ وتىر. ال قالانى كوگىلدىر وتىنمەن قامتۋ ماسەلەسىنىڭ ٴقازىر شەشىلەر ٴتۇرى كورىنبەيدى. وسىدان بىرنەشە جىل بۇرىن كوكشەتاۋعا گاز قۇبىرىن تارتۋ تۋرالى جوبا قولعا الىنعان بولاتىن. قازىرگى ۋاقىتتا بۇل جوبالار بەلگىسىز سەبەپتەرمەن توقتاپ تۇر. سوعان قاراعاندا، كوكشەگە كوگىلدىر وتىن كەلمەي كوك ٴتۇتىن كەتپەيتىن سياقتى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي